1 Timoteeyo 5 - Iimuuma Iinyaaya

Amaragiriro ku-Bhakiriisitu

¹ Waasiga okubhoyokera omukaruka, tari umubhwire unyoowere rwa kutyo owubhwira esomwana. Abhamura bhoone urome nabho rwa kutyo owuroma na abhamura bhaanyu,

² abhagasi bhanu bhaakurire urome nabho rwa kutyo owuroma na nyakumwana, na abhayara bhoone, urome nabho rwa kutyo owuroma na abhasubhaati bhaawo, mwiswareene.

³ Uyaane ekibharo abhakimari bha ekigasi bhanu bhatari na bhusakisi.

⁴ Nawe raabhe omukimari wa ekigasi woonewoone unu ari na abhaana amwi ati bheechukuru, abhaanu bhaaye bhayo bheeyigire okuriya abheebhusi amajomu ganu ꞉bhaabhakoreeye, na okukora ganu ageendwa, okusakira abhayiiri bheebhwe. Riingʼana riyo ni ejomu na nikwo kutyo Nyamuwanga keenda.

⁵ Omukimari wa ekigasi unu atari na bhusakisi, uyo asigaaye omwene na obhwisige bhwaye bhuri ku-Nyamuwanga, ku-nsiku mu-ngeta na mu-mwisi, kaasaasaama na okusabha obhusakisi ku-Nyamuwanga.

⁶ Tari omukimari wa ekigasi unu eendere amajomerwa ga ku-kyaro, uyo mu-mwoyo kaaribhata afuuye, raabhé kutyo keesha omwoyo.

⁷ Amangʼana gayo goone kutyo ugaragirire ku-Bhakiriisitu, insonga bhaasiga okubha-wo abhaanu bha okwaikwa kubhiibhi.

⁸ Nawe muunu woonewoone unu atakusakira abhaanu bha ewaaye, uyo kaabha eegaanire obhwikirisha, na ni mubhiibhi kukira omuunu unu atakwikirisha.

⁹ Omukimari wa ekigasi unu akyari kuyikya myaka makumi gasansabha, waasiga okumubharira mubhukimari, na abhe mugasi unu ꞉ataataarire-ko meega.

¹⁰ Abhe amenyekeene ku-bhaanu ati ꞉aariga ari na ntungwa njomu, ˆnaarera na abhaana bhaaye kujomu, abhe mukumi wa abhaanu, abhe ˆneetuuraga emwaro ku-bhataakatiifu bheejaabho, abhe ˆnaasakira bhanu abhanyanka, ˆneesoosha na okukora amajomu ku-mangʼana goone kutyo.

¹¹ Nawe abhakimari abha ekigasi bhanu bhakyari bhatooto, waasiga okubhabharira-mo, kwa okubha amajomerwa ga omubhiri gaakabhayiga abhaaja okwenda okugabhurwa kweki, mbasiga okwisoosha ku-Kiriisitu.

¹² Na okukora kutyo kuribhareetera indamuro, kwa okubha abhabha bhasigire riiragano ryebhwe erya okwamba.

¹³ Ukasiga gayo abheeyigira obhurenga na obhutereeganu bhwa okuribhataga bhuyagayaga mu-misi gya abhaanu. Na bhutari bhurenga era, tari ni bhagwatanya bha abhaanu na bheebhuusirisha bha amangʼana ga abhandi, enu mbaaikaga amangʼana ganu gatakubhasaasa na ganu gateesire.

¹⁴ Mmbe woori, anye eneenda abhakimari bha ekigasi bhanu bhakyari bhatooto, bhagabhurwe, bheebhure abhaana na bhaangarire emisi gyebhwe, insonga abhasoko bheeswe bhaasiga okukyaika kubhiibhi.

¹⁵ Enaaika kutyo kwa okubha abhandi bharayindukire na woori abhakora aga Sitaani.

¹⁶ Raabhe akabha-wo omugasi Omukiriisitu unu eekaaye na abhakimari bha ekigasi abhasakire omwene, insonga riikanisa ryasiga okusingwa. Ryeki risakire abhakimari bha ekigasi abhandi bhanu bhatari na bhusakisi.

¹⁷ Abhakaruka bhanu abhayambaarira riikanisa kujomu, bhayaanwe ekibharo muno na okukorerwa amajomu, munomuuno bhanu abheesoosha okuraasha na okwiyigisha.

¹⁸ Enaaika kutyo, kwa okubha ikaamirwe mu-Makaamo Amataakatiifu ati, “Iingʼombe ikabha niitaja obhuro okubhuwungurura, usige kuyibhoya omunwa.” Kweki ikaamirwega ati, “Omukosi wa emirimu eesire okuyaanwa indiyo yaaye.”

¹⁹ Waasiga kwikirisha amasitaakyo ku-mukaruka wa riikanisa, bhataabha-wo bhaanu bhabhiri amwi ati bhasatu bhanu ꞉bhaarorere.

²⁰ Tari abhakaruka bhanu abhagenderera okukora ebhikayo, ubhagonye mu-meeso ga abhandi bhoone kutyo, insonga abhandi bhoone bhoobhaye.

Amaragiriro ga Pawuro ku-Timoteeyo

²¹ Enikuragirira mu-meeso ga Nyamuwanga, na aga Kiriisitu Yeesu na bhaamaraayika abhasorwa ati ugwatirire amangʼana gayo. Waasiga okutusha bhwangu indamuro, na waasiga okusoroora muunu woonewoone.

²² Waasiga okubha mwangu okutuurira-ko omuunu amabhoko okubha mukaruka wa riikanisa, awe wiiyangarire ubhe mweru mu-mutima, waasiga na okuyimbana na ebhikayo bhya abhaanu abhandi.

²³ Okwambira woori, waasiga okunywa amanji era, tari ubhe nuunywaga-ko na iidivaayi kutooto ku-nsonga ya obhurwaye mu-nda yaawo, na amarwara agandi ganu agakunyaansha kiyana.

²⁴ Abhaanu abhandi, ebhikayo bhyebhwe bhiri ku-bhweru, bhiribhatangatira ku-ndamuro. Na abhandi, ebhyebhwe ebhibhaseeterera iinyuma.

²⁵ Nikwo kutyokutyo, na ebhikorwa ebhijomu bhiri ku-bhweru. Na ganu gakyeeyibhisire, garibha goone ku-bhweru mmara.