1 Peetero 5 - Iimuuma Iinyaaya

Okwangarira abhaanu bha Nyamuwanga

¹ Woori enaaika na emwe abhakaruka bha riikanisa. Anye noone niri mukaruka weejaanyu, unu ꞉naarorere na ameeso gaani kutyo Yeesu Kiriisitu ꞉aanyankire. Kweki enirindirira okunyoora obhugungyo amwi nawe, runu obhugungyo bhwaye bhurituurwa ku-bhweru.

² Woori enibheesaasaama mubhe bhareefi bha abhaanu bha Nyamuwanga bhanu muyaaywe nawe okubhaangarira rwa kutyo omwene keenda. Mubhaangarire mwendere okusooka mu-mitima gyemwe. Mwasiga kwenda okuriywa giiyera, tari mwisooshe mwimaririiye ku-Nyamuwanga.

³ Mwasiga kubha abhatangasha bharuru ku-bhaanu bhanu omutangasha, nawe mubhe ekirengekanyo kijomu bhabheeyigirega-ko.

⁴ Mu-kabhaga kanu Omureefi Omukuru owa riikanisa arituurwa ku-bhweru, muriramira orusuurya rwa obhugungyo bhunu bhutakuwa-wo.

⁵ Emwe bhanu muri mw-ikura mwone, muungwe abhakaruka bheemwe. Yee, mwone kutyo mubhe mwituuraga emwaro, na mubhe musakiranaga na abheejaanyu, kwa okubha Makaamo agaaika ati, “Nyamuwanga atakwikirishaanya na bhanu abheeyeema, tari kaayaana iinema bhanu abheetuura emwaro.”

⁶ Mmbe woori, mwituure emwaro ku-kubhoko okwa obhuturo okwa Nyamuwanga, insonga akabhaga kaaye kakayika abhatuure iiguru.

⁷ Mwitwikye Nyamuwanga giinyanko gyemwe gyone kutyo, kwa okubha ebhaga ryone kutyo omwene angariiye okubhasakira.

⁸ Mwiyiinye, mwiyangariiyega ebhaga ryone kutyo, kwa okubha omusoko weemwe Sitaani ari rwa indwi inu eyingʼoona, keeyinda enu na enu ˆnaagaraga omuunu amumare-wo.

⁹ Mmbe mureme agaaye, mugenderere okukomeesha obhwikirisha bhwemwe ku-Nyamuwanga, mumenyerega ati Abhakiriisitu bheejaanyu mu-kyaro kyone kutyo abhanyanka rwa emwe.

¹⁰ Nawe mukamara akabhaga akafuyi kanu, aka iinyanko, Nyamuwanga owa iinema yoone kutyo, unu ꞉aabhabhirikiiye mwingire mu-bhugungyo bhwaye amwi na Yeesu Kiriisitu kajaanende, aribhayaana amanaga, obhwambiro obhujomu, na okubhasimbiisha.

¹¹ Nyamuwanga niwe ari na obhuturo kajaanende! Amina.

Amangʼana ga okuragana

¹² Nibhakaamiiye iinyarubha iimfuyi inu, kiri amwi na Siribhino, omwene woone ni mwiyigira weejaasu, nimumenyere kujomu ati ni muunu mwitongeeye. Na niwe aansakiiye okukaama iinyarubha inu, insonga kibhakomeeshe, na kibheereshe ati, inu niyo iinema ya Nyamuwanga eya ekimari. Woori kwa okubha mwamenyere kutyo, mwikomeeshe mugenderere okuyiikirisha.

¹³ Abheeyigira bheejaanyu abha Bhabheri anu, bhanu ꞉bhaasorerwe na Nyamuwanga rwa emwe, na omwana waani wa obhwikirisha Maariko, abhabhakeesha.

¹⁴ Mukeeshaanye mwendeene okusooka mu-mitima gyemwe. Enibhasabhira mwone kutyo bhanu mwikirisiishe Yeesu Kiriisitu, mubhe na omurembe. Amina.