1 Yowana 2 - Iimuuma Iinyaaya

Yeesu Kiriisitu niwe kaakisabhira

¹ Abhaana bhaani abheende, enibhakaamira amangʼana ganu, insonga mwasiga okukora ebhikayo. Nawe raabhe muunu woonewoone aakakora ebhikayo, kiri na unu kaakisabhira ku-Raata Nyamuwanga akyabhire. Omubhagisi uyo ni Yeesu Kiriisitu, omwene ni murengeresi mu-meeso ga Nyamuwanga.

² Omwene niwe ekimweso kya obhugwatanya ku-Nyamuwanga ku-nsonga ya ebhikayo bhyeswe. Itari ku-bhikayo bhyeswe era, tari na ebhikayo bhya abhaanu bhoone kutyo abha ku-kyaro.

³ Mmbe, raabhe kikoongwa ebhiraagiro bhya Nyamuwanga, ayo niwe ekimenya ati kimumenyere.

⁴ Woonewoone unu kaaika ati kaamenya Nyamuwanga, enu atakuungwa ebhiraagiro bhyaye, ni mubheeyi, atari na kimari mu-mutima gwaye.

⁵ Nawe omuunu unu koongwa riingʼana ryaye, kimari obhwendi bhwa Nyamuwanga bhukuumiiye mu-mutima gwaye. Ku-rinu eriija, erikikora nkimenya ati kiri na obhumwi na Nyamuwanga.

⁶ Omuunu unu kaaika ati ari na obhumwi na Nyamuwanga, keendwa akatungiiye kaaye kabhe rwa kutyo Yeesu ꞉aariga ari.

Ebhiraagiro bhya Yeesu ku-kwendana

⁷ Abheendwa bhaani, ekiraagiro kinu enibhakaamira kitari kiyaaya, tari ni kiraagiro kya kara kiryakirya ꞉mwariga mumenyere okwambira bhunu ꞉mweekirisiishe. Ekiraagiro kiyo, ni iingʼana inu ꞉mwoonguuywe iiguru ya okwendana.

⁸ Na woori, enibhakaamira ekiraagiro ekiyaaya, riingʼana rya ekimari erya Yeesu. Riingʼana rinu riri mu-mutima gwaye na mu-mitima gyemwe, kwa okubha ekisuute ekitura, na obhweru bhwa ekimari bhwamarire okungʼarabhya.

⁹ Omuunu woonewoone unu kaaika ati eekaaye mu-bhweru enu asokere Omukiriisitu weejaabho, akyeekaaye mu-kisuute.

¹⁰ Woonewoone unu eendere Omukiriisitu weejaabho, eekaaye mu-bhweru. Atarimo kiinu kyonekyone ekya okumukora akore ebhikayo.

¹¹ Nawe unu asokere Omukiriisitu weejaabho, ari mu-kisuute. Kaaribhata mu-kisuute, atakumenya enu kaagenda, kwa okubha ekisuute kimuwofuuye ameeso gaaye.

¹² Enibhakaamira emwe, abhaana bhaani abheende, kwa okubha mwabhiiywe ebhikayo bhyemwe okuturira kw-isiina rya Yeesu Kiriisitu.

¹³ Enibhakaamira emwe bhanu mwamarire nsiku nyafu mwikirisiishe, kwa okubha mwamenyere Yeesu Kiriisitu, unu ꞉aariga ariwo bhusimukwa. Enibhakaamira emwe bhanu muri mw-ikura, kwa okubha muyigire omukayi Sitaani. Enibhakaamira emwe abhaana, kwa okubha mwamenyere Raata Nyamuwanga.

¹⁴ Enibhakaamira emwe bhanu mwamarire nsiku nyafu mwikirisiishe, kwa okubha mwamenyere Yeesu Kiriisitu, ati ꞉aariga ariwo bhusimukwa. Enibhakaamira emwe bhanu muri mw-ikura, kwa okubha muri na amanaga, omugenderera okugwata Riingʼana rya Nyamuwanga, na Sitaani woone mumuyigire.

¹⁵ Mmbe woori enibhabhwira ati, mwasiga okwenda ganu gatakujomisha Nyamuwanga, na obhubhiibhi bhwone kutyo bhunu bhuri mu-kyaro. Omuunu woonewoone akabhwenda, okwenda Raata Nyamuwanga kutamurimo.

¹⁶ Enaaika kutyo kwa okubha obhubhiibhi bhuyo bhutakusooka ku-Nyamuwanga, tari obhusooka mu-kyaro. Obhubhiibhi bhwa mu-kyaro ni ntungwa ginu, amajomerwa ga omubhiri, okwenda okubha na kyonekyone kinu owurora, na okwiyeema.

¹⁷ Ekyaro kinu na obhubhiibhi bhwende-mo, bhwone obhutura. Nawe, omuunu woonewoone unu kaakora ganu Nyamuwanga kaakena, kaarama kajaanende.

Okwikenga bhanu abharema Kiriisitu

¹⁸ Abhaana bhaani abheende, ginu ni nsiku gya obhuteero! Mwamarire okuungwa ati omuremi wa Kiriisitu aribha-wo, na woori kutya abharemi bhaafu bhaabheeye-wo. Insonga iyo niyo eyikora nkimenya ati kiri mu-nsiku gya obhuteero.

¹⁹ Abhaanu bhayo ꞉kyariga kiri nabho amwi, mbasooka kw-iswe, kwa okubha ꞉bhaariga bhatari ku-rubharika rweswe. Raabhe bhakabheeye ku-rubharika rweswe, bhakagendereeye okubha kw-iswe. Nawe woori, ꞉bheemukire, insonga ibhe ku-bhweru ati ꞉bhaariga bhatari ku-rubharika rweswe.

²⁰ Nawe emwe, Yeesu Omutaakatiifu, abhayaaye Mwoyo Omutaakatiifu waaye, woori, emwe mwone kutyo mumenyere ekimari.

²¹ Nitakubhakaamira iinyarubha inu, kwa okubha ati mutakumenya ekimari, tari kwa okubha mukimenyere. Na mumenyere ati rutariwo rurimi rwonerwone runu orusooka ku-kimari.

²² Omuunu omubheeyi ni wuuya? Omuunu omubheeyi ni woonewoone unu kaaika ati Yeesu atari Kiriisitu. Woonewoone unu kaarema Raata Nyamuwanga, ˆnaarema na Omwana waaye Yeesu, uyo niwe omuremi wa Kiriisitu.

²³ Omuunu unu kaarema Omwana uyo, atari na bhumwi na Raata Nyamuwanga. Nawe, unu keekirisha Omwana uyo mu-meeso ga abhaanu, ari na obhumwi na Raata Nyamuwanga woone.

²⁴ Woori, mugenderere okugagwatirira mu-mitima, amangʼana ganu ꞉mweeyigisiibhwe okwambira bhunu ꞉mweekirisiishe Kiriisitu. Raabhe rinu ꞉mweeyigisiibhwe riri mu-mitima gyemwe, emwe mwone muri mu-mutima gwa Yeesu, na ogwa Raata Nyamuwanga.

²⁵ Obhuragi bhwaye kw-iswe, ꞉aakiragire okuramira obhurame bhunu bhutakuweera.

²⁶ Enibhakaamira amangʼana ganu, nibhagonye mwasiga okwikirishaanya na bhanu abheenda okubhayabhya.

²⁷ Nawe emwe, Kiriisitu ꞉aabhayaaye Mwoyo Omutaakatiifu, na Mwoyo uyo eekaaye mw-imwe. Uyo niwe kaabheeyigisha goone kutyo, na ameeyigisho gaaye ni ga kimari. Na mutari na bhukene bhwa kwiyigisibhwa na muunu woonewoone. Rwa kutyo Mwoyo Omutaakatiifu abheeyigisiishe, mugenderere okugwatira ameeyigisho, insonga mubhe na obhumwi na Kiriisitu.

²⁸ Woori, abhaana bhaani abheende, mugenderere okubha na obhumwi na Kiriisitu, insonga mu-kabhaga kanu arituurwa ku-bhweru, kibhe na ekiyaaro, kyasiga okwiswara orusuku runu arisubha.

²⁹ Mumenyere ati Kiriisitu ni murengeresi. Raabhe ni kutyo, mumenye ati woonewoone unu kaakora aga obhurengeresi, uyo niwe eebhuuywe na Nyamuwanga.