1 Abhakorinto 10 - Iimuuma Iinyaaya

Abhakiriisitu bhasige okuramya ebhisusano

¹ Bhakiriisitu bheejaasu, eneenda mumenye ati, bhunu bhaajaaji ꞉bhaasookaga Miisiri, bhoone kutyo ꞉bhaariga mbatangasibhwa na eriire, bhoone kutyo ꞉bhaaturire mu-nyanja agati.

² Okuturira mu-riire na mu-nyanja, mbabha muna ꞉bhaabhatiisiibhwe bhoone kutyo bhabhe bhaanu bha Musa.

³ Bhoone kutyo mbarya ebhyokurya bhinu ꞉bhyasookere mu-rwire.

⁴ Bhoone kutyo mbanywa amanji ganu ꞉gaasookaga mw-itare rinu ꞉ryagendaga nabho. Na riitare riyo ꞉aariga ari Kiriisitu.

⁵ Nawe abhaafu mu-bhayo, ꞉bhataajomisiishe Nyamuwanga, okubha kutyo Nyamuwanga ˆnaabhamara-wo bhari ku-nsi ya orukungu eyo.

⁶ Mmbe, amangʼana gayo goone kutyo ni bhirengekanyo kw-iswe, insonga kisige okuranga amabhiibhi, rwa kutyo bhayo ꞉bhaarangaga.

⁷ Mwasiga okuramya ebhisusano, rwa kutyo abhandi agati weebhwe ꞉bhaakoraga. Kyakora ikaamirwe mu-Makaamo Amataakatiifu ati, “Abhaanu ꞉bheekaaye mbarya na okunywa, kimwi mbayambaara okubhinira ebhisusano.”

⁸ Kyasiga okutaara ameega, rwa kutyo abhandi agati weebhwe ꞉bhaariga mbakora, orusuku rumwi mbafwa abhaanu bhiwumbi makumi gabhiri na bhasatu.

⁹ Kyasiga okusakya Raatabhugenyi, rwa kutyo abhandi agati weebhwe ꞉bhaamusakiishe, mbarumwa na ebhisoro, mbafwa.

¹⁰ Na mwasiga okwisigiinyira rwa kutyo abhandi agati weebhwe ꞉bheesigiinyiiye, mbeetwa na maraayika omwiti.

¹¹ Mmbe, amangʼana gayo goone kutyo ꞉gaabhanyoorere, ngakaamwa, insonga gabhe ebhirengekanyo bhya okukigonya eswe bhanu kiriwo mu-nsiku gya obhuteero ginu.

¹² Mmbe, unu keerora ati akomeeye mu-bhwikirisha, eeyangarire, aasiga okugwa.

¹³ Amasakyo ganu gabhanyoorere, ni masakyo rwa ganu abhaanu abhandi bhoone abhanyoora ku-nsiku. Nyamuwanga ni mwitongeeye kaabheegana, ataribhasiga musakibhwe okukira kutyo omutura. Nawe, raabhé mukasakibhwa, Nyamuwanga kaaja okubhatuurira-wo na injira ya okusookera mu-masakyo, insonga mubhe na amanaga ga okusimbiira.

¹⁴ Mmbe ku-nsonga ya gayo, abheendwa bhaani, mwiyangarire mwasiga okuramya ebhisusano!

¹⁵ Enaaika na emwe, rwa abhaanu bhanu muri na obhwenge, mwiganiirishe rinu enibhabhwira.

¹⁶ Bhunu ekinywera ekikombe kya giinonkwe, akabhaga ka ebhyokurya bhya Raatabhugenyi, ayo niwe ekibha nkiyimbana na maanyinga ga Kiriisitu. Kikabhutura omukaate nkirya, ayo niwe ekibha nkiyimbana na omubhiri gwa Kiriisitu.

¹⁷ Omukaate ni gumwi, raabhé kutyo eswe kiri bhaafu, nawe eswe kyone kiri mubhiri gumwi. Eyibha kutyo kwa okubha ekiyimbanira ku-mukaate ogumwi guyo.

¹⁸ Muringire Abhaijirayeeri. Bhanu abharya bhinu bhisoosiibhwe ekimweso kw-ishengero, angu bhatakuyimbana na Nyamuwanga okuturira ku-kimweso kiyo?

¹⁹ Mmbe woori, naaike kutiki? Naaike ati, ebhyokurya bhinu bhisoosiibhwe okubha bhimweso ku-bhisusano, ebhisakira? Amwi ati ebhisusano ebhisakira?

²⁰ Itari kutyo, nawe ebhimweso bhinu abhasoosha, abhabhisoosha ku-misambwa, na bhatakubhisoosha ku-Nyamuwanga. Anye nitakwenda emwe muyimbane na emisambwa. Mutakutura okunywera ekikombe kya Raatabhugenyi mumare munywere na ekya emisambwa.

²¹ Mutakutura okunywera mu-kikombe kya Raatabhugenyi mumare munywere mu-kikombe kya emisambwa. Mutakutura okurya kw-igari rya Raatabhugenyi mumare murye na kw-igari rya emisambwa.

²² Angu, ekyenda Raatabhugenyi akifuyire? Angu, omutoga ati kiri na amanaga okumukira?

Kigungye Nyamuwanga ku-ganu ekikora

²³ Omuunu kaatura okwaika ati, “Anye nitakusisha okukora kyonekyone kinu eneenda.” Nawe anye enaaika ati, ebhindi bhitari bhijomu. Kweki kaaika ati, “Anye nitakusisha kiinu kyonekyone,” Nawe enaaika ati, ebhindi bhitakukisakira.

²⁴ Omuunu aasiga okwigana omwene era, tari eegane ganu agasakira abheejaabho.

²⁵ Kyonekyone kinu ekigusibhwa mw-igusisho, murye. Mwasiga okubhuusirishabhusirisha, insonga muryega emitima gyerere,

²⁶ kwa okubha Amakaamo Amataakatiifu agaaika ati, “Ekyaro na ebhiinu bhyone kutyo bhinu bhirimo ni bhya Raatabhugenyi.”

²⁷ Raabhe omuunu unu atari Mukiriisitu akabhabhirikira okurya, mwikirisha okugenda, mwasiga kubhuusirishabhusirisha, murye kyonekyone kinu ekireetwa kw-igari, insonga murye emitima gyerere.

²⁸ Nawe raabhe omuunu akabhabhwira ati, “Ekyokurya kinu kisoosiibhwe ekimweso ku-misambwa,” ayo mwasiga okurya, ku-nsonga ya omuunu unu kaabhabhwira, insonga mwasiga okukora omutima gwaye gubhiiye.

²⁹ Nikaaika ati, omutima okubhiiya, nitakwaikira emitima gyeswe, tari enaaikira omutima gwa omuunu unu kaabhabhwira. Nawe kubhaki obhwiyagaaro bhwani bhuramurirwe na okubhiiya omutima gwa omuunu owundi?

³⁰ Raabhe anye enikumya Nyamuwanga niwe nindya ekiinu, kubhaki nifumwe ku-nsonga ya ekiinu kinu enirya nikumiishe Nyamuwanga?

³¹ Mmbe, engʼana ryoneryone rinu omukora, kubhe ni kurya, amwi ati ni kunywa, na amangʼana agandi goone kutyo, mukore ku-nsonga ya okugungya Nyamuwanga.

³² Mwasiga okuyabhya Abhayawudi, bhanu bhatari Bhayawudi na riikanisa rya Nyamuwanga.

³³ Mubhe rwa kutyo anye niri. Eniikomeesha okujomisha abhaanu bhoone kutyo ku-mangʼana goone kutyo ganu enikora. Nitakukora kutyo niijomishe anye omwene, tari enikora kutyo insonga abhaanu abhaafu bheerusibhwe.