1 Abhakorinto 11 - Iimuuma Iinyaaya

¹ Mmbe, mwiyigire ku-anye, rwa kutyo anye noone eniiyigira ku-Kiriisitu.

Kutyo eyeendwa ukabha nuusaasaama ku-Nyamuwanga

² Enibhakumangya kwa okubha omuuyiita ku-mangʼana goone kutyo, na mugwatire ameeyigisho rwa kutyo ꞉naabheeyigisiishe.

³ Nawe woori eneenda mumenye ati Kiriisitu niwe omutwe gwa omurume, na omutwe gwa omugasi ni murume waaye, na omutwe gwa Kiriisitu ni Nyamuwanga.

⁴ Mmbe, omurume woonewoone akabha ˆnaasaasaama Nyamuwanga amwi ati kaasoosha obhuragi enu afwaye ekitambaara ku-mutwe, uyo kaaswasha Kiriisitu.

⁵ Tari omugasi unu kaasaasaama ku-Nyamuwanga amwi ati kaasoosha obhuragi, enu atafwaye ekitambaara ku-mutwe, kaaswasha omurume waaye, kwa okubha kaabha rwa unu amwegerwe ginfwiri.

⁶ Raabhe omugasi atakufwara ekitambaara ku-mutwe gwaye amwege ginfwiri. Nawe raabhe ni nswaro ku-mugasi okumwega, nyakara afware ekitambaara ku-mutwe gwaye.

⁷ Tari kujomu omurume okufwara ekitambaara ku-mutwe, kwa okubha omwene niwe ekirengekanyo na obhugungyo bhwa Nyamuwanga. Nawe omugasi, ni kirengekanyo kya bhugungyo bhwa omurume waaye.

⁸ Enaaika kutyo kwa okubha omurume ꞉ataasookere ku-mugasi, tari omugasi niwe ꞉aasookere ku-murume.

⁹ Na Nyamuwanga ꞉ataabhumbire omurume ku-nsonga ya omugasi, tari omugasi niwe ꞉aabhumbirwe ku-nsonga ya omurume.

¹⁰ Ku-nsonga iyo, na ku-nsonga ya maraayika, eyeendwa omugasi afware ekitambaara ku-mutwe gwaye, okweresha ati ari emwaro ku-murume waaye.

¹¹ Nawe ku-Bhukiriisitu, omugasi atakubha mugasi, atari na murume. Na omurume woone atakubha murume atari na mugasi.

¹² Enaaika kutyo, kwa okubha raabhé kutyo omugasi ꞉aabhumbirwe okusooka ku-murume, nikwo kutyokutyo omurume woone, keebhurwa na omugasi. Na ebhiinu bhyone kutyo ebhisooka ku-Nyamuwanga.

¹³ Woori muramure abheene, angu omugasi eesire okusaasaama Nyamuwanga atafwaye ekitambaara ku-mutwe?

¹⁴ Angu, akabhumbiiye ka omuunu katakubheeresha ati ni nswaro ku-murume okubha na nfwiri ndeera?

¹⁵ Nawe omugasi keeyungwa kujomu akabha na nfwiri ndeera, kwa okubha ayaaywe nfwiri ndeera insonga gibhe rwa ingibho ku-mutwe.

¹⁶ Nawe raabhe omuunu keenda okubhambaarira amangʼana gayo, amenye ati eswe kitari na ntungwa rwa giyo, gitarimo na mu-makanisa goone kutyo aga Nyamuwanga.

Abhakorinto bhatakurya ebhyokurya bhya Raatabhugenyi kutyo eyeendwa

¹⁷ Ku-ganu eneenda okubharagirira woori, nitakubhakumangya, kwa okubha okusangira kwemwe amwi, kutakubhasakira tari okubhanyamura.

¹⁸ Nunguuywe ati, omusangira amwi mw-ikanisa, nawe mutakuungwana. Anye noone niri ayeeyi okwikirisha ati nikwo kutyo gari.

¹⁹ Obhwawukani bhuri agati weemwe, insonga bhanu bhari ku-Nyamuwanga bhamenyekane.

²⁰ Nawe woori, mu-kusangira kwemwe amwi, mutakurya ebhyokurya bhya Raatabhugenyi kutyo eyeendwa,

²¹ kwa okubha omuunu wumwiwumwi kaatangata ˆnaarya ebhyokurya bhyaye atakurinda abheejaabho. Abhandi mbasigara bhari na omweko, na abhandi abharya bhakorerwe.

²² Angu, mutari na owa okuriira na okunywera? Kubhaki omujeera riikanisa rya Nyamuwanga na okuswasha bhanu bhatari na kiinu? Nibhabhwireki? Nibhakumangye? Wuri! Ku-gayo nitakubhakumangya.

Okurya ebhyokurya bhya Raatabhugenyi kutyo eyeendwa

²³ Ameeyigisho ganu ꞉neeyigiiye ku-Raatabhugenyi Yeesu, nigo ꞉naabheeyigisiishe emwe ati, ingeta inu Yeesu ꞉aariiywe injeejemo, ꞉aagegere omukaate,

²⁴ ˆnaakumya Nyamuwanga, ˆnaagubhuturabhutura ˆnaaika ati, “Gunu ni mubhiri gwani, ni emwe omukora ngusoosibhwa. Muraakorega kutya, okuuyiita!”

²⁵ Kutyokutyo bhunu ꞉bhaamarire okurya, ˆnaagega ekikombe kya iidivaayi, ˆnaaika ati, “Iidivaayi ya mu-kikombe kinu, ni kibharikisho kya iimuuma iinyaaya agati wa abhaanu na Nyamuwanga. Iimuuma inu Nyamuwanga kaayitusisha ku-maanyinga gaani. Muraakorega kutya, okuyiita!”

²⁶ Mumenye ati, kutyo omurya omukaate guyo na okunywera ekikombe kiyo, omubha muraasha okufwa kwa Raatabhugenyi okuyikira anu arisubha.

²⁷ Mmbe, omuunu woonewoone unu kaarya omukaate guyo, amwi ati kaanywera ekikombe kya Raatabhugenyi kutyo itakwenderwa, kaakaya, kwa okubha kaabha ajeerere omubhiri na amaanyinga ga Raatabhugenyi.

²⁸ Mmbe woori, omuunu ˆneebhuushe omwene okwamba, niwe aramure okurya omukaate na okunywera ekikombe kiyo.

²⁹ Enaaika kutyo, kwa okubha omuunu unu kaarya omukaate na okunywera ekikombe, enu atamenyere raabhe ayimbeene na omubhiri gwa Raatabhugenyi, uyo kaabha ˆnaarya na okunywa indamuro ya Nyamuwanga.

³⁰ Kyakora bhariwo abhaanu bhaafu agati weemwe ni bharwaye, na abhandi bharafuuye.

³¹ Nawe raabhe kikeebhuusiishe okwamba, kitaakaramuriiywe.

³² Nawe kikaramurirwa, ni Raatabhugenyi niwe kaakibhuma, insonga kyasiga okuramurirwa rwa kutyo abharamurirwa abhaanu bhanu bhatakumenya Nyamuwanga.

³³ Mmbe woori Bhakiriisitu bheejaasu, mukasangira amwi kw-igari rya Raatabhugenyi, murindane.

³⁴ Raabhe omuunu ari na omweko, naarye ewaaye, insonga okusangira kwemwe amwi, kwasiga okubhareetera indamuro. Amangʼana agandi ganu gaasigara, bhunu niriija nirigaroosha.