1 Abhateesaroonike 3 - Iimuuma Iinyaaya

Pawuro kaatuma Timoteeyo Teesaroonike

¹ Mmbe, ꞉kyataamiibhwe okusimbiira, kwa okubha ꞉kitaamenyere kiyo ꞉kyariga nkigenderera eyo. Niwe nkirora ati, eswe abheene kisigare mu-musi gwa Atene,

² nkituma Timoteeyo kw-imwe, omwene woone ni Mukiriisitu na omukosi weejaasu wa emirimu gya Nyamuwanga egya okuraasha Amangʼana Amajomu aga Kiriisitu. ꞉Kyamutumire okubhakomeesha emyoyo, na kubhasimbiisha mu-bhwikirisha bhwemwe.

³ ꞉Kyakorere kutyo insonga, muunu woonewoone aasiga kutitibhara ku-nsonga ya ebhinyansho bhiyo, kwa okubha emwe abheene mumenyere ati, kiisire kiturire mu-bhinyansho bhiyo.

⁴ Gayo mugamenyere kwa okubha bhunu ꞉kyariga kiri amwi na emwe, ꞉kyabhabhwiraga ati kirinyansibhwa. Nibhyo ebhinyansho bhiyo omunyoora woori.

⁵ Ku-nsonga iyo bhunu ꞉naataamiibhwe okusimbiira kweki, nintuma Timoteeyo kw-imwe, insonga nimenye kutyo omugenderera ku-bhwikirisha bhwemwe. ꞉Naamutumire abhasakire insonga Sitaani aasiga kuuja ˆnaabhasakya, kimwi emirimu gyeswe kw-imwe, ngibha ati kyakoreeye bhusa.

Amangʼana okusooka ku-Bhateesaroonike

⁶ Nawe woori Timoteeyo aasubhire eweeswe enu, okusooka kw-imwe, aakibhwira mangʼana amajomu aga obhwikirisha na obhwendi bhwemwe. Aakibhwira ati, ku-nsiku omukiyiita ku-majomu, na omuranga ku-nsiku okukirora rwa kutyo kyone ekibharanga.

⁷ Ku-nsonga iyo Bhakiriisitu bheejaasu, amangʼana iiguru ya obhwikirisha bhwemwe, gakikomeesiishe emyoyo mu-nyanko na mu-bhinyansho bhyeswe bhyone kutyo.

⁸ Woori ekiiyungwa ati kiri bhaworu, kwa okubha emwe musimbiirire ku-Raatabhugenyi Yeesu.

⁹ Woori ni nkumyoki ginu ekitura okuriya Nyamuwanga, ku-nsonga ya obhwikirisha bhwemwe, na ku-bhujomerwa obhunene bhunu kiri nabhwo ku-nsonga yeemwe mu-meeso ga Nyamuwanga?

¹⁰ Ngeta na mwisi kikomeeye okusaasaama Nyamuwanga ati, akisakire kweki kirorane na emwe, insonga kibhasakire kinu kisuuyire ku-bhwikirisha bhwemwe.

¹¹ Mmbe, Raata Nyamuwanga omwene, na Yeesu Raatabhugenyi weeswe, akikorere injira ya okuuja kw-imwe.

¹² Raatabhugenyi Yeesu abhoongeshe okwendana emwe abheene na okwenda abhandi bhoone kutyo, rwa kutyo eswe kibheendere.

¹³ Kweki abhasimbiishe emyoyo gyemwe gyasiga okubha na esoro, na mubhe bhaanu bha mitima myeru. Mwasiga okubha na ekikayo mu-meeso ga Nyamuwanga, Raata, bhunu Raatabhugenyi weeswe Yeesu ariija, ari na abhataakatiifu bhaaye bhoone kutyo.