1 Abhakorinto 8 - Iimuuma Iinyaaya

Ebhyokurya bhinu bhisoosiibhwe okubha mugabho ku-bhisusano

¹ Mmbe, nikaaikira ebhyokurya bhinu bhisoosiibhwe okubha ebhimweso okushengera ku-bhisusano, kimenyere ati, eswe kyone kutyo kiri bhamenyi. Nawe obhumenyi obhukora abhaanu bheeyeeme. Tari, okwendana nikwo okukomeesha abhaanu mu-bhwikirisha.

² Omuunu akeerora ati amenyere riingʼana riirebhe, uyo atakumenya engʼana ryoneryone, rwa kutyo eyeendwa amenye.

³ Nawe omuunu akeenda Nyamuwanga, uyo amenyerwe na Nyamuwanga.

⁴ Mmbe woori, ku-rubhaara rwa okurya ebhyokurya bhinu bhisoosiibhwe bhibhe ebhimweso okushengera ku-bhisusano, kimenyere ati ebhisusano bhitari kyonekyone mu-kyaro munu. Na kimenyere ati ariwo Nyamuwanga wumwi era.

⁵ Ni kimari ati abhaanu abhandi abhatoga ati, emisambwa giri mu-rwire, giri na mu-kyaro. Kimari bhiriwo bhiinu bhyafu bhinu abhaanu abharamya mbaaika ati ni misambwa amwi ati bhakuru.

⁶ Nawe kw-iswe, ariwo Nyamuwanga wumwi era, niwe Raata, na niwe ꞉aabhumbire ebhiinu bhyone kutyo. Eswe kiriwo okumukorera emirimu. Na ariwo Raatabhugenyi wumwi era, niwe Yeesu Kiriisitu, unu ebhiinu bhyone kutyo ꞉bhyabhumbirwe okuturira ku-mwene, eswe kyone kirimo.

⁷ Nawe, itari ati abhaanu bhoone kutyo ni bhamenyi bha amangʼana gayo, kwa okubha bhariwo abhandi bhanu ꞉bhaariga bhanarire okuramya emisambwa. Na woori, bhakabha mbarya ebhyokurya bhinu bhisoosiibhwe okushengera emisambwa, abhayiita kutyo ꞉bhaaramyaga, mbeerora ati abhakora ebhikayo, kwa okubha bhakyari okukomeera mu-bhwikirisha.

⁸ Nawe ebhyokurya bhitakutura okukifugesha ayeeyi na Nyamuwanga, kwa okubha kikasiga okurya, kitakusoosibhwa-ko kiinu kyonekyone, na kikarya, kitakwongesibhwa kiinu kyonekyone.

⁹ Nawe mwangarire, obhwiyagaaro bhwemwe bhwasiga okwita emitima abhaanu bhanu bhakyari okukomeera mu-bhwikirisha.

¹⁰ Enaaika kutyo, kwa okubha omuunu unu akyari okukomeera mu-bhwikirisha, akakurora awe unu umenyere ati ebhisusano bhitakutura kukora kyonekyone nuurya ebhyokurya mw-iyekaru rya okuramisha ebhisusano, angu, atakuuja okwiganiirisha ati woone kaatura okurya ebhyokurya bhinu bhisoosiibhwe ebhimweso okushengera ebhisusano?

¹¹ Angu, utakurora ati okumenya kwawo okumara-wo Omukiriisitu weejaanyu unu akyari okukomeera mu-bhwikirisha, enu omwene woone Kiriisitu ꞉aafuuye ku-nsonga yaaye?

¹² Mmbe, mukakayira Abhakiriisitu bheejaanyu bhanu bhakyari okukomeera mu-bhwikirisha mubheeta emitima, omubha mukorere ebhikayo ku-Kiriisitu.

¹³ Woori, raabhe kinu anye enirya, ekiita omutima Omukiriisitu weejaasu, kimari nitakuuja okukirya kajaanende, insonga naasiga okwita omutima Omukiriisitu weejaasu.