Ta̤dǔlè̌nǎ 7 - Kawyaw New Testament

Isôrěla a kòyò pwa̤ tôsě lǐ̤shò̌ kû̌ lǐ̤rǐ

¹ Ta̤ma̤anǎ̤ pô̤̌o htodě hǎkhû̌nu bǎbǎ, shidû̌shite̤we̤ nutokhlǒ bǎbǎ, sǒmṳ̌ tokhlǒ bǎbǎ, pô̤̌khô gili̤sǎ hèbǎ asî tô̤̌nu, he kè̌shǐ tanaphû̌ sò̌lǐ̤ ihtǒô̌ lô̌khô dǒ hǎkhû̌ lǐ̤khô dě a ma̤tě̤tṳ̌ shěshukèbò gili̤sǎ klè̌.

² He kè̌shǐ tanaphû̌ ashǔshawa̤ ô̌ dǒ lṳmṳ̌htò̌ tôkhô hè dě a phǐhèǐ Běcǎ Cǒmara dǒ a htûpwa̤ nutôpwa̤ a ta̤ma̤mǎma̤dòǐ tôkǔ. Htodě a jî̌pwǐ̤ kaǎgǔhtò̌ tanaphû̌ sò̌lǐ̤ dǒ Cǒmara ǐ asî ata̤pô̤ta̤phǎ dǒ a gǔ ma̤pî̌kè hǎkhû̌ kû̌ shidû̌te̤we̤ tokhlǒnu hǒ.

³ Tanaphû̌ nutôpwa̤ hî̌ kû̌, “Bǎ pa ma̤mǎma̤dòǐ nò̌khôtô̤̌nu Běcǎ Cǒmara jû̌ tokhlǒ kû̌ ta̤ma̤mǎma̤dòǐ dǒ a mě̤htò̌lô̤ nò̌khôtô̤̌nu, hǎkhû̌ bǎbǎ, shidû̌te̤we̤ bǎbǎ, sǒmṳ̌wṳ̂̌bô bǎbǎ, tôbǎ ma̤pò̤̌ma̤sha bǎ asî tôcǒ꤮ tô̤̌.”

⁴ Dě kòyò shôbǐǐ he kû̌ kòyò dǒ kòyò ma̤mǎma̤dòǐ a kû̌ Cǒmara a ta̤ma̤mǎma̤dòǐ bǎ a mě̤htò̌lô̤ tokhlǒnu, a ô̌ pwa̤ tôsě lǐ̤shò̌ kû̌ lǐ̤rǐ. Asî tokhlǒ mî̌ lǒ̤bò Isôrělaphû̌ shǐginǐ̤mṳ̌ nutokhlǒ hǒ.

⁵ Dǒ Khûyǔda tômṳ̌tôcǒ akla numî̌ pwa̤ tôshò̌ kû̌ ginǐ̤rǐ, dǒ Khûrǔbe tômṳ̌tôcǒ akla numî̌ tôshò̌ kû̌ ginǐ̤rǐ, dǒ Khûgǎ tômṳ̌tôcǒ akla numî̌ tôshò̌ kû̌ ginǐ̤rǐ,

⁶ Dǒ Khûasha tômṳ̌tôcǒ akla numî̌ tôshò̌ kû̌ ginǐ̤rǐ, dǒ Khûnatali tômṳ̌tôcǒ akla numî̌ tôshò̌ kû̌ ginǐ̤rǐ, dǒ Khûmanǎ̤she tômṳ̌tôcǒ akla numî̌ tôshò̌ kû̌ ginǐ̤rǐ,

⁷ Dǒ Khûshǐmû tômṳ̌tôcǒ akla numî̌ tôshò̌ kû̌ ginǐ̤rǐ, dǒ Khûle̤wǐ tômṳ̌tôcǒ akla numî̌ tôshò̌ kû̌ ginǐ̤rǐ, dǒ Khûǐshakha tômṳ̌tôcǒ akla numî̌ tôshò̌ kû̌ ginǐ̤rǐ,

⁸ Dǒ Sabǔlû tômṳ̌tôcǒ akla numî̌ tôshò̌ kû̌ ginǐ̤rǐ, dǒ Khûyṳ̂tǎ tômṳ̌tôcǒ akla numî̌ tôshò̌ kû̌ ginǐ̤rǐ kû̌ dǒ Khûbîyame̤ tômṳ̌tôcǒ akla numî̌ pwa̤ tôshò̌ kû̌ ginǐ̤rǐ.

Kòyò saprṳ̂dû̌ tôprṳ̂

⁹ Ta̤ma̤anǎ̤ pô̤̌o htodě he kè̌shǐ kòyò ô̌prṳ̂ô̌phǎ tôprṳ̂ dě kòyò dô̌ bǎpè̤̌ asî tôpwǎ̤꤮ tô̤̌. Asî ô̌ kû̌ kòyò khlilèphû̌ pṳ̂̌tomṳ̌, khliplô̤̌ pṳ̂̌tôplô̤̌, kòyò pṳ̂̌tocǒ, kû̌ ayô̤̌ pṳ̂̌tocǒ hè dě asî hèihtǒô̌ dǒ sû̌phû̌ kû̌ akhwǐ tòcòhta alô̤mô̤̌. Htodě asî kûsô̌htò̌nṳ̌ jejûbû dě pṳ̂̌měǐ lô̌khô golotṳmṳ̌ sǒphò sî tokhlǒ.

¹⁰ Asî jî̌pwǐ̤ kaǎgǔ dě a hî̌ kû̌, “Tǒ̤pwǎ pa Cǒmara dǒ a hǎnòò̌ô̌ dǒ khwǐ tòcòhta alô̤nu tôpwa̤ kû̌ sû̌phû̌ nutôdo ma̤hǎplǎge pa pwǎ.”

¹¹ Lǒ̤bò mǒkhû̌ tanaphû̌ tokhlǒ ihtǒô̌ te̤we̤ bò kû̌ khwǐ tòcòhtanu kû̌ mǒ̤khumǒ̤pwǎ̤ nutokhlǒ kû̌ ta̤htûpwa̤nu lǐ̤do. Bǎnuakha asî dô̌gînî̤lò̤ bò dǒ khwǐ côphǎ tòcòhta alô̤mô̤̌ dě cubucabahtò̌ lô̌khô Cǒmara.

¹² Dě a hî̌ lô̌khô kû̌, “Ame̤, ta̤htû̌sò̌htò̌, ta̤bwǐdû̌sîrîhtû, ta̤sî̌ta̤jò̌, ta̤hî̌bwǐhî̌sîrî, ta̤bè̌dû̌bè̌htû, ta̤pô̤ta̤phǎ, kû̌ ta̤khû̌ta̤ǎ tokhlǒnu, pa Běcǎ Cǒmara nǐ̤bǎ pû tûjû̌pwa̤ talakhǎ nî̌꤮ Ame̤.”

¹³ Htodě dǒ mǒ̤khumǒ̤pwǎ̤ nutokhlǒ akla tôpwa̤ nî̌ a gwè̌ he kû̌, “Kòyò dǒ a kûsô̌ jejûbû tokhlǒ numî̌ mò̌pè? Asî mî̌ a ô̌ bǎtè hè?”

¹⁴ “Saradû̌, he sî̌ganǎ̤tô̤̌, na sî̌ganǎ̤ pwǎ,” he hî̌shěshu a pô̤̌nu. Dě a hî̌shěshu he kû̌, “Asî tokhlǒ numî̌ kòyò dǒ a cû̌ tûlû̌bò̌ hto ta̤ma̤jî̌ma̤jû̌ dǒ a tirǐsò̌ ǐsha tocǒ nuhǒ. Asî shǔpǒ̤ ma̤bû hto a jejûhtû tokhlǒ kû̌ sû̌phû̌ nutôdo asǐ hǒ.

¹⁵ Pô̤̌nu akhû̌akhî, Asî ihtǒô̌ bǎ Cǒmara akhwǐ tòcòhta alô̤mô̤̌ hǒ dě asî ma̤ hto ata̤ma̤ lṳ̌mṳ̌khǐkhǐ, lṳ̌mṳ̌shasha bǎ ta̤lṳhtò̌ hôkû nuhǒ. Pwa̤ dǒ a hǎnòò̌ dǒ khwǐ a tòcòhta akhû̌ tôpwa̤nu, a gǔ ô̌cu kû̌ asî dě a gǔ tôgô̌tòdòǐ asî pě.

¹⁶ Sǎǎsǎô pe tôkhò̌꤮ tô̤̌. Lṳmṳ̌ shěbǎ pe asî tôkhò̌꤮ tô̤̌. A khòbǎ pe ta̤agû̌alû̌ tô̤̌.

¹⁷ Ma̤titèhî̌dě sû̌phû̌ ô̌ dǒ khwǐ tòcòhta aklǎmakû nutôdo gǔ kè̌ǐ asî dě a gǔ sûcû̌ asî bǎ shi dǒ a ǐ asî ta̤htûpwa̤ a shipǒ̤htò̌ tokhlǒ a ô̌ pě. Htodě Cǒmara htǔsûkè bǎ asî mǐ̤sǎshi pě.”