1 Abhakorinto 4 - Iimuuma Iinyaaya

Emirimu gya abhatumwa

¹ Abhaanu bhakibhare ati kiri bhajuuma bha Kiriisitu, kiyaaywe omurimu gwa okuraasha amangʼana ga Nyamuwanga ganu ꞉gaariga geeyibhisire.

² Mmbe, omuunu unu ayaaywe emirimu gya Nyamuwanga, keendwa abhe mujuuma mwitongeeye.

³ Nawe ku-rubhaara rwani, itari kiinu nikaramurirwa na emwe, amwi ati niramurirwe na abharamusi bha mw-ibharaja. Na anye omwene woone nitakwiramurira,

⁴ kwa okubha nitakurora engʼana ebhiibhi ryoneryone mu-mutima gwani erya okwisitaakisha-ko. Nawe nitakubharwa ati niri murengeresi ku-nsonga iyo, tari Raatabhugenyi Yeesu niwe kaandamurira.

⁵ Mmbe, mwasiga okuramurira abhaanu akabhaga kakyari okuyika-wo, murindirire orusuku runu Raatabhugenyi Yeesu ariija. Omwene niwe arituura abhweru amangʼana goone kutyo ganu geeyibhisire aga mu-kisuute, na arituura abhweru ganu gari mu-mitima gya abhaanu. Niwe abhaanu bhoone kutyo bharinyoora ginkuma gyebhwe okusooka ku-Nyamuwanga, okuriingʼaana na kutyo bheesire okukumangibhwa.

⁶ Bhakiriisitu bheejaasu, amangʼana gayo goone kutyo naagarengekanya ku-anye, na Apooro, ku-nsonga yeemwe. Okuriingʼaana na ekirengekanyo kiyo, musombookerwe amangʼana ganu agaaika ati, “Mwasiga okwambuka ganu ꞉gaakaamirwe mu-Makaamo Amataakatiifu.” Mukamenya gayo, ataribha-wo omuunu woonewoone unu ariikumangisha omuunu omurebhe, ˆnaajeera owundi.

⁷ Angu, ni niga, unu akorere awe okubha kujomu okukira abhandi? Ni kiinuki kinu uri nakyo, kinu ꞉utaayaaywe na Nyamuwanga? Raabhe ꞉waayaaywe, kubhaki owiikumangya muna ꞉utaayaaywe?

⁸ Woori omwirora ati mwanyoorere ebhiinu bhyone kutyo bhinu omukena! Omwirora ati mwaniibhire! Mwabheeye bhakama, raabhé kutyo eswe kitari abhakama! Nyakara mukabheeye bhakamakaama, insonga eswe kyone kitunge amwi na emwe!

⁹ Nawe enirora ati Nyamuwanga akikorere eswe abhatumwa okubha bhaanu bhanu ekijeerwa okukira abhaanu bhoone kutyo. Kiri rwa abhaanu bhanu bharamuriiywe okwitwa. Kikorerwe rwa abhaanu bha okusekwa mu-kyaro, ku-bhaamaraayika na ku-bhaanu.

¹⁰ Abhaanu bhaafu abhakirora ati eswe kiri bhasiru, kwa okubha ekikorera Kiriisitu emirimu, nawe emwe omwirora ati muri bheenge kwa okubha omuseeta Kiriisitu. Abhaanu abhakirora eswe ati kitari na managa, nawe emwe omwirora ati muri na amanaga. Abhaanu abhakijeera eswe, nawe emwe omwirora ati muri na ekibharo.

¹¹ Na woori anu, eswe kiri na omweko na obhwiro, na ekiyenga kinaabhi, ekibhumwa, na kitari na bhwikaro.

¹² Ekiikomeesha muno okukora emirimu gyeswe kwa amabhoko geeswe abheene. Abhaanu bhakakifuma, ekibhasabhira giinonkwe. Bhakakinyansha, ekisimbiira.

¹³ Bhakakibheeyeresha, ekibhasubhya kifuraaye. Abhakirora rwa obhukoote bhwa ku-kyaro, nikwo kutyo abhaanu bhoone kutyo abhakirora na woori.

¹⁴ Nitakubhakaamira amangʼana gayo insonga nibhaswashe, tari eneenda okubhagonya rwa abhaana bhaani abheende,

¹⁵ kwa okubha raabhé kutyo muri na bheeyigisha bhaafu bhanu abhabheeyigisha iiguru ya Kiriisitu Yeesu, nawe mutari na bheesomwana bhaafu. Ni anye ꞉naabheebhuuye mu-bhwikirisha, okuturira ku-kuraasha Amangʼana Amajomu kw-imwe.

¹⁶ Mmbe, enibheesaasaama ati muringirire ku-anye kutyo enikora.

¹⁷ Insonga iyo niyo eyikora nitume Timoteeyo kw-imwe, omwene ni mwana waani omwende, omwitongeeye mu-kukora emirimu gya Raatabhugenyi. Kaaja okubhayiitya kutyo anye niikaaye mu-bhuyimbani bhwani na Kiriisitu Yeesu, okuriingʼaana na kutyo eniiyigisha abhaanu mbaara gyone kutyo mu-makanisa goone kutyo.

¹⁸ Abhandi agati weemwe abheeyeema, kwa okubha abhatoga ati nitakyasubha kweki kw-imwe eyo.

¹⁹ Nawe Raatabhugenyi akeenda, eniija okubhasubha-ko bhwangu. Nikaaja eyo eniija okwenda okumenya ganu abheeyeemi bhayo abhaaika, nimenye na amanaga geebhwe.

²⁰ Enaaika kutyo kwa okubha obhukama bhwa Nyamuwanga, bhutakubha ku-kwaika mangʼana era, tari munomuuno ni ku-managa.

²¹ Angu, omwenda nikore kiinuki? Nibhaaje-ko na nsimbo? Amwi ati omwenda niije na mwoyo gwa obhufura na obhwendi?