1 Abhakorinto 3 - Iimuuma Iinyaaya

Omugambirano ku-mirimu gya Nyamuwanga

¹ Abhakiriisitu bheejaasu, bhunu ꞉naariga niri kw-imwe ꞉naariga nitakwaika na emwe rwa abhaanu bhanu abhatangasibhwa na Mwoyo Omutaakatiifu. Tari, ꞉naariga naaika na emwe rwa abhaanu bhanu abhatangasibhwa na obhusimukwa bhwa ebhikayo, rwa abhaana abhajaare mu-bhwikirisha bhweswe ku-Kiriisitu.

² ꞉Naariga nimbanywesha amata era, nitakubhayaana ebhyokurya ebhya abhaanu abhakuru, kwa okubha ꞉mwariga mukyari okutura okubhirya. Yee, na woori mukyari okutura okubhirya,

³ kwa okubha na woori mukyatangasibhwa na obhusimukwa bhwemwe obhwa ebhikayo. Angu, raabhe agati weemwe mukyari na orwango na giinyombo, gayo gatakweresha ati mukyatangasibhwa na obhusimukwa bhwemwe obhwa ebhikayo, na akatungiiye keemwe muri rwa abhaanu bha ku-kyaro kunu era?

⁴ Enaaika kutyo kwa okubha raabhe omuunu kaaika ati, “Anye niri muunu wa Pawuro,” owundi ˆnaaika ati, “Anye niri wa Apooro.” Gayo gatakweresha ati, akatungiiye keemwe kari rwa aka abhaanu bha ku-kyaro kunu?

⁵ Mmbe, Apooro ni niga? Anye Pawuro ni niga? Eswe kiri bhajuuma era bhanu Nyamuwanga ꞉aatumire kibhasakire insonga mumwikirishe. Eswe wumwiwumwi kaakora emirimu ginu, okuriingʼaana na kutyo ꞉aayaaywe na Raatabhugenyi.

⁶ Anye ꞉naayambire gimbibho, Apooro ˆneetirira, nawe unu kaagimesha ngikura ni Nyamuwanga.

⁷ Mmbe, owa okuringira atari unu kaayamba gimbibho, amwi ati unu keetirira, tari owa okuringira ni Nyamuwanga uyo niwe kaakusha.

⁸ Unu kaayamba na unu keetirira bhoone kutyo bhariingʼeene, nawe Nyamuwanga ariyaana wumwiwumwi ekiyaanwa kyaye, okuriingʼaana na kutyo omuunu ꞉aakorere emirimu gyaye.

⁹ Enaaika kutyo kwa okubha eswe bhoone kutyo kiri bhakosi bha emirimu gya Nyamuwanga, emwe muri esambu rya Nyamuwanga, na muri nyumba ya Nyamuwanga.

¹⁰ Okuriingʼaana na iinema ya Nyamuwanga inu ꞉aanaaye, aansakiiye okuumbaka omusingi rwa omuumbaki omujomu unu ari na obhwenge, na omuumbaki owundi, koombaka ku-musingi guyo. Nawe, woonewoone unu koombaka-ko aangarire kujomu kutyo koombaka ku-musingi guyo.

¹¹ Atariwo omuunu unu kaatura okutuura-wo omusingi ogundi, kwa okubha omusingi gunu gwamarirwe okutuurwa-wo, ni Yeesu Kiriisitu omwene.

¹² Ku-musingi guyo, omuunu kaatura okuumbaka-ko na jaabhu, na ebhyuma, na amagina ga obhugusi obhunene, na amati, na amasha, amwi ati na amanyansi, emirimu gya abhaanu bhoone kutyo girituurwa ku-bhweru.

¹³ Emirimu giyo girituurwa abhweru ku-rusuku rwa indamuro, rurigituura abhweru gyone kutyo mu-muriro. Omuriro guyo gurisakya emirimu gya abhaanu gumwigumwi, kutyo guri.

¹⁴ Raabhe emirimu gya omuunu gikatama okurungura, omuunu uyo ariramira ekiyaanwa.

¹⁵ Nawe emirimu gya omuunu gikarungura, kaabha afwiriiwe-mo, nawe omwene aryerusibhwa rwa omuunu unu awoneeye ntererukira okwingira mu-muriro.

¹⁶ Angu, mutakumenya ati emwe muri eyekaru rya Nyamuwanga, na Mwoyo wa Nyamuwanga eekaaye mw-imwe?

¹⁷ Mmbe, raabhe omuunu woonewoone akanyamura riiyekaru rya Nyamuwanga, Nyamuwanga arimunyamura, kwa okubha rya Nyamuwanga ni iitaakatiifu, na ni emwe riiyekaru riyo.

¹⁸ Omuunu woonewoone aasiga okwijimya omwene. Omuunu agati weemwe unu keerora ati ni mwenge mu-kyaro kinu, ˆnaabhe mutengʼo, insonga anyoore obhwenge bhwa ekimari.

¹⁹ Akore kutyo, kwa okubha obhwenge bhwa mu-kyaro anu, ni bhusiru mu-meeso ga Nyamuwanga. Rwa kutyo ikaamirwe mu-Makaamo Amataakatiifu ati, “Nyamuwanga kaagwata abha obhwenge mu-bhungʼeeni bhwebhwe.”

²⁰ Ikaamirwe kweki ati, “Raatabhugenyi amenyere ati, obhwiganiirisha bhwa abhaanu bha obhwenge, bhutari na bhwera.”

²¹ Mmbe, omuunu woonewoone aasiga okwikumangisha omuunu omurebhe, kwa okubha eswe kyone kutyo Nyamuwanga akituuye-wo okubhasakira emwe,

²² nibhe anye Pawuro, abhe Apooro, amwi ati Keefa. Nyamuwanga abhayaaye ebhiinu bhyone kutyo okubhasakira, bhibhe bhya mu-kyaro, amwi ati obhurame, amwi ati orufu, bhibhe bhinu bhiriwo woori, amwi ati bhinu bhiribha-wo, bhyone kutyo ni bhyemwe.

²³ Na, emwe muri bha Kiriisitu, na Kiriisitu ni wa Nyamuwanga.