1 Abhateesaroonike 2 - Iimuuma Iinyaaya

Emirimu ginu Pawuro ꞉aakorere Teesaroonike

¹ Bhakiriisitu bheejaasu, emwe abheene mumenyere kujomu ati eswe okuuja kw-imwe, ꞉kitaakoreeye bhusa.

² Mumenyere ati bhunu ꞉kyariga kikyari kuyika kw-imwe, ꞉kyanyansiibhwe na okufumwa mu-musi gwa Firipi. Nawe Nyamuwanga ꞉aakiyaaye amanaga ga okuraasha Amangʼana Amajomu aga Yeesu kw-imwe kiri na riibhaasi, raabhé kutyo ꞉kyaraasiishe kwa nyanko nene.

³ Ameeyigisho geeswe ganu ekibhakomeeresha, gatari ga kubhayabhya, kubhajabhisha, na kwaika mabhiibhi.

⁴ Tari, ekiraasha kwa okubha Nyamuwanga ꞉aakirorere ati kiisire, ˆnaakiyaana emirimu gya okuraasha Amangʼana Amajomu. Insonga itari kujomisha bhaanu, tari ekyenda okujomisha Nyamuwanga, uyo niwe kaamenya ganu geeyibhisire mu-mitima gyeswe.

⁵ Rwa kutyo emwe mwone mumenyere, ati ꞉kyariga kitakwaika amangʼana insonga mukyende, na okwaika mangʼana ganu gatari na kimari insonga kinyoore omuyeero kw-imwe. Nyamuwanga niwe kaakirora kujomu.

⁶ Eswe, ꞉kyariga kitakwenda bhaanu bhakigungye, kw-imwe, na ku-bhandi bhoone kutyo. Nawe eswe kyone, kiri bhatumwa bha Kiriisitu, ꞉kyariga kiri na obhuturo bhwa okwenda ebhiinu okusooka kw-imwe, nawe ꞉kitaakorere kutyo.

⁷ ꞉Kyariga kiri bhafura kw-imwe rwa omugasi kutyo kaarera abhaana bhaaye bhakyari.

⁸ Nikwo kutyo kyone ꞉kyariga kibheeganire muno, ꞉kyajomeeywe okubhayaana itari Amangʼana Amajomu aga Nyamuwanga era, tari na okwisoosha eswe abheene, kwa okubha emwe muri bheendwa bheeswe.

⁹ Bhakiriisitu bheejaasu, omuyiita ekituunyo kyeswe, kwa okubha ꞉kyakoraga emirimu mu-ngeta na mu-mwisi insonga kyasiga kusabhiirisha ebhiinu okusooka kw-imwe, enu nkibharaasishaga na Amangʼana Amajomu aga Nyamuwanga.

¹⁰ Emwe abheene ꞉mwarorere, na Nyamuwanga woone ꞉aarorere, ati intungwa yeeswe kw-imwe bhanu mwikirisiishe Nyamuwanga, ꞉yaariga iri njomu, ya obhurengeresi, itari na masoro.

¹¹ Mumenyere kujomu kweki ati, bhunu ꞉kyariga kiri kw-imwe, ꞉kyariga nkibhakorera rwa omwibhusi wa ekirume, kutyo kaakorera abhaana bhaaye. ꞉Kyabhakomeeshaga emitima, nkibhakomeeresha

¹² okugenderera okubha mukora ganu Nyamuwanga keenda. Uyo niwe kaabhabhirikira mwingire mu-bhukama, na mu-bhugungyo bhwaye.

¹³ Ku-nsonga iyo eswe kyone ekikumya Nyamuwanga kiyana, kwa okubha bhunu ꞉mwoonguuywe Riingʼana rya Nyamuwanga okusooka kw-iswe, ꞉mutaariramiiye muna engʼana rya bhaanu, tari muna engʼana rinu erisooka ku-Nyamuwanga, kimari nikwo kutyo gari. Riingʼana riyo niryo erikora emirimu mu-mitima gyemwe, emwe bhanu mwikirisiishe.

¹⁴ Bhakiriisitu bheejaasu, ganu ꞉gaanyoorere Abhakiriisitu mu-makanisa ga Nyamuwanga Ebhuyawudi eyo, nigo woori agabhanyoora na emwe. Abhaanu bhaanyu abhabhanyansha rwa kutyo na Abhayawudi ꞉bhaanyansibhwaga na abheejaabho.

¹⁵ Abhayawudi bhayo, nibho ꞉bheetire Raatabhugenyi Yeesu na abharagi bha kara. Kweki nibho ꞉bhaakibhirimiishe. Abhaanu bhayo ni bhasoko bha Nyamuwanga, na abhaanu bhoone kutyo.

¹⁶ Abhakigaanya kisige okuraasisha bhanu bhatari Abhayawudi Amangʼana Amajomu, na kutyo Nyamuwanga kaatura okubheerusha. Abhagenderera okwiyongesha ebhikayo ku-bhikayo bhyebhwe. Nawe woori obhusimbiiru bhwa Nyamuwanga ku-bheene bhwayika ku-bhuteero!

Pawuro na abheejaabho abheenda okunyookana na Abhateesaroonike kweki

¹⁷ Bhakiriisitu bheejaasu, okusigana kweswe na emwe ꞉kwariga kuri kwa ebhaga etooto era, na okusigana kuyo ꞉kwariga kuri kurema kurorana era, nawe mu-mitima nkibheeganiirishaga. Riibhaga ryone riyo, ꞉kyariga kyendere muno okubharora kweki.

¹⁸ Ku-nsonga iyo, ꞉kyeendaga kiije kw-imwe. Yee bha, anye Pawuro ꞉naariga niikena muno okuuja eyo kiyana, nawe Sitaani ˆnaakiyinga.

¹⁹ Ni emwe omukora nkibha na obhwisige ku-Raatabhugenyi Yeesu bhunu ariija. Ni emwe omukora nkijomerwa. Okugenderera kwemwe okwikirisha Raatabhugenyi, okukora nkiirora ati, ꞉kitaakoreeye bhusa.

²⁰ Kimari, ni emwe omukora nkiyeema na okujomerwa kunu ekijomerwa.