1 Abhakorinto 15 - Iimuuma Iinyaaya

Okusuuka kwa Kiriisitu

¹ Woori Bhakiriisitu bheejaasu, enibhayiitya Amangʼana Amajomu ganu ꞉naabharaasisiishe, mugaramira. Gayo nigo gabhayambaasiishe murumire na woori.

² Raabhe omugwatira amangʼana ganu ꞉naabharaasisiishe, Nyamuwanga kaabheerusha. Nawe raabhe mutakugagwatira, okwikirisha kwemwe kutakubhasakira.

³ Ameeyigisho ganu anye ꞉naaramiiye nigo ꞉naabheeyigisiishe okwamba, ati Kiriisitu ꞉aafuuye ku-nsonga ya ebhikayo bhyeswe, rwa kutyo ikaamirwe mu-Makaamo Amataakatiifu.

⁴ Kimwi mbamusiika, orusuku rwa akasatu ˆnaasuuka, rwa kutyo ikaamirwe mu-Makaamo Amataakatiifu.

⁵ Bhunu ꞉aasuukire, okwamba ꞉eebhuurire ku-Keefa omwene, ˆnaamara ˆneebhuura ku-bhatumwa bhaaye ekumi na bhabhiri.

⁶ ˆNaamara ˆneebhuura ku-Bhakiriisitu abhandi bhanu ꞉bhaambukaga magana gataanu. Mu-bhayo, abhaafu bhakyariwo na woori, nawe abhandi bharafuuye.

⁷ ˆNaamara ˆneebhuura ku-Yakobho, kweki ˆneebhuura ku-bhatumwa bhoone kutyo.

⁸ ꞉Eejire aamara okwibhuura ku-bhaanu bhoone kutyo, ˆneebhuura na ku-anye noone, anye unu niri rwa omwana unu ꞉eebhuuywe atayikire.

⁹ Enaaika kutyo kwa okubha anye niri mutooto muno okukira abhatumwa bhoone kutyo, niteesire na kubhirikirwa mutumwa, kwa okubha ꞉naanyansiishe riikanisa rya Nyamuwanga.

¹⁰ Nawe iinema ya Nyamuwanga niyo inkorere anye nibhe mutumwa. Iinema yaaye ku-anye ꞉yaariga itari bhusa, kwa okubha okuturira iinema iyo, nikorere emirimu okukira abhatumwa bhoone kutyo. Nitakorere gayo kwa amanaga gaani omwene, tari Nyamuwanga okuturira ku-nema yaaye, niwe ꞉aakorere emirimu amwi na anye.

¹¹ Mmbe, ibhe ati ni anye, amwi ati abhatumwa abhandi bhayo, eswe bhoone kutyo, ekiraasha amangʼana gayogayo, na nigo mwikirisiishe.

Okusuuka kwa abhafuuye

¹² Mmbe, raabhe ekiraasha ati Kiriisitu ꞉aasuukire okusooka mu-bhafuuye, eyibha kutiki abhandi agati weemwe abhaaika ati obhusuuki bhwa abhafuuye bhutariwo?

¹³ Raabhe obhusuuki bhutariwo, mmbe, Kiriisitu woone ꞉ataasuukire.

¹⁴ Na raabhe Kiriisitu ꞉ataasuukire, okuraasha kweswe ni bhusa, na obhwikirisha bhweswe bhwone ni bhusa era.

¹⁵ Yee, raabhe ni kutyo eswe kibheeye bhabheeyi kwa okubha ekibheeyeresha Nyamuwanga ati ꞉aasuurire Kiriisitu okusooka mu-bhafuuye. Nawe raabhe abhafuuye bhatakusuurwa, mmbe, Nyamuwanga ꞉ataasuurire Yeesu.

¹⁶ Enaaika kutyo, ku-nsonga inu ati, raabhe abhafuuye bhatakusuurwa, Kiriisitu woone ꞉ataasuukire.

¹⁷ Na raabhe Kiriisitu ꞉ataasuukire, obhwikirisha bhwemwe ni bhusa, na mukyari okusooka mu-bhikayo bhyemwe.

¹⁸ Na abhaanu bhoone kutyo bhanu ꞉bhaafuuye bheekirisiishe Kiriisitu, bhabhurire kimwi.

¹⁹ Raabhe ekiisiga Kiriisitu akiyaane obhurame bhwa mu-kyaro kinu era, ekibha abhaanu bhanu bheesire okufwirwa ekigongo okukira abhaanu bhoone kutyo.

²⁰ Nawe woori ekimari ni ati, Kiriisitu ꞉aasuukire okusooka mu-bhafuuye, uyo niwe owa okwamba okusuuka mu-bhafuuye.

²¹ Rwa kutyo orufu ꞉rwareeterwe na muunu wumwi mu-kyaro, nikwo kutyo na obhusuuki bhwa abhafuuye ꞉bhwareeterwe na muunu wumwi.

²² Rwa kutyo abhaanu bhoone kutyo abhafwa ku-nsonga ya obhusimukwa bhwebhwe ku-Adaamu, nikwo kutyo abhaanu bhoone kutyo bharisuurwa ku-nsonga ya obhuyimbani bhwebhwe na Kiriisitu.

²³ Nawe abhaanu wumwiwumwi arisuurwa ku-kabhaga kaaye omwene, Kiriisitu niwe owa okwamba okusuuka, na bhunu arisubha arisuura abhaanu bhaaye.

²⁴ Ayo niwe iribha obhuteero bhwa ebhiinu bhyone kutyo, bhunu Kiriisitu arimara-wo abhatungi, bhanu bhari na obhuturo, na bhanu bhari na amanaga, bhoone kutyo, kimwi ˆnaayaana Raata Nyamuwanga obhukama.

²⁵ Enaaika kutyo, kwa okubha Kiriisitu niwe aritunga okuyikira anu arituura abhasoko bhaaye bhoone kutyo emwaro abhatunge.

²⁶ Omusoko unu arisingirira okumarwa-wo ni rufu.

²⁷ Amakaamo Amataakatiifu agaaika ati, “Nyamuwanga ꞉aatuuye ebhiinu bhyone kutyo emwaro mu-bhutungi bhwaye.” Amangʼana gayo “Ebhiinu bhyone kutyo,” itari ati Nyamuwanga woone atuuywe mu-bhutungi bhuyo. Wuri, kwa okubha omwene niwe atuuye ebhiinu bhiyo mu-bhutungi bhwa Kiriisitu.

²⁸ Mmbe, Nyamuwanga arimara okutuura emwaro ebhiinu bhyone kutyo mu-bhutungi bhwa Omwana waaye, niwe na Omwana woone ariituura emwaro mu-bhutungi bhwaye, insonga Nyamuwanga atunge ebhiinu bhyone kutyo.

²⁹ Woori, abhaanu bhanu abhabhatiisibhwa ku-nsonga ya abhafuuye abheesiga okunyooraki? Raabhe abhafuuye bhatakusuurwa, kubhaki abhaanu abhabhatiisibhwa ku-nsonga ya abhafuuye?

³⁰ Eswe kyone kubhaki ekiituura mu-ngʼanga ku-nsiku?

³¹ Bhakiriisitu bheejaasu, ku-nsiku anye niri mu-ngʼanga ya okufwa. Yee enaaika kimari, rwa kutyo enaaika ekimari ati eniikumangya ku-nsonga ya emwe, kwa okubha muyimbeene na Kiriisitu Yeesu Raatabhugenyi weeswe.

³² Raabhe obhwisige bhwani bhukabheeye bhuri rwa abhaanu bha ekyaro kinu, okurwana kwani na gintyanyi ginduru mu-musi gwa Efeso kukansakiiyeki? Raabhe abhafuuye bhatakusuurwa, mmbe, “Kiikare kirye na okunywa, kwa okubha katondo ekifwa.”

³³ Mwasiga kujimibhwa, amangʼana amabhiibhi ganu abhaanu abhaaika, aganyamura gintungwa ginjomu.

³⁴ Mubhe na obhwenge, mukore kutyo eyeendwa, na mwasiga okukora ebhikayo, kwa okubha abhandi agati weemwe bhatakumenya Nyamuwanga. Enaaika gayo, insonga nibhatitibhashe.

Emibhiri gya mu-kyaro na egya mu-rwire

³⁵ Omuunu kaatura okubhuusha ati, “Abhafuuye abhasuurwa kutiki? Na bhakaaja, abhaaja bhari na mibhiriki?”

³⁶ Mutengʼo awe! Ukayamba imbibho, itakutura okumera itafuuye.

³⁷ Imbibho inu omuyamba, ibhe ngano amwi ati mbibho yindi, itakutura okususana na riisha rinu eriija okumera.

³⁸ Nyamuwanga kaayaana gimbibho emibhiri rwa kutyo omwene keenda, imbibho inu omubhiri gunu, na eyindi omubhiri gunu.

³⁹ Ebhibhumbwa bhyone kutyo bhiri na emibhiri, nawe emibhiri giyo gitakususana. Giriwo emibhiri gya abhaanu, egya gintyanyi, egya giinyonyi, na egya ginswi.

⁴⁰ Na giriwo emibhiri gya mu-rwire, na emibhiri gya mu-kyaro. Obhujomu bhwa emibhiri gya mu-rwire bhuri kundi, na obhujomu bhwa emibhiri gya mu-kyaro bhuri kundi.

⁴¹ Obhungʼarabhyo bhwa riisuubha bhuri kundi, obhungʼarabhyo bha okwesi bhuri kundi, na obhungʼarabhyo bhwa ginjota bhwone bhuri kundi. Ginjota gyone yimwiyimwi gitaasheenye obhungʼarabhyo bhwagyo.

⁴² Nikwo kutyo iribha, bhunu abhafuuye bharisuuka. Ni rwa kutyo gimbibho egiyambwa. Omubhiri omunyamuke nigwo ogubhiikwa, nawe gunu ogusuurwa gutakunyamuka.

⁴³ Omubhiri ogusiikwa gujeererwe, nawe ku-kusuuka, ogusuuka guri na obhugungyo. Bhunu ogusiikwa, ogubha gutari na managa, nawe ku-kusuuka ogubha guri na amanaga.

⁴⁴ Bhunu ogusiikwa ogubha guri ku-bhusimukwa bhwago, nawe ku-kusuuka ogubha guri mubhiri muyaaya gunu kiriyaanwa na Mwoyo Omutaakatiifu. Guriwo omubhiri gwa obhusimukwa, guriwo na omubhiri omuyaaya gunu Mwoyo Omutaakatiifu arikiyaana.

⁴⁵ Ikaamirwe mu-Makaamo Amataakatiifu ati, “Omuunu wa okwamba, Adaamu, ꞉aabhumbirwe ˆnaabha muunu, ˆneesha omwoyo,” nawe Adaamu omusingirisi, Kiriisitu, niwe Mwoyo unu kaayaana abhaanu obhurame.

⁴⁶ Nawe omubhiri gwa obhusimukwa nigwo ogutangata, niwe guriija omubhiri omuyaaya gunu kiriyaanwa na Mwoyo Omutaakatiifu.

⁴⁷ Adaamu omuunu wa okwamba, bhusimukwa ꞉aariga ari wa ku-kyaro, ꞉aabhumbirwe na riiswa. Omuunu wa akabhiri, Kiriisitu, ꞉aasookere mu-rwire.

⁴⁸ Mmbe, abhaanu bhoone kutyo mu-kyaro bhari na emibhiri gya ku-kyaro, rwa ogwa Adaamu. Na abhaanu bhoone kutyo mu-rwire bharibha na emibhiri gya mu-rwire rwa omubhiri gwa Kiriisitu.

⁴⁹ Rwa kutyo ekisusana na Adaamu, unu ꞉aabhumbirwe na riiswa, nikwo kutyo kirisusana na Kiriisitu, unu ꞉aasookere mu-rwire.

⁵⁰ Abhakiriisitu bheejaasu, eneenda okwaika ati, emibhiri gyeswe ginu, gitakutura okugabha mu-bhukama bhwa Nyamuwanga, kinu ekinyamuka kitakutura okugabha obhurame bhunu bhutakuweera.

⁵¹ Mwitegeereshe, nibhabhwire imbisike, eswe kitarifwa kyone kutyo, tari kyone kutyo kiriyinduka.

⁵² Riingʼana riyo riribha mu-kabhaga kafuyi muno, ameeso gakyari na kutemya, bhunu riikombi rya okweresha ati obhuteero bhwa ekyaro bhwayika, riribhumwa. Riikombi riyo riririra na abhafuuye bharisuurwa bhari na emibhiri ginu gitakunyamuka, eswe kyone kiriyinduka.

⁵³ Nikwo kutyo iribha, kwa okubha omubhiri gunu ogunyamuka eyeendwa guyinduke gubhe mubhiri gunu gutakunyamuka, na omubhiri gunu ogufwa gunu, guyinduke gubhe mubhiri gunu gutakufwa.

⁵⁴ Mmbe, omubhiri gunu ogunyamuka na okufwa, bhunu guriyinduka okubha omubhiri gunu gutakunyamuka na gutakufwa, ayo niwe ririkuumira riingʼana rinu ꞉ryakaamirwe mu-Makaamo Amataakatiifu ati, “Nyamuwanga ayigire orufu, orufu ruyigirwe kimwi!”

⁵⁵ “Orufu, obhuyigi bhwawo bhuri aaki? Gari aaki amanaga gaawo ga okureeta obhururu?”

⁵⁶ Ebhikayo bhinu ekikora, nibhyo ebhikora orufu ndubha na obhururu, na ebhiraagiro nibhyo ebhyeresha amanaga ga ebhikayo.

⁵⁷ Nawe kikumye Nyamuwanga, kwa okubha omwene niwe kaakiyaana obhuyigi okuturira ku-Raatabhugenyi weeswe Yeesu Kiriisitu.

⁵⁸ Mmbe, Abhakiriisitu bheejaasu abheende, mukomeere mu-bhwikirisha, mwasiga okufwa emitima. Ku-nsiku mugenderere muno okukora emirimu gya Raatabhugenyi, kwa okubha mumenyere ati, emirimu ginu omukora gitari bhusa, tari omukora ku-nsonga ya Raatabhugenyi.