1 Timoteeyo 6 - Iimuuma Iinyaaya

Amaragiriro ku-bhagaya Abhakiriisitu

¹ Abhakiriisitu abhagaya bhoone, bhayaane ekibharo bheesebhugenyi bheebhwe, insonga riisiina rya Nyamuwanga na ameeyigisho geeswe, gaasiga okufumwa.

² Abhagaya bhanu bheesebhugenyi bheebhwe bheekirisiishe, bhaasiga okubhajeera kwa okubha ati ni Bhakiriisitu bheejaabho. Abheendwa bhakorere kujomu muno bheesebhugenyi, kwa okubha abhasakira Abhakiriisitu bheejaabho, na ni bheendwa bheebhwe. Wiiyigishega amangʼana gayo na okugonya.

Ameeyigisho ga okuyabhya na obhuniibhi bhwa ekimari

³ Bhariwo abhaanu bhanu abheeyigisha ameeyigisho ga okuyabhya. Abheeyigisha ganu gatakwikirishaanya na ameeyigisho ga ekimari aga Raatabhugenyi weeswe Yeesu Kiriisitu, na gatakwikirishaanya na ameeyigisho ganu ageeyigisha okukora kutyo Nyamuwanga keenda.

⁴ Abheene abheeyeema era, bhatakumenya engʼana ryoneryone. Abhaanu rwa bhayo bhoomiiye era kubhambashaanya ku-mangʼana matoototooto, na muyo nimwo orusooka orwiso, amaremo, amafumo, obhwiganiirisha obhubhiibhi,

⁵ na giinyombo ku-nsiku agati wa abhaanu bhanu obhwenge bhwebhwe bhuranyamukire, bhatakumenya ekimari. Abhatoga ati okukora ganu Nyamuwanga keenda niyo injira ya okunyoorera obhuniibhi.

⁶ Nawe, okukora ganu Nyamuwanga keenda okukora omuunu abhe muniibhi muno, raabhe akeeswa na ebhiinu bhinu ari nabhyo.

⁷ Kwa okubha kiteejire na kiinu kyonekyone mu-kyaro munu. Na kitarisooka-mo na kiinu kyonekyone,

⁸ mmbe, eswe raabhe kikabha na ebhyokurya, na ebhya okufwara, bhikiise.

⁹ Nawe bhanu abheenda okubha bhaniibhi, abhagwira mu-masakyo, na mu-mitego, mbeeyingisha mu-mangʼana maafu aga amajomerwa ganu gatari na bhwera. Amangʼana gayo agabhanyamura, na agayabhya abhaanu.

¹⁰ Kwa okubha okwenda muno giiyera niryo riisina rya amabhiibhi goone kutyo. Abhandi ku-bhwendi bhwa giiyera, bhasigeene na obhwikirisha, woori bhari na amawuta maafu mu-myoyo, rwa omuunu unu eesomere na iimaro.

Riiremo riijomu erya obhwikirisha

¹¹ Nawe awe, muunu wa Nyamuwanga, wiikenge na gayo. Wiikomeeshe okubha murengeresi, ukorega ganu Nyamuwanga keenda, ubhe na obhwikirisha, ubhe na obhwendi, urindirirega amangʼana, na ubhe mufura.

¹² Urwane kujomu riiremo rya obhwikirisha, gwatirira obhurame bhunu bhutakuweera bhunu waabhirikiriiywe, nuwiigambaga ameegambo majomu mu-meeso ga abharori bhaafu.

¹³ Enikuragirira mu-meeso ga Nyamuwanga unu kaayaana obhuworu ebhiinu bhyone kutyo, na mu-meeso ga Kiriisitu Yeesu unu ꞉aaikire amangʼana ga ekimari mu-meeso ga Pontiyo Piraato,

¹⁴ ati, ugwatirire amaragiriro gayo nuugoongwaga utakugayabha, utakwaikwa kubhiibhi, okuyikira anu Raatabhugenyi weeswe Yeesu Kiriisitu arisubha.

¹⁵ Nyamuwanga araramuuye akabhaga ka okusubha kwaye. Niwe eesire okugungibhwa, omwene era niwe Omutungi, niwe Omukama wa abhakama, na Raatabhugenyi ku-bharaatabhugenyi bhoone kutyo.

¹⁶ Omwene era niwe atakufwa, eekaaye mu-bhweru bhunu muunu atakutura okubhufugerera. Na atariwo muunu unu aramurorere, kweki atariwo unu kaatura okumurora. Ekibharo na obhuturo bhiri ku-mwene kajaanende. Amina.

¹⁷ Uragirire abhaniibhi bha ku-nsi kunu bhaasiga okwiyeema, na okwisiga obhuniibhi bhwebhwe kwa okubha ni bhwa kabhaga kafuyi era. Tari bheesige Nyamuwanga unu kaakiyaana ebhiinu bhyone kutyo, insonga kibhijomererwe.

¹⁸ Kweki ubharagirire bhakore amajomu, bhabhe bhaniibhi ku-bhikorwa ebhijomu. Bhabhe bhayaani, bhaangariiye okusakira abheejaabho.

¹⁹ Bhaakakora kutyo, abheebhiikira ebhiinu bhinu bhiribha bhwambiro obhujomu ku-kabhaga kanu akaaja, insonga bharamire obhurame bhwa ekimari.

²⁰ Timoteeyo, gwatirira kujomu ekimari kinu uyaaywe. Wiikenge na amangʼana ganu gatari na bhwera na ganu gatari ga diini. Usige kwiyingisha mu-mamba gya ekisiru, ginu abhandi abhaaika ati nigo injira ya okumenya amangʼana, enu itari.

²¹ Abhaanu abhandi bhanu bheeyingisiishe mbageekirisha, bhasigire obhwikirisha bhwebhwe. Iinema ibhe amwi na emwe.