Yṳ̌da 1 - Kawyaw New Testament

¹ He mî̌ Khûya̤kû apṳ̌ KhûYǔda, htokhôtô̤̌ he mî̌ Yeshǔ Khrǐ ajû̌ tôpwa̤. He sǎyṳ wě̤cû̌bǎ kòyò dǒ pha Cǒmara kaǎ asî dě a mô̤ǐ asî, tô̤̌ Yeshǔ Khrǐ ô̌pǒ̤ takabǐ ǐ asî nutokhlǒ a ô̌.

² Cǒmara a ta̤sǎyṳgwèbǎǐ, a sǎphlǒ gûjû̌kabǎ kû̌ ata̤mô̤ ô̌lǒô̌be pû kû̌ sî nî̌꤮.

Sara jî̌lòhô anǎ̤ tokhlǒ

³ He sû̌khômô̤ sî, ta̤ma̤hǎplǎge dǒ pa lǒ̤bò nǐ̤bǎ wô̤̌wô̤̌ lû̌û awe̤akènu, he sǎyṳ wě̤cû̌ bǎ jî̌ sî bǎbǎkǎlè khònò̤̌ he kè̌shǐ kû̌ he bǎ wě̤cû̌khô̌ tèplè̌ bǎ sî dǒ ashǔshawa̤ tôcǒ. Dě he sǎyṳ ǐkhû̌ǐǎ sî kû̌ ta̤sǎlě̤we̤kè dǒ Cǒmara ǐlò̤ htophlǔ bò tôplǎ nô̤̌ kû̌ kòyò lǒ̤bò dǒ a yṳ̌ǎ tokhlǒnu, sî jî̌pwǐ̤ ô̌ tònòshû̌sho wô̤̌wô̤̌ pû a nî̌꤮.

⁴ Ma̤titèhî̌dě, kòyò dǒ a bè̌dubè̌nǎ̤ Cǒmara tô̤̌ tokhlǒnu a hènṳ̌hǔ dǒ sîkla hǒ. Pô̤̌khô asî gǔ hî̌bǎ hǎplǎ anǎ̤ kû̌ a ta̤ô̌htûpwa̤ apî̌alṳ̂̌ tokhlǒ ayanudě, a htû̌lè̌ tèplè̌ge pa Běcǎ Cǒmara abwǐsîrî nutokhlǒ awe̤akè. Kǎtô̤̌ asî hǒtokhlǒnu a yṳ̌ǎ kû̌ pa ikǒlǒkòdû̌ Běcǎ Yeshǔ Khrǐ nutô̤̌. Pô̤̌ lî̤plò̌shǐ shôbǐǐ nǎ hto ta̤cî̌htò̌ tokhlǒnu asî khòbǎ lǒ̤bò pě.

⁵ Sî sî̌ganǎ̤ htobò ta̤hǒo lǒ̤bò hǒ bǎbǎkǎlè he sǎyṳ dǐ gènè̤bǎ pô̤̌sô̌ sî kû̌ tôplǎnu Běcǎ ma̤hǎplǎ hǎhtò̌gehto Isèrèlaphû̌ dǒ Ijî̌gǎ bǎbǎkǎlè dǒ nô̌kònu a ma̤si bòkèsô̌ kòyò lǒ̤bò dǒ a yṳ̌ǎ lû̌û tô̤̌ nutokhlǒ.

⁶ Gènè̤htò̌ tîkhîsô̌ lô̌khô tûû̌ tanaphû̌ dǒ a wîkè Cǒmara ǐ asî ata̤pǒǐnu, dě a hǎhtò̌cû̌ khô̌kè kû̌ a lǎ̤ô̌nu tokhlǒ. Cǒmara comě bòkè asî kû̌ sǒpli̤tè̤glè dě a dǒnṳ̌kè asî dǒ ta̤khǐsiwi̤ akû hǒ. Dě a bè̌ô̌ asî tǒ̤dǒ ta̤cî̌htò̌ a lṳmṳ̌ni̤dû̌ nutôni̤ pě.

⁷ Pô̤̌nudě, gènè̤htò̌ nṳ̌sô̌ lô̌khô Wî̤̌sadû kû̌ Wî̤̌gamû̌ra kû̌ wî̤̌ ô̌ dǒ a kòshî̌ nutokhlǒ. Wî̤̌kûphû̌ bǎnu tokhlǒ mî̌ a ma̤sǔ sô̌sô̌ ta̤ pô̤̌nu hǒ. Asî gû̌ma̤ lô̌khô sǐshi lǎ̤klô sǎyṳ phû̌mò̤̌ tokhlǒ dě ma̤mô̤ lô̌khô anǎ̤ kû̌mî̌ pwa̤mǒ̤pwa̤khû lǎ̤klô phû̌mò̤̌ tokhlǒ. Asî khòbǎ ta̤pò̤̌ta̤sha dǒ mî̌phǎkla tûjû̌pwa̤ numî̌, a htûhtò̌ kòyò lǎ̤kè̌lû̌ dǒ kòyò lǒ̤bò aya hǒ.

⁸ Kòyò dǒ a hènṳ̌hǔ dǒ sîkla tokhlǒ numî̌ asô̌sô̌kû̌ hǒo nuhǒ. Dǒ asî kè̌shǐ nǎ ta̤ tokhlǒ akhû̌akhî, asî ma̤phǔmò̤̌ lò̤ tûû̌ sô̌ anǎ̤glǒ tokhlǒ pwǎ. Asî htè̌shěshu ta̤shû̌ta̤sho hǒo dě a pîjî̌ǐsho mǒkhû̌ tanaphû̌ dǒ a ô̌ kû̌ a ta̤bwǐdû̌sîrîhtû nutokhlǒ.

⁹ Mǐkelǎ mî̌ mǒkhû̌ tanaphû̌ dǒ adû̌lǒbò kòyò bǎbǎkǎlè bǎ a kû̌ hǎkhû̌tana klî̌ lû̌û kû̌ Khûmṳ̂shě alṳ̌nǎ̤glǒ akhanu, Mǐkelǎ sǎhtǎ bè̌bǔ ta̤sǔ dǒ hǎkhû̌tana tô̤̌. A hî̌ pwǎ lû̌û kû̌, “Cǒmara sǎhtǎ tûû̌ na pě,” pô̤̌nu pwǎ.

¹⁰ Bǎbǎkǎlè kòyò hǒtokhlǒnu a pîjî̌ǐsho ta̤ dǒ a sî̌ganǎ̤ phlǔtô̤̌ nutokhlǒ. Asî sǎphlǒ sô̌sô̌ lô̌khô kû̌ ta̤phû̌ta̤wè̤ akhû̌akhî, a gû̌ ma̤ lô̌khô pô̤̌ asǎphlǒ noma̤ lû̌û nupwǎ. Dǒ asî ma̤pô̤̌nu akhû̌akhî, a ma̤pî̌ma̤lṳ̂̌ lô̌khô anǎ̤ hǒ.

¹¹ Cǒmara gǔ cî̌htò̌ mè̤̌mî̌ca asî pě, ma̤titèhî̌dě asî gû̌ma̤ pô̤̌ Khûkayi ma̤nu hǒ. Dǒ asî bè̌dû̌ ruhta akhû̌akhîdě, a sǎphlǒshû̌ gû̌ma̤ pô̤̌ Khûbala ma̤sǔ nuhǒ. Asî ma̤shěshu kòyò htû ikǒlǒkòdû̌ tokhlǒ sô̌sô̌kû̌ Khûkû̌ri ma̤hto nuhǒ. Kòyò ma̤pî̌kè asî pô̤̌ kòyò ma̤pî̌kè Khûkû̌ri nupě.

¹² Bǎ sî bǒsû̌khǎkhô ǎwô̤̌wô̤̌ ôwô̤̌wô̤̌ shǎǎ akhanu, kòyò hǒtokhlǒ hènṳ̌ ma̤wǐma̤phû̌mò̤̌ kû̌ sî pě. Asî hǒtokhlǒ numî̌ asô̌sô̌pwǎ kû̌ pwa̤kè̌sû̌phû̌ tokhlǒ dǒ a bè̌dû̌ pwǎtǒ̤ a lǎ̤ǎbǎôbǎ ayapwǎ dě a lǎ̤sòwò̤̌nu a ô̌ kû̌ lô̌khô kòyò tôcǒ tô̤̌. Asî numî̌ asô̌sô̌kû̌ poǒlṳ̌ tokhlǒ dǒ a cû̌kè dě a julò̤ bǎ kòyò tô̤̌ nutokhlǒ pwǎ. Asî hǒtokhlǒnu asô̌sô̌kû̌ sǒmṳ̌ dǒ asǎaphô hǎhtò̌ gû̌ kòyò kû̌ ashěakhǎ tô̤̌ tokhlǒ, dě kòyò htěhtò̌sada akhò̌wǐ̤ dě a sibòkènu.

¹³ Asî tokhlǒnu, asô̌sô̌kû̌ shipěpǒ sho dǒ shidû̌te̤we̤ akûnu tokhlǒ pwǎ. Htokhôtô̤̌ asî ta̤ma̤ dǒ a htûhtò̌ ta̤sòwò̤̌ tokhlǒnu a ô̌lṳ̌htò̌ sô̌sô̌kû̌ shibǒbè̌ nupě. Asî mî̌ kòyò dǒ asûcû̌tô kò klè̌tô̤̌ asô̌sô̌ kû̌ shǎ dǒ acû̌htôcû̌lò̤ a ô̌tò̤̌ agûlǎ̤ nutokhlǒ. Cǒmara tîwî̌tòwò nǎ bǎ asî gûlǎ̤ dǒ ta̤khǐsiwilǒkò tôkû dě a dǒnṳ̌ asî bǎnu tûjû̌pwa̤ talakhǎ pě.

¹⁴ Khûěnò̌ dǒ akhlialè lò̤ dǒ PhaAda ahtukha susô̌tôhtu nutôpwa̤ shôbǐǐ nǎ yî̤̌hto hǒ kû̌ asî hǒtokhlǒ awe̤akè dě a hî̌ kû̌, “Běcǎ gǔ hèwô̤̌wô̤̌ kû̌ amǒkhû̌ tanaphû̌ plò̌shǐ tokhlǒ dǒ kò dô̌bǎpè̤̌ tô̤̌nu pě.

¹⁵ Ma̤titèhî̌dě a hè cî̌htò̌ bò kòyò pṳ̂̌tôpwa̤ pě. A gǔ cî̌htò̌ bò kòyò dǒ a bè̌dubè̌nǎ̤ gû̌ kòyò Cǒmara tô̤̌ nutokhlǒ pě. A cî̌htò̌ asî ata̤sǔta̤plě dǒ asî ma̤tô kû̌ Cǒmara aklè̌aklò tô̤̌ nutokhlǒ pě. Asî htè̌geshěshu Cǒmara akhû̌akhî, a cî̌htò̌ asî pě.”

¹⁶ Kòyò hǒtokhlǒ numî̌ kòyò dǒ a tûmṳ̂̌ta̤ma̤ shû̌ dě a bè̌pwǎ ta̤sǔ dǒ kò alô̤ pṳ̂̌taplǎ. Asî gû̌ma̤ tûû̌ anǎ̤glǒ a ta̤sǎyṳsǎbǎ phû̌mò̤̌ nutokhlǒ akò pwǎ. Asî hî̌bǎ htû̌sò̌ ǐtû̌ lô̌khô anǎ̤, kǎtô̤̌ pô̤̌khô asî gǔ nǐ̤bǎ ta̤ dǒ a sǎyṳ nutokhlǒ dě, a hî̌bǎ htû̌sò̌htò̌ǐ lô̌khô kòyò.

Ta̤ǐsè̌rè̌ kû̌ ta̤sû̌ǐtòwòǐ tokhlǒ

¹⁷ Bǎbǎkǎlè he khô sî, gènè̤bǎ to̤ǐbǎ sô̌ lô̌khô pa Běcǎ Yeshǔ Khrǐ a pwa̤nophû̌ tokhlǒ shôbǐǐlṳ̌ nǎ hto sî nutokhlǒ nî̌.

¹⁸ Asî hî̌ bǎ sî kû̌, “Htû̌ lṳmṳ̌ni̤ lṳmṳ̌sa dǒ gutṳ̌kò pě tokhlǒnu kòyò dǒ a pî̤jî̌pèshè̌ sǎyǎ̤ sî tokhlǒ ô̌htò̌ pě. Asî nutokhlǒ mî̌ a gû̌ma̤ còcè̌ pwǎ pô̤̌ a ta̤sǎyṳ phû̌mò̤̌ dǒ a tô kû̌ Cǒmara asǎphlǒ tô̤̌ nutokhlǒ pwǎ.”

¹⁹ Kòyò hǒtokhlǒ numî̌ kòyò dǒ a ma̤ lûcû̌peshe bò kòyò, kòyò dǒ a gû̌ma̤ pô̤̌ anǎ̤glǒ phěyî̌ a ta̤sǎyṳsǎbǎ ô̌nu tokhlǒ, kǎtô̤̌ asî hǒtokhlǒ numî̌ a nǐ̤bǎ gû̌ kòyò Yôla Plò̌shǐ Běcǎ tô̤̌.

²⁰ Bǎbǎkǎlè he khô sî, sî bǎ ma̤dû̌htò̌htûhtò̌ pô̤̌ lô̌khô sî ta̤ô̌htûpwa̤nu dǒ sî ta̤yṳ̌ta̤nǎ̤ plò̌shǐ dǒ ashû̌shotònònu alô̤ dě, bǎ sî kwicaba akhanu, nǎla̤ǐ lô̌khô Yôla Plò̌shǐ Běcǎ nè̌klè̌nè̌klòǐ sî nutokhlǒ nî̌.

²¹ Bǎ sî ô̌pǒ̤kè̌shuǐ Běcǎ Yeshǔ Khrǐ a ta̤gwèbǎǐ dǒ a gǔ ǐ pa yôla htûpwa̤ tûjû̌pwa̤ hǒtôpwa̤ hè akhapěnu, ô̌htûpwa̤ sělě lô̌khô dǒ Cǒmara ata̤mô̤ akû nî̌.

²² Sǎyṳgwèbǎǐ kòyò dǒ a yṳ̌ǎ Khrǐnu bǎbǎkǎlè asǎphlǒ wò̌wè̌ pe nutokhlǒ nî̌.

²³ Jî̌pwǐ̤ ma̤jè̌ padô̌ kòyò dǒ a lǎ̤lṳ̂ ta̤ma̤hǎplǎge pô̤̌ na ma̤hǎplǎge kòyò dǒ mî̌kû nutokhlǒ nî̌. Htodě gwèbǎǐ bǎ pô̤̌ kòyò dǒ ashǔshawa̤ nutokhlǒ nî̌. Bǎbǎkǎlè gènè̤ tě̤tě̤mè̤̌mè̤̌ tîkî̌ nî̌, ma̤titèhî̌dě na tô ma̤yǒ̤ ajehǐyò̤̌ dǒ a wî̌ kû̌ asî ta̤sǔta̤phû̌mò̤̌ nutokhlǒ nî̌.

Ta̤htû̌sò̌htò̌ a ta̤kwicaba

²⁴ Pa htû̌sò̌htò̌ wô̤̌wô̤̌ lû̌û Cǒmara tǎ! Pô̤̌khô sî gǔ lò̤khǔpo̤ tǎ̤mǎ̤ ayanu, Cǒmara gǔ kè̌khwè̌ǐ ma̤jè̌ tûû̌ sî nî̌. Htokhôtô̤̌ a gǔ kaǎge bò̌ tûû̌ sî dǒ a lô̤mô̤̌ pě dě sî ta̤sǔ gǔ ô̌ pe tô̤̌, dě sî sǎlě̤sǎlò̤ mè̤̌mî̌ca tûû̌ pû nî̌.

²⁵ Comara mî̌ ta̤bwǐdû̌sîrîhtû. Cǒmara mî̌ a ô̌ tôpwa̤ nô̤̌ pwǎ. Kòyò dǒ a ma̤hǎplǎge pa mî̌ tǒ̤ a tôpwa̤ nô̤̌ pwǎ. Dǒ Yeshǔ Khrǐ akhû̌akhî, dě ta̤bwǐdû̌sîrîhtû, ta̤dû̌ta̤htû awî̤awô̌, ta̤pô̤ta̤phǎ kû̌ ta̤siwi̤sòwò̤ hǒtokhlǒnu, a ô̌cu pû kû̌ Cǒmara sahtò̌ dǒ ta̤tôcǒ ô̌ htûhtò̌ khôtô̤̌ akha, tǒ̤lò̤ khònò̤̌, hènè ajû̌jû̌ apwa̤pwa̤ nî̌꤮, Ame̤.