1 Peetero 4 - Iimuuma Iinyaaya

Obhurame obhuyaaya

¹ Mmbe woori, kwa okubha Yeesu anyoorere iinyanko ku-mubhiri gwaye, emwe woone mwikirishe okunyanka rwa kutyo omwene anyankire, kwa okubha omuunu akeekirisha omubhiri gwaye gunyanke atakutungwa kweki na ebhikayo.

² Na woori, atakugenderera okukora amajomerwa amabhiibhi aga abhaanu bha ku-kyaro kunu, nawe kaakora ganu agajomisha Nyamuwanga ku-kabhaga kanu akyari nako, aka okwikara mu-kyaro kinu.

³ Riibhaga rya okukora amabhiibhi ganu abhaanu bhanu abharema Nyamuwanga abhakoraga, ryeesire. ꞉Mwariga mutaara ameega, munambaariiye okukora amabhiibhi, obhukorwa, okukora amagenyi aga okurya na okunywa obhwarwa na okuramya ebhisusano, riyo riremerwe na Nyamuwanga.

⁴ Abhaanu bhayo, abharuguura na bhatakumenya kubhaki mutakuyimbana nabho kweki okukora ebhikayo, na woori nibho abhabhafuma.

⁵ Nawe ku-nsonga ya gayo bhariramurirwa imbere wa unu ariwo okuramurira abharore na abhafuuye.

⁶ Kyakora abhaanu bhanu bharafuuye bhoone ꞉bhaaraasisiibhwe Amangʼana Amajomu aga Yeesu Kiriisitu bhakyari okufwa, insonga bhaaje bhari rwa abhaanu abhandi, na bhabhe bharore mu-myoyo rwa kutyo Nyamuwanga ari.

⁷ Obhuteero bhwa amangʼana goone kutyo bhuri ayeeyi, ambe woori mwikenge ku-goone ganu omukora, mwiyiinyega, insonga muture okusaasaama.

⁸ Riingʼana riinene okukira gayo goone kutyo, mwendane muno emwe abheene na abheene, kwa okubha obhwendani obhufundikira obhwafu bhwa ebhikayo.

⁹ Mugenʼyanega mu-misi gyemwe mutakujujuumirana.

¹⁰ Mubhe bhayambaasi bhajomu abha giinema gya mbaga nyafunyafu ginu Nyamuwanga abhayaaye, emwe mwone kutyo mwangarire ebhiyaanwa bhinu Nyamuwanga abhayaaye bhisakire na abhandi.

¹¹ Omuunu unu kaaraasha, ˆnaaraashe rwa omuunu unu atumirwe na Nyamuwanga. Na unu kaasakira abhandi, ˆnaasakire amenyere ati amanaga gayo ayaaywe na Nyamuwanga, insonga ku-mangʼana gayo goone kutyo Nyamuwanga agungibhwe okuturira ku-Yeesu Kiriisitu. Uyo niwe ari na obhugungyo na obhuturo kajaanende. Amina.

Okunyanka ku-nsonga ya Yeesu

¹² Abheendwa bhaani, musige okuruguurira iinyanko inu eyibhanyoora ku-nsonga ya okusakya obhwikirisha bhwemwe, muna kiinu kigenyi kw-imwe.

¹³ Nawe mujomerwe kwa okubha omuyimbana na Yeesu Kiriisitu mu-kunyanka kwaye, insonga mujomerwe muno ku-rusuku runu obhugungyo bhwaye bhurituurwa ku-bhweru.

¹⁴ Nyakara emwe bhakabhafuma ku-nsonga ya riisiina rya Yeesu Kiriisitu, omunyoora giinonkwe, kwa okubha obhugungyo bhwa Mwoyo Omutaakatiifu wa Nyamuwanga obhuuja okubha kw-imwe.

¹⁵ Aasiga kubha-wo muunu woonewoone agati weemwe unu kaayaanwa ebhirusho kwa okubha ati ni mwiti, ni mwifi, ni mukayi, amwi ati ni mugwatanya wa bhaanu.

¹⁶ Omuunu aasiga kwiswara akanyanka kwa okubha ati ni Mukiriisitu, nawe agungye Nyamuwanga, ku-nsonga ya okubhirikirwa riisiina riyo.

¹⁷ Akabhaga ka indamuro ya Nyamuwanga kayikire, na abhaanu bhaaye omwene, nibho kaambira-ko okuramurira. Woori akaambira kw-iswe, obhuteero bhwayo bhuribha kutiki ku-bhanu abharema okwikirisha Amangʼana Amajomu aga Nyamuwanga?

¹⁸ Amangʼana ganu agasusana na amakaamo ganu agaaika ati, “Raabhe ikakomeera omurengeresi okwerusibhwa, iribha kutiki ku-unu atakuramya Nyamuwanga na omukosi wa ebhikayo?”

¹⁹ Mmbe woori bhanu abhanyanka kwa okubha abhakora ganu Nyamuwanga keenda, bhatuure emitima gyebhwe ku-Nyamuwanga mbagendereraga okukora amajomu, kwa okubha uyo niwe Omubhumbi weebhwe akaaika aaikire.