1 Timoteeyo 3 - Iimuuma Iinyaaya

Abhaangarisi bha riikanisa

¹ Riingʼana rinu ni rya kimari, na riisire okwikirisibhwa ati, “Omuunu akeenda emirimu gya okubha omwangarisi wa riikanisa, kaabha eerangire mirimu mijomu.”

² Mmbe, omwangarisi wa riikanisa, abhe muunu unu atakwaikwa kubhiibhi, abhe agabhuuye mugasi wumwi era, abhe ˆnaatura okwiyiinya omwene, abhe muramusi mujomu owa amangʼana, muunu unu atakubhirima na mangʼana, abhe mukumi wa abhaanu, abhe amenyere okwiyigisha Riingʼana rya Nyamuwanga.

³ Omwangarisi wa riikanisa aasiga kubha mukorwa, okubha muunu unu kaateesha abhaanu ebhiinu bhyebhwe managa, tari abhe mufura, abhe muunu unu eendere omurembe mu-bhaanu, na aasiga kubha mwendi wa yera.

⁴ Abhe muunu unu kaayambaarira kujomu omusi gwaye, abhaana bhaaye bhoone bhabhe bhoongwa.

⁵ Raabhe omuunu kaataamibhwa okuyambaarira omusi gwaye omwene, kaatura kutiki okwangarira abheekirisha bha mw-ikanisa rya Nyamuwanga?

⁶ Kweki, aasiga kubha muunu unu eekirisiishe bhwangu anu, aasiga okwiyeema kimwi ˆnaaramurirwa rwa kutyo Sitaani ꞉aaramuriiywe.

⁷ Tari, abhe muunu unu kaaikwa kujomu na abhaanu bhanu bhatakwikirisha, aasiga okujeerwa na abhaanu bhayo, ˆnaagwira mu-mutego gwa Sitaani.

Abhashemaasi bha riikanisa

⁸ Abhashemaasi bha riikanisa bhoone, bhabhe na ntungwa njomu, bhaasiga okubha bhagwatanya bha abhaanu, bhaasiga okubha bhaanu bhanu abhanywa muno obhwarwa, bhaasiga okubha bhaanu bhanu abhakora amangʼana amabhiibhi insonga bhanyoore giiyera.

⁹ Tari, bhabhe bhaanu bhanu bhagwatiriiye ameeyigisho ga ekimari kya obhwikirisha bhweswe bheerere emitima.

¹⁰ Abhashemaasi bhanu bhoone, bhasakwe okwamba, bhakarorwa ati bhatakwaikwa kubhiibhi, niwe bhakore emirimu giyo.

¹¹ Abhagasi bheebhwe bhabhe na ntungwa njomu, bhaasiga okubha bhajabhusi bha bhaanu, bhabhe mbeeyiinya, na ku-mangʼana goone kutyo bhabhe bheetongeeye.

¹² Shemaasi abhe na mugasi wumwi era, abhe muunu unu kaakusha abhaana bhaaye na okuyambaarira omusi gwaye kujomu.

¹³ Bhanu abhakora kujomu emirimu gya obhushemaasi, abhanyoora ekibharo. Na abhayaara muno ku-bhwikirisha bhwebhwe bhunu bhuri ku-Kiriisitu Yeesu.

Imbisike ya obhwikirisha bhweswe

¹⁴ Enikukaamira amangʼana gayo raabhé kutyo niri na obhwisige bhwa okuuja eyo bhwangu.

¹⁵ Nawe nikakoora okuuja, umenyega kutyo Abhakiriisitu abheendwa bharame. Abhaanu bhayo nibho riikanisa rya Nyamuwanga unu keesha omwoyo, na riikanisa niryo intimu na obhwambiro bhwa ekimari.

¹⁶ Kitariwo kiitimaato kyonekyone ku-bhunene bhwa imbisike ya obhwikirisha bhweswe kwa okubha, Kiriisitu ꞉aatuuywe ku-bhweru ari muunu, Mwoyo Omutaakatiifu ˆnaamwaika ati ni murengeresi, bhaamaraayika mbamurora, abhaanu mbamuraasha mu-bhyaro bhyone kutyo, abhaanu bhoone kutyo abha mu-kyaro mbamwikirisha, ˆnaagegwa ˆnaasirwa iiguru ku-bhugungyo.