1 Yowana 3 - Iimuuma Iinyaaya

Okwikara rwa abhaana bha Nyamuwanga

¹ Bhamura, ambe murore kutyo Raata Nyamuwanga akyendere, akikorere eswe kyone kibhirikirwe bhaana bhaaye! Na nikwo kutyo kiri. Nawe abhaanu bha ku-kyaro kunu, bhatakumenya ati eswe kiri bhaana bha Nyamuwanga, kwa okubha na omwene woone bhatakumumenya.

² Abheendwa bhaani, kimenyere ati woori kutya eswe kiri bhaana bha Nyamuwanga, na gakyari kutuurwa ku-bhweru kutyo ekiija okubha. Nawe, kimenyere ati akabhaga kanu Kiriisitu arisubha, kirisusana nawe, kwa okubha kirimurora kutyo ari.

³ Omuunu woonewoone unu keesiga gayo, eeyeshe okuturira ku-Yeesu Kiriisitu, insonga abhe mweru wa omutima, rwa kutyo Kiriisitu omwene woone ari mweru wa omutima.

⁴ Omuunu woonewoone unu kaagenderera okukora ebhikayo, kaajeema ebhiraagiro bhya Nyamuwanga, kwa okubha obhukosi bhwa ebhikayo, nibhwo obhujeemi.

⁵ Emwe mwone mumenyere ati Kiriisitu ꞉eejire mu-kyaro, insonga asooshe-wo ebhikayo bhyeswe. Omwene ni muunu unu atari na ebhikayo bhyonebhyone.

⁶ Woori iri ku-bhweru ati, omuunu woonewoone unu kaabha na obhumwi nawe, atakugenderera okukora ebhikayo. Nawe unu kaagenderera okukora ebhikayo, mu-bhurame bhwaye akyari kurora Kiriisitu, na akyari kumumenya.

⁷ Woori, abhaana bhaani abheende, mwasiga okwikirisha muunu woonewoone abhayabhye. Woonewoone unu kaakora amangʼana ga obhurengeresi, ni murengeresi mu-meeso ga Nyamuwanga, rwa Kiriisitu kutyo ari.

⁸ Nawe woonewoone unu kaagenderera okukora ebhikayo, uyo ni wa Sitaani. Kimenyere kutyo, kwa okubha Sitaani ni mukosi wa ebhikayo okwambira kara. Na insonga iyo niyo ꞉yaakorere Omwana wa Nyamuwanga ˆnaaja mu-kyaro, insonga anyamure emirimu gya Sitaani.

⁹ Omuunu woonewoone unu eebhuuywe na Nyamuwanga, atakugenderera okukora ebhikayo, kwa okubha gintungwa gya Nyamuwanga giri mu-mutima gwaye. Atakutura okugenderera okukora ebhikayo, kwa okubha woori ni omwana wa Nyamuwanga.

¹⁰ Nawe omuunu unu atakukora amangʼana ga obhurengeresi na unu atakwenda Omukiriisitu weejaabho, atari mwana wa Nyamuwanga. Kikarora kutyo ekimenya obhutaashaanya bhwa abhaana bha Nyamuwanga na abhaana bha Sitaani.

Okwendana

¹¹ Okwambira bhunu ꞉mweekirisiishe, ꞉mwoonguuywe amangʼana ati ekyendwa kyendane eswe abheene na abheene.

¹² Kyasiga okubha rwa Kaayini, owa omukayi Sitaani, unu ꞉eetire omumura waabho. Kubhaki ꞉aamwitire? Kaayini ꞉eetire omumura waabho kwa okubha ebhikorwa bhyaye ꞉bhyariga bhiri bhibhiibhi, nawe ebhya omumura waabho ꞉bhyariga bhiri bhya bhurengeresi.

¹³ Woori, Abhakiriisitu bheejaasu, musige okuruguura raabhe abhaanu bha ku-nsi kunu bhakabhasoka.

¹⁴ Eswe kyamenyere ati kisookere ku-managa ga orufu, na woori kiri na obhurame bhunu bhutakuweera. Kimenyere kutyo, kwa okubha kyendere Abhakiriisitu bheejaasu. Omuunu woonewoone unu atakwenda Abhakiriisitu bheejaabho, akyari ku-managa ga orufu.

¹⁵ Woonewoone unu kaasoka Omukiriisitu weejaabho, ni mwiti. Na emwe mwone mumenyere ati, omwiti wa abhaanu atari na obhurame bhunu bhutakuweera mu-mwoyo gwaye.

¹⁶ Bhunu Kiriisitu ꞉aasoosiishe obhurame bhwaye ku-nsonga yeeswe, ꞉aakyeresiishe obhwendi obhujomu. Eswe kyone, nikwo kutyo ekyendwa kisooshe bhurame bhweswe ku-nsonga ya Abhakiriisitu bheejaasu.

¹⁷ Omuunu woonewoone akabha na ebhiinu ebhya okumwisa ku-nsi kunu, aakarora ati amwi Omukiriisitu weejaabho ari na obhukene, nawe weeki ˆnaarema okumufwira ekigongo amusakire, kaatura okwaika kutiki ati arimo obhwendi bhwa Nyamuwanga?

¹⁸ Abhaana bhaani abheende, kyasiga okwendanira mangʼana era, tari kyendane kimari, nkikoreranaga amajomu.

¹⁹ Kikeendana kutyo, niwe ekimenya ati kiri bhaana bha Nyamuwanga, uyo niwe kaakyeresha amajomu na aga ekimari, na emitima gyeswe egisiiriika kikabha nawe.

²⁰ Raabhé kiraaramurirwe na emitima gyeswe ati kikorere ebhikayo, kiri na omurembe, kwa okubha kimenyere ati Nyamuwanga niwe omukuru okukira emitima gyeswe, na omwene niwe kaamenya goone kutyo.

²¹ Abheendwa bhaani, raabhe kitakuramurirwa mu-mitima gyeswe, kiri na ekiyaaro kya okufugerera Nyamuwanga.

²² Na kikamusabha ryoneryone kaakiyaana, kwa okubha kigwatire ebhiraagiro bhyaye na ekikora ganu agamujomisha.

²³ Ekiraagiro kyaye ni kinu ati, kiikirishe riisiina rya Omwana waaye, Yeesu Kiriisitu, na kyendane eswe abheene na abheene, rwa kutyo ꞉aakiragiriiye.

²⁴ Omuunu woonewoone unu koongwa ebhiraagiro bhya Nyamuwanga, ari na obhumwi nawe. Na Nyamuwanga omwene woone ari na obhumwi na omuunu uyo. Eswe kimenyere ati kiri na obhumwi na Nyamuwanga, okuturira ku-Mwoyo Omutaakatiifu unu akiyaaye.