1 Abhakorinto 7 - Iimuuma Iinyaaya

Amaragiriro iiguru ya obhugabhusi na obhugabhurwa

¹ Mmbe, nikaaikira amangʼana ganu ꞉mwankaamiiye, enibhabhwira ati, nyakara omurume asige okukuunʼya-ko omugasi.

² Nawe ku-nsonga ya obhutaasi bhwa ameega, nyakara omurume abhe na omugasi waaye omwene, omugasi woone abhe na omurume waaye omwene.

³ Omurume akore omugasi waaye kutyo eyeendwa, omugasi woone akorere omurume waaye kutyo eyeendwa.

⁴ Omugasi atari na bhuramusi ku-mubhiri gwaye, tari obhuramusi bhuri ku-murume waaye. Omurume woone atari na bhuramusi ku-mubhiri gwaye, tari obhuramusi bhuri ku-mugasi waaye.

⁵ Musige okwimana, amwi, mukabha mwikirishaanyiishe okukora kutyo kwa kabhaga kafuyi era, ku-nsonga ya okusaasaama Nyamuwanga. Mukamara, musubhirane kweki, Sitaani aasiga okubhasakya, ku-nsonga ya okutaamibhwa kwemwe okwiyiinya.

⁶ Naabhabhwira amangʼana gayo okubheekirisisha okusiga kwa kabhaga kafuyi ku-nsonga ya okusaasaama, nawe nitakubhasingʼiirisha.

⁷ Ku-bhwani naaneendere abhaanu bhoone kutyo bhabhe rwa kutyo anye niri, nawe omuunu wumwiwumwi Nyamuwanga amuyaaye ekiyaanwa kyaye, owundi kinu, owundi kinu.

⁸ Woori, enibhwira bhanu bhakyari okugabhura na bhanu bhafwiriiwe abharume ati, nyakara bheekare era rwa kutyo anye niri.

⁹ Nawe raabhe bhatakutura okwiyiinya, nyakara bhagabhure na okugabhurwa, kwa okubha ni nyakara okukora kutyo, bhaasiga okwitwa na obhusambaya.

¹⁰ Nawe bhanu bhaagabhureene, enibharagirira, na nitari anye omuragirisi, tari ni Raatabhugenyi Yeesu, niwe kaabharagirira ati, omugasi aasiga kutaana na omurume waaye.

¹¹ Nawe akataka ataanire nawe, aasiga okugabhurwa na omurume owundi, akataamibhwa, agende bhoongwane na omurume waaye bhasubhirane. Omurume woone aasiga okusiga omugasi waaye.

¹² Nawe abhaanu abhandi, ni anye woori enibhabhwira, atari Raatabhugenyi Yeesu. Enaaika ati, raabhe omurume Omukiriisitu ari na omugasi unu akyari okwikirisha Raatabhugenyi, nawe omugasi uyo eekirisiishe okugenderera okwikara nawe, aasiga okutaana nawe.

¹³ Na omugasi woone, raabhe ari na omurume unu akyari okwikirisha Raatabhugenyi, nawe omurume uyo eekirisiishe okugenderera okwikara nawe, aasiga okutaana nawe.

¹⁴ Enaaika kutyo, kwa okubha Nyamuwanga keesha omurume unu akyari okwikirisha, okuturira ku-mugasi waaye. Omugasi unu akyari okwikirisha woone, Nyamuwanga kaamwesha okuturira ku-murume waaye. Ikabheeye ati itari kutyo, abhaana bheemwe bhataakabheeye bhataakatiifu, nawe woori, ni bhataakatiifu.

¹⁵ Nawe unu akyari okwikirisha Raatabhugenyi akeenda okuwuruka, musige awuruke. Ayo Omukiriisitu uyo abhe murume, amwi ati abhe mugasi, atakubhoyerwa mu-bhugabhurwa na obhugabhusi bhuyo. Nawe Nyamuwanga akibhirikiiye kiikare kiri na omurembe.

¹⁶ Awe omugasi owumenya kutiki, amwi owutura okwerusha omurume waawo okuturira ku-bhwikirisha bhwawo? Na omurume woone, owumenya kutiki, amwi owutura okwerusha omugasi waawo okuturira ku-bhwikirisha bhwawo?

Abhaanu bhasigare kutyo Nyamuwanga ꞉aabhabhirikiiye bhari

¹⁷ Eyeendwa omuunu eekare kutyo Raatabhugenyi ꞉aamukorere abhe, na asigare kutyo Nyamuwanga ꞉aamubhirikiiye ari. Nikwo kutyo eniragirira mu-makanisa goone kutyo.

¹⁸ Raabhe omuunu ꞉aabhirikiiywe na Nyamuwanga aasaarirwe, asige kwikora ati atasaarirwe. Raabhe omuunu ku-bhusimukwa bhwaye bhatakusaarwa, na ꞉aabhirikiiywe na Nyamuwanga, asige okusaarwa.

¹⁹ Okusaarwa amwi ati okusiga okusaarwa kutari na bhwera. Ekiinu ekinene ni okuseeta ebhiraagiro bhya Nyamuwanga.

²⁰ Woori, abhaanu bhoone kutyo bhasigare rwa kutyo ꞉bhaariga bhari, bhunu Nyamuwanga ꞉aabhabhirikiiye.

²¹ Angu Nyamuwanga ꞉aakubhirikiiye uri mugaya? Riyo risige okukunyansha. Nawe raabhe ukanyoora injira ya okunyoora obhwiyagaaro, nyakara wiiyagaare.

²² Enaaika kutyo kwa okubha, omuunu unu ꞉aabhirikiiywe na Raatabhugenyi ari mugaya, uyo ku-Raatabhugenyi eeyagaarire. Na unu ꞉aabhirikiiywe atari mugaya, ni mugaya wa Kiriisitu.

²³ ꞉Mwagurirwe bhugusi bhunene, mwasiga okubha bhagaya bha abhaanu.

²⁴ Bhakiriisitu bheejaasu, musigare muri mu-meeso ga Nyamuwanga, rwa kutyo ꞉mwariga muri bhunu omwene ꞉aabhirikiiye.

Abhayarajuma na abhakimari bha ekigasi

²⁵ Ku-bhayarajuma, nitari na eragiriro okusooka ku-Raatabhugenyi Yeesu. Nawe enibharagirira, anye unu Nyamuwanga aansakiiye okuturira ku-kigongo kyaye okubha mwitongeeye.

²⁶ Anye enirora ati, ku-nsonga ya iinyanko inu iriwo, nyakara omuunu asigare kutyo ari.

²⁷ Nawe, raabhe ugabhuuye, siga okwenda okutaana na omugasi waawo. Raabhe ukyari okugabhura, siga okwenda okugabhura.

²⁸ Nawe raabhe ukagabhura, utakubha na kikayo. Omuyarajuma woone akagabhurwa, atari na kikayo. Tari, abhaanu rwa bhayo mu-kyaro anu, bharinyanka. Nawe anye nitakwenda bhanyoore giinyanko giyo.

²⁹ Bhakiriisitu bheejaasu, enaaika ati, akabhaga kanu kaasigaaye Kiriisitu asubhe, katari kareera. Mmbe, okwambira woori, bhanu bhari na abhagasi bhabhe rwa bhanu bhatari nabho.

³⁰ Na bhanu abharira, bhabhe rwa bhanu bhatakurira, bhanu bhajomeeywe, bhabhe rwa bhanu bhatajomeeywe, abhagusi bha ebhiinu bhabhe rwa bhanu bhatari na kiinu.

³¹ Na bhanu abhanyankirira obhurame bhwa mu-kyaro anu, bhabhe rwa bhanu bhatakunyankirira muno, kwa okubha amangʼana ga ku-kyaro anu agatura.

³² Eneenda musige okunyanka, kwa okubha omuunu unu akyari okugabhura, kaakora amangʼana ga Raatabhugenyi, kutyo kaatura okumujomisha.

³³ Nawe unu agabhuuye, kaanyankirira aga ku-kyaro kunu, kutyo kaatura okujomisha omugasi waaye.

³⁴ Na bhuriwo obhutaashaanya bhwa omugasi omugabhurwa na omuyarajuma. Omuyarajuma omwene kaanyankirira amangʼana ga Raatabhugenyi, insonga abhe mutaakatiifu mu-mwoyo na ku-mubhiri. Nawe omugasi unu agabhuuywe, kaanyankirira amangʼana ga ku-kyaro kunu, kutyo kaatura okujomisha omurume waaye.

³⁵ Nitakwaika amangʼana gayo insonga nibhagaanye, tari eneenda okubhasakira. Eneenda mubhe kutyo eyeendwa, mukorerega Raatabhugenyi emirimu na mutima gumwi.

³⁶ Omuunu woonewoone unu kaarora ati itari kujomu okusiga okugabhura omuyarajuma unu asandire obhuko, na raabhe obhusambaya bhwamuyigire, na omwene kaarora ati nyakara agabhure, ˆnaakore kutyo keenda, agabhure era, kaabha atakorere ekikayo.

³⁷ Raabhe omuunu aramuuye mu-mutima gwaye omwene ati atakugabhura, na kitariwo ekiinu kinu ekimusingʼiirisha okugabhura, omuunu rwa uyo akatura okwiyiinya, kaabha akorere kujomu.

³⁸ Mmbe, unu kaaramura okugabhusha omuyarajuma waaye, kaakora kujomu. Na unu atakumugabhusha, omwene woone kaakora kujomu muno.

³⁹ Omugasi omugabhurwa, kaabha abhoyerwe mu-bhugabhurwa, mu-kabhaga koone kutyo kanu omurume waaye kaabha akyari okufwa. Nawe omurume waaye akafwa, ayo kaatura okugabhurwa na omurume woonewoone unu omwene keenda, nawe omurume uyo abhe ˆneekirisha Raatabhugenyi.

⁴⁰ Nyakara omukimari uyo eekare omwene era, asige okugabhurwa. Nikwo kutyo anye enirora, enigamba ati, anye noone niri na Mwoyo wa Nyamuwanga.