2 Abhakorinto 1 - Iimuuma Iinyaaya

Obhukeesha

¹ Iinyarubha inu eniyikaama anye Pawuro, niri na Omukiriisitu weejaasu Timoteeyo. Anye ꞉naabhirikiiywe okubha mutumwa wa Kiriisitu Yeesu okuriingʼaana na obhukene bhwa Nyamuwanga. Ekibhakaamira emwe bhanu muri mw-ikanisa rya Nyamuwanga mu-musi gwa Korinto, amwi na abhataakatiifu bhoone kutyo bhanu bhari mu-kyaro kya Akaya.

² Iinema na omurembe okusooka ku-Raata Nyamuwanga, na ku-Raatabhugenyi Yeesu Kiriisitu, bhibhe amwi na emwe.

Nyamuwanga kaawooyeresha abhaanu mu-bhinyansho bhyebhwe

³ Akumangibhwe Nyamuwanga, Esemwene Raatabhugenyi weeswe Yeesu Kiriisitu, Raata wa ekigongo, omwene niwe kaakiwooyeresha ku-mangʼana goone kutyo.

⁴ Niwe kaakiwooyeresha mu-bhinyansho bhyeswe bhyone kutyo, insonga eswe kyone kiture okuwooyeresha abhaanu abhandi bhanu bhari mu-bhinyansho bhya mbaga nyafunyafu, rwa kutyo Nyamuwanga omwene kaakiwooyeresha.

⁵ Kutyo ekigenderera okunyanka ku-nsonga ya Kiriisitu, nikwo kutyo Nyamuwanga kaagenderera okukiwooyeresha okuturira ku-Kiriisitu.

⁶ Na raabhe ekinyanka, ekinyanka ku-nsonga ya okubhawooyeresha emwe, na ku-nsonga ya obhwerusha bhwemwe. Na raabhe ekiwooyeresibhwa ni ku-nsonga ati, kibhawooyereshe emwe. Okuwooyeresibhwa kuyo okubhasakira okusimbiira mu-bhinyansho bhinu eswe kyone ekinyoora.

⁷ Obhwisige bhweswe kw-imwe ni bhunene, kwa okubha kimenyere ati, kutyo omunyanka rwa eswe, nikwo kutyo omuwooyeresibhwa rwa eswe.

⁸ Abhakiriisitu bheejaasu, ekyenda mumenye kutyo ꞉kyanyankire mu-kyaro kya Asiya. ꞉Kyanyoorere ebhinyansho bhinu bhitari ku-bhaanu, ꞉kyanyankire muno, nkitoga ati kikafuuye.

⁹ Kimari ꞉kyariga nkiiyungwa muna ꞉kyariga kiramuriiywe okwitwa. Nawe ꞉yaabheeye kutyo insonga kyasiga okwisiga amanaga geeswe, tari kiisige Nyamuwanga unu kaasuura abhafuuye.

¹⁰ Omwene niwe ꞉aakyerusiishe bhunu ꞉kyariga kiri mu-ngʼanga ya okwitwa, na niwe kaaja okugenderera okukyerusha kweki. Eswe ekimwisiga ati kaaja okugenderera okukora kutyo,

¹¹ raabhe omusakirana na eswe okukisabhira ku-mwene. Na kaaja okuungwa obhusaasaami bhwemwe ˆnaakiyaana giinonkwe. Niwe abhaanu bhaafu abhaaja okukumangya Nyamuwanga ku-nsonga yeeswe.

Pawuro kaasiga orugendo rwa okuja Korinto

¹² Mmbe, eswe ekiiyeemera engʼana rimwi. Emitima gyeswe egikibhwira ati, kiikaaye kitaakatiifu na kiitongeeye. Obhwitongeeye bhuyo bhutari bhwa amanaga geeswe, tari kiri nabhwo okuturira ku-nema ya Nyamuwanga. Nikwo kutyo kiiyeresiishe ku-bhaanu bha mu-kyaro anu, munomuuno kw-imwe.

¹³ Kitakubhakaamira ganu omuuja okutaamibhwa okusoma na okusombookerwa, tari kiri na obhwisige ati omuuja okusombookerwa kujomu muno.

¹⁴ Raabhé kutyo woori anu omukisombookerwa kutooto era, omuuja okusombookerwa kujomu ati, orusuku runu Raatabhugenyi weeswe Yeesu arisubha, muriikumangya ku-nsonga yeeswe, rwa kutyo eswe kyone ekiikumangya ku-nsonga yeemwe.

¹⁵ ꞉Naariga nimenyere ekimari kya amangʼana gayo, kyakora ꞉naariga neenda okuyika kw-imwe eyo okwamba, insonga munyoore giinonkwe gya okutaarirwa na anye kabhiri.

¹⁶ ꞉Naariga nikenere okubhataarira nikabha niri mu-rugendo rwa okuja Makedooniya, na niture kweki akabhaga ka okusubha, insonga munsakire mu-rugendo rwani rwa okugenda Ebhuyawudi.

¹⁷ Angu, omutoga ati ꞉naasigire orugendo rwani orwa okuturira kw-imwe, kwa okubha nitakuyambaarira ganu enibha naaikire? Amwi ati, omutoga ati enitangasibhwa na bhwiganiirisha bhunu obhusooka ku-bhusimukwa bhwani obhwa omubhiri, na nibhwo obhukora naaike “Ni kimari” mu-kabhaga kamwi, nimare naaike kweki ati, “Itari kimari?”

¹⁸ Nawe, okuriingʼaana na obhwitongeeye bhwa Nyamuwanga, amangʼana ganu ꞉kyabhabhwiriiye ꞉gaariga gatari ga omuunu okwaika ati, “Ni kimari” mu-kabhaga kamwi, amare aaike kweki ati, “Itari kimari.”

¹⁹ Enaaika kutyo, kwa okubha Yeesu Kiriisitu, Omwana wa Nyamuwanga, unu anye na Siribhino na Timoteeyo ꞉kyabharaasisiishe amangʼana gaaye, ꞉aariga atari muunu wa kwaika ati, “Ni kimari” mu-kabhaga kamwi, amare aaike kweki ati, “Itari kimari.” Tari, ebhaga ryone kutyo omwene ni Kimari kya Nyamuwanga.

²⁰ Nikwo kutyo iri, kwa okubha goone kutyo ganu Nyamuwanga ꞉aaragire, gakuumiiye okuturira ku-Yeesu Kiriisitu. Na ku-nsonga yaaye ekyaika ati, “Amina,” insonga eswe kigungye Nyamuwanga.

²¹ Mmbe, Nyamuwanga niwe kaakikomeesha eswe na emwe mu-bhuyimbani bhweswe na Kiriisitu. Akisorere

²² ˆnaakituura-ko orubhano rwaye, ˆnaakiyaana Mwoyo Omutaakatiifu mu-mitima gyeswe, insonga abhe ingomboro ya amangʼana goone kutyo ganu Nyamuwanga arikiyaana.

²³ Nyamuwanga niwe amenyere omutima gwani ati, ganu enaaika ni kimari! ꞉Nitaasubhire kw-imwe Korinto eyo, kwa okubha ꞉naariga nitakwenda muungwe obhururu mu-mitima gyemwe.

²⁴ Kinu eneenda okwaika ni ati, kitakwenda okutunga obhwikirisha bhwemwe, kwa okubha mwakomeeye mu-bhwikirisha. Tari, eswe kiri bhajuuma bheejaanyu, ekibhasakira ku-bhujomerwa bhwemwe.