Pwa̤nophû̌ 8 - Kawyaw New Testament

¹ Htodě Khûsò̌lǔ asǎphlǒtô kû̌ pwa̤ma̤si Khûsôtibe nutokhlǒ dě a gǔ olò̤ gû̌ pô̤̌nu. Sahtò̌ bǎnu tôni̤ hènè dě kòyò dǒ a ô̌ bǎ Wî̤̌yarǔshôle akû dǒ a yṳ̌nǐ̤nǎ̤nǐ̤ Yeshǔ tokhlǒnu kòyò ma̤jî̌ma̤jû̌ asî. Kòyò dǒ a ô̌kè dǒ Wî̤̌yarǔshôle akû tokhlǒ numî̌ tǒ̤pwǎ pwa̤nophû̌ tokhlǒ nô̤̌ pwǎ. Dě lǒ̤bò kòyò dǒ a yṳ̌ǎnǎ̤ǎta̤ tokhlǒnu a hǎhtò̌khlè̌ cû̌pushǔpeshe bò dǒ Yǔdagǎ kû̌ Shamarǐgǎ.

² Pwa̤ mô̤nṳ̌ Cǒmaranu a ô̌ tokhlǒ dě a cû̌ lǔǐ kè Khûsôtibe. Dě asî hǎshû̌hǎwî̤ lô̌khô.

³ Khûsò̌lǔ tôpwa̤nu a cû̌ ma̤pî̌ma̤lṳ̂̌ Khrǐ a ta̤dòkû tokhlǒ. A cû̌htò̌ nṳ̌ dǒ hǐtômè hto tômè akû, dě a cû̌ cî̌jûgrû̌ pwa̤mǒ̤mǒ̤, pwa̤khûkhû dǒ a yṳ̌ǎnǎ̤ǎta̤ tokhlǒ dě dǒnṳ̌ asî dǒ apô̤kû.

Khûphǐlǐpǔ shôbǐǐlṳ̌ ta̤sǎlě̤we̤kè dǒ Shamarǐ gǎkû

⁴ Pwa̤yṳ̌ǎta̤phû̌ dǒ a khlè̌cû̌ pushǔpeshe bò lû̌û tokhlǒnu, a cû̌tǒ̤bò dǒ gûlǎ̤ pṳ̂̌꤮ tûkû dě a cû̌lè shôbǐǐlṳ̌ bǎ kòyò kû̌ Yeshǔ a ta̤sǎlě̤we̤kè nutokhlǒ.

⁵ Khûphǐlǐpǔ cû̌tǒ̤ dǒ Wî̤̌dû̌ gutṳ̌ dǒ a ô̌ dǒ Shamarǐ gǎkûnu tîwî̤̌. Dě a cû̌ shôbǐǐlṳ̌ bǎ kòyò ô̌ bǎnu tokhlǒ kû̌ Yeshǔ Khrǐ awe̤akè.

⁶ Kòyò saprṳ̂ tokhlǒ ganǎ̤de hto Khûphǐlǐpǔ a ta̤shôbǐǐ tokhlǒ, htodě asî kè̌shǐbǎ lû̌û ta̤ma̤ cô̌klǐcô̌sè tokhlǒ akhû̌akhî. A ganǎ̤de wô̌꤮ bǎ ata̤hî̌bǎ tokhlǒ.

⁷ Khînǎkhîno phû̌mò̤̌ tokhlǒ yî̤̌kǒyî̤̌sa hǎhtò̌cû̌ tephekè dǒ a ma̤bǎ kòyò tokhlǒ alô̤nu a ô̌ dû̌wî̤. Htokhôtô̤̌ a ma̤hǎmǎ dû̌wî̤ bǎ kòyò dǒ a sitôkô̌ke tokhlǒ kû̌ kòyò dǒ a khò̌lôpô̤̌dě tokhlǒ.

⁸ Pô̤̌nu akhû̌akhî, wî̤̌ kûphû̌ tokhlǒ sǎlě̤sǎlò̤ jî̌le.

⁹ Bǎ wî̤̌kûnu kòyò dǒ ami̤ kû̌ Khûshǐmṳ̂ ô̌ tôpwa̤. A hî̌ tûû̌ anǎ̤ kû̌ a mî̌ a htû ikǒlǒkò kûshû̌htû tôpwa̤. Dě a cû̌lè ma̤ ǒò̌ kiti̤kaa hto dû̌wî̤ bǎ Shamarǐphû̌ tokhlǒ kû̌ ma̤tèplè̌ kòyò mǐ̤sǎ tokhlǒ.

¹⁰ Pô̤̌nudě lǒ̤bò kòyò dǒ a htûdû̌htûpwǎ̤ dě a ô̌ bǎ wî̤̌kû nutokhlǒ bǎbǎ, kòyò dǒ ǎshǎ wè̤ta̤phû̌ ô̌ bǎ wî̤̌kû nutokhlǒ bǎbǎ, a ganǎ̤de wô̌bǎbò lû̌û yô̤̌. Asî hî̌ lô̌khô kû̌, “Kòyò nutôpwa̤ mî̌ Cǒmara a ta̤pô̤ta̤phǎ dǒ kòyò kaǎ kû̌ ta̤pô̤ta̤phǎ dǒ adû̌ayô̤̌nu.”

¹¹ A ma̤ ǒò̌ kiti̤kaa bǎ kòyò kû̌ ata̤ma̤ tèplè̌ kòyò mǐ̤sǎ bǎnu mî̌ ayî̤hǒ akhû̌akhî, kòyò ganǎ̤de wô̌bǎ ayô̤̌.

¹² Bǎbǎkǎlè bǎ Khûphǐlǐpǔ shôbǐǐlṳ̌ bǎ asî kû̌ Cǒmara shigǎ awe̤akè kû̌ Yeshǔ Khrǐ awe̤akè akhanu, pwa̤mǒ̤mǒ̤, pwa̤khûkhû nî̌ a yṳ̌nǐ̤nǎ̤nǐ̤ ta̤sǎlě̤we̤kè dě ju bò anǎ̤ kû̌ shi.

¹³ Khûshǐmṳ̂ sanǎ̤ yṳ̌nǐ̤nǎ̤nǐ̤ Yeshǔ dě a ju anǎ̤ kû̌ shi shi, htokhôtô̤̌ a cû̌wô̤̌wô̤̌ gewô̤̌wô̤̌ kû̌ Khûphǐlǐpǔ pṳ̂̌꤮ taplǎ. Bǎ a kè̌shǐ Khûphǐlǐpǔ ma̤ ǒò̌ kiti̤kaa dǒ adû̌ayô̤̌ tokhlǒ akhanu, a ǒò̌ kiti̤kaa jî̌lî.

¹⁴ Bǎ pwa̤nophû̌ dǒ Wî̤̌yarǔshôle akû tokhlǒ ganǎ̤de kû̌ Shamarǐphû̌ tokhlǒ yṳ̌ǎ lô̌khô Cǒmara alě̤ayô̤̌ akhanu, asî nocû̌ Khûpetarǔ kû̌ Khûyṳ̂ha dǒ asîô̌.

¹⁵ Bǎ asî hètǒ̤ akhanu, pô̤̌khô Shamarǐphû̌ tokhlǒ gǔ nǐ̤bǎ Yôla Plò̌shǐ Běcǎ ayanu, a kwicaba bǎ asî.

¹⁶ Ma̤titèhî̌dě Yôla Plò̌shǐ Běcǎ hèlò̤ dǒ asî lô̤ tôpwǎ̤꤮ nò̌khôtô̤̌. Asî ju pwǎtǒ̤ lô̌khô anǎ̤ kû̌ shi dǒ Běcǎ Yeshǔ ami̤ akû mô̤̌pepwǎ.

¹⁷ Pô̤̌nudě Khûpetarǔ kû̌ Khûyṳ̂ha bè̌htò̌ acǔde dǒ asîlô̤, dě asî nǐ̤bǎ lô̌khô Yôla Plò̌shǐ Běcǎ.

^18-19 Bǎ pwa̤nophû̌ Khûpetarǔ kû̌ Khûyṳ̂ha dò̌htò̌ acǔde dǒ pwa̤yṳ̌ǎta̤phû̌ tokhlǒ alô̤ dě asî nǐ̤bǎ Yôla Plò̌shǐ Běcǎ akhanu, Khûshǐmṳ̂ kè̌shǐ dě a sǎyṳ ǐ Khûpetarǔ kû̌ Khûyṳ̂ha ruhta dě a hî̌ asî kû̌, “He gǔ bè̌htò̌ he cǔde dǒ mò̌pèpè̌꤮ tôpwa̤ alô̤ pěnu bǎbǎ, pô̤̌khô kòyò gǔ nǐ̤bǎ Yôla Plò̌shǐ Běcǎ ayanudě, ǐpadô̌ he ta̤pô̤ta̤phǎ nu tocǒ.”

²⁰ Dě Khûpetarǔ hî̌shěshu lû̌û kû̌, “Cǒmara ata̤ǐ sûnu, pwî̤ a kû̌ ru mî̌ anǐ̤ pwǎ, na gènè̤ pô̤̌nu akhû̌akhî, na kû̌ naru gǔ lò̤tě̤ wô̤̌wô̤̌ lû̌û dǒ larakû pě nî̌꤮.

²¹ Na mî̌ kòyò dǒ a ô̌plǒ dǒ pa ta̤phǐta̤ma̤ akû mè̤̌tô̤̌, ma̤titè̌hî̌dě na sǎphlǒnu, acǒtè̤ dǒ Cǒmara a lô̤mô̤̌ tô̤̌.

²² Na sǎphlǒ a ta̤gènè̤ phû̌mò̤̌ tokhlǒnu, na tôbǎ yò̤lǎ̤plǎdî̌ getîkhî sô̌ mò̌ a dě kwicaba Cǒmaranu. Nakè̌ma̤ pô̤̌nuhî̌dě Cǒmara plûkè jò kǎ na ta̤gènè̤sǔnu tokhlǒ pě kǎlè.

²³ Ma̤titèhî̌dě he kè̌shǐ kû̌ na sǎphlǒ nî̌ a betipǐ kû̌ ta̤sǎkhěkhû̌khwè dě na ta̤sǔta̤plě comě na sô̌sô̌kû̌ kòyò lò̤tě̤ dǒ apô̤kû tôpwa̤nu.”

²⁴ Khûshǐmṳ̂ hî̌shěshu Khûpetarǔ kû̌ Khûyṳ̂ha kû̌, “Pô̤̌khô sî hî̌ ta̤tokhlǒ lǒ̤bò gǔ lò̤bǎ he tocǒ tô̤̌nu dě kwicaba bǎ lô̌khô heya dǒ Běcǎ ô̌.”

²⁵ Bǎ Khûpetarǔ kû̌ Khûyṳ̂ha shôbǐǐlṳ̌ bǎ kòyò kû̌ ta̤ dǒ a sî̌ganǎ̤ kè̌shǐbǎ hto Yeshǔ Khrǐ awe̤akè nutokhlǒ dě shôbǐǐlṳ̌ hto bǎ kòyò kû̌ Cǒmara alě̤ayô̤̌ akhanu, asî getîkhî sô̌ dǒ Wî̤̌yarǔshôle. Bǎ asî ge dǒ klè̌lô̤ akhanu, a cû̌lè dû̌wî̤ dǒ Shamarǐ do dě a nṳ̌ tôdo hto hǎhtò̌ tôdo dě a cû̌ shôbǐǐlṳ̌ bǎ kòyò ta̤sǎlě̤we̤kè.

Khûphǐlǐpǔ kû̌ kòyò htû Isiyṳ̂piyagǎ ikǒlǒkòdû̌ tôpwa̤

²⁶ Běcǎ a mǒkhû̌ tanaphû̌ tôpwa̤ hî̌ Khûphǐlǐpǔ kû̌, “Tîwî̌tòwò nǎ nanǎ̤ dě ô̌ bǎ Wî̤̌yarǔshôle dě cû̌꤮ gelò̤ kû̌ klè̌ cǔmû dǒ Wî̤̌kashǎ nutôbô. Klè̌ numî̌ gǎshashigǎ lǒ̤seměkhû̌ aklè̌.”

²⁷ Pô̤̌nudě Khûphǐlǐpǔ ô̌ tîwî̌tòwò anǎ̤ dě a hǎhtò̌cû̌. Bǎ a cû̌ dǒ klè̌lô̤ akhanu, a glǎ kû̌ Isirûpiyaphû̌ dǒ ashǔkè a dǐ tôpwa̤. A mî̌ a htû ikǒdû̌ dě a bǎ kè̌ǐ pǒǐ Isiyûpiya khwǐmǒ̤ Mǒ̤khèda aruhta lǒ̤꤮ bò tôpwa̤. A cû̌ cubucaba hto dǒ Wî̤̌yarǔshôle dě a gelò̤tîkhîsô̌ dǒ ado kû̌ tîsî̌lô̤.

²⁸ Bǎ a ge dǒ klè̌lô̤ akhanu, a dô̌ lî̤ dǒ piwi̤pèshè Khûyashǎya wě̤ dǒ awǐnu tokhlǒ.

²⁹ Yôla Plò̌shǐ Běcǎ shôbǐǐ Khûphǐlǐpǔ kû̌, “Cû̌ dǒ a tîsî̌lô̤ kòshî̌nu.”

³⁰ Dě Khûphǐlǐpǔ khlè̌cû̌ dǒ tîsî̌lô̤ kòshî̌ dě bǎ a ganǎ̤de a dô̌ piwi̤pèshè Khûyashǎya lî̤ akhanu, a gwè̌ lû̌û kû̌, “Na dô̌ lî̤ numî̌, na sî̌ganǎ̤ ǐ yô̤̌mûyô̤̌sǎ ya?”

³¹ Dě kòyò htû ikǒlǒkòdû̌ hǒtôpwa̤ hî̌shěshu lû̌û kû̌, “Kòyò shôbǐǐ bǎ he tôpwǎ̤꤮ tô̤̌ hî̌dě he cû̌ sî̌ganǎ̤jò hî̌tè?” A hî̌ dě a kaǎhtò̌ dò̌ lû̌û bǎ tîsî̌lô̤.

³² Kòyò dǒ ashǔkè a dǐ nutôpwa̤ dô̌ lî̤plò̌shǐ tôtô̤̌ dǒ a hî̌ kû̌, “Amî̌ asô̌sô̌kû̌ sû̌phû̌ tôdo dǒ kòyò cî̌cû̌ yǎ dě kòyò glè̌ ma̤si lû̌ûnu, dě asô̌sô̌kû̌ kòyò dǐkè sû̌phû̌ ashǔ dǒ a hǎ yî̤̌kǒyî̤̌sa gû̌ kòyò tômṳ̂̌꤮ tô̤̌ tôdo, a pwe̤ kû̌ kòyò tômû꤮ tô̤̌.

³³ Kòyò ma̤sòwò̤̌ lû̌û dě kòyò cî̌htò̌cǒ cî̌htò̌tè̤ bǎ lû̌û tô̤̌, pwa̤ dǒ a shôbǐǐjò bǎ kòyò kû̌ a khlilè awe̤akènu a ô̌ tôpwǎ̤꤮ tô̤̌, ma̤titè̌hî̌dě kòyò phî̌kè ata̤htûpwa̤ dǒ hǎkhû̌ nuhǒ.”

³⁴ Kòyò htû ikǒlǒkòdû̌ tôpwa̤nu, a gwè̌ Khûphǐlǐpǔ kû̌, “Shôbǐǐ kè̌kè̌mò̌ he piwi̤pèshè nutôpwa̤ hî̌bǎ ta̤ hǒo, mî̌ a hî̌ tûû̌ pwǎ awe̤akè pwǎ ya? Mè̤̌tô̤̌mî̌ a hî̌ kòyò tôpwa̤pwa̤ awe̤akè ya?”

³⁵ Pô̤̌nudě Khûphǐlǐpǔ sahtò̌ hî̌ bǎ lû̌û kû̌ lî̤plò̌shǐ nutôplô dě a shôbǐǐlṳ̌ bǎ lû̌û kû̌ Yeshǔ a ta̤sǎlě̤we̤kè.

³⁶ Dě bǎ asî nusò̌ginǐ̤ cû̌ sělě pô̤̌ dǒ alô̤mô̤̌ akhanu, asî cû̌tǒ̤ dǒ shiô̌ ta̤lǎ̤ tûkû. Hǒtaplǎdě kòyò htû ikǒlǒkòdû̌ tôpwa̤nu a hî̌ lû̌û kû̌, “Shi ô̌ bǒo lè, he kè̌ sǎyṳ ju henǎ̤ kû̌ shi numî̌ ta̤ma̤dǐdò tě̤tṳ he klè̌ ô̌ tocǒcǒ ya?”

³⁷ (Khûphǐlǐpǔ hî̌shěshu lû̌û kû̌, “Na kè̌ yṳ̌ǎ lǒ̤sû̌lǒ̤sò̌ mè̤̌mî̌ca Yeshǔ Khrǐ numî̌, na ju nanǎ̤ kû̌ shi mî̌ anǐ̤ pwǎ.” A hî̌ lû̌û dě a hî̌shěshu kû̌, “Yeshǔ Khrǐ mî̌ Cǒmara aphû̌khû mè̤̌mî̌ca numî̌ he yṳ̌ǎ” A hî̌shěshu pô̤̌nu)

³⁸ Kòyò htû ikǒlǒkòdû̌ tôpwa̤nu a kaǎ ô̌kǔ pwa̤wṳ̂̌ tîsî̌lô̤ nutôpwa̤. Dě Khûphǐlǐpǔ kû̌ kòyò htû ikǒlǒkòdû̌ nusò̌ginǐ̤ nṳ̌lò̤ dǒ shikû, dě Khûphǐlǐpǔ ju bǎ lû̌û kû̌ shi.

³⁹ Bǎ asî ô̌ dǒ shikû gehtò̌ akhanu, Yôla Plò̌shǐ Běcǎ jocû̌ hǎmǎkè Khûphǐlǐpǔ. Kòyò htû ikǒlǒkòdû̌ nutôpwa̤ kè̌shǐ pe lû̌û tô̤̌ bǎbǎkǎlè a sǎlě̤sǎlò̤ dě a ge sělě dǒ ado.

⁴⁰ Khûphǐlǐpǔ sî̌ganǎ̤ tûû̌ anǎ̤ kû̌ a cû̌tǒ̤ dǒ Wî̤̌Ashadû akû dě a cû̌ pô̤̌ dǒ Wî̤̌kèshari. Bǎ a cû̌ dǒ klè̌lô̤ akhanu, a shôbǐǐlṳ̌ bǎ kòyò kû̌ Yeshǔ Khrǐ a ta̤sǎlě̤we̤kè nu pṳ̂̌꤮ tôwî̤̌.