2 Abhakorinto 10 - Iimuuma Iinyaaya

Pawuro kaasubhya bhanu abhamujeera

¹ Mmbe, anye Pawuro enibheesaasaama omwene niituuye emwaro, na obhufura bhwa Kiriisitu. Abhaanu abhandi abhaaika ati anye niri na riibhaasi nikabha nimbakaamira niri areera, na enibha muubha okwaika, nikabha niri amwi na emwe.

² Mmbe, enibheesaasaama ati, mwasiga okunkora nibhe mururu bhunu niriija kw-imwe eyo. Enaaika kutyo kwa okubha nimenyere ati enitura okubha mururu ku-bhoone kutyo bhanu abhatoga ati eswe kiikaaye rwa abhaanu abhandi bha ku-kyaro kunu.

³ Raabhé kutyo kiikaaye ku-kyaro kunu, nawe kitakurwana riiremo rwa abhaanu bha ku-kyaro kunu.

⁴ Ebhigwato bhyeswe mw-iremo riyo, bhitari bhinu abhaanu bha ku-kyaro kunu abharwanira, tari ebhyeswe bhiri na amanaga ganu agasooka ku-Nyamuwanga, na ebhikambura gimbago gyone kutyo egya omusoko weeswe.

⁵ Ekinyamura amangʼana goone kutyo aga obhubheeyi na aga okwikumangya ganu agayinga abhaanu bhaasiga okumenya Nyamuwanga. Na ekigwata obhwiganiirisha bhwone kutyo insonga bhuungwe Kiriisitu.

⁶ Emwe mukamara okubha bhoongwa kimwikimwi, ayo niwe ekiija okwamba okuyaana ebhirusho amangʼana goonegoone ganu gatari ga bhuungwani.

⁷ Muringire amangʼana ganu gari imbere mu-meeso geemwe! Omuunu woonewoone unu keerora ati omwene ni wa Kiriisitu, ayiite ati eswe kyone kiri bhaanu bha Kiriisitu rwa omwene.

⁸ Amwi enirorwa ati eniikumangisha muno obhuturo bhunu Raatabhugenyi akiyaaye okukira kutyo eyeendwa. Nawe anye nitakwiswara, kwa okubha obhuturo bhuyo bhutakubheeta emitima, tari obhubhakomeesha mu-bhwikirisha.

⁹ Nitakwenda murore ati, eneenda okubhoobhayisha okuturira ku-nyarubha ginu enibhakaamira.

¹⁰ Enaaika kutyo, kwa okubha abhaanu abhandi abhaaika ati, “Giinyarubha gya Pawuro giri na amangʼana amakomeeye, na ni maruru, nawe akabha ari amwi na eswe atari na ebhaasi, na amangʼana gaaye gatari na bhwera.”

¹¹ Omuunu unu kaaika kutyo, amenye ati, kutyo ekibhakaamira kiri areera, nikwo kutyo ekiija okukora kikabha kiri amwi na emwe eyo.

¹² Eswe kitakutura okwiriingʼaanya, amwi ati, okwisusanya na abhaanu bhanu abheekumangya abheene. Abhaanu bhayo bhatakumenya kyonekyone, kwa okubha abheekora ati nibho indengo ya okwirengera na okwiriingʼaanya abheene na abheene.

¹³ Nawe eswe kitakwikumangisha kyonekyone kinu kitari mirimu ginu Nyamuwanga akiyaaye. Emirimu giyo, nigyo ekikora na kw-imwe.

¹⁴ Kikabheeye nkiyeema muno, raabhe kikabheeye kikyariga okuyika kw-imwe eyo, nawe eswe ꞉kyariga kiri abha okwamba okuyika kw-imwe eyo, okubhareetera Amangʼana Amajomu aga Kiriisitu.

¹⁵ Na kitakwikumangisha emirimu ginu abhaanu abhandi bhakorere, emirimu ginu eswe kitayaaywe okukora. Tari ekiisiga ati kutyo obhwikirisha bhweswe obhuuja okugenderera okukura, nikwo kutyo na emirimu gyeswe agati weemwe egiija okubha myafu.

¹⁶ Ayo niwe kiritura okuraasha Amangʼana Amajomu mu-bhyaro ebhindi bhinu amangʼana gayo gakyari okuraasibhwa, insonga kyasiga okwikumangisha emirimu ginu abhaanu abhandi bhakorere mbaara egindi.

¹⁷ Ni rwa kutyo ikaamirwe mu-Makaamo Amataakatiifu ati, “Omuunu woonewoone unu keekumangya, eekumangye ku-nsonga ya Raatabhugenyi.”

¹⁸ Mmbe woori, omuunu woonewoone unu keekumangya omwene atakwikirisibhwa na Raatabhugenyi, tari unu Raatabhugenyi kaakumangya niwe keekirisibhwa nawe.