1 Yowana 5 - Iimuuma Iinyaaya

Okuyiga ebhikayo

¹ Omuunu woonewoone unu keekirisha ati Yeesu ni Kiriisitu, uyo niwe eebhuuywe na Nyamuwanga. Omuunu akeenda omwibhusi, keenda na omwibhurwa weende-ko.

² Ekimenya ati ekyenda abhaana bha Nyamuwanga, kikeenda Nyamuwanga nkyungwa na ebhiraagiro bhyaye,

³ kwa okubha okwenda Nyamuwanga ni kuungwa ebhiraagiro bhyaye. Na okuungwa ebhiraagiro bhyaye kutari kukomeeye,

⁴ kwa okubha woonewoone unu eebhuuywe na Nyamuwanga kaayiga obhubhiibhi bhwa ku-kyaro. Na ekibhuyiga okuturira ku-bhwikirisha bhweswe.

⁵ Angu! Niga unu kaatura okuyiga bhubhiibhi bhwa ku-kyaro kunu? Unu keekirisha ati Yeesu ni Mwana wa Nyamuwanga niwe kaatura okubhuyiga.

Ganu Yeesu Kiriisitu ꞉aaikiiywe

⁶ Yeesu Kiriisitu niwe ꞉eejire ku-kyaro, ˆnaabhatiisibhwa mu-manji, ˆnaafwa ku-musarabha, amaanyinga gaaye ngeetika. ꞉Ataabhatiisiibhwe era, tari na amaanyinga gaaye ꞉geetikire ku-musarabha.

⁷ Na Mwoyo Omutaakatiifu niwe kaakibhwira gayo, kwa okubha omwene uyo niwe ekimari.

⁸ Bhariwo bhasatu bhanu abheekirishaanya [mu-rwire, na abhasatu bhayo ni Raata Nyamuwanga, Riingʼana, na Mwoyo Omutaakatiifu. Abhasatu bhanu ni bhamwi.

⁹ Kweki bhariwo bhasatu bhanu abheekirishaanya mu-kyaro], bhayo ni Mwoyo Omutaakatiifu, amanji, na amaanyinga. Na abhasatu bhoone kutyo abheekirishaanya kw-ingʼana erimwi riyo. Raabhe ekiikirisha ganu ekibhwirwa na abhaanu, kimenye ati ganu Nyamuwanga kaakibhwira ni manene okukira aga abhaanu, kwa okubha gayo nigo Nyamuwanga kaakibhwira iiguru ya Omwana waaye.

¹⁰ Omuunu woonewoone unu keekirisha Omwana wa Nyamuwanga, eekirisiishe ati ganu Nyamuwanga kaakibhwira, ni ga kimari. Nawe unu atakwikirisha Nyamuwanga, kaakora Nyamuwanga okubha mubheeyi, kwa okubha atakwikirisha ganu Nyamuwanga kaakibhwira iiguru ya Omwana waaye.

¹¹ Gayo nigo Nyamuwanga kaakibhwira ati, akiyaaye obhurame bhunu bhutakuweera. Na obhurame bhuyo kibhunyoorere okuturira ku-kwikirisha Omwana waaye.

¹² Woonewoone unu ari na obhumwi na Omwana wa Nyamuwanga, ari na obhurame bhuyo. Nawe unu atari na obhumwi na Omwana wa Nyamuwanga, obhurame bhuyo atari nabhwo.

Obhurame bhunu bhutakuweera

¹³ Enibhakaamira amangʼana gayo, emwe bhanu omwikirisha riisiina rya Omwana wa Nyamuwanga, insonga mumenye ati muri na obhurame bhunu bhutakuweera.

¹⁴ Na woori, eswe kiri na kiyaaro kinene ku-Nyamuwanga, kwa okubha kimenyere ati kaakyungwa, na kikamusabha ryoneryone okuriingʼaana na kutyo keenda, kaakiyaana.

¹⁵ Raabhe kimenyere ati kaakyungwa, kikamusabha ryoneryone, kimenyere ati kaakiyaana okuriingʼaana na obhukene bhunu kimusabhiiye-ko.

¹⁶ Mmbe, bhiriwo ebhikayo bhinu bhitakwawura omuunu mbimwesa kimwi areera na Nyamuwanga. Raabhe omuunu woonewoone kaarora Omukiriisitu weejaabho ˆnaakora ebhikayo rwa bhiyo, amusabhire era ku-Nyamuwanga, Nyamuwanga woone kaamwabhira ˆnaamuyaana obhurame. Eyibha kutyo ku-bhanu abhakora ebhikayo rwa bhiyo. Nawe bhiriwo ebhikayo bhinu ebhyawura omuunu mbimwesa kimwi areera na Nyamuwanga. Anye nitakwaika ati amusabhire ku-bhikayo rwa bhiyo.

¹⁷ Okukora ryoneryone rinu ritari rya bhurengeresi mu-meeso ga Nyamuwanga, nikwo okukora ebhikayo. Nawe, bhiriwo ebhikayo bhinu bhitakwawura omuunu mbimwesa kimwi areera na Nyamuwanga.

¹⁸ Kimenyere ati woonewoone unu eebhuuywe na Nyamuwanga, atakugenderera okukora ebhikayo, kwa okubha Omwana wa Nyamuwanga kaamwangarira, na Sitaani atakutura kumukuunʼya-ko.

¹⁹ Kimenyere ati eswe kiri bhaana bha Nyamuwanga, tari abhaanu abhandi, bhanu bhatakuungwa Nyamuwanga bhoone kutyo abhatungwa na omukayi Sitaani.

²⁰ Na kimenyere ati Omwana wa Nyamuwanga aamarire okuuja, akiyaaye obhwenge, insonga kimenye Nyamuwanga wa ekimari. Ekibha na obhumwi na Nyamuwanga wa ekimari, okuturira okubha ku-bhumwi na Omwana waaye Yeesu Kiriisitu. Unu niwe Nyamuwanga wa ekimari na obhurame bhunu bhutakuweera.

²¹ Abhaana bhaani abheende, mwiyangarire mwasiga okuramya ebhisusano.