1 Peetero 3 - Iimuuma Iinyaaya

Obhurame bhwa omuunu na mukaaye

^1-2 Nikwo kutyo, na abhagasi abhagabhurwa emwe mwone, muungwe abharume bheemwe. Insonga raabhe bhakabha-wo abharume bhanu bhatakwikirisha iingʼana ya Nyamuwanga, bhakaringira gintungwa gya abhagasi bheebhwe, bhafutwe na akatungiiye keebhwe, bheekirishe bhakyari na kubhwirwa engʼana.

³ Musige okubha bhaanu bha okujomya emibhiri era, okubha bha okusuka nfwiri, okufwara giijaabhu na gingibho gya obhugusi bhunene,

⁴ tari obhureesi bhwemwe bhwambire mu-mitima gyemwe. Obhureesi bhwa mu-mitima, ni okusiiriika mu-mutima na obhufura. Bhuyo nibhwo bhutakutura okunyamuka, na nibhwo bhwenderwe muno mu-meeso ga Nyamuwanga,

⁵ kwa okubha nikwo kutyo abhagasi bhanu bheekirishaga Nyamuwanga kara, ꞉bheejomyaga. ꞉Bhaariga mbeesiga Nyamuwanga, mboongwaga na abharume bheebhwe.

⁶ Owumwi wa abhagasi bhayo ni Saara omugasi wa Bhurayimu. Weeki ꞉oongwaga muno omurume waaye ˆnaamuyaanaga na ekibharo, ˆnaamubhirikiraga esebhugenyi. Mmbe woori, emwe mwone raabhe mukakora amajomu mutakuubhaya ryoneryone, omubha bhayara bhaaye.

⁷ Na abharume bhanu mugabhuuye emwe, mwikare na abhagasi bheemwe mwengeyere, mumenyega ati abheene bhatari na amanaga rwa emwe. Mubhayaane ekibharo mumenyerega ati abheene bhoone ni bhagabhi bha iinema ya obhurame amwi na emwe. Mukore kutyo insonga obhusaasaami bhwemwe bhusige kuyingwa na kiinu kyonekyone.

Okunyanka nuukoraga amajomu

⁸ Erya okumariisha, enibhabhwira mwone kutyo ati, muyimbane mubhe na mugambirano gumwi. Mwendane na mufwirane ekigongo, mubhe bheetegeeresha bha amangʼana, mwituuraga emwaro.

⁹ Mwasiga okuriya ebhisiyomba bhanu abhabhakorera amabhiibhi, amwi ati efumo na efumo, tari mubhakorere amajomu. Mubhe bhaanu bha kwendera abhandi giinonkwe, kwa okubha gayo nigo mubhirikiriiywe na Nyamuwanga, insonga mugabhe giinonkwe gyaye.

¹⁰ Ni rwa kutyo Amakaamo Amataakatiifu agaaika ati, “Woonewoone unu keenda okurama kujomu na okubha na amajomerwa, ayinge orurimi rwaye rusige kwaika mabhiibhi na omunwa gwaye gusige okubheeya.

¹¹ Eekenge na amabhiibhi, akore amajomu. Akore kutyo kaatura, okwagara omurembe na abheejaabho.

¹² Mukorega kutyo kwa okubha ameeso ga Raatabhugenyi garingiiyega abharengeresi, na amatwi gaaye agoongwa obhusaasaami bhwebhwe. Tari riisungu rya Raatabhugenyi riri ku-bhakosi bha amabhiibhi.”

¹³ Kana ni niga unu kaatura okubhakorera amabhiibhi raabhe kabhaga koone omwikomeesha okukora amajomu?

¹⁴ Nawe, nyakara emwe raabhe omunyanka ku-nsonga ya okukora obhurengeresi. Gakabha kutyo musige kuubhaya, musige na kwitimaata iiguru ya bhanu abhabhanyansha, tari mugungye Raatabhugenyi Yeesu Kiriisitu mu-mitima gyemwe.

¹⁵ Ebhaga ryone kutyo mumenye okusubhya kujomu omuunu woonewoone unu kaabhabhuusha iiguru ya obhwisige bhwa mu-mitima gyemwe. Nawe mukore kutyo muungwanire, mutarurire.

¹⁶ Mwere emitima gyemwe, kwa okubha muri bheeyigira bha Yeesu Kiriisitu, insonga bhanu abhabhakuurisha amabhiibhi, gintungwa gyemwe ginjomu gikore bheesware.

¹⁷ Nyakara omuunu okunyanka nuukoraga amajomu raabhe nikwo kutyo Nyamuwanga keenda, kukira okunyanka nuukoraga amabhiibhi.

¹⁸ Yeesu Kiriisitu woone ꞉aanyankire rumwi era ku-nsonga ya ebhikayo bhya abhaanu bhanu bhatari bharengeresi, insonga akigwatanye na Nyamuwanga. Nawe omwene ꞉aariga ari murengeresi. ꞉Eetirwe omubhiri, ˆnaayaanwa obhuworu okuturira ku-Mwoyo Omutaakatiifu.

¹⁹ Na okuturira Mwoyo uyo, ˆnaagenda anu emyoyo gya abhafuuye gibhoyerwe, ˆnaabharaasisha amangʼana ga Nyamuwanga.

²⁰ Emyoyo giyo ni gya abhaanu bhanu ꞉bhaariga bhatakuramya Nyamuwanga kara, akabhaga kanu Noowa ꞉aariga ˆnoombaka iimeeri. Nyamuwanga ꞉aabheeye musimbiiru ku-bhubhiibhi bhwebhwe okuyikira anu iimeeri ꞉yaawooye okuumbakwa, nawe ku-bhuteero abhaanu bhatooto, munaana era, nibho bhawonere okugegwa na amanji.

²¹ Kiyo ni ekirengekanyo kya obhubhatiisha bhwemwe mu-nsiku ginu. Obhubhatiisibhwa bhunu obhweresha ati mwerusiibhwe okusooka ku-rufu na indamuro, okuturira ku-bhuturo bhwa okusuuka kwa Yeesu Kiriisitu. Obhubhatiisibhwa bhuyo bhutari okwoga era, ati kusoosha eko ku-mubhiri, tari ni mitima gyeswe okwera mu-meeso ga Nyamuwanga.

²² Yeesu Kiriisitu ꞉aagendere mu-rwire na woori eekaaye orubhaara rwa ebhuryo orwa Nyamuwanga, kaatunga bhaamaraayika, abha obhuturo, na amanaga goone kutyo, bhyone kutyo bhiri emwaro waaye.