Rṳ̂̌me̤ 14 - Kawyaw New Testament

Pè̤̌wǎ̤ pe tǎ̤ lû̌û tôpwa̤ kû̌ tôpwa̤ a ta̤sǔ tǎ̤mǎ̤

¹ Kaǎmô̤shǔ Khrǐphû̌ dǒ ata̤yṳ̌ ô̌ pî̌tî̌pe nutokhlǒ nî̌꤮. Asî ata̤gènè̤ tokhlǒnu, a khô̌ kû̌ na bǎbǎ, htè̌shěshu tǎ̤ asî tǎ̤mǎ̤ nî̌꤮.

² Kòyò tokhlǒkhlǒnu a yṳ̌ǎ kû̌ ǎ titè̌꤮ mî̌ anǐ̤ pwǎ a hî̌ bǎbǎkǎlè kòyò dǒ ata̤yṳ̌ ô̌ pî̌tî̌pe tôpwa̤nu a ǎ pwǎtǒ̤ sǒdogotǒ̤ nô̤̌ pwǎ.

³ Kòyò dǒ a ǎbò ta̤pṳ̂̌꤮ tocǒ tôpwa̤nu, a bǎ gènè̤ pî̌tî̌ǐ kòyò dǒ a ǎ gû̌ kòyò ta̤pṳ̂̌꤮ tocǒ tô̤̌nu tôpwa̤ tô̤̌. Pô̤̌nudě kòyò dǒ a ǎ gû̌ kòyò pṳ̂̌꤮ tocǒ tô̤̌ tôpwa̤nu, a bǎ pè̤̌wǎ̤ kòyò ta̤sǔ dǒ a ǎ ta̤pṳ̂̌꤮ tocǒ tokhlǒnu tô̤̌, ma̤titèhî̌dě Cǒmara kaǎmô̤shǔ kòyò nutôpwa̤.

⁴ Na cû̌ pè̤̌wǎ̤ tǒ̤ kòyò pwa̤ma̤ta̤phû̌ ta̤sǔ dě na mî̌ kòyò hî̌tè tôpwa̤. A ma̤ htûhtò̌ ata̤ma̤ bǎbǎ, a ma̤ htûhtò̌ tô̤̌ bǎbǎ, aběcǎ ô̌tû̌ dě a gǔ hî̌ tûû̌ lû̌û pě, ma̤titèhî̌dě Běcǎ Cǒmaranu, a ma̤jè̌ bò̌jò asî akhû̌akhî, asî gǔ ma̤htò̌bò̌ pě.

⁵ Ma̤pô̤̌nu, kòyò tokhlǒkhlǒnu a gènè̤ lô̌khô kû̌, lṳmṳ̌ni̤ tokhlǒkhlǒnu kòyò bè̌ aplò̌shǐ khô̌tû̌ yǎ, a gènè̤ pô̤̌nu bǎbǎkǎlè tokhlǒkhlǒnu a gènè̤ kû̌ lṳmṳ̌ni̤ lǒ̤bònu a sô̌sô̌bò pwǎ lû̌û a gènè̤ lô̌khô pô̤̌nu. Kòyò tôpwa̤ kû̌ tôpwa̤nu, a bǎ yṳ̌ǎ měgle tûû̌ a ta̤gènè̤ pwǎ.

⁶ Kòyò dǒ a gènè̤ kû̌ lṳmṳ̌ni̤ tokhlǒkhlǒnu, kòyò tôbǎ bè̌plò̌shǐ khô̌tû̌ yǎ, a kè̌ gènè̤ hî̌dě, bè̌plò̌shǐ lṳmṳ̌ni̤nu dǒ ta̤bè̌dû̌bè̌htû Běcǎ ayanu. Kòyò dǒ a ǎ ta̤pṳ̂̌꤮ tocǒ tokhlǒnu, ǎ dǒ ta̤bè̌dû̌bè̌htû Běcǎ ayanu, ma̤titèhî̌dě a hî̌bwǐhî̌sîrî hto Cǒmara dě a ǎ ta̤ akhû̌akhî, a ta̤bè̌dû̌bè̌htû Cǒmara hǒ. Pô̤̌nudě kòyò dǒ a dǔǎshǎ tokhlǒnu, a hî̌bwǐhî̌sîrî Cǒmara dě a ta̤bè̌dû̌bè̌htû htò̌ Cǒmara ami̤ akhû̌akhî a sô̌sô̌lû̌û pwǎ.

⁷ Pa ô̌htûpwa̤ ǐ tûû̌ paya mè̤̌tô̤̌. Htodě pa si tûû̌ paya mè̤̌tô̤̌.

⁸ Pa kè̌ htûpwa̤ hî̌dě, pa ô̌htûpwa̤ dǒ Běcǎ aya. Pa kè̌ si hî̌dě pa si dǒ Běcǎ aya. Pô̤̌nudě pa htûpwa̤ bǎbǎ, pa si bǎbǎ, pa mî̌ Běcǎ ata tokhlǒ.

⁹ Dǒ ta̤we̤ta̤kè hǒtokhlǒ akhû̌akhî, pô̤̌khô Khrǐ gǔ htûhtò̌ kòyò htûpwa̤ tokhlǒ kû̌ kòyò si tokhlǒ a Běcǎ dě, a si htodě a ihtǒhtûpwa̤ getîkhî sô̌ dǒ ta̤si hǒ.

¹⁰ Pô̤̌nudě, na cû̌ pè̤̌wǎ̤ tǒ̤ na pṳ̌wè̤̌ ta̤sǔ ma̤titè? Mè̤̌tô̤̌dě, na cû̌ gènè̤ pî̌tî̌tǒ̤ na pṳ̌wè̤̌ nutôpwa̤ ma̤titè? Lǒ̤bò pa tokhlǒnu, pa bǎ ihtǒbò dǒ Cǒmara lǎ̤cî̌htò̌ agûlǎ̤ alô̤mô̤̌nu pě.

¹¹ Ma̤titèhî̌dě, dǒ lî̤plò̌shǐkûnu, Běcǎ hî̌ kû̌, “Ma̤pô̤̌ he htûpwa̤ mè̤̌mî̌canu, he olò̤ sî kû̌, kòyòpṳ̂̌꤮ tôpwa̤ gǔ hè dô̌gînî̤ shǒtikhlǐlò̤bò dǒ he lô̤mô̤̌ pě dě a gǔ olò̤ lô̌khô pṳ̂̌꤮ tôpwa̤ kû̌ he mî̌ Cǒmara mè̤̌mî̌ca tôpwa̤ pě.”

¹² Pô̤̌nudě, pa ma̤hto kwè̌ titènu pa bǎ shôbǐhtò̌lṳ̌bò Cǒmara pṳ̂̌꤮ pwa̤ pě.

Dǐ htûhtò̌ ta̤lò̤khǔpo̤, ta̤sǔta̤plě dǒ kòyòya tǎ̤mǎ̤

¹³ Pô̤̌nudě, pè̤̌wǎ̤ pe tǎ̤ lû̌ta̤sǔ tôpwa̤ kû̌ tôpwa̤ tǎ̤mǎ̤ nî̌꤮. Ta̤ dǒ a gǔ htûhtò̌ ta̤lò̤khǔpo̤, ta̤sǔta̤plě dǒ pṳ̌wè̤̌ tôpwa̤pwa̤ aya hî̌nu, na bǎ bè̌lò̤ khô̌kè na sǎphlǒ dǒ na gǔ ma̤pe ta̤nutokhlǒ tôcǒ꤮ tô̤̌.

¹⁴ He htûhtò̌ kû̌ Běcǎ Yeshǔ tôcǒ nô̤̌hǒ akhû̌akhî, he sî̌ganǎ̤ tě̤tě̤mè̤̌mè̤̌ kû̌ shǎǎ ô̌tûû̌ anǎ̤ dě a mṳ̂̌plî tô̤̌nu a ô̌ tôcǒ꤮ tô̤̌. A mṳ̂̌plî lǒ̤bò pwǎ. Bǎbǎkǎlè kè̌ na yṳ̌ǎ kû̌ shǎǎ tokhlǒkhlǒnu a mṳ̂̌plî tô̤̌ kè̌hî̌dě shǎǎnu a mṳ̂̌plî dǒ naya tô̤̌.

¹⁵ Dǒ na ǎ ta̤tôcǒcǒ akhû̌akhî, dě na pṳ̌wè̤̌ gènè̤mô̤ tîkî̌꤮ tô̤̌ kè̌hî̌dě, na ma̤ ta̤nu dǒ ta̤mô̤ǐ akû mè̤̌tô̤̌. Dǒ na ǎshǎ akhû̌akhî, dě cû̌ma̤pî̌kè tǎ̤ na pṳ̌wè̤̌ dǒ Khrǐ tṳ̌sikhòsi bǎ hto dǒ ayanu tôpwa̤ tǎ̤mǎ̤.

¹⁶ He kè̌ ma̤ ta̤hǒtôcǒ mî̌ awô̌ bǎ heya, na gènè̤ bǎbǎkǎlè, kè̌ a htûhtò̌ pṳ̌wè̤̌ khrǐphû̌ tokhlǒ a ta̤gènè̤sǔ kè̌hî̌dě ma̤ tǎ̤mǎ̤. Hî̌pěmî̌ asî pî̤jî̌shǐcô̌ bò̌bòhè̌.

¹⁷ Ma̤titèhî̌dě, Cǒmara ashiagǎkûnu, shǎǎshǎô mî̌ ta̤ dǒ a lûdû̌lǒ mè̤̌tô̤̌. Ta̤ dǒ a lṳ̂dû̌lǒ mî̌, ta̤tě̤ta̤mè̤̌, ta̤ô̌mô̤ô̌bǎ, kû̌ sǎlě̤sǎlò̤ dǒ Yôla Plò̌shǐ Běcǎ ǐ pa tokhlǒ nupwǎ.

¹⁸ Kòyò dǒ a ô̌htûpwa̤ gû̌ pô̤̌nu tokhlǒ, dě a ma̤ Khrǐ a ta̤phǐta̤ma̤ tokhlǒnu, Cǒmara bǎbǎ kòyòhǎkhû̌phû̌ bǎbǎ asǎphlǒ ô̌ lû̌û hǒ.

¹⁹ Pô̤̌nudě, pa gǔ jî̌pwǐjî̌le ô̌mô̤ô̌kla kè̌khî lû̌û tôpwa̤ kû̌ tôpwa̤ htodě pa gǔ phî̌jè̌ wè̤jè̌, ǐkhû̌ǐǎ kè̌khî lû̌û tôpwa̤ kû̌ tôpwa̤ tǎ꤮.

²⁰ Ma̤pî̌kè tǎ̤ Cǒmara a ta̤phǐta̤ma̤ kû̌ shǎǎshǎô akhû̌khî tǎ̤mǎ̤ nî̌꤮. Shǎǎ lǒ̤bò mî̌ a ma̤mṳ̂̌plî bò pwǎ bǎbǎkǎlè shǎǎ titètè̌꤮ bǎbǎ, kòyò tôpwa̤pwa̤ kè̌ ǎ dě a kè̌ htûhtò̌ pṳ̌wè̤̌ dǒ ashǔshawa̤ tôpwa̤ a ta̤lò̤khǔpo̤ numî̌, a ma̤ ta̤hǒonumî̌ a sǔhǒ.

²¹ Ǎ ta̤yî̌ bǎbǎ, ô shisî̌yô̤̌ bǎbǎ, ma̤ta̤ tôcǒcǒ dǒ a htûhtò̌ ta̤lò̤khǔpo̤ dǒ pṳ̌wè̤̌ ayabǎbǎ, pa kè̌ dǔ mò̌ mî̌ awô̌khlo pwǎ.

²² Ta̤ tokhlǒnu, na yṳ̌ǎ a hî̌tè nu, cî̌ cî̌ bè̌ yǎ nǒ̤ dě Cǒmara kè̌ sî̌ganǎ̤ mî̌ a pô̌hǒ. Kòyò tôpwa̤ kè̌ sî̌ganǎ̤ kû̌ a ma̤ ta̤hǒnumî̌ a tôpwǎ, dě a ma̤hto dǒ a sǎphlǒkûnu, mô̤mô̤ a mô̤ pwǎ, dě asǎphlǒ kè̌ cî̌htò̌ lû̌û tô̤̌ hî̌nu, a nǐ̤bǎ ta̤ǐshowî̤ hǒ.

²³ Bǎbǎkǎlè a ǎ dě a kè̌ sǎphlǒ dǐkhû̌dǐdò hî̌nu Cǒmara gǔ cî̌htò̌ a bǎ a ǎta̤ akhanu pě, ma̤titèhî̌dě a ǎ ta̤hǒnumî̌ a ǎ kû̌ ta̤yṳ̌ta̤nǎ̤ mè̤̌tô̤̌. Na ma̤ titètè̌ bǎbǎ, ta̤yṳ̌ kè̌ ô̌tô̤̌ hî̌nu a htû ta̤sǔ hǒ.