1 Peetero 1 - Iimuuma Iinyaaya

Obhukeesha

¹ Iinyarubha inu eniyikaama anye Peetero, omutumwa wa Yeesu Kiriisitu. Enibhakaamira emwe bhanu musorerwe na Nyamuwanga, bhanu munyarageene na okwikara mu-bhyaro bhya ebhugenyi ebhya Ponto, Garaatiya, Kapadokiya, Asiya na Bhituuniya.

² Raata Nyamuwanga ꞉aariga abhamenyere okwambira kara eyo ˆnaabhasora. Okuturira okwesibhwa na Mwoyo Omutaakatiifu, ꞉aabhakorere mubhe bhataakatiifu, insonga mumuungwe na mwesibhwe na amaanyinga ga Yeesu Kiriisitu. Nyamuwanga abhoongeshe iinema na omurembe.

Obhwikirisha bhweswe

³ Kikumangye Nyamuwanga, esemwene Raatabhugenyi weeswe Yeesu Kiriisitu. Okuriingʼaana na ekigongo kyaye kyafu, ꞉aakiibhuuye orwa akabhiri okuturira mu-kusuuka kwa Yeesu Kiriisitu okusooka mu-bhafuuye, insonga kinyoore obhwisige bhwa obhurame.

⁴ Na woori ekirindirira okugabha giinonkwe ginu Nyamuwanga abhiikiiye emwe bhaanu bhaaye mu-rwire. Giinonkwe giyo, gitakutura okubhora, okunyamuka, na okuwotoka.

⁵ Emwe mwikirisiishe Yeesu Kiriisitu, na okuturira ku-bhwikirisha bhwemwe, Nyamuwanga kaabhaangarira kujomu na amanaga gaaye, okuyikira anu okwerusibhwa kwemwe kurituurwa ku-bhweru mu-kabhaga ka obhuteero.

⁶ Mmbe, mujomererwe muno amangʼana gayo, raabhé kutyo woori anu mu-kabhaga akafuyi kanu, omutura okusurumbara ku-nsonga ya amasakyo maafumaafu ganu omunyoora.

⁷ Woori anu omusakibhwa, na amasakyo gayo, agakora obhwikirisha bhwemwe bhunu obhukira iijaabhu ekibharo, bhurorwe ati, ni bhwa kimari. Iijaabhu ni kiinu kinu ekinyamuka, nawe yoone eyisakibhwa mu-muriro okurorwa iisamaani yaayo, na nikwo kutyo na okwikirisha kwemwe. Na bhunu Yeesu Kiriisitu arisubha okwiyeresha ku-bhweru, aribhayaana obhugungyo na ekibharo.

⁸ Mukyariga okumurora, nawe omumwenda, raabhé kutyo mutakumurora woori, nawe omumwikirisha mujomeeywe muno, okujomerwa kunu kuri na obhugungyo bhunu bhutakwaikwa na muunu.

⁹ Omujomerwa, kwa okubha omuramira obhwerusha bhwa emyoyo gyemwe, na bhuyo nibhwo obhukene bhwa obhwikirisha bhwemwe.

¹⁰ Abharagi bha kara ꞉bheekomeesiishe muno okumenya obhwerusha bhuyo, mbaragaga iiguru ya iinema ya Nyamuwanga inu ibhayikiiye emwe,

¹¹ kwa okubha Mwoyo Omutaakatiifu wa Yeesu Kiriisitu ꞉aariga ari mu-mitima gyebhwe, ˆnaaragaga ati Yeesu arinyanka, na okumara iinyanko iyo arinyoora obhugungyo. Mmbe, abharagi bhayo ꞉bhaagaaye muno bhamenye ati amangʼana gayo garibha-wo rusukuki na garibha ku-bhaaga.

¹² Nyamuwanga ꞉aatuuriiye ku-bhweru abharagi bhayo ati amangʼana ganu ꞉bhaariga mbaraga, ꞉gaariga gari ku-nsonga yeemwe, itari ku-nsonga yeebhwe. Ganu ꞉bhaaikire nigo garya mwaraasisiibhwe na bhanu ꞉bhaabhareeteeye Amangʼana Amajomu ngaaikiraga Yeesu Kiriisitu. Abharaasha bhayo ꞉bhaabhatondeeye Amangʼana Amajomu gayo kwa obhuturo bhwa Mwoyo Omutaakatiifu unu ꞉aariga atumirwe okusooka mu-rwire. Amangʼana gayo bhaamaraayika bhoone abheegomba muno okugamenya.

Mutangasibhwe na Mwoyo Omutaakatiifu mu-bhurame bhwemwe

¹³ Mmbe woori, mwituurega-wo na mwiyangarire, mutuure obhwisige bhwone kutyo mu-nema inu murireeterwa akabhaga kanu Yeesu Kiriisitu arituurwa ku-bhweru mu-kyaro.

¹⁴ Emwe ni abhaana bha Nyamuwanga, woori mumuungwe, mwasiga okwikirisha okuseeta ginambá gyemwe ginu ꞉mwariga muri nagyo mukyari kumenya engʼana ryoneryone ejomu.

¹⁵ Nyamuwanga niwe abhabhirikiiye, weeki ni mweru wa omutima. Woori emwe mwone omwendwa mubhe bhataakatiifu mu-kurama kwemwe kwone,

¹⁶ kwa okubha mu-Makaamo gaaye Amataakatiifu kaaika ati, “Mubhe bhataakatiifu, kwa okubha anye niri mweru wa omutima.”

¹⁷ Emwe raabhe omubhirikira Nyamuwanga ati Raata, mumenye ati omwene atari na bhusoroori bhwonebhwone. Kaaja okuramurira muunu wumwiwumwi okuriingʼaana na ebhikorwa bhyaye. Raabhe ni kutyo, mmbe mumuramye mu-kabhaga keemwe koone kutyo kanu kasigaaye, aka okwikara ku-kyaro kunu muri abhagenyi.

¹⁸ Mwikarega mumenyerega ati Nyamuwanga ꞉ataasoosiishe ebhiinu bhinu ebhinyamuka rwa giiyera amwi jaabhu, okubhatuurya emwe okusooka mu-ntungwa gyemwe ginyamuke, ginu ꞉mwariga muramiiye okusooka ku-bhakaruka bheemwe.

¹⁹ Tari ꞉aaturiiye ku-maanyinga ga iisamaani aga Yeesu Kiriisitu. Yeesu ꞉aariga rwa iingʼondi inu ꞉yaariga itari ndema na itariko katogosi.

²⁰ Okwambira ekyaro kikyari okubhumbwa, Nyamuwanga ꞉aariga amenyere Yeesu na amutuuye-wo ku-nsonga inu. Nawe ˆnaarinda okuyikira ku-nsiku gya obhuteero ginu, niwe ˆnaamureeta, ˆnaamutuura ku-bhweru mu-meeso ga abhaanu bhoone kutyo. Na amangʼana gayo ꞉aagakorere ku-nsonga yeemwe.

²¹ Yeesu ꞉eejire insonga abhatangashe mwikirishe Nyamuwanga. Nyamuwanga niwe ꞉aamusuurire na okumuyaana obhugungyo, kiyo nikyo ekikora woori omwikirisha na okwisiga Nyamuwanga.

²² Mmbe woori kwa okubha mwikaaye okuriingʼaana na ameeyigisho ga ekimari aga Yeesu Kiriisitu, emitima gyemwe gyesiibhwe insonga muture okwendana na abheejaanyu. Mwikomeeshe mwendane mwimaririiye mu-mitima gyemwe gyone kutyo,

²³ kwa okubha emwe mwibhuuywe orwa akabhiri. Okwibhurwa kunu kutakusooka ku-bheesomwana, bhayo bheeki abhafwa, tari mwibhuuywe na engʼana eworu erya Nyamuwanga, ryeki ritakuyinduka kajaanende.

²⁴ Amakaamo Amataakatiifu goone agaaika ati, “Abhaanu bhoone bhari rwa amanyansi, na obhujomu bhwebhwe bhuri rwa amawuuwa ku-manyansi. Amanyansi agawotoka na amawuuwa ngaragara,

²⁵ nawe riingʼana rya Raatabhugenyi ryeki ritakuyinduka kajaanende.” Riingʼana riyo ni Amangʼana Amajomu ganu garaasiibhwe kw-imwe.