1 Abhakorinto 12 - Iimuuma Iinyaaya

Ebhiyaanwa bhya Mwoyo Omutaakatiifu ku-Bhakiriisitu

¹ Woori, Bhakiriisitu bheejaasu, eneenda mumenye kujomu iiguru ya ebhiyaanwa bhya Mwoyo Omutaakatiifu.

² Mumenyere ati bhunu ꞉mwariga mutakwikirisha Nyamuwanga, ꞉mwajimiibhwe musirwa okuramya ebhisusano, enu ebhisusano ebhyene bhiteesha mwoyo!

³ Eneenda mumenye ati, atariwo omuunu woonewoone unu kaaroma okuturira ku-Mwoyo wa Nyamuwanga, ˆnaaika ati, “Yeesu eeyiimirwe.” Na omuunu woonewoone atakutura kwaika ati, “Yeesu ni Raatabhugenyi,” raabhe atakutangasibhwa na Mwoyo Omutaakatiifu.

⁴ Bhuriwo obhutaashaanya bhwa ebhiyaanwa, tari Mwoyo Omutaakatiifu unu kaagabha ebhiyaanwa bhiyo, ni wumwi uyouyo.

⁵ Na bhuriwo obhutaashaanya bhwa obhukosi bhwa emirimu gya Raatabhugenyi, nawe omwene ni uyouyo.

⁶ Bhuriwo obhutaashaanya bhwa obhukosi bhwa emirimu, nawe Nyamuwanga unu kaagikora gyone kutyo, ni wumwi uyouyo.

⁷ Omuunu wumwiwumwi kaayaanwa na Mwoyo Omutaakatiifu obhusombooro bhwa okumenya amangʼana amarebhe insonga kisakirane.

⁸ Mwoyo Omutaakatiifu uyo, kaayaana owumwi okwaika amangʼana ga obhwenge, Mwoyo uyouyo ˆnaayaana owundi obhuturo bhwa okumenya amangʼana, goone kutyo agakoreka okuriingʼaana na kutyo Mwoyo omwene kaakena.

⁹ Mwoyo Omutaakatiifu uyouyo kaayaana omuunu owundi ekiyaanwa kya obhwikirisha, owundi ekiyaanwa kya okuwosha,

¹⁰ owundi ekiyaanwa kya okukora ebhigwa, owundi ekiyaanwa kya okusoosha obhuragi. Mwoyo uyouyo kaayaana omuunu owundi ekiyaanwa kya okumenya iingʼana inu isookere ku-bhiwi, na inu isookere ku-Mwoyo Omutaakatiifu, owundi ekiyaanwa kya okwaika giinyaaika ginu abhandi bhatakumenya, owundi ekiyaanwa kya okusomboora giinyaaika giyo.

¹¹ Mwoyo Omutaakatiifu owumwi uyouyo niwe kaakora emirimu giyo gyone kutyo. Omwene kaayaana abhaanu bhoone kutyo wumwiwumwi ekiyaanwa kyaye, okuriingʼaana na kutyo Mwoyo uyo kaakena.

Omubhiri ogumwi, guri na bhigwatanya bhyafu

¹² Omubhiri gwa omuunu guri na bhigwatanya bhyafu, nawe ebhigwatanya bhiyo ni mubhiri gumwi. Nikwo kutyo iri na ku-mubhiri gwa Kiriisitu.

¹³ Enaaika kutyo, kwa okubha eswe bhoone kutyo, ibhe ati kiri Bhayawudi amwi ati kitari Bhayawudi, kibhe bhagaya amwi ati kibhe kitari bhagaya, ꞉kyabhatiisiibhwe okuturira ku-Mwoyo Omutaakatiifu wumwi na nkiyaanwa Mwoyo wumwi uyo, insonga kibhe mubhiri gumwi.

¹⁴ Mmbe, omubhiri gutari na kigwatanya kimwi era, tari guri na bhigwatanya bhyafu.

¹⁵ Raabhe okuguru kukaaika ati, “Anye nitari kubhoko, ku-nsonga iyo anye nitari kigwatanya kya omubhiri.” Angu, kutaakabheeye kigwatanya kya omubhiri ku-nsonga iyo?

¹⁶ Okutwi kwone kukaaika ati, “Anye nitari riiso, ku-nsonga iyo anye nitari kigwatanya kya omubhiri,” angu, kutaakabheeye kigwatanya kya omubhiri ku-nsonga iyo?

¹⁷ Raabhe omubhiri gwone kutyo gukabheeye eriiso, omuunu akoonguuywe kutiki? Amwi ati omubhiri gyone kutyo gukabheeye okutwi, omuunu akeewunyiirisiishe kutiki?

¹⁸ Nawe woori, Nyamuwanga atuuye ebhigwatanya bhyone kutyo ku-mubhiri okuriingʼaana na kutyo ꞉aariga akenere.

¹⁹ Omubhiri gutaakabheeye mubhiri, raabhe gukabheeye kigwatanya kimwi era.

²⁰ Nawe woori, ebhigwatanya ni bhyafu, tari omubhiri ni gumwi era.

²¹ Eriiso ritakutura okubhwira okubhoko ati, “Awe nitakukukena.” Omutwe gwone gutakutura okubhwira amaguru ati, “Emwe nitakubhakena.”

²² Riingʼana riinene okukira agandi ni rinu ati, ebhigwatanya bhya omubhiri bhinu abhaanu abhatoga ati, bhitakukenwa muno, bhiyo nibhyo bhikenerwe muno.

²³ Kweki ebhigwatanya bhinu abhaanu abhatoga ati, bhitari na kibharo, bhiyo nibhyo ekiyaana ekibharo muno okukira ebhindi. Ebhigwatanya bhinu abhaanu abhaaika ati ebhireeta nswaro, bhiyo nibhyo ekyangarira muno,

²⁴ na ebhigwatanya bhinu abhaanu abhaaika ati, bhitakuswasha, bhitakwangarirwa rwa ebhindi. Nyamuwanga omwene abhituuye kujomu ku-mubhiri, ˆnaayaana ekibharo ebhigwatanya bhinu bhitari na kibharo muno,

²⁵ insonga omubhiri gwasiga okutaana, tari ebhigwatanya bhyone kutyo bhisakirane.

²⁶ Raabhe ekigwatanya ekimwi kikawutaara, bhyone kutyo ebhibha bhiwutaarire. Kweki ekigwatanya ekimwi kikakumangibhwa, bhyone kutyo ebhijomerwa amwi nakyo.

²⁷ Mmbe, emwe mwone kutyo muri mubhiri gwa Kiriisitu, na wumwiwumwi kw-imwe ni kigwatanya ku-mubhiri guyo.

²⁸ Nyamuwanga ꞉aatuuye mw-ikanisa abha okwamba abhatumwa, abha akabhiri abharagi, abha akasatu abheeyigisha. ˆNaatuura-mo bhanu abhakora ebhigwa, bhanu bhari na ekiyaanwa kya okuwosha abharwaye, bhanu bhari na ekiyaanwa kya okusakira abhandi, bhanu bhari na ekiyaanwa kya okutangasha, na bhanu bhari na ekiyaanwa kya okwaika giinyaaika egindi.

²⁹ Angu, abhaanu bhoone kutyo ni bhatumwa? Bhoone kutyo ni bharagi? Bhoone kutyo ni bheeyigisha? Bhoone kutyo abhakora ebhigwa?

³⁰ Amwi ati, bhoone kutyo bhari na ekiyaanwa kya okuwosha abharwaye? Bhoone kutyo abhaaika giinyaaika egindi? Bhoone kutyo bhari na ekiyaanwa kya okusomboora giinyaaika giyo?

³¹ Mmbe, mwigombe muno okunyoora ebhiyaanwa ebhinene. Nawe okwamba eneenda okubheeresha injira injomu okukira egindi.