1 Timoteeyo 4 - Iimuuma Iinyaaya

Abheeyigisha bha orubheeyi

¹ Woori, Mwoyo Omutaakatiifu wa Nyamuwanga kaaikira abhweru ati, ku-nsiku gya obhuteero, abhandi bhariigaana obhwikirisha bhwa ekimari, mbaseeta emyoyo ginu egijimya, na ameeyigisho geebhwe.

² Ameeyigisho gayo, ageeyigisibhwa na abhaanu abhabheeyi bhanu abhaaika amangʼana ganu gatari mu-mitima gyebhwe, abhaaika enu emitima gyebhwe ginyamukire giri muna gyokiibhwe na omuriro.

³ Abhagaanya abhaanu ati bhasige okugabhura amwi ati kugabhurwa, na okurya ebhyokurya ebhirebhe, enu Nyamuwanga ꞉aabhibhumbire bhiramirwe na abhaanu bhanu bhari na obhwikirisha, bhanu abhakumya, bhayo nibho bhamenyere ekimari.

⁴ Ebhibhumbwa bhya Nyamuwanga bhyone kutyo ni bhijomu, kitariwo kya kuremwa, raabhe ukakiramira nuukumya,

⁵ kwa okubha okuturira kw-ingʼana rya Nyamuwanga na okusabhira, bhyone kutyo bhyesiibhwe mu-meeso ga Nyamuwanga.

Omujuuma mujomu wa Yeesu Kiriisitu

⁶ Uyiitye Abhakiriisitu bheejaasu amangʼana gayo, ukakora kutyo owubha mujuuma mujomu wa Kiriisitu Yeesu, na owubha ukurire kujomu ku-mangʼana ga obhwikirisha bhweswe na ku-meeyigisho amajomu ganu useetere.

⁷ Ureme kimwi gingani ginu gitari gya diini, awe wiinashe era okukora ganu Nyamuwanga keenda.

⁸ Okwinasha okunanura omubhiri okusakira kutooto, nawe okwinasha okukora ganu Nyamuwanga keenda, okusakira muno. Ukeenda okukora agaaye, owubha na omurago gwa obhurame bhunu uri nabhwo, na obhundi bhunu bhuriija.

⁹ Riingʼana riyo ni rya kimari, na riisire okwikirisibhwa na abhaanu.

¹⁰ Riyo niryo erikora nkikomeera okukora emirimu ku-nsonga ati, ekiisiga Nyamuwanga unu keesha omwoyo, Omwerusi wa abhaanu bhoone kutyo, nawe munomuuno ku-bhanu bheekirisiishe.

¹¹ Amangʼana gayo ugaragirire na okugeeyigisha ku-bhaanu.

¹² Muunu woonewoone aasiga kukujeera kwa okubha ati ukyari mumura, tari ubhe kirengekanyo ku-bhanu abheekirisha, mu-kwaika kwawo, mu-katungiiye kaawo, mu-bhwendi, mu-bhwikirisha na mu-bhwitongeeye bhwawo.

¹³ Iikomeesha okusomera abhaanu Amakaamo Amataakatiifu, ubheeyigishega, na ugonyega abhayabhi, okuyikira anu niriija eyo.

¹⁴ Waasiga okusiga okukorera emirimu ekiyaanwa kinu Nyamuwanga ꞉aakuyaaye okuturira ku-mangʼana ga obhuragi, na okutuurirwa-ko amabhoko na abhakaruka bha riikanisa.

¹⁵ Iiganiirisha muno amangʼana gayo ugakore, insonga abhaanu bhoone kutyo bharore amagenderero ga obhwikirisha bhwawo.

¹⁶ Wiiyangarire awe omwene, na ameeyigisho gaawo. Ugenderere okukora gayo, kwa okubha ukakora kutyo uriiyerusha awe omwene na bhanu abhakwitegeeresha bhoone.