1 Abhakorinto 13 - Iimuuma Iinyaaya

Obhwendi obhukira ebhiyaanwa bhyone kutyo

¹ Raabhé nikaaika mu-nyaaika gya abhaanu na egya bhaamaraayika, raabhe nitakwenda abhandi, niri rwa riidumu rinu eribhumwa ritarimo kiinu, rwa inkengere inu eyibhumwa kitaabha-wo kiinu.

² Kweki, raabhé nikabheeye na ekiyaanwa kya okusoosha obhuragi, nimenyere gimbisike gyone kutyo, niri na obhwenge bhwone kutyo, raabhé nikabheeye na obhwikirisha bhunene bhunu obhutura okwiya ebhiima nimbisira ayandi, nawe raabhe nitakwenda abhandi, nitari kiinu.

³ Na nikasoosha ebhiinu bhyani bhyone kutyo niiyaana abhatobhu, na nikeesoosha omubhiri gwani insonga nirungure mu-muriro, nawe raabhe nitakwenda abhandi, okukora gayo kutakunsakira kyonekyone.

⁴ Obhwendi obhukora omuunu ˆnaabha musimbiiru, obhukora omuunu ˆnaasakira abhaanu abhandi, obhukora omuunu asige okubha na orwango, obhukora omuunu asige okwiyeema, amwi ati okubha na ekyene.

⁵ Obhwendi obhukora omuunu ˆnaabha na ntungwa njomu, obhukora omuunu ˆneegana abhaanu abhandi, obhukora omuunu asige okubha na esungu, amwi ati okubhiika esungu mu-mutima gwaye.

⁶ Obhukora omuunu ˆnaasiga okujomererwa amangʼana amabhiibhi, tari ˆnaajomererwa ekimari.

⁷ Obhwendi obhukora omuunu ˆnaasiga okufwa omutima ku-mangʼana goone kutyo, ˆnaabha na obhwikirisha ebhaga ryone kutyo, ˆnaabha na obhwisige ebhaga ryone kutyo na okusimbiira amangʼana goone kutyo.

⁸ Okusoosha obhuragi, okwaika giinyaaika egindi, na okubha na obhumenyi, ebhiyaanwa bhiyo bhyone kutyo, bhiri na obhuteero. Nawe obhwendi bhutari na bhuteero!

⁹ Enaaika kutyo kwa okubha ku-gayo kimenyere-ko mangʼana matooto era, na okusoosha obhuragi ekisoosha kutooto era.

¹⁰ Nawe akabhaga ka okumenya amangʼana gakuumiiye akaaja, na ganu gatakuumiiye gariwa-wo.

¹¹ Bhunu ꞉naariga niri mwana omujaare, ꞉naaromaga rwa omwana omujaare, ꞉neeganiirishaga na okuramura rwa omwana omujaare. Nawe woori, naakurire, naasigire amangʼana ga ekyana.

¹² Woori anu ekirora rwa omuunu unu kaarora mu-kitwi, nawe riibhaga eriija rinu kirirora meeso meeru. Woori nimenyere kutooto era, nawe mw-ibhaga riyo nirimenya kujomu rwa kutyo Nyamuwanga aammenyere.

¹³ Woori, ebhiinu ebhisatu bhinu bhitariwa-wo, ni obhwikirisha, obhwisige na obhwendi. Na ku-bhisatu bhiyo, ekinene okukira ebhindi ni bhwendi.