1 Timoteeyo 2 - Iimuuma Iinyaaya

Amaragiriro kutyo eyeendwa iimisa ibhe ku-Bhakiriisitu

¹ Mmbe, mukyari kukora kyonekyone okwamba, enisabha musabhirega abhaanu bhoone kutyo, mukumya Nyamuwanga ku-nsonga yeebhwe ku-ganu kaakora.

² Musabhire abhakama na abhatungi bhoone kutyo, insonga kiikare kisiiriikire kiri na omurembe nkikoraga ganu Nyamuwanga keenda, kiri na ntungwa njomu.

³ Riingʼana rinu ni ejomu, na erijomisha Nyamuwanga Omwerusi weeswe.

⁴ Unu keenda abhaanu bhoone kutyo bheerusibhwe na okumenya ekimari.

⁵ Ariwo Nyamuwanga wumwi era, na omuunu unu kaagwatanya abhaanu na Nyamuwanga woone ni wumwi era, niwe Kiriisitu Yeesu.

⁶ Uyo niwe ꞉aasoosiishe obhurame bhwaye omwene, okubha ingomboro ku-nsonga ya abhaanu bhoone kutyo. Na abhaanu mbabhwirwa Amangʼana Amajomu ati, Nyamuwanga keenda abhaanu bhoone kutyo bheerusibhwe, mu-kabhaga kanu Nyamuwanga ꞉aaramuuye.

⁷ Na ku-nsonga iyo, anye ꞉naatuuywe-wo okubha mutumwa na omuraasha waago. Enaaika ekimari, nitakwaika rurimi. ꞉Naatuuywe-wo okubha mwiyigisha wa bhanu bhatari Bhayawudi, insonga nibhabhwire amangʼana ga obhwikirisha na ekimari.

⁸ Mmbe woori, eneenda abharume bhasaasaamega mbaara gyone kutyo, enu bheemusiishe amabhoko iiguru. Bhakore kutyo bheerere emitima, bhatari na esungu, amwi kubhambashaanya.

⁹ Kutyokutyo eneenda na abhagasi bheerooshe, okufwara kwebhwe kwereshe obhwitongeeye bhwebhwe, bhabhe na ntungwa njomu na bhabhe mbeeyiinya. Bhaasiga okwiroosha kwa kusuka nfwiri, amwi ati ku-kufwara bhiinu bhya jaabhu na ebhindi bhinu ebhingʼarabhya, amwi ngibho gya bhugusi bhunene.

¹⁰ Tari bhabhe na ntungwa njomu, rwa kutyo abhagasi bhanu bheekirisiishe okuramya Nyamuwanga abheendwa bhabhe.

¹¹ Abhagasi, bheeyigire bheetegeeresiishe, na bhabhe bhoongwa.

¹² Nitakwikirisha omugasi okwiyigisha, nitakwikirisha mugasi okutunga omurume, tari bhabhe bheetegeeresha bha amangʼana.

¹³ Enaaika kutyo, kwa okubha Nyamuwanga ꞉aabhumbire Adaamu okwamba, niwe ˆnaabhumba Yeebha.

¹⁴ Na Adaamu ꞉ataajimiibhwe, tari omugasi niwe ꞉aajimiibhwe, ˆneengira mu-bhukayi.

¹⁵ Nawe abhagasi bharyerusibhwa okuturira ku-kwibhura kwebhwe, bhakagenderera ku-bhwikirisha, obhwendi, obhutaakatiifu, na gintungwa ginjomu.