1 Timoteeyo 1 - Iimuuma Iinyaaya

Obhukeesha

¹ Iinyarubha inu eniyikaama anye Pawuro. Anye niri mutumwa wa Kiriisitu Yeesu, okuriingʼaana na amaragiriro ga Nyamuwanga Omwerusi weeswe, na Yeesu Kiriisitu unu ekiisiga.

² Enikukaamira awe Timoteeyo, omwana waaniwaani unu ꞉neebhuuye mu-kuraasha kwani. Iinema, ekigongo, na omurembe okusooka ku-Raata Nyamuwanga na ku-Kiriisitu Yeesu Raatabhugenyi weeswe bhibhe amwi na awe.

Okwikenga na ameeyigisho ga okuyabhya

³ Bhunu ꞉neemukire okugenda mu-kyaro kya Makedooniya, ꞉naakwisaasaamire ugenderere okwikara mu-musi gwa Efeso ayo. ꞉Naakusabhire kutyo insonga ugaanye abhaanu abhandi bhanu abheeyigisha ameeyigisho ga orubheeyi bhaasiga okwiyigisha abhaanu ameeyigisho ga okubhayabhya.

⁴ Ubhabhwire bhaasiga okugwatira gingani, na oruroobhekano rwa amasiina ga obhwibhurwa ganu gatari na bhuteero. Amangʼana gayo agareeta mamba era, gatakusakira kiinu ku-kukuumisha emirimu ginu Nyamuwanga akiyaaye. Na emirimu giyo ekigikora kiri na obhwikirisha.

⁵ Nawe insonga ya amaragiriro ganu, ni kureeta obhwendani mu-Bhakiriisitu, obhwendi bhunu oweenda weerere omutima na okwikirisha kunu kutakusaasha obhubheeyi.

⁶ Abheeyigisha abhandi bhasigire gayo, bhayindukiiye okwaika amangʼana ganu gatari na bhwera.

⁷ Abheenda okubha bheeyigisha bha ebhiraagiro bhya Musa, nawe bhatakumenya kujomu ganu abheeyigisha bhakomeeresiishe.

⁸ Nawe eswe kimenyere ati ebhiraagiro bhya Musa ni bhijomu, raabhe omuunu akabhiiyigisha kujomu rwa kutyo eyeendwa.

⁹ Na kimenyere ati ebhiraagiro ꞉bhitaatuuywe-wo ku-nsonga ya abharengeresi, tari ku-nsonga ya bhanu bhatakukora kutyo ebhiraagiro ebhyenda, na ku-bhajeemi, ku-bhanu bhatakuramya Nyamuwanga na ku-bhakayi, ku-bhanu bhatari bha mitima myeru, ku-bhanu abhaaika amangʼana ga injabhuro ku-Nyamuwanga, ku-bheeti bha abhaanu, na ku-bhanu abheeta abheebhusi bheebhwe,

¹⁰ ku-bhataasi bha ameega, na ku-bhakundi bha abheejaabho, ku-bhanu abhasira abhaanu mu-bhugaya, ku-bhabheeyi, na ku-bhanu abharaira enu bhaaikire rurimi, na ku-bhindi bhyonebhyone bhinu bhitakwikirishaanya na ameeyigisho ga ekimari.

¹¹ Ameeyigisho gayo ageekirishaanya na Amangʼana Amajomu aga obhugungyo bhwa Nyamuwanga wa giinonkwe gyone kutyo. Na amangʼana gayo nigo ꞉naayaaywe na Nyamuwanga nigaraashe.

Iinema ya Yeesu Kiriisitu ku-Pawuro

¹² Anye noone enikumya Kiriisitu Yeesu Raatabhugenyi weeswe, unu ꞉aanaaye amanaga, kwa okubha ꞉aandorere ati niri mwitongeeye, ˆnaansora nikore emirimu gyaye.

¹³ Raabhé kutyo ku-bhwambiro ꞉naamufumaga na okunyansha abhaanu bhaaye, na ꞉naariga mujimya wa bhaanu. Nawe omwene ꞉aanfwiriiye ekigongo, kwa okubha ꞉naakoraga gayo kisiru na okurema okwikirisha kwani.

¹⁴ Iinema ya Raatabhugenyi weeswe Kiriisitu Yeesu ꞉yaasukirwe nyafu ku-anye, amwi na okwikirisha na obhwendi mu-kugwatana kweswe nawe.

¹⁵ Riingʼana rinu ni rya kimari, na riisire okwikirisibhwa ati, “Kiriisitu Yeesu ꞉eejire mu-kyaro, insonga eerushe abhaanu bha ebhikayo.” Na mu-bhaanu bhayo owa okwamba weebhwe ni anye.

¹⁶ Na ku-nsonga iyo, ꞉naafwiriiywe ekigongo, insonga okuturira ku-anye owa okwamba, Kiriisitu Yeesu eereshe obhusimbiiru bhwaye bhwone kutyo, nibhe ekirengekanyo ku-bhanu bharimwikirisha bharamire obhurame bhunu bhutakuweera.

¹⁷ Woori kiyaane Nyamuwanga ekibharo na obhugungyo kajaanende, kwa okubha niwe omukama, niwe atakutura kufwa, niwe atakurorwa, niwe omwene era, atariwo owundi. Amina.

Pawuro kaaragirira Timoteeyo okugwatirira obhwikirisha

¹⁸ Omwana waani Timoteeyo, enikuyaana riiragiriro riyo ririkusakira, okuriingʼaana na amangʼana ga obhuragi ganu ꞉gaaikirwe ku-awe, insonga okuturira ku-mangʼana gayo, uture okurwana kujomu riiremo.

¹⁹ Ugwatirire obhwikirisha bhwawo, weere omutima, waasiga okubha rwa abhandi bhanu ꞉bhaaremere, mbagwa mbasiga obhwikirisha bhwebhwe.

²⁰ Mu-bhaanu bhayo bharimo bha Yimenaayo na Arekijanda. Bhayo niyaaye Sitaani insonga bheeyigisibhwe, bhaasiga okujabhura Nyamuwanga.