1 Abhateesaroonike 5 - Iimuuma Iinyaaya

Okuuja kwa Raatabhugenyi Yeesu

¹ Bhakiriisitu bheejaasu, bhutariwo bhukene bhwa kubhakaamira iiguru ya riibhaga na orusuku runu Raatabhugenyi arisubha,

² kwa okubha emwe abheene mumenyere kujomu ati orusuku runu Raatabhugenyi arisubha, ruritakya rwa mwifi kutyo akaaja mu-ngeta.

³ Bhunu abhaanu bharyaikaga ati, “Kiri na omurembe, na ekyaro kisiiriikire,” ayo niwe bharitaka era amangʼana ganyamukire, rwa kutyo omugasi wa inda kaataka era obhusungu bhumurumire. Na ataryerusibhwa na wumwi.

⁴ Nawe emwe, Abhakiriisitu bheejaasu, mutari mu-kisuute, ati orusuku ruyo rubhatakye rwa omwifi.

⁵ Kwa okubha emwe bhoone kutyo muri bhaana bha mu-bhweru, muri bhaanu bha mu-mwisi. Kitari bhaanu bha mu-ngeta, kitari bha mu-kisuute eswe.

⁶ Mmbe woori, kyasiga okubha rwa abhandi bhanu abhawongera ntiro, tari kiiyangarire na okwiyiinya.

⁷ Bhanu abhawongera ntiro, abhawongeraga mu-ngeta. Na abhakorwa bhoone, abhakorwaga mu-ngeta.

⁸ Nawe eswe, bhanu kiri bha mu-mwisi, kiiyiinye, okwikirisha kweswe na obhwendi bhweswe, bhibhe rwa ingubha mu-bhifubha bhyeswe. Na obhwisige bhwa okwerusibhwa kweswe, bhubhe rwa ingofiira ya ekyuma ku-mutwe.

⁹ Nyamuwanga ꞉ataakisorere eswe insonga ati riisungu ryaye riweere kw-iswe, tari ꞉aakisorere kinyoore obhwerusha, okuturira ku-Raatabhugenyi weeswe Yeesu Kiriisitu.

¹⁰ Yeesu niwe ꞉aafuuye ku-nsonga yeeswe, kiikare amwi nawe, kibhe kiri bhaworu, amwi ati kibhe kifuuye.

¹¹ Mmbe, mukomeeshaanyega emitima rwa kutyo omukoraga.

Gintungwa gya bhanu bheekirisiishe

¹² Woori Bhakiriisitu bheejaasu, ekibhasabha ati mumenye bhanu abhabhanyankirira, na okubhatangasha, okuturira kw-isiina rya Raatabhugenyi Yeesu, na bhayo nibho abhabhagonya.

¹³ Mubhayaane ekibharo muno, mubheende, ku-nsonga ya emirimu gyebhwe. Emwe abheene na abheene mwone, mubhe na omurembe.

¹⁴ Bhakiriisitu bheejaasu, ekibheesaasaama, mugonyega abharenga na okukomeesha bhanu bhafuuye emitima. Mukomeeshega bhanu bhatari na managa na okugegerana na bhaanu bhoone kutyo.

¹⁵ Mwangarire, muunu woonewoone akakorerwa amabhiibhi aasiga okusubhya amabhiibhi ku-weejaabho. Tari ku-nsiku mukorerane amajomu emwe abheene na abheene na ku-bhaanu bhoone kutyo.

¹⁶ Mujomerwe kiyana,

¹⁷ mwasiga kuyigwa okusabha.

¹⁸ Mukumye Nyamuwanga ku-mangʼana goone kutyo, kwa okubha nikwo kutyo Nyamuwanga keenda mukorega, mukamara okubha ku-Kiriisitu Yeesu.

¹⁹ Mwasiga okurema aga Mwoyo Omutaakatiifu.

²⁰ Kweki mwasiga kujeera obhuragi,

²¹ musakye amangʼana goone kutyo, nawe mugwate-mo amajomu.

²² Mwikenge na amabhiibhi goone kutyo.

²³ Anye noone enibhasabhira ku-Nyamuwanga ati, abhayaane omurembe, na abhasoosiishe-ko ebhikayo bhyone kutyo. Abhaangarire emyoyo, emitima, obhurame bhwemwe, na emibhiri gyemwe, insonga mwasiga kubha na masoro. Na abhaanu bhaasiga okubhaaika kubhiibhi okuyikira anu Raatabhugenyi Yeesu Kiriisitu ariija.

²⁴ Nyamuwanga omwene niwe abhabhirikiiye, kaaja okugakora ganu, kwa okubha omwene akaaika, aaikire.

Amangʼana ga okuragana

²⁵ Bhakiriisitu bheejaasu, mukisabhirega eswe kyone ku-Nyamuwanga.

²⁶ Mukeeshaanyega mwendeene Kikiriisitu.

²⁷ Enibheesaasaama kw-isiina rya Raatabhugenyi Yeesu ati, iinyarubha inu muyisomere Abhakiriisitu bhoone kutyo.

²⁸ Iinema ya Raatabhugenyi weeswe Yeesu Kiriisitu, ibhe amwi na emwe bhoone kutyo.