Tǐtǔ 1 - Kawyaw New Testament

¹ He mî̌ Khûpò̌lǔ, he wě̤cû̌ bǎ na lî̤ hǒtôbǎ. He mî̌ Cǒmara ajû̌ kû̌ Yeshǔ Khrǐ a pwa̤nophû̌ tôpwa̤. Cǒmara rû̌htò̌ he dě a nocû̌ ma̤jè̌ he kû̌ kòyò dǒ a rû̌htò̌ lû̌û nutokhlǒ a ta̤yṳ̌ta̤nǎ̤, dě a gǔ sî̌ganǎ̤ lô̌khô ta̤tě̤ta̤mè̤̌. Ta̤cǒta̤tè̤ numî̌ a ma̤jè̌ asî dǒ a gǔ ô̌htûpwa̤ tô kû̌ Cǒmara asǎphlǒ nutokhlǒ hǒ.

² Ta̤cǒta̤tè̤nu a ǐ asî ta̤kè̌shuǐ dǒ asî gǔ nǐ̤bǎ yôla htûpwa̤ tûjû̌pwa̤ talakhǎ aya hǒ. Bǎ hǎkhû̌ ô̌htûhtò̌ nò̌khôtô̤̌ akhanu, Cǒmara dǒ a lô̌ǐta̤ tôkhò̌꤮ tô̤̌ tôpwa̤nu, a olò̤ nǎ hto kû̌ a gǔ ǐ pa ta̤htûpwa̤nu hǒ.

³ Cǒmara dǒ a ma̤hǎplǎge pa hǒtôpwa̤ dǐsî̌ganǎ̤ bǎ pa ta̤we̤ta̤kè numî̌, a shěkhǎ tôbǎ dě a yṳ̌ǎnṳ̌ he dě a nolò̤ he dǒ he gǔ dǐsî̌ganǎ̤ bǎ sî kû̌ ta̤we̤ta̤kènu hǒ.

⁴ Khûtǐtu, he wě̤cû̌ lî̤ hǒtôbǎ dǒ naô̌. Na ta̤yṳ̌ta̤nǎ̤ asô̌sô̌kû̌ pa tôcǒ꤮ nô̤̌ akhû̌akhî, nanu a asô̌sô̌kû̌ hephû̌ sanǎ̤ kû̌ henǎ̤. pha Cǒmara kû̌ pwa̤ma̤hǎplǎge pa Yeshǔ Khrǐnu gǔ pû na ta̤bwǐta̤sîrî kû̌ ta̤gûjû̌kabǎ nî̌꤮.

Khûtǐtu ta̤ma̤ bǎ Grete shikhokhû̌

⁵ He bè̌kè hǒ na bǎ Grete shikhokhû̌ numî̌ pô̤̌khô na gǔ cû̌ tiwǐ ma̤tô̤ma̤bǎ htophlǔkè bò ta̤ dǒ a lǎ̤lṳ̂ma̤pe dǒ wî̤̌nu pṳ̂̌tôwî̤̌ akû nutokhlǒ pwǎ. Dě na gǔ bè̌htò̌ ta̤dòkû mǒ̤khumǒ̤pwǎ̤ tokhlǒ pô̤̌ he nè̌klè̌nè̌klò hto nanu nî̌꤮.

⁶ Ta̤dòkû ikǒlǒkòdû̌ tokhlǒ numî̌ asî bǎ mè̤̌ kòyò dǒ kòyò lǎ̤bè̌ ta̤sǔ dǒ asîlô̤nu a tôbǎ ô̌ tô̤̌. Ama bǎ ô̌pwǎ tôpwa̤꤮ nô̤̌, aphû̌ tokhlǒ numî̌ a bǎ htû pwa̤yṳ̌ǎta̤phû̌ dě asî mi̤ bǎ lṳ̌dǒ awî̤awô̌, mè̤̌tô̤̌mî̌ a bǎ nò̌kudu tô̤̌, htodě a bǎ mè̤̌ kòyò dǒ a ganǎ̤de yô̤̌ tokhlǒ.

⁷ Ma̤titèhî̌dě, ta̤dòkû ikǒlǒkòdû̌ tôpwa̤nu, ta̤ma̤ lò̤bǎ a dǒ a tôbǎ ma̤ Cǒmara a ta̤phǐta̤ma̤ akhû̌akhî, kòyò lǎ̤bè̌ a ta̤sǔ mî̌ a tôbǎ ô̌ tô̤̌. Ikǒpwǐ̤ kû̌ sǎphlǒ dû̌htò̌phwè tokhlǒnu a tôbǎ ô̌ tô̤̌, bǎ ǎmuôpô̌ tô̤̌, bǎpo̤bǎplè kòyò tô̤̌, bǎ pṳ̂̌sigwǐǎ ru dǒ kòyòkhû̌ tô̤̌.

⁸ Mè̤̌mè̤tôkhô, a tôhtû kòyò dǒ a kaǎmô̤shǔ shǐpwǎ̤shǐmè̤, a tôhtû kòyò dǒ a mô̤ ta̤ dǒ awô̌, a tôbǎ ta̤khòjobò̌ǐ anǎ̤, a tôbǎ ô̌ kû̌ ta̤tě̤ta̤mè̤̌ kû̌ ta̤plò̌shǐ kû̌ ta̤sè̌rè̌ ǐbò̌ anǎ̤,

⁹ Pô̤̌khô a gǔ ǐkhû̌ǐǎbò̌ kòyò kû̌ ta̤sû̌ǐtòwòǐ dǒ atô tokhlǒ, htokhôtô̤̌ pô̤̌khô a gǔ sû̌ǐtòwòǐ getîkhîjòsô̌ kòyò dǒ a hî̌ takǎshěshu ta̤we̤ta̤kè hǒtokhlǒ ayanu, a tôbǎ yṳ̌ǎ pṳ̂̌měǐ wô̌ ta̤we̤ta̤kè dǒ kòyò yṳ̌ǎnṳ̌ a dě pô̤̌ kòyò sû̌ǐ hto lû̌û nutokhlǒ.

¹⁰ Ma̤titèhî̌dě kòyò dǒ a hî̌ takǎshěshu ta̤ tokhlǒnu a ô̌ dû̌wî̤. Asî nutokhlǒmî̌, a hî̌bǎ ta̤ dǒ yô̤̌mûyô̤̌sǎ ô̌tô̤̌ tokhlǒ, dě a hî̌bǎ lòhǎlòhô bò kòyò. Kòyò pô̤̌nu tokhlǒmî̌, ǎtakǐ, pa kè̌shǐjò asî bǎtè hî̌dě, asî nutokhlǒmî̌, a hî̌bǎ shû̌tuklǔ lô̌khô kû̌ pô̤̌khô kòyò gǔ nǐ̤bǎ ta̤hǎplǎge ayanu, kòyò bǎ dǔtṳ̌aphě, a hî̌ lô̌khô pô̤̌nu tokhlǒ akla nuhǒ.

¹¹ Tôbǎ noô̌sǔtukǔ asî ta̤hî̌bǎ nutokhlǒ, ma̤titèhî̌dě ta̤sû̌ǐtòwòǐ dǒ a tô sû̌ǐ tô̤̌ tokhlǒnu, asî cû̌sû̌ǐ kòyò akhû̌akhî, asî cû̌ ma̤shû̌shǎ ma̤dǐdòbò kòyò hǐphû̌phòphû̌ pṳ̂̌꤮ tôpwa̤ a ta̤yṳ̌ta̤nǎ̤. Asî sǎyṳ nǐ̤bǎ lô̌khô ru dě a cû̌ma̤lè sû̌ǐ kòyò pwǎ.

¹² Asî Grete klǔphû̌ piwi̤pèshè akla tôpwa̤nu a hî̌ kû̌, “Grete klǔphû̌ tokhlǒmî̌ kòyòlòhô pṳ̂̌taplǎ, asî mî̌ asô̌sô̌kû̌ ta̤mi̤ta̤mò̤̌ dǒ a khuhe phû̌mò̤̌ tokhlǒ htodě asî mî̌ kòyò cèklèlôbô̌phû̌ dǒ a ǎlǒ̤ô̌kè tokhlǒ.”

¹³ A hî̌ ta̤ hǒtokhlǒ numî̌ a tôpwǎ akhû̌akhî, pô̤̌khô asî gǔ ô̌cǒô̌tè̤ dǒ ta̤yṳ̌ta̤nǎ̤ akûnu sû̌ǐshû̌ asî nî̌꤮.

¹⁴ Htodě pô̤̌khô asî gǔ wîkè Yǔdaphû̌ a ta̤dô̌kènè̤ dǒ awǐnu nutokhlǒ, htodě pô̤̌khô asî wîkè ta̤mǎlò̤ dǒ kòyò htè̌shěshu ta̤tě̤ta̤mè̤̌ nutokhlǒ ta̤hî̌bǎ nutokhlǒ ayanu, sû̌ǐshû̌ asînu.

¹⁵ Kòyò tôpwa̤pwa̤ dǒ a mṳ̂̌plî dǒ Cǒmara a lô̤mô̤̌nu, ta̤lǒ̤꤮ bò mṳ̂̌plî bò dǒ aya hǒ. Bǎbǎkǎlè kòyò dǒ a mṳ̂̌plî gû̌ kòyò tô̤̌ dě a yṳ̌nǐ̤nǎ̤nǐ̤ gû̌ kòyò tô̤̌ tokhlǒnu, dǒ ayanu a mṳ̂̌plî tôcǒ꤮ tô̤̌. Asî ta̤sǔ tokhlǒnu a ma̤ phû̌mò̤̌bò nṳ̌sô̌ asî ata̤gènè̤ kû̌ asǎphlǒ dǒ a sî̌ganǎ̤ ta̤wî̤ kû̌ ta̤phû̌mò̤̌ nuhǒ.

¹⁶ Asî hî̌ kû̌ a sî̌ganǎ̤ Cǒmara bǎbǎkǎlè ta̤ma̤ dǒ asî ma̤ tokhlǒnu a ô̌lṳ̌htò̌ kû̌ asî sî̌ganǎ̤ Cǒmara tîkî̌꤮ tô̤̌. Asî nutokhlǒmî̌ lǎ̤ma̤yǒ̤sǐpi̤wô̤̌, htodě kòyò dǒ a ganǎ̤de kû̌ kòyò ayô̤̌ tô̤̌ tokhlǒ, asî glè̌ ma̤ta̤ awô̌ tocǒcǒnu a ma̤bò̌ kû̌ kòyò tô̤̌.