1 Abhateesaroonike 1 - Iimuuma Iinyaaya

Obhukeesha

¹ Iinyarubha inu eniyikaama anye Pawuro, kiri amwi na Siribhino na Timoteeyo. Ekibhakaamira emwe riikanisa rya Teesaroonike, emwe bhanu mwikirisiishe Raata Nyamuwanga na Raatabhugenyi Yeesu Kiriisitu. Iinema na omurembe bhibhe amwi na emwe.

Obhwikirisha bhwa Abhateesaroonike

² Ekikumya Nyamuwanga kiyana ku-nsonga yeemwe bhoone kutyo, nkibhasabhira ku-Nyamuwanga enu nkibhatogoraga na amasiina geemwe.

³ Eswe kyone bhunu ekibha nkibhasabhira ku-Raata Nyamuwanga ekiyiita emirimu gyemwe ginu omukora okuriingʼaana na obhwikirisha bhwemwe. Ekiyiita ekituunyo kyemwe kinu ekyeresha obhwendi bhwemwe ku-bhandi, na okurindirira kwemwe ku-bhwisige bhunu muri nabhwo ku-Raatabhugenyi Yeesu Kiriisitu.

⁴ Bhakiriisitu bheejaasu, emwe bhanu mwenderwe na Nyamuwanga, eswe kyone kimenyere kutyo abhasorere mubhe bhaanu bhaaye.

⁵ Kimenyere ati, bhunu ꞉kyaraashaga Amangʼana Amajomu kw-imwe, ꞉kitaaraashaga mangʼana ageene era. Tari ꞉kyaraashaga ku-managa na obhuturo bhwa Mwoyo Omutaakatiifu kiimaririiye kimwi. Emwe mumenyere kujomu kutyo gintungwa gyeswe ꞉gyariga giri kw-imwe, insonga kibhasakire.

⁶ Emwe ꞉mweeyigiiye kw-iswe, mwiyigira na ku-Raatabhugenyi Yeesu, raabhé kutyo ꞉mwanyoorere nyanko nyafu, ꞉mwaramiiye Riingʼana rya Nyamuwanga muri na amajomerwa ganu agasooka ku-Mwoyo Omutaakatiifu.

⁷ Okubha kutyo mweresiishe njira njomu ya okwiyigirira-ko mu-bheekirisha bha mu-bhyaro bhya Makedooniya na Akaya, bhoone kutyo.

⁸ Insonga ni ati, okuturira kw-imwe, abhaanu bhoonguuywe riingʼana rya Raatabhugenyi Yeesu. Itari ku-bhaanu bha mu-bhyaro bhya Makedooniya na Akaya era, tari obhwikirisha bhunu muri nabhwo ku-Nyamuwanga bhuswereene mbaara gyone kutyo. Woori eswe, kitari kweki na rindi rya kwaika.

⁹ Ekibhabhwira kutyo kwa okubha abhaanu bhayo abheene, nibho abhakibhwira kutyo emwe ꞉mwakiramiiye, na kutyo ꞉mwasigire okuramya emisambwa gyemwe, muyindukira okukorera emirimu Nyamuwanga unu keesha omwoyo, na owa ekimari.

¹⁰ Bhamenyere na kutyo omurindirira Omwana wa Nyamuwanga, unu Nyamuwanga ꞉aasuurire okusooka mu-bhafuuye, asubhe okusooka mu-rwire. Omwana uyo ni Yeesu, niwe eejire okukyerusha okusooka mw-isungu rya Nyamuwanga rinu ririija.