Rṳ̂̌me̤ 2 - Kawyaw New Testament

Cǒmara a ta̤cî̌htò̌ mî̌ atôabǎ, acǒatè̤

¹ Khôbǒsû̌sî꤮, na kè̌ hî̌ kòyò kû̌, “Asî numî̌ kòyò wô̌tô̤̌,” bǎbǎkǎlè na mî̌ kòyò wô̌tô̤̌ sô̌sô̌kû̌ asî pwǎ. Na cû̌hî̌ hǎplǎ nanǎ̤ mî̌ anǐ̤ tô̤̌. Bǎ na hî̌ kû̌ asî mî̌ kòyòkhu dě Cǒmara tô cî̌htò̌ asî akhanu, na cî̌htò̌ tûû̌ nanǎ̤, ma̤titèhî̌dě na dě na ma̤ sô̌sô̌kû̌ pô̤̌nu pwǎ.

² Pa sî̌ganǎ̤ kû̌ Cǒmara cî̌htò̌cǒ cî̌htò̌tè̤ pwǎ kòyò dǒ a ma̤ ta̤sǔ pô̤̌nu tokhlǒ pwǎ.

³ Bǎbǎkǎlè khôsî꤮, kòyò ma̤ ta̤sǔ pô̤̌nu tokhlǒnu, na cû̌ pîjî̌ǐshoǐ kòyò ma̤titè? Na nǎ̤běcǎ tûû̌ dě na ma̤ ta̤sǔ sô̌sô̌kû̌ asî nupwǎ. Pô̤̌nudě, na gènè̤ ǐtûû̌ nanǎ̤ kû̌ na gǔ hǎplǎ kû̌ Cǒmara a ta̤cî̌htò̌ pě pô̤̌nu ya?

⁴ Cǒmara wô̌ dǒ nakhû̌ pwǐ tè, a khòsǎdô bǎ na pwǐtè, a sǎphlǒhtû bǎ na pwǐtènu, na bè̌dubè̌nǎ̤tô̤̌ ya? Pô̤̌khô na gǔ yò̤lǎ̤plǎdî̌ gesô̌ nasǎphlǒ ayanudě, Cǒmara jî̌pwǐ̤ bè̌lṳ̌ bǎ na ata̤mô̤ ta̤wô̤̌ tokhlǒ dǒ nakhû̌ numî̌ na sî̌ganǎ̤ tě̤tě̤mè̤̌mè̤̌ tô̤̌ ya?

⁵ Ma̤titèhî̌dě na mî̌ kòyò ikǒpwî̤̌ dě htû̌lè̌ yokǎkwi tô̤̌ tôpwa̤, pô̤̌nudě, htû̌꤮ Cǒmara sǎphlǒdû̌ dě a gǔ cî̌htò̌ cǒcǒtè̤tè̤ ô̌lṳ̌htò̌ pě akhanu, a sǎphlǒ gǔ dû̌khlo na pě dě a cî̌htò̌ jî̌khlo na pě.

⁶ Cǒmara ǐ kòyò ta̤ma̤nǐ̤khû̌kǎ pṳ̂̌꤮ tôpwa̤ pô̤̌ kòyò ô̌htûpwa̤ ma̤hto ta̤nu tokhlǒ pě.

⁷ Kòyò dǒ ama̤ hènè ta̤wô̌ dě a kè̌lǎ Cǒmara ǐ ta̤bwǐdû̌sîrîhtû, ta̤bè̌dubè̌nǎ̤ kû̌ ta̤htûpwa̤ dǒ asijò tô̤̌ tokhlǒnu Cǒmara ǐ yôla htûpwa̤ tûjû̌pwa̤ pě.

⁸ Bǎbǎkǎlè kòyò dǒ a mô̤ǐlò̤ tûû̌ anǎ̤ nutokhlǒ kû̌ a wîkè ta̤tě̤ta̤mè̤̌, dě a gû̌ma̤ ta̤phû̌mò̤̌shǐhtô tokhlǒnu, Cǒmara sǎphlǒdû̌ asî pě dě a cî̌htò̌ asî pě.

⁹ Lǒ̤꤮ bò kòyò dǒ a ma̤ ta̤phû̌mò̤̌ tokhlǒnu, a khòbǎ ta̤pò̤̌ta̤sha kû̌ ta̤gû̌ta̤gè̌ pě. Yǔdaphû̌ tokhlǒ gǔ khòbǎ wǐlǒ pě, htopědě Yǔdaphû̌ mè̤̌tô̤̌ tokhlǒ gû̌ khòbǎ nô̌ dǒ nô̌kò pě.

¹⁰ Bǎbǎkǎlè Cǒmara gǔ ǐ kòyò dǒ a ma̤ ta̤wô̌ lǒ̤bò nutokhlǒ kû̌, ta̤bwǐdû̌sîrîhtû, ta̤bè̌dubè̌nǎ̤ kû̌ sǎphlǒ ta̤gûjû̌kabǎ pě. A ǐ wǐlǒ Yǔdaphû̌ nutokhlǒ pě htopědě a ǐnô̌ Yǔdaphû̌ mè̤̌tô̤̌ nutokhlǒ dǒ nô̌kò pě.

¹¹ Ma̤titèhî̌dě Cǒmara cî̌htò̌ sô̌sô̌bò pwǎ lû̌û pě. A kè̌dû̌ kè̌pî̌tî̌ kòyò tôpwǎ̤꤮ tô̤̌.

¹² Ta̤sû̌ta̤tòwò dǒ Cǒmara nowě̤mǎnǎ KhûMûshě tokhlǒnu Yǔdaphû̌ mè̤̌tô̤̌ tokhlǒ ata̤ ô̌ kû̌ kòyò tô̤̌, bǎbǎkǎlè Cǒmara gǔ cî̌htò̌ asî ta̤sǔ pě. Yǔdaphû̌ dǒ a ô̌ kû̌ ta̤sû̌ta̤tòwò tokhlǒnu bǎbǎ, a ganǎ̤de lô̌khô Cǒmara a ta̤sû̌ta̤tòwò tô̤̌ dě a ma̤si lô̌khô ta̤ akhû̌akhî, Cǒmara cî̌htò̌ asî pěpě.

¹³ Cǒmara bè̌cǒbè̌tè̤ kòyòhǎkhû̌phû̌ kû̌ a ganǎ̤de ta̤sû̌ta̤tòwò khû̌khînu mè̤̌tô̤̌. Cǒmara bè̌cǒbè̌tè̤ kòyòhǎkhû̌phû̌ kû̌ a gû̌ma̤ pô̤̌ ta̤sû̌ta̤tòwò mǎnǎ ayô̤̌ nutokhlǒ pwǎ.

¹⁴ Yǔdaphû̌ mè̤̌tô̤̌ tokhlǒnu a nǐ̤bǎ Cǒmara a ta̤sû̌ta̤tòwò tô̤̌ bǎbǎkǎlè tôplǎplǎnu, asî lǎ̤klô gènè̤ ta̤tokhlǒnu a sô̌sô̌kû̌ pô̤̌ ta̤sû̌ta̤tòwò hî̌nu a ô̌ tokhlǒ. Pô̤̌nudě dǒ asî sǎphlǒkûnu a dǔlè̌lṳ̌ kû̌ asî sî̌ganǎ̤ ta̤wô̌ kû̌ ta̤phû̌mò̤̌. Pô̤̌nudě asî nǎ̤běcǎ nî̌ a htûhtò̌ bǎ asî ta̤sû̌ta̤tòwò hǒ.

¹⁵ Asî a ta̤hî̌buhî̌bǎ, a ta̤ihtǒhǎnòò̌ sî tokhlǒnu, a dǔlè̌lṳ̌ kû̌ Cǒmara a ta̤sû̌ta̤tòwò hî̌bǎ lû̌û dǒ a sǎphlǒkû. Asî sǎphlǒ dǒ a sî̌ganǎ̤ ta̤wî̤ kû̌ ta̤phû̌mò̤̌nu a hî̌lṳ̌ padô̌ asî. Asî sǎphlǒ ta̤gènè̤nu, tôplǎplǎ a nè̌ tîkhî sô̌ kû̌ a sǔ, tôplǎplǎ dě a tô, a ma̤ pô̤̌nu.

¹⁶ Bǎ Cǒmara ǐlò̤ a ta̤pô̤ta̤phǎ shû̌sho dǒ Yeshǔ Khrǐ gǔ cî̌htò̌ kòyò lǒ̤꤮ bò pě tôni̤nu, a gǔ sô̌sô̌kû̌ pô̤̌nu pě. Bǎnu akhapě, lǒ̤꤮ bò kòyò a ta̤gènè̤ ta̤sûû̌ tokhlǒnu, Cǒmara gǔ cî̌htò̌ bò asî ata̤bè̌hǔbè̌shò̌ nutokhlǒ pě. Hǒnumî̌ ta̤sǎlě̤we̤kè dǒ he hî̌ǐ bǎ kòyò nuhǒ.

Yǔdaphû̌ tokhlǒ kû̌ ta̤sû̌ta̤tòwò

¹⁷ Na dǒ a htû Yǔdaphû̌ nolè, na hî̌ tûû̌ nanǎ̤ kû̌ he mî̌ Yǔdaphû̌ tôpwa̤ yahě. Na yṳ̌ǎnṳ̌ Khûmṳ̂shě a ta̤sû̌ta̤tòwò dě na gènè̤ tûû̌ nanǎ̤ kû̌ Cǒmara mô̤wô̌ na yahě. Sî hî̌bǎ khucawa tûû̌ sînǎ̤ kû̌, “Cǒmara rû̌htò̌ pa Yǔdaphû̌ dǒ pa gǔ htûhtò̌ bǎ a kòyò,” mè̤̌tô̤̌ya.

¹⁸ Cǒmara sǎyṳ noma̤ kwè̌ na mî̌titènu na sî̌ganǎ̤ hǒ. Dǒ kòyò sû̌ǐhto na kû̌ ta̤sû̌ta̤tòwò tokhlǒ akhû̌akhî, na sî̌ganǎ̤ rû̌htò̌jò ta̤dǒ a tôlǒ tokhlǒ hǒ.

¹⁹ Na gènè̤ǐtû̌ nanǎ̤ kû̌ na mî̌ kòyò tôpwa̤ dǒ a nè̌bǎ Yǔdaphû̌ mè̤̌tô̤̌ dǒ asô̌sô̌kû̌ kòyò mǐ̤sǎkhǐ tokhlǒ aklè̌. Na gènè̤ ǐtûû̌ nanǎ̤ kû̌ na lîhtò̌ bǎ kòyò ô̌ dǒ ta̤khǐsiwi̤ nutokhlǒ aya.

²⁰ Na gènè̤ nanǎ̤ kû̌ na nè̌bò̌ kòyò a ǒò̌phuhtò tokhlǒ aklè̌ dě na sû̌ǐtòwòǐjò bǎ kòyò dǒ asô̌sô̌kû̌ phijǎ dǒ a ônû̌ pe nutokhlǒ, ma̤titèhî̌dě ta̤sû̌ta̤tòwò nè̌klè̌nè̌klò bǎ bò sî kû̌ sî gǔ sî̌ganǎ̤ Cǒmara awe̤akè kû̌ ta̤tě̤ta̤mè̤̌ tokhlǒ hǒ.

²¹ Na sû̌ǐ bǎ kòyò! Ma̤titèdě na sû̌ǐlò̤ tûû̌ nanǎ̤ tô̤̌? Na shôbǐǐlṳ̌ bǎ kòyò kû̌ ǎhǔǎhě tǎ̤ kòyò ta tǎ̤mǎ̤ nî̌꤮, na hî̌ pô̤̌nu bǎbǎkǎlè na cû̌ ǎhǔ ya?

²² Cû̌sǔnṳ̌plěnṳ̌ tǎ̤ kòyòphû̌kòyòma tǎ̤mǎ̤ nî̌꤮, na hî̌ pô̤̌nu bǎbǎkǎlè mî̌ na cû̌sǔnṳ̌plěnṳ̌ kòyòphû̌kòyòma ya? Na ma̤yǒ̤ ta̤yô̤ta̤gî̌ bǎbǎkǎlè mî̌ na cû̌phǐsigwǐ Yǔdaphû̌ mè̤̌tô̤̌ tokhlǒ a ta̤lě̤dû̌pwî̤htû dǒ a ta̤lṳhtò̌hôkû nutokhlǒ ya?

²³ Na phî̌ htò̌yô̤̌htò̌mǒ jò̌꤮ nanǎ̤ kû̌ Cǒmara ǐlò̤ na ta̤sû̌ta̤tòwò bǎbǎkǎlè dǒ na jûlě̤phî̌yô̤̌ ganǎ̤de gû̌ kòyò ta̤sû̌ta̤tòwò tô̤̌ akhû̌akhîdě, mî̌ na cû̌ ma̤ sòwò̤̌ Cǒmara ya?

²⁴ “Dǒ sî Yǔdaphû̌ tokhlǒ akhû̌akhî, dě Yǔdaphû̌ mè̤̌tô̤̌ tokhlǒ pî̤jî̌ǐshobò Cǒmara,” Lî̤plò̌shǐkû ahî̌ pô̤̌nu.

²⁵ Kè̌ sî ganǎ̤de ta̤sû̌ta̤tòwò hî̌dě, sî dǔtṳ̌ aphě Nṳmî̌ a lě̤dû̌pwî̤htû lîlè. Bǎbǎkǎlè sî kè̌ ganǎ̤detô̤̌ hî̌dě dǒ Cǒmara a lô̤mô̤̌nu sî sô̌sô̌pwǎ kû̌ kòyò dǒ a dǔtṳ̌aphě tô̤̌ nutokhlǒ pwǎ.

²⁶ Pô̤̌nudě asî dǒ a dǔtṳ̌ gû̌ kòyò bětô̤̌ tokhlǒnu kè̌ a ganǎ̤de ta̤sû̌ta̤tòwò numî̌ Cǒmara bè̌ asî pô̤̌ kòyò dǒ a dǔtṳ̌abě nutokhlǒ hǒ.

²⁷ Pô̤̌nudě Yǔdaphû̌ mè̤̌tô̤̌ tokhlǒ dǒ a dǔtṳ̌ gû̌ kòyò phětô̤̌ tokhlǒnu, kè̌ a ganǎ̤de Cǒmara a ta̤sû̌ta̤tòwò hî̌dě a nè̌ na ta̤sǔ pě. Na ô̌ kû̌ ta̤sû̌ta̤tòwò dě na dǔtṳ̌bě bǎbǎ, na ganǎ̤de gû̌ kòyò ta̤sû̌ta̤tòwò tô̤̌ akhû̌akhî, a pè̤̌wǎ̤bò na ta̤sǔ pě.

²⁸ Kè̌ hî̌ bò̌bò ta̤hî̌bǎ hî̌dě, dǒ pa kû̌ ô̌htûpwa̤ pô̤̌ Yǔdaphû̌ alǎ̤klô nutokhlǒ akhû̌akhî, dě pa htûhtò̌ bò̌jò Yǔdaphû̌ a mè̤̌mî̌ca tôpwa̤ tô̤̌, htokhôtô̤̌ Yǔdaphû̌ a mè̤̌mî̌ca tôpwa̤ numî̌ a dǔtṳ̌ pwǎtǒ̤ nǎ̤glǒphěyî̌nu mè̤̌tô̤̌.

²⁹ Yǔdaphû̌ mè̤̌mî̌ca tôpwa̤ numî̌ a bǎ dǔ asǎphlǒ dǒ amè̤̌kû̌ Yôla Plò̌shǐ Běcǎ htû̌lè̌ tèplè̌kè lû̌sǎphlǒnu. Ta̤sû̌ta̤tòwò nî̌ a htû̌lè̌ tèplè̌ jòkè lû̌sǎphlǒ tô̤̌. Kòyòhǎkhû̌phû̌ htû̌sò̌htò̌ bǎ kòyò dǒ a dǔtṳ̌ asǎphlǒnu tokhlǒ tô̤̌ bǎbǎkǎlè Cǒmara htû̌sò̌htò̌ ǐtûû̌ asî.