1 Abhakorinto 9 - Iimuuma Iinyaaya

Ganu abhatumwa abheendwa bhakorerwe

¹ Angu, anye niteeyagaarire? Anye nitari mutumwa? Anye ꞉nitaarorere Raatabhugenyi weeswe Yeesu? Angu emwe ꞉muteekirisiishe Raatabhugenyi okuturira mu-kuraasha kwani?

² Raabhe abhaanu abhandi abharora ati anye nitari mutumwa, nawe kw-imwe anye niri mutumwa, kwa okubha ni emwe ekibharikisho kya obhutumwa bhwani ati, nitumirwe na Raatabhugenyi.

³ Bhanu abhaaika ati anye nitari mutumwa, enibhabhuusha ati,

⁴ eswe kiteesire okurya na okunywa okusooka ku-mirimu gyeswe egya obhutumwa?

⁵ Omutoga ati eswe kitari na obhuturo bhwa okugenda na abhagasi Abhakiriisitu, mu-rugendo rweswe orwa okuraasha amangʼana ga Kiriisitu, rwa kutyo abhatumwa abhandi, na abhamura bhaabho Raatabhugenyi Yeesu, na Keefa, kutyo abhakora?

⁶ Angu, ni anye na Bharinaabha era nibho ekyendwa kikore emirimu egindi okunyoora ebhiinu bhinu ekikena?

⁷ Ni musirikareki unu kaagenda mw-iremo ˆneeriya omwene? Ni murimiki unu kaayamba emijabhiibhu mw-isambu, ˆnaasiga okurya amatwasho gaagyo? Na ni mureefiki unu kaareebha emyandu, ˆnaasiga okunywa amata ga emyandu giyo?

⁸ Amangʼana ganu enaaika, gatari ga bhaanu era, tari, na ebhiraagiro bhya Musa bhyone nikwo kutyo ebhyaika.

⁹ Mu-bhiraagiro bhya Musa ikaamirwe ati, “Iingʼombe ikabha niitaja obhuro okubhuwungurura, usige kuyibhoya omunwa.” Angu, Nyamuwanga kaaikira ngʼombe?

¹⁰ Atakukyaikira eswe? Yee, kaakyaikira! Amakaamo gayo ꞉gaakaamirwe ku-nsonga yeeswe, kwa okubha unu kaarima, na unu kaawuura, bhoone kutyo bheesire okwisiga okunyoora-ko ebhigeswa.

¹¹ Eswe ꞉kyabharaasisiishe amangʼana ga Kiriisitu, rwa omuunu unu kaayamba gimbibho. Angu, ni engʼana ebhiibhi emwe okukiyaana ebhyokurya?

¹² Raabhe abhandi bheesire okuyaanwa ebhiinu bhiyo okusooka kw-imwe, angu, eswe kiteesire okuyaanwa ebhiinu bhiyo okukira bhayo? Nawe eswe ꞉kiteendere mukikorere kutyo, tari kisimbiirire amangʼana goone kutyo, insonga kyasiga okukora abhaanu bhataamibhwe okwikirisha Amangʼana Amajomu ga Kiriisitu.

¹³ Angu, mutakumenya ati bhanu abhakora emirimu mw-iyekaru rya Nyamuwanga, abhanyoora ebhyokurya bhyebhwe okusooka mw-iyekaru muyo? Na mutakumenya ati bhanu abhakora emirimu gya kw-ishengero abhanyoora ebhyokurya bhyebhwe ku-bhinu ebhisooka kw-ishengero?

¹⁴ Nikwo kutyo Raatabhugenyi Yeesu woone ꞉aaragiriiye ati, abhaanu bhanu abharaasha Amangʼana Amajomu, bhanyoorega ebhyokurya bhyebhwe okusooka ku-mirimu giyo.

¹⁵ Nawe anye, nikyariga kwenda engʼana na rimwi ku-ganu niisire okuyaanwa. Na nitakukaama ganu, ati woori mwambe okuunaana. Ku-anye nyakara nifwe, nawe omuunu woonewoone aasiga okungaanya okwikumangya kwani kunu eniikumangya ku-nsonga ya okuraasha Amangʼana Amajomu.

¹⁶ Anye niteesire okwikumangya ku-nsonga ya okuraasha Amangʼana Amajomu, kwa okubha omurimu guyo nigwo niragiriiywe okukora. Na garinyoora nikasiga okuraasha Amangʼana Amajomu gayo.

¹⁷ Raabhe nikakora omurimu gunu kwa okwenda kwani omwene, eniisiga okunyoora ekiyaanwa. Nawe raabhe itari kwa okwenda kwani, mmbe Nyamuwanga aandorere ati niisire okukora emirimu giyo.

¹⁸ Mmbe woori ekiyaanwa kyani ni kiiya? Ekiyaanwa kyani, ni kuraasha Amangʼana Amajomu bhusa, kyakora nitakusabha okuyaanwa na ganu niisire okuyaanwa ku-nsonga ya okuraasha amangʼana gayo.

Amangʼana ganu abhatumwa abheendwa bhakore

¹⁹ Anye nitari mugaya wa muunu woonewoone, niiyagaarire. Nawe niikorere okubha mugaya wa abhaanu bhoone kutyo, insonga nisakire abhaanu bhaafu bheekirishe Kiriisitu.

²⁰ Ku-Bhayawudi, ꞉naariga niri rwa Omuyawudi, insonga nibhasakire bheekirishe Kiriisitu. Ku-bhagwati bhwa ebhiraagiro, ꞉naariga niri rwa omugwati wa ebhiraagiro insonga nibhasakire bheekirishe Kiriisitu.

²¹ Ku-bhanu bhatari na bhiraagiro bhya Musa, ꞉naariga niri rwa omuunu unu atari na ebhiraagiro bhiyo, insonga bhoone bheekirishe Kiriisitu. Itari ati anye nitari na bhiraagiro mu-meeso ga Nyamuwanga, tari niri nabhyo kwa okubha enitangasibhwa na ebhiraagiro bhya Kiriisitu.

²² Ku-bhanu bhatakomeeye mu-bhwikirisha, ꞉naariga niri rwa omuunu unu nitakomeeye mu-bhwikirisha, insonga nibhasakire bhoone bheekirishe Kiriisitu. ꞉Naakoraga gayo goone kutyo, ku-bhaanu bhoone kutyo, insonga okuturira ku-njira gyone kutyo, neerushe-mo abhaanu abhandi.

²³ Enikora gayo goone kutyo ku-nsonga ya Amangʼana Amajomu, insonga niyimbane na abhandi mu-nonkwe gyago.

²⁴ Angu, mutakumenya ati bhanu abhabhirimyaanya, abhabhirima bhoone kutyo, nawe unu kaanyoora ekiyaanwa ni wumwi era? Mmbe, mubhirime muno, insonga munyoore ekiyaanwa.

²⁵ Bhanu abhayajana mu-bhwenywa okwagara obhuyigi, abheeyinga ku-mangʼana agandi goone kutyo. Abhakora kutyo insonga bhanyoore orusuurya, raabhé kutyo orusuurya ruyo orunyamuka. Nawe eswe ekikora kutyo, insonga kinyoore orusuurya runu rutakunyamuka.

²⁶ Anye noone enibhirimyaanya kutyokutyo, nitari rwa unu atakumenya kinu kaabhirimira, na nitakubhuma ebhikundi rwa omuunu unu kaabhuma omuyaga.

²⁷ Tari eninasha omubhiri gwani okusimbiira amangʼana amakomeeye, insonga nikamara okuraasisha abhaanu Amangʼana Amajomu, anye omwene naasiga okuremwa na Nyamuwanga.