1 Abhakorinto 16 - Iimuuma Iinyaaya

Insororo ya okusakira abhataakatiifu

¹ Woori eneenda okwaikira insororo ya okusakira abhataakatiifu bha Yerusareemu. Emwe mwone mukore rwa kutyo ꞉naaragiriiye Abhakiriisitu bha mu-makanisa mu-kyaro kya Garaatiya.

² Ku-nsiku gyone kutyo egya obhwoyo, abhaanu bhoone kutyo agati weemwe, eebhiikire ebhiinu ku-bhinu kaanyoora, insonga bhunu niriija eyo, mubhe mwasoroosiishe ebhiinu.

³ Bhunu niriyika, nirituma abhaanu bhanu murisora, nibhayaane na iinyarubha ya okubhamenyegesha, insonga bhasire insororo iyo ku-Bhakiriisitu bha Yerusareemu.

⁴ Na raabhe mukarora ati anye noone eneendwa nigende, nirigenda nabho.

Obhukene bhwa Pawuro okuyika Korinto

⁵ Nikasooka Makedooniya, eniija okubhaaja-ko eyo, kwa okubha eneenda okutura Makedooniya okwamba.

⁶ Bhunu niriija, amwi niriikara eyo kabhaga kafuyi, amwi niriikara eyo mu-kabhaga koone kutyo aka imbewo, insonga munsakire okugenderera na orugendo rwani, woonewoone enu nikeende okuja.

⁷ Nitakwenda kurorana na emwe woori, bhuyambaaye era. Tari Raatabhugenyi akeenda, anye naaneendere akabhaga kature-wo niikaaye na emwe.

⁸ Nawe woori nikyagenderera okwikara mu-musi gwa Efeso anu, okuyikira mu-nsikukuru ya Pentekoositi.

⁹ Enikora kutyo, kwa okubha Nyamuwanga aanyiiguriiye njira nene eya okukora emirimu mu-musi gunu, na bhariwo abhaanu bhaafu bhanu abharema emirimu giyo.

¹⁰ Timoteeyo akabhaaja-ko eyo, mumuramire kujomu eekare atakuubhaya, kwa okubha omwene woone kaakora emirimu gya Raatabhugenyi rwa kutyo anye enikora.

¹¹ Omuunu woonewoone aasiga okumujeera. Tari bhunu arisubha mumusakire ansubhe-ko ari na omurembe, kwa okubha anye na Abhakiriisitu abhandi ekimurinda.

¹² Nawe Apooro Omukiriisitu weejaasu, anye nimwisaasaamire muno ati abhaaje-ko eyo na Abhakiriisitu abhandi. Nawe omwene akyari kuyikya-wo okuuja. Arinyoora omwanya ariija.

Amangʼana ga okuragana

¹³ Mwiyangarire, mukomeere mu-bhwikirisha, mubhe na riibhaasi na amanaga.

¹⁴ Amangʼana geemwe goone kutyo mugakore mwendeene.

¹⁵ Bhakiriisitu bheejaasu, mumenyere ati abhaanu bha ewa Sitefwano, nibho ꞉bhaariga bhari abha okwamba okwikirisha Yeesu Kiriisitu mu-kyaro kya Akaya, na bharamuuye okusakira Abhakiriisitu. Woori, enibheesaasaama ati,

¹⁶ mubhe muungwa abhaanu rwa bhayo, na abhandi bhoone kutyo bhanu abheekomeesha muno okukora nabho emirimu.

¹⁷ Nijomeeywe muno okurora Sitefwano, Foritunato na Akayiko bhaanyiijire-ko enu. Bhaankoreeye ganu emwe mukankoreeye mukabheeye muri anu,

¹⁸ kwa okubha bhasambaarusiishe omutima gwani, na egyemwe. Woori, mumenye kujomu abhaanu rwa bhayo.

¹⁹ Abhaanu bha mu-makanisa ga mu-kyaro kya Asiya, abhabhakeesha. Akira na mukaaye Piriisika, na Abhakiriisitu bhanu abhasangira eweebhwe, abhabhakeesha muno mu-bhuyimbani bhweswe na Raatabhugenyi Yeesu.

²⁰ Abhakiriisitu bheejaasu bhoone kutyo bhanu bhari anu, abhabhakeesha. Mukeeshaanye mwendeene Kikiriisitu.

²¹ Anye Pawuro enikaama obhukeesha bhunu na okubhoko kwani omwene.

²² Omuunu woonewoone unu atakwenda Raatabhugenyi Yeesu, eeyiimwe. Raatabhugenyi weeswe nuuje!

²³ Iinema ya Raatabhugenyi Yeesu ibhe na emwe.

²⁴ Nibheendere mwone kutyo, mu-bhuyimbani bhweswe na Kiriisitu Yeesu.