1 Abhakorinto 2 - Iimuuma Iinyaaya

Okuraasha amangʼana ganu agaaikira Yeesu Kiriisitu

¹ Abhakiriisitu bheejaasu, bhunu ꞉neejire kw-imwe okubharaasisha imbisike ya Nyamuwanga, ꞉nitaaikaga kwa bhujomu bhwa amangʼana amwi ati kwa obhwenge.

² Bhunu ꞉naariga niri kw-imwe, ꞉naaramuuye ati, naaikire Yeesu Kiriisitu era, munomuuno, naaikire okusungwa kwaye ku-musarabha.

³ Akabhaga kayo ꞉naariga niiyungwa nirebhere ku-bhwaiki, ꞉naariga nuubhayire niiyararaga muno.

⁴ Bhunu ꞉naariga niiyigisha na okuraasha, ꞉naariga nitakwaika okuturira ku-bhwenge bhwani okukongya bhaanu, tari ni kuturira ku-bhimenyegesho, na amanaga ga Mwoyo Omutaakatiifu.

⁵ ꞉Naakorere kutyo, insonga obhwikirisha bhwemwe bhwasiga okwisiga obhwenge bhwa abhaanu, tari bhwisige amanaga ga Nyamuwanga.

Obhwenge bhwa ekimari kya Nyamuwanga

⁶ Mmbe, eswe ekyaika amangʼana ga obhwenge ku-bhaanu bhanu bhaakomeeye mu-bhwikirisha. Nawe obhwenge bhuyo bhutari bhwa mu-kyaro anu, na bhutari bhwa abhatungi bha mu-kyaro anu, bhayo ni bhatusi era ku-kyaro kunu.

⁷ Obhwenge bhunu ekiraasha, ni bhwenge bhwa imbisike ya Nyamuwanga bhunu ꞉bhwariga bhubhisirwe. Obhwenge bhuyo, Nyamuwanga ꞉aariga aramuuye okukiyaana okwambira ekyaro kikyari okubhumbwa, ku-nsonga ya okukigungya.

⁸ Atariwo omuunu na wumwi mu-bhatungi bha ekyaro kinu unu amenyere obhwenge bhuyo, kwa okubha bhakabheeye bhabhumenyere, bhataakasungire Raatabhugenyi wa obhugungyo ku-musarabha.

⁹ Nawe rwa kutyo ikaamirwe mu-Makaamo Amataakatiifu ati, “Ganu Nyamuwanga ꞉aatuuriiye-wo bhanu bhamwendere, atariwo omuunu unu aragarorere amwi ati kugoongwa, atariwo omuunu unu aragatuuye mu-mutima.”

¹⁰ Nawe Nyamuwanga akituuriiye abhweru amangʼana gayo, okuturira ku-Mwoyo Omutaakatiifu. Mwoyo Omutaakatiifu kaaringira eetegeeresiishe goone kutyo na gimbisike gya Nyamuwanga.

¹¹ Atariwo muunu unu kaatura okumenya ganu omuunu owundi keeganiirisha, tari ni mwoyo gwaye omwene era, nigwo ogugamenya. Nikwo kutyo na ganu Nyamuwanga keeganiirisha, atariwo unu kaatura okugamenya, tari Mwoyo waaye era, niwe kaagamenya.

¹² Eswe ꞉kitaaramiiye mwoyo gwa ku-kyaro kunu, tari ꞉kyaramiiye Mwoyo unu asookere ku-Nyamuwanga insonga kimenye ganu kiyaaywe na Nyamuwanga.

¹³ Amangʼana gayo ekigaaika, gatari mangʼana ganu ageeyigisibhwa na bhwenge bhwa abhaanu, tari ageeyigisibhwa na Mwoyo wa Nyamuwanga. Ekigaaika nkisombooraga ekimari kya mu-mwoyo, ku-bhaanu bhanu bhari na Mwoyo uyo.

¹⁴ Nawe omuunu unu atari na Mwoyo wa Nyamuwanga, atakutura okuramira amangʼana ganu agasooka ku-Mwoyo wa Nyamuwanga, kwa okubha ku-mwene amangʼana gayo ni ga kisiru. Na atakutura kusombookerwa, kwa okubha omuunu kaasombookerwa era, akabha asakiiywe na Mwoyo wa Nyamuwanga.

¹⁵ Omuunu unu kaatangasibhwa na Mwoyo wa Nyamuwanga, kaasombookerwa amangʼana goone kutyo. Nawe abhaanu abhandi bhatakutura okumusombookerwa.

¹⁶ Rwa kutyo Amakaamo Amataakatiifu agaaika ati, “Ni niga unu kaatura okumenya obhwiganiirisha bhwa Raatabhugenyi Nyamuwanga insonga amwiyigishe?” Nawe, eswe ekiiganiirisha ganu agasooka ku-Kiriisitu.