Ta̤dǔlè̌nǎ 6 - Kawyaw New Testament

Kòyò ma̤měwô̌ ta̤ma̤mǎma̤dòǐ tokhlǒ

¹ He kè̌shǐ sû̌phû̌ nutôdo kèè̌ môhtò̌ kòyò klǎiměcu ta̤ma̤mǎma̤dòǐ dǒ susô̌tôkǔ aklanu awǐlǒ tôkǔ dě he ganǎ̤de ta̤htûpwa̤ nulǐ̤do akla tôdonu alě̤pwe̤htò̌ sô̌sô̌kû̌ shî̌lî̌nu dě “Hèmò̌” a hî̌ pô̤̌nu.

² He kè̌ dě he kè̌shǐ tîsî̌bû tôdo, dě kòyò dǒ a dò̌ lû̌û tôpwa̤nu a pṳ̂̌měǐ khlǐ tôbǎ dě kòyò ǐ a khû̌glû̌hta tômè. A nî̌, asô̌sô̌kû̌ kòyò dǒ a shěpè̤̌ hto kòyò tôpwa̤nu. Khònò̤̌dě a dò̌ sô̌ tîsî̌ dě a hǎhtò̌cû̌ pô̤̌khô a gǔ cû̌shěpè̤̌ sô̌ kòyònu.

³ Bǎ sû̌phû̌ kèè̌ môhtò̌ ta̤ma̤mǎma̤dòǐ ginǐ̤kǔtôkǔ akhanu, he ganǎ̤de ta̤htûpwa̤ ginǐ̤do tôdo hî̌ kû̌, “Hèmò̌.”

⁴ Dě tîsî̌lî̤ tôdo hǎhtò̌, dě kòyò dǒ a dò̌ lû̌û tôpwa̤ nî̌, kòyò ǐ yǎ ta̤pô̤ta̤phǎ dǒ a gǔ phî̌hè ta̤shěta̤pě̤ bǎ hǎkhû̌nu. Dě hǎkhû̌phû̌ tokhlǒ gǔ ma̤si kè̌khîsô̌ lû̌û tôpwa̤ kû̌ tôpwa̤. Kǎtô̤̌ kòyò ǐ yǎ nò̌she tôbǎ.

⁵ Htodě sû̌phû̌ nutôdo kèè̌ môhtò̌ ta̤ma̤mǎma̤dòǐ sukǔtôkǔ dǒ kòyò ma̤mě yǎnu, dě he ganǎ̤de ta̤htûpwa̤ sudo nutôdo hî̌ kû̌, “Hèmò̌” a hî̌ pô̤̌nu. He kè̌ dě he kè̌shǐ tîsî̌lo̤ tôdo dě kòyò dǒ a dò̌ lû̌û tôpwa̤nu a pṳ̂̌měǐ còcèlǎ dǒ a cǔdekû.

⁶ He ganǎ̤de dǒ ta̤htûpwa̤ lǐ̤do aklanu, a sô̌sô̌ kû̌ alě̤pwe̤htò̌ tôcǒ, dě a hî̌ kû̌, “Wè̤ta̤ tônǐ̤mṳ̌hǎ nî̌, a nǐ̤ pwǎ akhû̌kǎ bǔjû̌ tôkò̌ pwǎ, mè̤̌tô̤̌dě bǔbǎli̤ sukò̌ pwǎ. Dě ma̤pî̌kè tǎ̤ òlǐbashi kû̌ sîpî̌shisî̌yô̤̌ nu tǎ̤mǎ̤ nî̌.”

⁷ Htodě sû̌phû̌ nutôdo kèè̌ môhtò̌ ta̤ma̤mǎma̤dòǐ lǐ̤kǔtôkǔ dǒ kòyò ma̤mě anu dě he ganǎ̤de ta̤htûpwa̤ lǐ̤do nutôdo hî̌ kû̌, “Hèmò̌” a hî̌ pô̤̌nu.

⁸ He kè̌ dě he kè̌shǐ tîsî̌ bûla tôdo. Dě kòyò dǒ a dò̌ lû̌û tôpwa̤ nî̌ kòyò kaǎ ami̤ kû̌ ta̤si. Dě lṳ̌gǎnǎdo gû̌ phǔti̤nǐ̤ kû̌ akò. Kòyò ǐ asî ata̤pô̤ta̤pwǎ̤ dǒ a gǔ ma̤pî̌kè hǎkhû̌ lǐ̤kǔtôkǔ pě. Pô̤̌nudě a gǔ ma̤si kòyò kû̌ ta̤shěta̤pě̤, ta̤ô̌hǎwǐ̤shèwè̤, ta̤shǐta̤sha kû̌ a gǔ no ma̤si kû̌mî̌ ta̤mi̤ta̤mò̤̌ tokhlǒ pě.

⁹ Htodě sû̌phû̌ nutôdo kèè̌ môhtò̌ ta̤ma̤mǎma̤dòǐ dǒ kòyò ma̤mě a yè̤̌kǔtôkǔnu. He kè̌shǐ kòyò dǒ a shôbǐǐlṳ̌ bǎ kòyò kû̌ Cǒmara alě̤ayô̤̌, kǎtô̤̌ a khòlṳ̌ cǒcǒtè̤tè̤, dě kòyò ma̤sihto asî tokhlǒnu, he kè̌shǐ asî yôla tokhlǒ ô̌dǒ ta̤lṳhtò̌awǎ̤ alǎ̤nu.

¹⁰ Asî kaǎgǔhtò̌ shû̌ lô̌khô ayô̤̌ kû̌, “Běcǎ dǒ a jò̌ta̤lǒ̤bò dě aplò̌shǐ, acǒatè̤ tôpwa̤, Kòyòphû̌khû dǒ a ma̤si pa tokhlǒnu, na gǔ cî̌htò̌ asî, na gǔ ma̤sô̌ asî alǐ̤ bǎkhò̌tè pě?”

¹¹ Kòyò ǐ asî jejûbû pṳ̂̌tôpwa̤, htodě kòyò hî̌ asî kû̌ asî gǔ ô̌kǔ pô̤̌ tashò̌phû̌nô̤̌. Dě asî gǔ ô̌kǔ tǒ̤dǒ kòyò ma̤si bò asî khô jû̌ tokhlǒ kû̌ apṳ̌wè̤̌ dǒ a yṳ̌nǐ̤nǎ̤nǐ̤ tokhlǒ pô̤̌ kòyò ma̤sihto asî nupě.

¹² He kè̌ dě he kè̌shǐ sû̌phû̌ nutôdo kèè̌ môhtò̌ ta̤ma̤mǎma̤dòǐ akǔ susô̌ nutôkǔ. Hǒtôplǎdě, tanahtû̌dema̤ shû̌mî̌ca, lṳmṳ̌ khǐkè sô̌sô̌kû̌ hugò̌pwǐlo̤ tôpṳnu, htodě la dě alî̤pi̤sǐ sô̌sô̌kû̌ sǐnu.

¹³ Shǎ tokhlǒ lò̤tě̤pro̤ bò dǒ hǎkhû̌ sô̌sô̌kû̌ gili̤sǎshû̌ hè dě dǐshimṳ̌ mi nò̌khôtô̤̌ tokhlǒ lò̤tě̤bò dǒ hǎkhû̌nu.

¹⁴ Mǒlǎ̤ nî̌ a hǎmǎkè sô̌sô̌kû̌ kòyò tûlû kè lî̤tûklûnu. Khôlô pṳ̂̌tèmè kû̌ klǔ pṳ̂̌tuklǔnu, a shǒ cû̌ bòkè kû̌ agûlǎ̤ pě.

¹⁵ Bǎnukha pěnu, hǎkhû̌ khwǐ sî, pwa̤pǒta̤ sî, kli ikǒlǒkòdû̌ sî, pwa̤dû̌yò̤̌htò̌sa sî, pwa̤khû̌ǎshû̌sho sî, htodě jû̌ lǒ̤bò sî bǎbǎ, lǒ̤bò pwa̤ nǐ̤bǎ ta̤pi̤li̤ sî bǎbǎ, a cû̌ ô̌hǔô̌bǐ lô̌khô anǎ̤ dǒ khokû, kû̌mî̌ dǒ lǒ̤te̤shô̌plǎ dǒ a ô̌ bǎ khômǔkhôlôkla nutokhlǒ pě.

¹⁶ Asî kaǎgǔhtò̌ lô̌khô khôlô tokhlǒ kû̌ lǒ̤ tokhlǒ dě a hî̌ lô̌khô kû̌, “Lò̤tě̤pro̤ dǒ pakhû̌nu dě lò̤tě̤pro̤ hǔbǐ kè pa kû̌ pwa̤ dǒ a hǎnòò̌ô̌ dǒ khwǐ tòcòhta akhû̌ nutôpwa̤ amǐ̤sǎ kû̌ sû̌phû̌ a ta̤sǎphlǒdû̌ panu.

¹⁷ Ma̤titèhî̌dě, lṳmṳ̌ni̤lṳmṳ̌sa hètǒ̤ dǒ Cǒmara kû̌ sû̌phû̌ gǔ cî̌htò̌ kòyò pṳ̂̌tôpwa̤ nuhǒ, mò̌pè tôpwa̤ glè̌ tṳ̌bǎ pěya?”