1 Abhakorinto 1 - Iimuuma Iinyaaya

Obhukeesha

¹ Iinyarubha inu eniyikaama anye Pawuro, niri na Omukiriisitu weejaasu Sositeene. Anye ꞉naabhirikiiywe okubha mutumwa wa Kiriisitu Yeesu okuriingʼaana na obhukene bhwa Nyamuwanga.

² Ekibhakaamira emwe bhanu muri mw-ikanisa rya Nyamuwanga mu-musi gwa Korinto. Emwe mwesiibhwe na Nyamuwanga okuturira ku-bhuyimbani bhwemwe na Kiriisitu Yeesu, ˆnaabhabhirikira mubhe bhataakatiifu, amwi na abhaanu okusooka mbaara gyone kutyo, bhanu abhasaasaama Yeesu Kiriisitu, Esebhugenyi, na Raatabhugenyi kw-iswe kyone.

³ Iinema na omurembe okusooka ku-Raata Nyamuwanga, na ku-Raatabhugenyi Yeesu Kiriisitu, bhibhe amwi na emwe.

Ginkumyo gya Pawuro ku-Nyamuwanga

⁴ Enikumya Nyamuwanga waani kiyana ku-nsonga yeemwe, ku-nsonga ya iinema inu abhayaaye okuturira ku-Kiriisitu Yeesu.

⁵ Mu-kuyimbana kwemwe na Kiriisitu muniibhire mu-mangʼana goone kutyo, munomuuno ku-kwaika kwemwe, na obhumenyi bhwa amangʼana goone kutyo.

⁶ Gayo ageeresha ati amangʼana ga Kiriisitu ganu ꞉kyabharaasisiishe ni ga kimari.

⁷ Kyakora mutasuuyiiwe ekiyaanwa na kimwi ku-bhiyaanwa bhya Mwoyo Omutaakatiifu, mu-kabhaga kanu omurindirira muno okusubha kwa Raatabhugenyi weeswe Yeesu Kiriisitu.

⁸ Omwene niwe kaaja okubhakomeesha okuyikira ku-bhuteero, insonga mwasiga okwisigiinyirwa, orusuku runu arisubha okuramurira abhaanu.

⁹ Nyamuwanga arikora gayo, kwa okubha omwene ni mwitongeeye. Omwene niwe ꞉aabhabhirikiiye muyimbane na omwana waaye Yeesu Kiriisitu, Raatabhugenyi weeswe.

Obhumwi agati wa Abhakiriisitu

¹⁰ Woori, Bhakiriisitu bheejaasu, enibheesaasaama kw-isiina rya Raatabhugenyi weeswe Yeesu Kiriisitu ati, mwasiga okutaashaanya mu-bhwaiki. Na mwasiga okurema okuungwana emwe abheene na abheene, tari mubhe na omugambirano gumwi, na bhwaiki bhumwi.

¹¹ Bhakiriisitu bheejaasu, abhaanu abharebhe abheenda ewa Kurowe bhaandeeteeye amangʼana ati, iriwo iinyombo agati weemwe.

¹² Kinu eneenda okwaika ni kinu ati, emwe mwone kutyo wumwiwumwi kaaika ryaye. Unu kaaika ati, “Anye niri wa Pawuro.” Owundi kaaika ati, “Anye niri wa Apooro.” Owundi kaaika ati, “Anye niri wa Keefa.” Owundi kaaika ati, “Anye niri wa Kiriisitu.”

¹³ Angu, Kiriisitu uyo arimo karinga? Angu, Pawuro niwe ꞉aasungirwe ku-musarabha ku-nsonga yeemwe? Angu, ꞉mwabhatiisiibhwe kw-isiina rya Pawuro?

¹⁴ Enikumya Nyamuwanga, kwa okubha ꞉nitaabhatiisiishe muunu woonewoone kw-imwe, tari Kirisipo na Gaayo era.

¹⁵ Mmbe, kw-imwe atariwo unu kaatura okwaika ati ꞉aabhatiisiibhwe kw-isiina ryani.

¹⁶ Naayiita, ꞉naabhatiisiishe na abhaanu abheenda ewa Sitefwano. Ukasiga bhayo, nitakumenya raabhe ꞉naabhatiisiishe omuunu owundi woonewoone.

¹⁷ Kiriisitu ꞉ataantumire anye okubhatiisha abhaanu. Tari ꞉aantumire okuraasha Amangʼana Amajomu. Na niraashe nitakwisiga bhwenge bhwani omwene, na kwaika kwani kujomu, insonga okufwa kwa Kiriisitu ku-musarabha kwasiga okubhurwa obhwera.

Kiriisitu niwe amanaga na obhwenge bhwa Nyamuwanga

¹⁸ Riingʼana rya omusarabha, ni engʼana rya kisiru ku-bhaanu bhanu bhatari ku-Nyamuwanga. Tari kw-iswe bhanu ekyerusibhwa, iingʼana iyo eyeeresha amanaga ga Nyamuwanga.

¹⁹ Ni rwa kutyo ikaamirwe mu-Makaamo Amataakatiifu ati, “Nirinyamura obhwenge bhwa abhaanu bhanu bhari na obhwenge. Na okumenya kwa abhamenyi kwone nirikurema.”

²⁰ Woori ari aaki omuunu unu ari na obhwenge? Ari aaki unu keeyigisha ebhiraagiro bhya Musa? Ari aaki omurwaji wa siinu? Angu Nyamuwanga ꞉ataakorere obhwenge bhwa ku-kyaro okubha bhutengʼo?

²¹ Enaaika kutyo, kwa okubha Nyamuwanga okuriingʼaana na obhwenge bhwaye, ꞉aaramuuye ati abhaanu bhatakutura okumumenya okuturira ku-bhwenge bhwebhwe abheene. Tari omwene ꞉aaramuuye okwerusha bhanu abhamwikirisha okuturira ku-mangʼana ganu ekiraasha ganu abhandi abhaaika ni ga kisiru.

²² Abhayawudi okwikirisha abheenda bharore ebhiruguusho, Abhayunaani bheeki abhaagara okurora obhwenge.

²³ Nawe eswe, ekiraasha amangʼana iiguru ya Kiriisitu unu ꞉aasungirwe ku-musarabha. Amangʼana gayo agafururusha Abhayawudi, na ku-Bhayunaani ni mangʼana ga kisiru.

²⁴ Nawe ku-bhanu Nyamuwanga ꞉aabhabhirikiiye okubha bhaanu bhaaye, bhabhe Bhayawudi amwi ati bhatari Bhayawudi, Kiriisitu niwe amanaga ga Nyamuwanga, na obhwenge bhwa Nyamuwanga.

²⁵ Amangʼana ganu abhaanu abharora ati ni bhutengʼo bhwa Nyamuwanga, ni ga kyenge muno okukira aga abhaanu. Na aga Nyamuwanga ganu abhaanu abharora ati gatari na managa, gari na amanaga okukira aga abhaanu.

²⁶ Woori, Bhakiriisitu bheejaasu, muyiite kutyo ꞉mwariga muri bhunu ꞉mwabhirikiiywe na Nyamuwanga. Ku-kuringira era, abhaafu agati weemwe ꞉mwariga mutari na bhwenge. Na ꞉mwariga mutakumukire muno, na ꞉mwariga mutasookere mu-nyumba gya abhaanu bha ekibharo.

²⁷ Nawe Nyamuwanga ꞉aasorere amangʼana ganu abhaanu abhatoga ati ni ga kitengʼo, insonga aswashe bhanu bhari na obhwenge. Kweki Nyamuwanga ꞉aasorere ebhiinu bhya mu-kyaro bhinu bhitari na amanaga, insonga aswashe bhinu bhiri na amanaga.

²⁸ Nyamuwanga ꞉aasorere ebhiinu bhinu abhaanu abharora ati bhitari na kibharo, na bhinu abhajeera, bhinu abhaanu abharora ati bhitari na bhwera, insonga anyamure amangʼana ganu abhaanu abharora ati gari na obhwera.

²⁹ ꞉Aakorere kutyo insonga omuunu woonewoone aasiga okwikumangya mu-meeso ga Nyamuwanga.

³⁰ Nyamuwanga niwe abhayimbanyiishe na Kiriisitu Yeesu. Niwe akorere Kiriisitu abhe obhwenge bhweswe. Okuturira ku-Yeesu kibheeye bharengeresi, bhataakatiifu mu-meeso ga Nyamuwanga na kituuriibhwe.

³¹ Rwa kutyo ikaamirwe mu-Makaamo Amataakatiifu ati, “Omuunu woonewoone unu keekumangya, eekumangye ku-nsonga ya Raatabhugenyi.”