1 Peetero 2 - Iimuuma Iinyaaya

¹ Mmbe woori, musige obhubhiibhi bhwone kutyo, obhubheeyi, okwaika amangʼana ganu gatari mu-mitima gyemwe, orwango, na obhubheeyereshaanya.

^2-3 Woori anu mwamenyere ati Raatabhugenyi ari na ekigongo. Mmbe, mubhe rwa abhaana abhajaare kutyo abheenda amata ga bhaanyira, emwe mwone mukabhibhwe amata amajomu aga mu-mwoyo, insonga okuturira ku-gayo obhwerusha bhwemwe bhukure.

Abhaanu bha Nyamuwanga omutaakatiifu

⁴ Muuje ku-Yeesu, uyo niwe Riigina rinu eriisha omwoyo, rinu ryaremerwe na abhaanu, enu Nyamuwanga niryo ꞉aasorere, ꞉aariyaaye na ekibharo kinene.

⁵ Emwe mwone, muri rwa magina ganu ageesha emyoyo, na omugenderera okuumbakwa na Nyamuwanga mubhe nyumba gya mu-myoyo, abhakorere mubhe abhashengesi abhasorwa, musooshega ebhimweso bhya mu-myoyo bhinu ebhijomisha Nyamuwanga, okuturira kw-isiina rya Yeesu Kiriisitu.

⁶ Na Amakaamo Amataakatiifu goone agaaika ati, “Iitegeeresha, enituura riigina riikuru erya mu-rufuka mu-musi gwa Sayuuni, riigina riisorwa erya ekibharo, na woonewoone unu arimwikirisha atariiswara rusuku na rumwi.”

⁷ Riigina rinu ni rya kibharo ku-bhanu omwikirisha. Nawe ku-bhanu bhatakwikirisha, “Abhoombaki ꞉bhaaremere riigina rinu. Nawe, riigina rinu niryo ribheeye riigina riinene erya mu-rufuka.”

⁸ Kweki, “Riigina riyo ni egina rya okwikuujura-ko, na ni itare rya okugwisha abhaanu.” Abheekuujura kwa okubha bhaaremere okwikirisha Amangʼana ga Nyamuwanga, na nikwo kutyo ꞉bhaariga bhatuuriiywe-wo kwambira kara.

⁹ Nawe emwe mutari rwa bhayo, emwe ni emwe orwibhuro runu Nyamuwanga eesoreeye, abhashengesi bha obhukama. Na emwe ni bhaanu bhataakatiifu, abha Nyamuwanga omwene, bhanu ꞉aasorere okusooka mu-kisuute, ˆnaabheengisha mu-bhweru bhwaye obhwa okuruguusha, insonga muraashe ebhikorwa bhyaye ebhinene.

¹⁰ Kara ayo ꞉mwariga mutari bhaanu bha Nyamuwanga, nawe woori muri bhaanu bhaaye. Kweki ꞉mwariga mutakumenya ekigongo kya Nyamuwanga ku-bhaanu, nawe woori omukiramira.

Abheeyigira bha Yeesu abheendwa bhoongwe abhatangasha bhoone kutyo

¹¹ Abheendwa bhaani, emwe muri rwa abhagenyi na bhatusi era, mu-kyaro munu. Woori enibheesaasaama ati, mwikenge ku-majomerwa ga emibhiri gyemwe, ganu gatakwikirishaanya na emitima gyemwe.

¹² Mubhe na ntungwa njomu agati wa bhanu abharema Nyamuwanga, insonga raabhe bhakabhakuurisha ati omukora amabhiibhi, bharore ebhikorwa bhyemwe ebhijomu bhagungye Nyamuwanga orusuku runu ariija.

¹³ Emwe omuungwa Raatabhugenyi Nyamuwanga, ku-nsonga iyo mukorega ebhiraagiro bhyone kutyo bhinu abhakuru bha ekyaro abheenda mukore. Muyaane ekibharo omutungi weemwe omukuru owa mu-kyaro.

¹⁴ Kweki mukore gayogayo ku-bhatangasha bhanu abhatumwa na omukuru, okuuja okuyaana ebhirusho abhakosi bha amabhiibhi na okukumangya bhanu abhakora amajomu.

¹⁵ Ibhe kutyo, kwa okubha Nyamuwanga keenda mukorega amajomu insonga bhanu bhatari na bhwenge bhaasiga kubha na ryoneryone rya okubhajujuumira.

¹⁶ Mwikare mwiyagaarire, nawe obhwiyagaaro bhwemwe bhwasiga okubha njira ya okubhisaga amabhiibhi, nawe mwikare kutyo Nyamuwanga keenda abhajuuma bhaaye bheekare.

¹⁷ Muyaane ekibharo abhaanu bhoone kutyo. Abheeyigira abheene mwone, mwendane. Muramye Nyamuwanga. Muyaane omutungi omukuru ekibharo.

Mubhe bhasikiru rwa Yeesu kutyo ꞉aariga ari

¹⁸ Emwe abhagaya, muungwe muno bheesobhugenyi bheemwe, bhabhe na ntungwa njomu, bhabhe bharuru, bhabhe bhafura, emwe mubhayaane ekibharo.

¹⁹ Mukorega kutyo kwa okubha ni kujomu omuunu akasimbiira ku-bhinyansho bhinu kaabha eewoneeywe, ku-kabhaga kanu kaabha ˆnaakora aga okujomisha Nyamuwanga.

²⁰ Mutakujomisha Nyamuwanga mukabha muyaanwa ebhirusho ku-nsonga ya ebhikayo bhyemwe. Nawe mukabha mwigumiirisha muyaanwaga ebhinyansho ku-nsonga ya amajomu ganu mukorere, Nyamuwanga kaabheekirisha.

²¹ Gayo nigo mwabhirikiriiywe, na Yeesu Kiriisitu. Omwene woone, ꞉aanyankire ku-nsonga yeemwe. ˆNaabhasigira ekirengekanyo, insonga mubhe mwiyigirira-ko.

²² Omwene ꞉ataakorere ebhikayo, na okubheeya kwone atabheeyaga.

²³ Bhunu ꞉aafumirwe atasubhiishe efumo, bhunu ꞉aanyansibhwaga ꞉ataaikaga kyonekyone ati bhamuubhaye. Nawe goone kutyo ꞉aasigiiye Nyamuwanga omuramusi unu kaaramura arengeresiishe.

²⁴ Yeesu ꞉aagegere ebhikayo bhyeswe ku-mubhiri gwaye, ˆnaabhambwa ku-musarabha, insonga kifwe ku-mangʼana ga ebhikayo, na kiikare kirengeresiishe ku-ganu Nyamuwanga kaakena mu-bhurame bhweswe. Yeesu okuwutaasibhwa, emwe ꞉mwaworere.

²⁵ Emwe, ꞉mwariga mubhurire rwa giingʼondi ginu giyabhire injira, nawe woori musubhire ku-Mureefi weemwe, unu kaabhaangarira emyoyo gyemwe.