Rṳ̂̌me̤ 5 - Kawyaw New Testament

Ta̤pè̤̌ta̤dû kû̌ ta̤sǎlě̤sǎlò̤

¹ Pô̤̌nudě Cǒmara bè̌cǒbè̌tè̤ pa kû̌ pa ta̤yṳ̌ta̤nǎ̤ akhû̌khî hǒ. Dě pa ô̌pè̤̌ô̌dû ô̌mô̤ô̌kla sô̌ kû̌ Cǒmara hǒ. Pwa̤ma̤ htûhtò̌ bǎ pa pô̤̌ numî̌ pa Běcǎ Yeshǔ Khrǐ pwǎ.

² Dǒ pa yṳ̌ǎ Běcǎ Yeshǔ Khrǐ akhû̌akhîdě, a no ô̌htûpwa̤ pa dǒ Cǒmara abwǐsîrî akû hǒ. Khònò̤̌ pa ô̌htûpwa̤ dǒ abwǐsîrî akû hǒ. Dě pa sǎlě̤ kè̌shumò̤̌mô̤ǐ Cǒmara a ta̤bwǐdû̌sîrîhtûnu hǒ.

³ Pa kè̌shu tǒ̤pwǎ hǒonu mè̤̌tô̤̌, bǎ pa kè̌shǐ kû̌ ta̤jî̌ta̤jû̌, ta̤pò̤̌ta̤sha akha nubǎbǎ, pa sǎlě̤sǎlò̤ pwǎ, ma̤titèhî̌dě pa sî̌ganǎ̤ kû̌ ta̤ nutokhlǒ nî̌ a dǐdû̌htò̌ bǎ pô̤̌ pa ta̤khòbò̌ ta̤jî̌ta̤jû̌ pwǎ.

⁴ Ta̤khòbò̌ ta̤jî̌ta̤jû̌ nî̌ a dǐ ô̌dû̌htò̌ ta̤ma̤tô Cǒmara asǎphlǒ, ta̤ma̤tô Cǒmara asǎphlǒnu, a dǐô̌htûhtò̌ dû̌wî̤ ta̤kè̌shuǐ.

⁵ Bǎ pa kè̌shuǐ kû̌ Cǒmara gǔ ma̤ bǎ pa akhanu, pa sǎphlǒpî̌ tô̤̌, ma̤titèhî̌dě, bǎ Cǒmara ǐlò̤ pa Yôla Plò̌shǐ Běcǎ akhanu, a glǒlò̤ lò̌lò̤ hto bǎ pa a ta̤mô̤ǐ dǒ pa sǎphlǒkû hǒ.

⁶ Ma̤titèhî̌dě, bǎ pa ma̤jè̌ lò̤ jò pe panǎ̤ tô̤̌ akhanu, Yeshǔ Khrǐ hètṳ̌sikhòsi tôshětôkhǎ bǎ kòyòkhu kòyòhe tokhlǒ aya.

⁷ Kòyò tôpwa̤ gǔ tṳ̌sikhòsi bǎ kòyòcǒkòyòtè̤ aya tôpwa̤ numî̌, aga jî̌jî̌. Bǎbǎkǎlè kòyòwô̌ mè̤̌mî̌ca tôpwa̤ aya hî̌nu mî̌ pwa̤ tṳ̌sikhòsibǔ dǒ aya numî̌ a ô̌ pwǎ kǎlè.

⁸ Bǎbǎkǎlè Cǒmara mô̤ǐ pa pwǐtè hî̌dě, bǎ pa htûpe pwa̤ma̤sǔphû̌ akha pe nudě, Khrǐ hètṳ̌sikhòsi anǎ̤ dǒ paya. Hǒomî̌ Cǒmara dǔlè̌lṳ̌hto pa kû̌ ata̤mô̤ panu hǒ.

⁹ Pa htûhto kòyòcǒkòyòtè̤ dǒ Cǒmara a lô̤mô̤̌ kû̌ Khrǐ asǐ akhû̌khî hǒ. Pô̤̌nudě Khrǐ ma̤hǎplǎge mè̤̌mî̌ca pa kû̌ Cǒmara a ta̤cî̌htò̌ nupě.

¹⁰ Dǒ awǐkha numî̌, pa htû kòyò dǒ a sǎkhě Cǒmara tokhlǒ. Dǒ aphû̌khû tṳ̌sikhòsi anǎ̤ dǒ paya akhû̌akhî, a ma̤klaǐ tîkhî sô̌ kû̌ pa hǒ. Khònò̤̌ pa htû akhô hǒ. Pa sî̌ganǎ̤ tě̤tě̤mè̤̌mè̤̌ hto kû̌ pa hǎplǎbò̌ pwǎ kû̌ aphû̌khû a ta̤ô̌htûpwa̤ akhû̌khî nô̤̌ pwǎ.

¹¹ Pa lǎ̤sǎlě̤sǎlò̤nu a ô̌ tǒ̤ hǒonô̤̌ mè̤̌bǎtô̤̌. Dǒ Běcǎ Yeshǔ Khrǐ akhû̌akhîdě, pa sǎlě̤sǎlò̤ bǒsû̌ kû̌ Cǒmara hǒ. Pwa̤ dǒ a ma̤bǒsû̌ getîkhî sô̌ bǎ pa kû̌ Cǒmara mî̌ Yeshǔ Khrǐ pwǎ.

Ta̤si kû̌ PhaAda, ta̤htûpwa̤ kû̌ Khrǐ

¹² Ma̤pô̤̌nudě, dǒ kòyò tôpwa̤ ganǎ̤de Cǒmara ayô̤̌ tô̤̌ akhû̌akhîdě, kòyò pṳ̂̌꤮ tôpwa̤ ma̤bò ta̤sǔ hǒ. Ta̤sǔta̤plě nunî̌ a dǐhtûhtò̌ ta̤si hǒ. Pô̤̌nudě dǒ ta̤sǔta̤plěnu akhû̌akhîdě, kòyò pṳ̂̌꤮ tôpwa̤ tôbǎ kè̌shǐ bò kû̌ ta̤si hǒ.

¹³ Kòyò hǎkhû̌phû̌ ma̤wǐhto ta̤sǔ dǒ Cǒmara ǐlò̤ ta̤sû̌ta̤tòwò nò̌khôtô̤̌ nuhǒ. Bǎbǎkǎlè kè̌ ta̤sû̌ta̤tòwò ô̌tô̤̌ hî̌nu Cǒmara cî̌htò̌ nô̌ kòyò ta̤sǔ tô̤̌.

¹⁴ Sahtò̌ bǎ PhaAda ganǎ̤de Cǒmara ayô̤̌ tô̤̌ ahtukhanu, dě a tǒ̤dǒ Khûmṳ̂shě ahtukha nu, kòyò lǒ̤꤮ bò bǎsibò. Kòyò nutokhlǒ mî̌, a ma̤sǔ pô̤̌ PhaAda ma̤sǔnu mè̤̌tô̤̌ bǎbǎkǎlè asî bǎsi bò pwǎ. PhaAda mî̌ asô̌sô̌kû̌ Khrǐ dǒ a glè̌ hèlò̤pě nutôpwa̤ hǒ.

¹⁵ Bǎbǎkǎlè Cǒmara a ta̤ǐlò̤ kwe sûnu kû̌ PhaAda ma̤ta̤sǔnu ginǐ̤cǒ numî̌ a sô̌sô̌ lû̌ tô̤̌. Ma̤titèhî̌dě, dǒ kòyò tôpwa̤ ganǎ̤de Cǒmara ayô̤̌ tô̤̌ akhû̌akhîdě, kòyò bǎ si dû̌wî̤. Bǎbǎkǎlè Cǒmara abwǐsîrînu adû̌khlo pe kû̌ hǒonu. Htokhôtô̤̌ sû dǒ a hè dǒ kòyò ashǔshawa̤ tôpwa̤ a ô̌ mî̌ Yeshǔ Khrǐ nuhǒ. Dǒ abwǐsîrî khû̌khîdě, a ǐ betǐpǐ kòyò tûprṳ̂taphǎ hǒ.

¹⁶ He gǔ hî̌pô̤̌ sô̌ kû̌, Cǒmara a ta̤ ǐ kwe sûnu kû̌ kòyò tôpwa̤ ma̤ta̤sǔ numî̌ a sô̌sô̌ lû̌ tô̤̌. Bǎ a ma̤ ta̤sǔ akhanu, Cǒmara cî̌htò̌ lû̌û pô̤̌ kòyò dǒ a ma̤sǔma̤plě ta̤ tôpwa̤nu, bǎbǎkǎlè bǎ kòyò ma̤ dû̌wî̤꤮ ta̤sǔ akhanu, Cǒmara ǐ asî kû̌ abwǐsîrî a sû akhû̌akhî, a bè̌cǒbè̌tè̤ asî hǒ.

¹⁷ Dǒ pwa̤khû PhaAda ma̤ ta̤sǔta̤plě akhû̌akhî, kòyò lǒ̤bò bǎsi numî̌ atô pwǎ. Bǎbǎkǎlè kòyò dǒ a sǎphlǒô̌ phî̌shěshu Cǒmara ǐ lû̌û kû̌ abwǐdû̌ sîrîhtûnu kû̌ a ǐ lû̌û ta̤tě̤ta̤mè̤̌ a sû tokhlǒnu nî̌, a ô̌htûpwa̤ kû̌ Yeshǔ Khrǐ a jû̌jû̌pwa̤pwa̤ pě, kǎtô̤̌ a pǒ ta̤ kû̌ Yeshǔ Khrǐ pě. Ma̤titèhî̌dě kòyò tôpwa̤ dǒ a mî̌ Khrǐnu, a ma̤ bǎ hto ta̤ dǒ paya hǒ.

¹⁸ Pô̤̌nudě kòyò tôpwa̤ amè̤̌kû̌ PhaAda nî̌ ma̤sǔta̤ tôcǒ akhû̌akhî, Cǒmara cî̌htò̌ kòyò pṳ̂̌꤮ tôpwa̤ hǒ. Pô̤̌nudě, kòyò tôpwa̤ dǒ amè̤̌kû̌ Yeshǔ Khrǐ nî̌ a ma̤hto ta̤tě̤ta̤mè̤̌ tôcǒ akhû̌akhî, Cǒmara bè̌cǒbè̌tè̤ bò kòyò pṳ̂̌꤮ tôpwa̤ hǒ, dě asî nǐ̤bǎ lô̌khô ta̤htûpwa̤ tûjû̌pwa̤ pě.

¹⁹ Ma̤titèhî̌dě dǒ kòyò tôpwa̤ ganǎ̤de Cǒmara ayô̤̌ tô̤̌ akhû̌akhî, kòyò pṳ̂̌꤮ tôpwa̤ htûhtò̌bò ta̤sǔta̤plě a phû̌mǒ̤phû̌khû tokhlǒ hǒ. Bǎbǎkǎlè dǒ kòyò tôpwa̤ ganǎ̤de Cǒmara ayô̤̌ akhû̌akhî, Cǒmara bè̌cǒbè̌tè̤ bò kòyò pṳ̂̌꤮ tôpwa̤ hǒ.

²⁰ Pô̤̌khô kòyò lǒ̤bò gǔ sî̌ganǎ̤ kû̌ asî ma̤sǔ dû̌wî̤ ayanu, Cǒmara ǐlò̤bǎ asî ta̤sû̌ta̤tòwò nuhǒ. Bǎbǎkǎlè bǎ asî ma̤ta̤sǔ sǔ sǔ adû̌htò̌ akhanu, Cǒmara a ta̤bwǐta̤sîrî nu sǔ sǔ a ô̌wô̤̌htò̌.

²¹ Ma̤pô̤̌nudě, pô̤̌ ta̤sǔta̤plě pǒǐ bò kòyò lǒ̤꤮ bò dě a nohtûhtò̌ ta̤si akhônu, khònò̤̌ pô̤̌khô pa gǔ nǐ̤bǎ yôla htûpwa̤ tûjû̌pwa̤ dǒ pa Běcǎ Yeshǔ Khrǐ a ô̌ dě, Cǒmara abwǐsîrî pǒǐ pa kû̌ ta̤tě̤ta̤mè̤̌ hǒ.