2 Abhakorinto 11 - Iimuuma Iinyaaya

Pawuro na bhanu abheekora ati ni bhatumwa

¹ Raabhe kutyo enaaika kutooto rwa mutengʼo, enisabha munyiitegeereshe. Yee, munyiitegeereshe!

² Anye enibhafuyira, kw-ifuwa rinu erisooka ku-Nyamuwanga, kwa okubha muri rwa omuyarajuma, unu ꞉naasandiiye obhuko murume wumwi, na omurume uyo ni Kiriisitu.

³ Nawe woori enuubhaya ati, rwa kutyo Yeebha ꞉aajimiibhwe na ekisoro ekyenge kirya, emwe mwone mwasiga okujimibhwa, musiga okwenda Kiriisitu mwimire na mwerere emitima.

⁴ Enaaika kutyo, kwa okubha emwe muri bhangu okuramira omuunu unu kaaja okuraasha amangʼana ganu agaaikira Yeesu ganu agataashaanya na ganu eswe ꞉kyaraasiishe. Na omuramira mwoyo owundi amwi ati amangʼana agandi bhwangu, raabhé kutyo agataashaanya na ganu ꞉mwaramiiye okusooka kw-iswe.

⁵ Anye nitakwirora ati niri mutooto okukira bhanu abhaaika ati ni bhatumwa abhakuru.

⁶ Raabhé kutyo omundora ati nitakwaika kujomu, obhumenyi bhwani ni bhunene. Kyeresiishe riyo kw-imwe ebhaga ryone kutyo ku-njira gyone kutyo.

⁷ ꞉Neetuuye emwaro okuturira okuraasha bhusa Amangʼana Amajomu ga Nyamuwanga kw-imwe, insonga nibhatuure emwe iiguru. Angu, ꞉naakorere ebhikayo kw-ingʼana riyo?

⁸ Bhunu ꞉naakoraga emirimu kw-imwe, ꞉naariga nindamira giiyera okusooka mu-makanisa agandi. ꞉Naariga niri muna enibhateesha ebhiinu bhyebhwe, insonga nibhasakire emwe.

⁹ Bhunu ꞉naariga niri amwi na emwe, ꞉naariga nitari mujigo ku-muunu woonewoone kw-imwe, bhunu ꞉naariga ninsuuyirwa. Abhakiriisitu bheejaasu bhanu ꞉bhaasookere Makedooniya ꞉bhaariga mbaanaana bhinu ꞉naariga ninkena. ꞉Naariga niiyangariiye muno, insonga naasiga okusaka okubha mujigo kw-imwe, na nikwo kutyo eniija okugenderera okukora.

¹⁰ Rwa kutyo ekimari kya Kiriisitu kiri mu-mutima gwani, atariwo omuunu na wumwi mu-kyaro kyone kutyo ekya Akaya eyo, unu aringaanya okwikumangisha amangʼana gayo.

¹¹ Nitakwaika kutyo ati kwa okubha nitabheendere. Nyamuwanga niwe kaamenya ati nibheendere!

¹² Nawe rinu enikora enigenderera okurikora, insonga abhatumwa bhanu abheekora ati nibho abhakuru, bhaasiga okunyoora omwanya gwa okwikumangya ati, abhakora emirimu rwa eswe.

¹³ Abhaanu rwa bhayo ni bhatumwa bhabheeyi, abhakora emirimu mbajimyaga abhaanu, abheekora ati, ni bhatumwa bha Kiriisitu.

¹⁴ Riingʼana riyo ritari rya kuruguusha, kwa okubha na Sitaani omwene keeyinduraga ˆneekora okubha maraayika wa obhweru.

¹⁵ Na ritari engʼana rya okuruguusha abhajuuma bhaaye bhoone bhakeeyindura mbeekora okubha bhajuuma bha obhurengeresi. Obhuteero bhwebhwe bhariramira ganu agariingʼaana na ebhikorwa bhyebhwe.

Pawuro keekumangisha ebhinyansho bhyaye

¹⁶ Enibhabhwira kweki ati, omuunu woonewoone aasiga kutoga ati anye niri mutengʼo! Nawe raabhé muraatoge ati niri mutengʼo, enibhasabha munyiitegeereshe mu-bhutengʼo bhunu, insonga anye noone niikumangye kutooto.

¹⁷ Amangʼana ga okwikumangya ganu enaaika woori, gatakusooka ku-Raatabhugenyi, tari enaaika rwa omuunu omutengʼo.

¹⁸ Abhaanu bhaafu abheekumangisha amangʼana ga ku-kyaro kunu, mmbe, siga anye noone niikumangye.

¹⁹ Yee eniikumangya, kwa okubha emwe omwirora ati muri na obhwenge, na omugegerana na abhatengʼo mujomeeywe.

²⁰ Omugegerana na omuunu unu kaabhatuura mu-bhugaya, unu kaabheebhira na okubhateesha ebhiinu bhyemwe, unu keetuura iiguru, na unu kaabhabhuma mu-bhusu.

²¹ Ni nswaro okurora ati eswe ꞉kitaabhakoreeye gayo, kwa okubha eswe kitari na bhuturo! Woori enaaika rwa mutengʼo ati, raabhe ariwo omuunu unu eesire okwikumangya ku-ryoneryone, anye noone niisire okwikumangisha riingʼana riyo.

²² Raabhe abheene ni Bhaebhuraaniya, anye noone niri Mwebhuraaniya. Raabhe abheene ni Abhaijirayeeri, anye noone niri Muijirayeeri. Raabhe abheene ni bha mu-ruganda rwa Bhurayimu, anye noone niri wa mu-ruganda rwa Bhurayimu.

²³ Woori siga naaike rwa omusasi ati, raabhe abheene ni bhajuuma bha Kiriisitu, anye ni mujuuma waaye okukira abheene. Anye niikomeesiishe okukora emirimu okukira abheene, nibhoyerwe mu-jeera kaafu okukira abheene, nibhumirwe muno, na niturire mu-ngʼanga ya okufwa kaafu.

²⁴ Nibhumirwe na Abhayawudi kataanu, ebhibhooko makumi gasatu na kenda.

²⁵ Nitarikirwe ebhibhooko na Abharuumi kasatu, ꞉naabhumirwe na amagina na Abharuumi rumwi, Iimeeri ꞉yaanyamukiiye kasatu mu-nyanja, na ebhaga rimwi ꞉neekaaye mu-nyanja mu-ngeta na mu-mwisi.

²⁶ Akaafu mu-ngʼendo gyani, ꞉naariga niri mu-ngʼanga ya okugegwa na giinyuji, mu-ngʼanga ya okuteesibhwa ebhiinu, mu-ngʼanga ya Abhayawudi bheejaasu na eya bhanu bhatari Bhayawudi. ꞉Naariga niri mu-ngʼanga okutura mu-misi, okutura ku-nsi ya orukungu, na mu-nyanja. ꞉Naariga niri mu-ngʼanga ku-bhaanu bhanu abheekora ati ni Bhakiriisitu bheejaasu.

²⁷ Nikorere emirimu emikomeeye, na ninyankire muno, akaafu ꞉nitaawongeraga, ninyankire na omweko, na obhwiro, nibhurirwe ebhyokurya kaafu, na ꞉neekaaye mu-mbewo nitari na ngibho.

²⁸ Amwi na gayo goone kutyo, erindi rinu niri naryo ku-nsiku, ni mujigo gwa emirimu gyani egya obhwangarisi mu-makanisa goone kutyo.

²⁹ Raabhe omuunu woonewoone atari na bhuturo, ni anye eniiyungwa ati, nitari na bhuturo. Raabhe abhaanu bhakakora omuunu woonewoone akore ebhikayo, anye noone enuungwa obhururu.

³⁰ Raabhe nikeenda okwikumangya, eniikumangisha okurema okubha na obhuturo kwani.

³¹ Nyamuwanga, unu eesire okukumangibhwa kajaanende, Esemwene Raatabhugenyi Yeesu, amenyere ati nitakubheeya.

³² Akabhaga akarebhe ꞉naariga niri mu-musi gwa Dameesiki. Dameesiki ayo omutangasha unu ꞉aariga ari mu-bhutungi bhwa omukama Areta, ꞉aatuuye abhariisi mbaara gyone kutyo egya omusi, insonga bhangwate.

³³ Nawe abhaanu abharebhe mbanyisha okuturira mw-iwundu rinu ꞉ryariga riri ku-ndugu ya orubhago rwa omusi, niri mw-ikapo enene, niiwona okugwatwa.