1 Yowana 4 - Iimuuma Iinyaaya

Okumenya ameeyigisho ga orubheeyi na aga ekimari

¹ Abheendwa bhaani, mwasiga okwikirisha woonewoone unu kaaja kw-imwe ˆnaaika ati ari na Mwoyo Omutaakatiifu wa Nyamuwanga. Tari musakye kujomu raabhe omuunu uyo kaatangasibhwa na Mwoyo Omutaakatiifu wa Nyamuwanga, amwi ati uri. Mukore kutyo, kwa okubha abharagi abhabheeyi bhaabheeye bhaafu ku-kyaro kunu.

² Injira ya okumenyegesha ati omuunu kaatangasibhwa na Mwoyo Omutaakatiifu wa Nyamuwanga ni inu. Omuunu woonewoone unu keekirisha ati Yeesu Kiriisitu ꞉eejire mu-kyaro ˆnaabha na omubhiri rwa omuunu, uyo niwe kaatangasibhwa na Mwoyo Omutaakatiifu wa Nyamuwanga.

³ Nawe woonewoone unu atakwikirisha ati Yeesu ꞉aabheeye na omubhiri rwa ogwa omuunu, atakutangasibhwa na Mwoyo Omutaakatiifu wa Nyamuwanga. Omuunu uyo kaatangasibhwa na omwoyo gwa omuremi wa Kiriisitu. Na emwe mwone, mwoonguuywe ati omwoyo guyo oguuja, na woori gwamarire okubha-wo mu-kyaro.

⁴ Nawe, emwe abhaana bhaani abheende, emwe muri abhaana bha Nyamuwanga, na mwayigire abharagi abhabheeyi bhayo. Mwabhayigire kwa okubha unu ari mw-imwe ari na obhuturo, okukira unu kaatangasha abhaanu okukora amabhiibhi ku-kyaro kunu.

⁵ Abharagi abhabheeyi bhayo, ni bha ku-kyaro kunu, kyakora abhaaika amangʼana ga ku-kyaro. Na abhaanu bha ku-kyaro kunu, bhanu bhatakwikirisha Nyamuwanga, abhabheetegeeresha.

⁶ Eswe kiri bhaana bha Nyamuwanga. Omuunu woonewoone unu amenyere Nyamuwanga, keekirisha ameeyigisho geeswe. Nawe unu atari wa Nyamuwanga, atakwikirisha ameeyigisho geeswe. Kiyo nikyo ekikora nkimenya obhutaashaanya bhwa abhaanu bhanu abhatangasibhwa na Mwoyo wa ekimari, na bhanu abhatangasibhwa na omwoyo gunu ogubhusha.

Obhwendi bhwa Nyamuwanga

⁷ Abheendwa bhaani, kyendane, kwa okubha obhwendi obhusooka ku-Nyamuwanga. Omuunu woonewoone unu eendere abheejaabho uyo niwe eebhuuywe na Nyamuwanga, na uyo niwe amenyere Nyamuwanga.

⁸ Nawe woonewoone unu atakwenda abheejaabho, akyari kumenya Nyamuwanga, kwa okubha Nyamuwanga ni bhwendi.

⁹ Nyamuwanga ꞉eeresiishe obhwendi bhwaye kw-iswe, bhunu ꞉aatumire Omwana waaye omumwemwe ku-kyaro, insonga okuturira ku-Mwana waaye uyo, kinyoore obhurame bhunu bhutakuweera.

¹⁰ Itari ati ni eswe ꞉kyaambire okwenda Nyamuwanga, tari omwene niwe ꞉aakyendere. Bhuyo nibhwo obhwendi. ꞉Aatumire Omwana waaye, insonga abhe ekimweso kya okukigwatanya na Nyamuwanga na okukisoosha-ko ebhikayo bhyeswe.

¹¹ Abheendwa bhaani, raabhe Nyamuwanga ꞉aakyendere kutyo, eyeendwa eswe kyone kyendane.

¹² Atariwo muunu woonewoone unu ararorere Nyamuwanga ebhaga ryoneryone. Nawe kikeendana, Nyamuwanga keekara mu-mitima gyeswe, na obhwendi bhwaye mbukuumira mw-iswe.

¹³ Eswe kiri na obhumwi na Nyamuwanga, Nyamuwanga woone ari na obhumwi na eswe. Kimenyere kutyo, kwa okubha akiyaaye Mwoyo Omutaakatiifu waaye.

¹⁴ Eswe kyarorere na ekibhwira abhandi ati Raata Nyamuwanga ꞉aatumire Omwana waaye mu-kyaro, insonga abhe omwerusi wa abhaanu bhoone kutyo.

¹⁵ Omuunu woonewoone unu keekirisha ati Yeesu ni Mwana wa Nyamuwanga, uyo ari na obhumwi na Nyamuwanga. Nyamuwanga woone ari na obhumwi nawe.

¹⁶ Woori, eswe kyamenyere na okwikirisha ati Nyamuwanga kaakyenda. Nyamuwanga ni bhwendi. Woonewoone unu eekaaye mu-bhwendi, uyo niwe ari na obhumwi na Nyamuwanga, Nyamuwanga woone ari na obhumwi nawe.

¹⁷ Ku-riyo, obhwendi bhukuumiiye mw-iswe, insonga kibhe na ekiyaaro ku-rusuku rwa okuramurirwa. Obhwendi bhuyo bhukuumiiye, kwa okubha obhurame bhweswe ku-kyaro kunu, woori obhususana na kutyo Yeesu ꞉aariga ari.

¹⁸ Omuunu unu ari na obhwendi, atari na ekiyayo. Obhwendi bhwa ekimari obhusoosha-wo ekiyayo kyone kutyo, kwa okubha indamuro niyo eyikora abhaanu bhabhe na ekiyayo. Omuunu unu ari na ekiyayo, obhwendi bhukyari kukuumira mu-mutima gwaye.

¹⁹ Eswe kyendere Nyamuwanga na Abhakiriisitu bheejaasu kwa okubha Nyamuwanga niwe ꞉aatangatire okukyenda.

²⁰ Raabhe omuunu woonewoone kaaika ati eendere Nyamuwanga, enu asokere Omukiriisitu weejaabho, ni mubheeyi. Kimenyere ati ni mubheeyi, kwa okubha raabhe atakwenda Omukiriisitu weejaabho unu kaarora, atakutura kwenda Nyamuwanga unu akyariga kurora.

²¹ Mmbe, Nyamuwanga akiyaaye ekiraagiro kinu ati, woonewoone unu kaamwenda, eende na Omukiriisitu weejaabho.