Rṳ̂̌me̤ 16 - Kawyaw New Testament

Ta̤hî̌mô̤hî̌wô̌ tokhlǒ

¹ He gǔ shôbǐǐlṳ̌ bǎ sî kû̌ pa pṳ̌pwa̤mǒ̤ Mǒ̤phî̌be awe̤akè. A mî̌ Wî̤̌kekarě ta̤dòkû ikǒdû̌ tôpwa̤.

² Htû̌ a hètǒ̤ kû̌ sî pě dě kaǎmô̤shǔ a pô̤̌ ta̤yṳ̌ǎnǎ̤ǎ Běcǎ Yeshǔ dǒ asô̌sô̌kû̌ sînu nî̌꤮. Kaǎmô̤shǔ a pô̤̌ Cǒmara a kòyò aplò̌shǐ tokhlǒ tô kè̌pǒ̤ǐ kòyònu nî̌꤮. A lǎ̤lṳ̂ sî titètè̌ bǎbǎnu ma̤jè̌ padô̌ a nî̌꤮, ma̤titèhî̌dě he bǎbǎ, kòyò shǔshawǎ̤ tokhlǒ bǎbǎ, a phî̌jè̌ma̤jè̌ dû̌wî̤ kòyò hǒ.

³ He sûcû̌ padô̌ he ta̤hî̌mô̤hî̌wô̌nu dǒ Phaakǔlǎ kû̌ ama Mǒ̤phrishila a ô̌. Asî mî̌ a ma̤ta̤ kû̌ he dǒ Yeshǔ Khrǐ aya.

⁴ A sî̌ganǎ̤ kû̌ kòyò gǔ ma̤si asî bǎbǎkǎlè a khòlṳ̌ lô̌khô anǎ̤, dě a ma̤hǎplǎge hto he hǒ. A ma̤bwǐma̤sîrî tǒ̤ he mè̤̌tô̤̌, a ma̤bwǐma̤sîrî padô̌ lǒ̤bò ta̤dòkû dǒ a htû Yǔdaphû̌ mè̤̌tô̤̌ nutokhlǒ akhû̌akhî, pa hî̌bwǐhî̌sîrîǐ asî.

⁵ Hî̌mô̤hî̌wô̌ padô̌ he ta̤dòkû dǒ a hè cubucaba gû̌ dǒ lû̌û hǐ nutokhlǒ nî̌. Hî̌mô̤hî̌bǎwô̌ nǐ̤bǎ gû̌ he khô Khûèpanǐtǔ nî̌꤮. Kòyò dǒ a yṳ̌ge wǐ Khrǐ dǒ Ashǎgǎ kû numî̌ a hǒ.

⁶ He sûcû̌ padô̌ he ta̤hî̌mô̤hî̌wô̌ dǒ Mǒ̤marǐ a ô̌. A mî̌ a ma̤ bǎ mî̌ca ta̤ dǒ sîya tôpwa̤.

⁷ Sû cû̌ padô̌ he ta̤hî̌mô̤hî̌wô̌ dǒ Khûadrûnǐkû kû̌ Mǒ̤yunǐ nî̌꤮. Asî mî̌ Yǔdaphû̌ sô̌sô̌kû̌ henu pwǎ. Kòyò dǒtě̤ wô̤̌wô̤̌gû̌ asî kû̌ he dǒ apô̤kû. Asî mî̌ pwa̤nophû̌ dǒ kòyò bè̌dubè̌nǎ̤ mî̌ca tokhlǒ. Asî gû̌wǐkhlo he kû̌ Khrǐ akò lè.

⁸ He sûcû̌ padô̌ he ta̤hî̌mô̤hî̌wô̌ dǒ Khûaplî̌yatǔ a ô̌. A kû̌ Khrǐ htûtôcǒnô̤̌ akhû̌akhî he mô̤ǐ mî̌ca yǎ꤮.

⁹ He sûcû̌nǐ̤ he ta̤hî̌mô̤hî̌wô̌ dǒ Khûǔrôbanṳ̌ dǒ a ma̤ wô̤̌wô̤̌gû̌ Khrǐ a ta̤phǐta̤ma̤ kû̌ he nutôpwa̤ kû̌ he khô Khûsatakǔ a ô̌.

¹⁰ Sûcû̌nṳ̌ padô̌ he ta̤hî̌mô̤hî̌wô̌ dǒ Khûapelě a ô̌nu nî̌꤮. A mî̌ pwa̤ma̤ta̤phû̌ dǒ a kè̌shǐbǎ nô̌ hto ta̤ma̤jî̌ma̤jû̌ tokhlǒ dě a sǎphlǒpî̌ gû̌ kòyò tô̤̌ tôpwa̤ akhû̌khî, kòyò dǒ sǎmǒla̤ǐ mî̌ca a tôpwa̤hǒ. Sûcû̌nṳ̌ padô̌ he ta̤hî̌mô̤hî̌wô̌nu dǒ Khûarǐsatò̌bǔlǔ kû̌ a hǐphû̌phòphû̌ nutokhlǒ a ô̌ nî̌꤮.

¹¹ Sûcû̌ nṳ̌ padô̌ he ta̤hî̌mô̤hî̌wô̌ dǒ Khûhî̌rûdǐya a ô̌ nî̌꤮. A mî̌ Yǔdaphû̌ sô̌sô̌kû̌ he pwǎ. Sûcû̌ nṳ̌bǎ he ta̤hî̌mô̤hî̌wô̌ dǒ pṳ̌wè̤̌ Khrǐphû̌ dǒ a ô̌ dǒ Khûnasǐsǔ ahǐ nutokhlǒ nî̌꤮.

¹² Hî̌mô̤hî̌bǎwô̌ nṳ̌bǎ he Mǒ̤htarǔbènu kû̌ Mǒ̤htarǔbûsa nusò̌ginǐ̤ nî̌꤮. Asî mî̌ pwa̤mǒ̤ tokhlǒ dǒ a ma̤ mî̌cata̤ dǒ Běcǎ aya. Hî̌mô̤hî̌wô̌ nṳ̌bǎ hekhômô̤ Mǒ̤phèrasǐnu nî̌꤮. A mî̌ pwa̤mǒ̤ dǒ a jî̌pwǐ̤ ma̤cǒta̤ dǒ Běcǎ aya tôpwa̤ hǒhǒ.

¹³ Hî̌mô̤hî̌wô̌ nṳ̌bǎ he Khûrǔbǔnu nî̌꤮. A mî̌ pwa̤ma̤ta̤phû̌ ami̤dû̌ dǒ ta̤yṳ̌ta̤nǎ̤ tôkhô tôpwa̤. Hî̌mô̤hî̌bǎwô̌ nṳ̌bǎ he amǒ̤nu nî̌꤮. Akè̌pǒ̤ǐ he asô̌sô̌kû̌ aphû̌ kû̌ anǎ̤nu.

¹⁴ Hî̌mô̤hî̌wô̌ nṳ̌bǎ he Khûasukhrǐtǔ, Khûphalekò̌, Khûhîma, Khûpahtarò̌ba, Khûhama sî tokhlǒnu nî̌꤮. Htodě hî̌mô̤hî̌wô̌ nṳ̌bǎ dô̌ he pṳ̌wè̤̌ Khrǐphû̌ dǒ a hè caba kû̌ asî nutokhlǒ nî̌꤮.

¹⁵ Hî̌mô̤hî̌bǎwô̌ nṳ̌bǎ he Phawî̤lûlûkû kû̌ ama Mǒ̤jǔlî̌ya, Khûnerǔ kû̌ a pṳ̌pwa̤mǒ̤, kû̌ Khûòlephǎ kû̌ lǒ̤꤮ bò Cǒmara a kòyò aplò̌shǐ dǒ a hè caba kû̌ asî nutokhlǒ nî̌꤮.

¹⁶ Bǎ sî kè̌shǐ shěshu lû̌û tôpwa̤ kû̌ tôpwa̤ akhanu, gômô̤shǔ lû̌û kû̌ ta̤numû̌ dǒ aplò̌shǐnu akû nî̌꤮. Khrǐ a ta̤dòkû lǒ̤bò sûhè bǎ sî dě asî ata̤hî̌mô̤hî̌wô̌ tokhlǒ pwǎ.

Ta̤mǎnǎyô̤̌sǎ dǒ nô̌kò gutṳ̌ tokhlǒ

¹⁷ Pṳ̌wè̤̌ sî, he ǐkhû̌ǐǎ sîkò kû̌, ô̌sè̌rè̌ lô̌khô sînǎ̤ kû̌ kòyò dǒ a hènṳ̌ma̤ lûcû̌peshe ta̤nutokhlǒ nî̌꤮. Asî ta̤sû̌ǐtòwòǐ tokhlǒnu a lô̌ǐ cû̌ tephekè kòyò dǒ sîkla tokhlǒkhlǒ kû̌ Khrǐ pě. Asî ta̤sû̌ǐ tokhlǒnu a lû khô̌ kû̌ Khrǐ awe̤akè dǒ kòyò sû̌ǐ hto sî nutokhlǒ hǒ. Ô̌tephekè kû̌ asî nî̌꤮.

¹⁸ Ma̤titèhî̌dě kòyò pô̤̌nu tokhlǒ mî̌ a ma̤ Běcǎ Khrǐ ata̤ma̤ mè̤̌tô̤̌. Mè̤mè̤̌tôkhômî̌, a lṳ̂ma̤mô̤ ma̤sǎphlǒmô̤ ǐtûû̌ lô̌khô anǎ̤glǒ a ta̤sǎyṳsǎbǎ tokhlǒ pwǎ. A hî̌bǎmô̤ hî̌bǎjò kòyò, htû̌sò̌htò̌ kòyò dě asî lô̌ǐplò̤ǐ kòyò dǒ a jûlě̤phî̌yô̤̌yû ta̤nutokhlǒ pě.

¹⁹ Sî jûlě̤phî̌yô̤̌ ganǎ̤dewô̌ yô̤̌nu, kòyò ganǎ̤debò pṳ̂̌꤮ tôpwa̤ hǒ. Dǒ sî ô̌htûpwa̤ pô̤̌nu akhû̌akhî, he sǎlě̤ kû̌ sî. Bǎbǎkǎlè ta̤wô̌ mî̌ hî̌tènu, he sǎyṳ nosî̌ganǎ̤phlôpṳ̂̌ wô̌ sî. Htodě ta̤phû̌mò̤̌ mî̌ hî̌tènu, he sǎyṳ noô̌ mṳ̂̌plî wô̌ sî pwǎ.

²⁰ Yî̤khôtô̤̌ pěmî̌ ta̤pè̤̌ta̤dû a Cǒmaranu gǔ noyî̤̌khabô̌ mǔkè hǎkhû̌tana hǒtôdo dǒ sî khǎlǎlǎ̤ pě. Běcǎ Yeshǔ Khrǐ abwǐsîrî ô̌cu pû kû̌ asî nî̌꤮.

²¹ Khûtîmôte dǒ a ma̤wô̤̌wô̤̌ ta̤ kû̌ he tôpwa̤ sûhè a ta̤hî̌mô̤hî̌wô̌ dǒ sî ô̌. Htodě Khûlǔshǐya, Khûjôsô kû̌ Khûsûsǐmatarǔ nutokhlǒ sûhè. Asî mî̌ Yǔdaphû̌ tokhlǒ sô̌sô̌kû̌ he hǒ.

²² He mî̌ Khûhtǔshǎ. Lî̤hǒtôbǎ mî̌ Khûpò̌lǔ nowě̤ he pwǎ. Dě he hî̌mô̤hî̌bǎwô̌ cû̌nṳ̌ sî dǒ Khrǐ ami̤ akû.

²³ Khûkayǔ hî̌mô̤hî̌wô̌ cû̌nṳ̌ sî. A kaǎmô̤shěshuwô̌ tû̌ he dǒ ahǐ mè̤̌tô̤̌, a kaǎmô̤shǔ bò ta̤dòkû lǒ̤bò a kè̌ kaǎmô̤shǔwô̌ mî̌ca shǐpwǎ̤shǐmè̤. Pwa̤ô̌pǒ̤ bǎ kò wî̤̌doshǐ ru Khûěrasatǔnu kû̌ pa pṳ̌wè̤̌ Khûkatǔ sûhè padô̌ sî ata̤hî̌mô̤hî̌wô̌ tokhlǒkhlǒ.

²⁴ Pa Běcǎ Yeshǔ Khrǐ abwǐsîrî ô̌ pû kû̌ sî lǒ̤꤮ bò nî̌. Ame̤.

Ta̤htû̌sò̌htò̌ a ta̤caba dǒ nô̌kò gutṳ̌

²⁵ Dǒ he shôbǐǐlṳ̌ lṳ̌ bǎ kòyò kû̌ ta̤sǎlě̤we̤kè kû̌ Yeshǔ Khrǐ awe̤akè akhû̌akhî, Cǒmara ma̤shû̌htò̌bǎ sî ta̤yṳ̌ dě pa gǔ htû̌sò̌htò̌ a tǎ꤮. Yeshǔ Khrǐ awe̤akè numî̌, kòyò dǒû̌dǒshò̌ a mè̤mè̤̌hǒ bǎbǎkǎlè khònò̤̌ kòyò dǔlè̌lṳ̌ hto a hǒ.

²⁶ Bǎbǎkǎlè khònò̤̌ pô̤̌ piwi̤pèshè hî̌nǎ htohǒnu, htodě pô̤̌ Cǒmara dǒ a htûpwa̤ tûjû̌pwa̤ hǒtôpwa̤ mǎnǎ hto ayô̤̌ tokhlǒ kû̌, pô̤̌khô Yǔdaphû̌ mè̤̌tô̤̌ tokhlǒ gǔ yṳ̌ǎ Khrǐ dě asî gǔ ganǎ̤de lû̌ûyô̤̌ ayanu, kòyò dǐsî̌ganǎ̤ lṳ̌bǎ bòkè asî pṳ̂̌꤮ tûkû hǒ.

²⁷ Dě Cǒmara dǒ a ma̤ta̤jò pwǎtǒ̤ a hǒtôpwa̤ nî̌, dǒ Yeshǔ Khrǐ akhû̌akhî, dě a gǔ nǐ̤bǎ pû ta̤bwǐdû̌sîrîhtû ajû̌jû̌ apwa̤pwa̤ nî̌꤮. Ame̤.