1 Abhateesaroonike 4 - Iimuuma Iinyaaya

Gintungwa ginu Nyamuwanga keenda

¹ Woori kinu ekisigara Bhakiriisitu bheejaasu, ꞉mweeyigiiye okusooka kw-iswe kutyo Nyamuwanga keenda mwikare, insonga mumujomishe. Ni kimari omukora kutyo. Woori, ekibhasabha nkibheesaasaama kwa bhuturo bhwa Raatabhugenyi Yeesu ati, mugenderere okukora kutyo na okwambuka.

² Mumenyere kujomu maragiriroki ganu ꞉kyabharagiriiye kwa bhuturo bhwa Raatabhugenyi Yeesu.

³ Nyamuwanga keenda musigane na obhutaasi bhwa ameega, mubhe bhaanu bhataakatiifu.

⁴ Emwe mwone musige kunyansibhwa na emibhiri gyemwe, mubhe bhataakatiifu, na mubhe bheetongeeye.

⁵ Musige kubha na nambá ya amabhiibhi rwa abhaanu bhanu bhatakwikirisha Nyamuwanga.

⁶ Kw-ingʼana riyo, muunu woonewoone aasiga kukayira Mukiriisitu weejaabho, amwi kumujimya. Rwa kutyo ꞉kyabhabhwiriiye ati, Raatabhugenyi Nyamuwanga kaaja okuramurira abhaanu bhanu abhakora ebhikayo rwa bhiyo.

⁷ Nyamuwanga ꞉ataakibhirikiiye kitungwe na ameega, tari ꞉aakibhirikiiye ati kiikare mu-bhutaakatiifu.

⁸ Mmbe, omuunu woonewoone unu kaarema ameeyigisho ganu, atakurema muunu, tari kaarema Nyamuwanga, unu kaabhayaana emwe Mwoyo Omutaakatiifu waaye.

⁹ Woori, bhutariwo bhukene bhwa kubhakaamira ati mwendane, kwa okubha emwe mwamarire okwiyigisibhwa na Nyamuwanga omwene, okwendana.

¹⁰ Ni kimari omukorera kutyo abheejaanyu bhoone kutyo, abheekasi bha Makedooniya. Nawe ekibhasabha muno Bhakiriisitu bheejaasu, mugenderere okwendana kutyo na okukira.

¹¹ Mwikomeeshe okusiiriika. Muunu woonewoone aasiga kwiyingisha mu-mangʼana ga abhandi, nawe akore emirimu gyaye omwene, rwa kutyo ꞉kyabharagiriiye.

¹² Mukore kutyo insonga mwereshe ntungwa njomu mu-meeso ga bhanu bhatari Bhakiriisitu, mukakora kutyo, mutakubha bhaanu bha kusabhiirisha ebhiinu bhya abhandi.

Abhakiriisitu bharisuuka

¹³ Nawe Bhakiriisitu bheejaasu, ekyenda mumenye amangʼana ga Abhakiriisitu bhanu bharafuuye, insonga mwasiga okusurumbara rwa abhaanu abhandi bhanu bhatari na obhwisige.

¹⁴ Eswe kimenyere ati Yeesu ꞉aafuuye, kweki ˆnaasuuka. Ku-nsonga iyo ekiisiga ati Nyamuwanga arisuurura abhaanu bhoone kutyo bhanu ꞉bhaafuuye bheekirisiishe Yeesu, ˆnaabhatuura amwi na Yeesu.

¹⁵ Ganu ekibhabhwira ni meeyigisho ga Raatabhugenyi Yeesu ati, eswe bhanu kiribha bhaworu, bhanu kirisigara-wo okuyikira bhunu omwene arisubha, kitaritangatira abhafuuye bhayo.

¹⁶ Raatabhugenyi Yeesu omwene ariika okusooka mu-rwire. ˆNaamura obhuku ˆnaasiiga rwa obhuraka bhwa maraayika omukuru, na riikombi rya Nyamuwanga ndirira. Ayo niwe bhanu ꞉bhaafuuye bheekirisiishe Kiriisitu, bharisuuka okwamba.

¹⁷ Niwe eswe bhanu kiribha-wo kiri bhaworu, kiriimusibhwa okuja iiguru nkigenda nabho mu-meere, insonga kiramirire Raatabhugenyi iiguru. Eyo niwe kiriikara amwi nawe kajaanende.

¹⁸ Mmbe woori mukomeeshaanyega na amangʼana gayo.