1 Abhakorinto 14 - Iimuuma Iinyaaya

Ekiyaanwa kya okusoosha obhuragi na ekya okwaika giinyaaika ginu abhandi bhatakumenya

¹ Mwikomeeshe okwendana enu mwigomba okunyoora ebhiyaanwa bhya Mwoyo Omutaakatiifu, munomuuno ekiyaanwa kya okusoosha obhuragi.

² Omuunu unu kaaika iinyaaika inu abhandi bhatakumenya, atakuroma na bhaanu, tari kaaroma na Nyamuwanga, kwa okubha atariwo unu kaamenya ganu kaaika. Omuunu uyo kaabha ˆnaaika gimbisike okuturira ku-Mwoyo Omutaakatiifu.

³ Nawe unu kaasoosha obhuragi, kaaika na abhaanu amangʼana ga okubhasimbiisha mu-bhwikirisha, aga okubhakomeesha na aga okubhawooyeresha.

⁴ Omuunu unu kaaika iinyaaika inu abhandi bhatakumenya, keesimbiisha omwene mu-bhwikirisha, nawe unu kaasoosha obhuragi kaasimbiisha Abhakiriisitu bheejaabho.

⁵ Anye eneenda emwe mwone kutyo mwaikega giinyaaika ginu abhandi bhatakumenya, nawe munomuuno eneenda musooshega obhuragi. Enaaika kutyo, kwa okubha okusoosha obhuragi okusakira muno Abhakiriisitu okukira okwaika giinyaaika ginu abhandi bhatakumenya, raabhe atariwo unu kaasomboora giinyaaika giyo. Mmbe, unu kaaika giinyaaika ginu abhandi bhatakumenya, asomboore insonga asimbiishe Abhakiriisitu abhandi mu-bhwikirisha.

⁶ Woori, Bhakiriisitu bheejaasu, nikabhaaja-ko naaika giinyaaika ginu abhandi bhatakumenya, enibhasakiraki? Kitariwo kyonekyone kinu enibhasakira. Nawe nikabhabhwira ganu Nyamuwanga antuuriiye abhweru, amwi ati nikabheeyigisha okumenya amangʼana, nikabhasoosisha obhuragi amwi ati okubheeyigisha, ayo enibha nibhasakiiye.

⁷ Nikwo kutyo iri na ku-bhiinu bhinu bhitakwisha mwoyo bhikabha mbirira, kibhe ekironge, amwi ati kinuubhi. Raabhe bhikarema okutaashaanya ku-kurira kwabhyo, omuunu kaatura okumenya kutiki ati ni rwimboki runu orurira mu-kironge, amwi ati mu-kinuubhi?

⁸ Na raabhe riikombi rikarira oruriro runu rutari rwa okuja mw-iremo, ni niga unu keetuura-wo okwingira mw-iremo?

⁹ Nikwo kutyo iri na kw-imwe. Mukaaika iinyaaika inu abhaanu bhatakumenya, ni niga unu kaatura okumenya kinu omwaika? Gayo agabha ngagenda na muyaga era.

¹⁰ Mu-kyaro girimo nyaaika nyafu, nawe itariwo nyaaika na yimwi inu itari na insonga yeende-ko.

¹¹ Mmbe nikataamibhwa okusombookerwa iinyaaika ya omuunu, enibha rwa omugenyi ku-muunu uyo, omwene woone kaabha rwa omusiru ku-anye.

¹² Nikwo kutyo iri na kw-imwe, kwa okubha mwendere muno okubha na ebhiyaanwa bhya Mwoyo Omutaakatiifu, mwikomeeshe muno okubha na ebhiyaanwa bhinu ebhisakira Abhakiriisitu abhandi bhasimbiire mu-bhwikirisha.

¹³ Mmbe woori, omuunu unu kaaika iinyaaika inu abhandi bhatakumenya, asabhe Nyamuwanga insonga amusakire okusomboora kinu kaaika.

¹⁴ Enaaika kutyo, kwa okubha nikasabha mu-nyaaika inu abhandi bhatakumenya, omwoyo gwani nigwo ogusabha, nawe mu-mutwe gwani nitakumenya kyonekyone.

¹⁵ Mmbe woori nikore kutiki? Enisabhira mu-nyaaika inu abhandi bhatakumenya, niimara kweki ninsabha okusooka mu-mutwe gwani, enimbira mu-nyaaika inu abhandi bhatakumenya, kweki niimba okusooka mu-mutwe gwani.

¹⁶ Ukakumya Nyamuwanga mu-nyaaika inu abhandi bhatakumenya, unu atakumenya kinu ekigenderera, kaaja okusubhya kutiki ati, “Amina,” enu ataamenya ganu waanusabha ku-Nyamuwanga?

¹⁷ Ni kimari ati ginkumyo gyawo ku-Nyamuwanga ni njomu, nawe owundi gitakumusakira okumukomeesha mu-bhwikirisha.

¹⁸ Enikumya Nyamuwanga kwa okubha enaaika mu-nyaaika inu abhandi bhatakumenya okukira emwe mwone kutyo,

¹⁹ nawe mw-ikanisa eneenda naaike mangʼana gataanu okuturira ku-bhwenge bhwani, insonga niiyigishe abhandi. Okukora kutyo ni kujomu okukira okwaika amangʼana bhiwumbi ekumi mu-nyaaika inu abhandi bhatakumenya.

²⁰ Bhakiriisitu bheejaasu, mwasiga okwiganiirisha rwa abhaana, tari mwiganiirishe rwa abhaanu abhakuru. Nawe ku-mangʼana amabhiibhi, mubhe rwa abhaana abhajaare.

²¹ Mu-Makaamo Amataakatiifu ikaamirwe ati, “Raatabhugenyi kaaika ati, ‘Eniija okwaika na abhaanu bhanu okuturira ku-bhagenyi bhanu abhasooka areera, bhanu abhaaika nyaaika ginu abhaanu bhaani bhatakumenya, nawe bhatarinyiitegeeresha.’ ”

²² Okwaika giinyaaika ginu abhandi bhatakumenya ni kimenyegesho, itari ku-bhanu abheekirisha tari ni kimenyegesho ku-bhanu bhatakwikirisha. Nawe okusoosha obhuragi, itari ku-nsonga ya bhanu bhatakwikirisha, tari ni ku-nsonga ya bhanu abheekirisha.

²³ Mmbe, raabhe riikanisa ryone kutyo risangiiye amwi, abhaanu wumwiwumwi ˆnaaika iinyaaika inu abhandi bhatakumenya, kimwi abhaanu bhanu bhatakumenya kinu ekigenderera, amwi ati bhanu bhatakwikirisha mbeengira, angu bhatakwaika ati muri bhasasi?

²⁴ Nawe bhoone kutyo bhakasoosha obhuragi, kimwi ˆneengira omuunu unu atakwikirisha, amwi ati omusiru, akoongwa okusooka ku-bhoone kutyo, amangʼana geebhwe agamukora amenye ebhikayo bhyaye. Na ganu koongwa agamuramurira.

²⁵ Na ganu geeyibhisire mu-mutima gwaye, agabha ku-bhweru, niwe omuunu uyo ˆneefumbika ansi, ˆnaaramya Nyamuwanga ˆnaaika ati, “Kimari Nyamuwanga ari agati weemwe!”

Abhakiriisitu bhasaasaame Nyamuwanga kutyo eyeendwa

²⁶ Woori, Bhakiriisitu bheejaasu, eyibha kutiki? Mukasangira amwi okusaasaama, owumwi embe Ijabhuri, owundi eeyigishe, owundi aaike ganu Nyamuwanga amutuuriiye abhweru, owundi aaike iinyaaika inu abhandi bhatakumenya, owundi asomboore iinyaaika iyo. Amangʼana gayo goone kutyo, gakoreke ku-nsonga ya okusimbiisha Abhakiriisitu.

²⁷ Raabhe omuunu akaaika mu-nyaaika inu abhandi bhatakumenya, bhaaike bhaanu bhabhiri amwi ati bhasatu, bhaasiga okwambuka ayo, na bhaaike wumwiwumwi, na abhe-wo omuunu wa okusomboora ganu abhaaika.

²⁸ Raabhe omuunu wa okusomboora atariwo, unu kaaika mu-nyaaika inu abhandi bhatakumenya ajibhire asige okwaika mw-ikanisa, arome na Nyamuwanga mu-mutima gwaye era.

²⁹ Bhanu abhasoosha obhuragi bhaaike bhabhiri amwi ati bhasatu, abhandi bhabheetegeereshe, bharenge amangʼana geebhwe.

³⁰ Nawe raabhe owundi mu-bhanu abheetegeeresha akatuurirwa abhweru riingʼana okusooka ku-Nyamuwanga, unu kaasoosha obhuragi ajibhire.

³¹ Okukora kutyo, okuyaana omuunu wumwiwumwi omwanya gwa okwaika, insonga abhaanu bhoone kutyo bheeyigisibhwe na okuwooyereshwa mu-mitima.

³² Ekiyaanwa kya okusoosha obhuragi, ekikora kutyo unu kaasoosha obhuragi keenda,

³³ kwa okubha Nyamuwanga atakureeta inkungu, tari omwene kaareeta omurembe. Rwa kutyo iri na mu-makanisa goone kutyo ga abhataakatiifu,

³⁴ mukasangira amwi mw-ikanisa, abhagasi bhajibhire, kwa okubha bhatakwikirisibhwa okwaika. Bhabhe bhoongwa rwa kutyo ebhiraagiro bhya Musa ebhyaika.

³⁵ Raabhe abheenda okumenya riingʼana riirebhe, bhabhuushe abharume bheebhwe iika, kwa okubha ni nswaro omugasi okuroma mw-ikanisa.

³⁶ Eneenda mumenye ati, Riingʼana rya Nyamuwanga ꞉ritaasookere kw-imwe. Na mumenye ati abhandi bhoone ꞉bhaariramiiye mutari emwe era.

³⁷ Raabhe omuunu keerora ati ari na ekiyaanwa kya okusoosha obhuragi, amwi ati ari na ekiyaanwa ekindi kya Mwoyo Omutaakatiifu, amenye ati, ganu enibhakaamira, ni maragiriro okusooka ku-Raatabhugenyi.

³⁸ Nawe omuunu unu kaajeera gayo, omwene woone kaajeerwa.

³⁹ Mmbe woori, Bhakiriisitu bheejaasu, mwikomeeshe okusoosha obhuragi, na mwasiga okugaanya omuunu okwaika iinyaaika inu abhandi bhatakumenya.

⁴⁰ Nawe amangʼana goone kutyo gakoreke kujomu, kutyo eyeendwa.