1 Abhakorinto 6 - Iimuuma Iinyaaya

Okusitaakyanya kwa Abhakiriisitu

¹ Raabhe omuunu akabha na riingʼana rya okusitaakya Omukiriisitu weejaabho, kaatura kutiki okusira ekiina kyaye ku-bhaanu bhanu bhatakwikirisha Nyamuwanga, ˆnaasiga okusira ku-bhataakatiifu?

² Mutakumenya ati abhataakatiifu nibho bhariramurira ekyaro kinu? Mmbe, raabhe ni emwe muriramurira ekyaro kinu, kubhaki omutaamibhwa okuramura ebhiina ebhitooto agati weemwe?

³ Mutakumenya ati kiriramurira na bhaamaraayika? Raabhe ni kutyo, omwendwa mumarega amangʼana geemwe aga ku-nsiku.

⁴ Ndora mukabha na amangʼana ga okusitaakyanya rwa gayo, omusirira abhaanu bha anja, bhanu bhatakuyaanwa ekibharo mw-ikanisa, musiga okuyaana abha mw-ikanisa okubha abharamusi?

⁵ Enaaika kutyo insonga mwisware. Angu, eyitura okubha ati agati weemwe atariwo omuunu na wumwi unu ari na obhwenge, unu kaatura okuramura ebhiina mu-Bhakiriisitu?

⁶ Nawe emwe Abhakiriisitu, omusitaakyanya emwe abheene na abheene ku-bhaanu bhanu bhatakwikirisha Nyamuwanga!

⁷ Ekimari ni ati, okusitaakyanya kwemwe kuyo, ni kutaamibhwa. Toga nyakara mwikirishe okukorerwa amabhiibhi na okuteesibhwa ebhiinu bhyemwe?

⁸ Nawe woori ni emwe omukorera abhaanu amabhiibhi, na omubhateesha ebhiinu bhyebhwe. Yee, omukora kutyo na ku-Bhakiriisitu bheejaanyu!

⁹ Mutakumenya ati abhakosi bha amabhiibhi bhatariingira mu-bhukama bhwa Nyamuwanga? Mwasiga okwijimya! Abhataasi bha ameega, bhanu abharamya ebhisusano, abhakundi bha abharume bheejaabho,

¹⁰ abheefi, abheemi, abhakorwa, abhafumi bha abhaanu, na bhanu abhateesha abhaanu ebhiinu bhyebhwe, bhayo bhoone kutyo bhatariingira mu-bhukama bhwa Nyamuwanga.

¹¹ Na abhandi agati weemwe ꞉mwariga muri kutyo. Nawe woori, okuturira kw-isiina rya Raatabhugenyi weeswe Yeesu Kiriisitu, na ku-Mwoyo wa Nyamuwanga, mwesiibhwe, mubharwa ati muri bharengeresi mu-meeso ga Nyamuwanga.

Abhakiriisitu bhagungye Nyamuwanga ku-mibhiri gyebhwe

¹² Omuunu kaatura okwaika ati, “Anye nitakusisha okukora kyonekyone kinu eneenda.” Nawe anye enaaika ati, ebhindi bhitari bhijomu. Eniikirisha ati nitakusisha kiinu, nawe nitakwenda okutungwa na ekiinu kyonekyone.

¹³ Omuunu kaatura okwaika ati, “Ebhyokurya bhiriwo okuja mu-nda, na inda iriwo okuramira ebhyokurya.” Nikwo kutyo, nawe Nyamuwanga aribhisoosha-wo bhyone kutyo bhibhiri, inda na ebhyokurya. Nawe omubhiri gutari gwa okutaarira ameega. Enaaika kutyo, kwa okubha Nyamuwanga ꞉ataabhumbire emibhiri ku-nsonga ya obhutaasi bhwa ameega, tari ꞉aagibhumbire insonga gimukorere emirimu, na omwene niwe kaangarira emibhiri gyeswe.

¹⁴ Okuturira ku-bhuturo bhwaye, Nyamuwanga arikisuura kyone, rwa kutyo ꞉aasuurire Raatabhugenyi.

¹⁵ Mutakumenya ati emibhiri gyemwe ni bhigwatanya bhya Kiriisitu? Angu, nigege ebhigwatanya bhya Kiriisitu nibhiyindure bhibhe bhya omusimbe? Wuri itari kutyo!

¹⁶ Mutakumenya ati omuunu woonewoone unu keengirirana na omusimbe, kaabha mubhiri gumwi nawe? Ni rwa kutyo ikaamirwe mu-Makaamo Amataakatiifu ati, “Abhabhiri bhayo bharibha mubhiri gumwi.”

¹⁷ Nawe omuunu unu agwatanyiibhwe na Raatabhugenyi, kaabha mwoyo gumwi nawe.

¹⁸ Mmbe, mwikenge na obhutaasi bhwa ameega. Ebhikayo ebhindi bhyone kutyo, omuunu kaabhikora bhiri anja wa omubhiri gwaye, nawe omuunu unu kaataara ameega, uyo kaakora ebhikayo ku-mubhiri gwaye omwene.

¹⁹ Mutakumenya ati emibhiri gyemwe ni yekaru rya Mwoyo Omutaakatiifu unu ari mw-imwe, unu ꞉mwayaaywe na Nyamuwanga? Mmbe, emibhiri giyo gitari gyemwe, ni gya Nyamuwanga,

²⁰ kwa okubha ꞉mwagurirwe bhugusi bhunene. Mmbe woori, mugungye Nyamuwanga ku-mibhiri gyemwe.