Pwa̤nophû̌ 20 - Kawyaw New Testament

Khûpò̌lǔ cû̌pô̤̌ dǒ Mèsidûnǐ̤yagǎ kû̌ Grěgǎ

¹ Bǎ ta̤shû̌shǎ ô̌sǔkè hto akhanu, Khûpò̌lǔ kaǎplǒ ta̤dòkûphû̌ tokhlǒ dě a ǐkhû̌ǐǎ asî, a hî̌mô̤hî̌wô̌ asî htodě a hǎhtò̌cû̌ dǒ Mèsidûnǐ̤ya gǎkû.

² Bǎ a cû̌bò̌ do ô̌ bǎ klè̌lô̤ tokhlǒ akhanu, a ǐkhû̌ǐǎ cû̌ jûgrûbǎ kòyò. Htodě a cû̌ sělě pô̤̌ dǒ Grěgǎ.

³ A cû̌ô̌ bǎnu sula htodě a ô̌ tîwî̌tòwòhto anǎ̤ kû̌ a gǔ hǎhtò̌cû̌ dǒ Shurǐgǎ kû̌ sǒkhlidû̌ taplǎnô̤̌ a sî̌ganǎ̤ kû̌ Yǔdaphû̌ tokhlǒ glè̌ ma̤si lû̌û akhû̌akhî, a bè̌lò̤ tîkhî sô̌ asǎphlǒ kû̌ a gǔ genṳ̌ cû̌tûlû̌ sô̌ Mèsidûnǐ̤yagǎ kû̌ akhò̌lô̤pô̤̌.

⁴ Wî̤̌berǐphû̌ Phaphǔrusho aphû̌khû Khûshû̌patarǔ kû̌ Wî̤̌tîsalònǐphû̌ KhûArǐshataku kû̌ Khûshekadǔ, htodě Wî̤̌tebephû̌ Khûkayǔ, kû̌ Khûtîmôte, kû̌ Ashǎgǎphû̌ Khûtǔkǐkǔ kû̌ Khûtaròphǐmǔ tokhlǒ gû̌cû̌ kû̌ lû̌û.

⁵ Asî cû̌ô̌pǒ̤wǐ pa dǒ Wî̤̌taròǎ akû.

⁶ Pwè mû̌ shôdô ta̤bû htohǒ dě tôplǎnô̤̌ pa htò̌dò̌ sǒkhlidû̌ bǎ Wî̤̌phǐlǐpǐnu dě pa hèkè̌shǐ kû̌ asî dǒ Wî̤̌taròǎ. Pa hè dǒ klè̌lô̤nu a ô̌ yè̤̌sa hǒdě pa hè ô̌yî̤ bǎnu susô̌tôni̤.

Khûpò̌lǔ cû̌ô̌lèkû̌ ta̤dòkûphû̌ tokhlǒ dǒ Wî̤̌taròǎ gutṳ̌kò tôplǎ

⁷ Bǎ mô̤gètè̤ lṳmṳ̌hǎ akhanu, pa ô̌plǒô̌cu tîkhî sô̌ lû̌û kû̌ gǔ běphò̌ mû̌ aya. Pe̤wô̤pě nu Khûpò̌lǔ gǔ hǎhtò̌cû̌hǒ akhû̌akhî a hî̌bǎ kòyò saprṳ̂ nutokhlǒ tǒ̤dǒ lṳmṳ̌klama.

⁸ Hǐdǒkû dǒ akhû̌tôtô̤̌ bǎ pa lǎ̤ô̌kǔ lû̌û agûlǎ̤ nu, kòyò dǎlî dû̌wî̤ mî̌.

⁹ Pwa̤khû phû̌sǎphû̌ dǒ ami̤ kû̌ Khûǔtukhǔ tôpwa̤nu a hǎnòò̌ dǒ takhaphû̌khû̌. Khûpò̌lǔ shôbǐǐ yî̤gîpî̤ hǒdě Khûǔtukhǔ hǎmôô̌khwekè dě a hǎmôô̌nṳ̌ sělěkè. Hǒtaplǎdě a ô̌dǒ hǐkhû̌ sutô̤̌tôtô̤̌ dě a lò̤tě̤ dǒ hǎkhû̌. Bǎ kòyò cû̌ phô̌htò̌ lû̌û akhanu, a sikèhǒ.

¹⁰ Dě Khûpò̌lǔ hǎtě̤ dǒ hǐlǎ̤ dě a û̌jogo phô̌ lû̌û dě a hî̌ kû̌, “Gû̌gè̌ ta̤mǎ̤. A ô̌htûpwa̤pe pwǎ!”

¹¹ Htodě a ihtǒ sô̌ dǒ hǐdǒkû dě a htò̌běphò̌ mû̌ dě a gǔ ǎô ta̤ kû̌ ta̤dòkûphû̌ tokhlǒ. A hî̌bǎyî̤̌꤮ kû̌ asî tǒ̤dǒ lṳmṳ̌shî̌ dě a hǎhtò̌cû̌ nô̌ pwǎ.

¹² Asî gesû pwa̤khû phû̌sǎ Khûǔtukhǔnu dǒ ahǐ. A htûpwa̤ pepwǎ akhû̌akhî, a mô̤ jî̌jî̌ asî sǎphlǒ.

Khûpò̌lǔ ô̌dǒ Wî̤̌taròǎ dě hǎhtò̌cû̌ dǒ Wî̤̌milětǔ

¹³ Khûpò̌lǔ mǎnǎ pa kû̌ cû̌dò̌ sǒkhlidû̌ dě hǎhtò̌cû̌ wǐ dǒ Wî̤̌Ashǔ nu, dě Khûpò̌lǔ cû̌ htò̌dò̌ kû̌ pa bǎnu pě. Ma̤titè̌hî̌dě a dě a gǔ cû̌ kû̌ akhò̌lô̤pô̤̌ dǒ hǎkhû̌ tôkhônu pě.

¹⁴ Pa kè̌shǐ shěshu lû̌û dǒ Wî̤̌Ashǔ, dě pa dò̌꤮ cû̌ wô̤̌wô̤̌ lû̌û sǒkhlidû̌ dǒ Wî̤̌mitele.

¹⁵ Pa htò̌dò̌ cû̌ sǒkhlidû̌nu dě nô̌kò tôni̤nu, pa cû̌tǒ̤ dǒ Khǐǔ shikhokhû̌. Dǒnô̌kòtôni̤ dě pa cû̌tǒ̤ dǒ Shamǔ shikhokhû̌. Dǒnô̌kòtôni̤ pô̤̌ dě pa cû̌ dǒ Wî̤̌milětǔ.

¹⁶ Pô̤̌khô ta̤shěta̤khǎ gǔ hǎbò bǎ Ashǎgǎkû tô̤̌nu, Khûpò̌lǔ bè̌lò̤ asǎphlǒ kû̌ a gǔ cû̌ tûlû̌kè Wî̤̌Ěphěsu. Kè̌ awô̌mò̌ dě Khûpò̌lǔ sǎyṳ cû̌tǒ̤ phwè kû̌ ta̤cû̌bò̌tûlû̌pwè ashěakhǎ bǎ Wî̤̌yarǔshôle akûnu.

Khûpò̌lǔ hî̌bǎ kû̌ Wî̤̌Ěphěsu ta̤dòkû bò̌bò mǒ̤khumǒ̤pwǎ̤ ikǒlǒkò tokhlǒ dǒ agutṳ̌kò tôplǎ

¹⁷ Bǎ Khûpò̌lǔ ô̌bǎ Wî̤̌milětǔ akhanu, a mǎhèbò ta̤dòkû mǒ̤khumǒ̤pwǎ̤ dǒ a htû ikǒlǒkò dě a ô̌ lôkhô dǒ Wî̤̌Ěphěsu akû nutokhlǒ dǒ a ô̌. Dě a hî̌ asî kû̌ a gǔ hè kè̌shǐ kè̌khî lû̌û bǎ Wî̤̌milětǔ akûnu.

¹⁸ Bǎ asî hètǒ̤ akhanu, Khûpò̌lǔ hî̌ asî kû̌, “Sahtò̌ bǎ he hètǒ̤ dǒ Ashǎgǎ nutini̤ hènè, he ihtǒhǎnòò̌ kû̌ sî pô̤̌hî̌tènu sî sî̌ganǎ̤ hto tûû̌hǒ.

¹⁹ Bǎ he kè̌shǐbǎ kû̌ ta̤pò̤̌ta̤sha dǒ Yǔdaphû̌ tokhlǒ phû̌mò̤̌shǐhtô he akhanu taplǎnô̤̌ he ma̤ta̤ dǒ Cǒmara aya akhû̌akhî he mǐ̤sǎshi lò̤bǎ htokhôtô̤̌ he bǎ shò̌lò̤ kudǔdǔ he sǎphlǒ.

²⁰ Sî sî̌ganǎ̤hto kû̌ ta̤shôbǐǐ tocǒcǒ dǒ a gǔ htûhtò̌ ta̤ma̤jè̌ dǒ sîyanu, he ma̤bǐma̤hǔ bǎ tocǒ꤮ tô̤̌. Dě dǒ kòyò saprṳ̂ akla bǎbǎ, dǒ sîhǐsîphò akû bǎbǎ, he sû̌ǐtòwòǐ hto bǎ sî hǒ.

²¹ Yǔdaphû̌ tokhlǒ bǎbǎ, Yǔdaphû̌ mè̤̌tô̤̌ tokhlǒ bǎbǎ, he hî̌lò̤shû̌ shû̌lě asî ginǐ̤prṳ̂ kû̌, yò̤lǎ̤plǎdî̌ lôkhô sî sǎphlǒ dě yṳ̌ǎnǎ̤ǎ lôkhô Běcǎ Yeshǔ, he hî̌ bǎ asî pô̤̌nu nu.

²² “Khònò̤̌nu, he ganǎ̤de Yôla Plò̌shǐ Běcǎ ayô̤̌ dě he gǔ cû̌ dǒ Wî̤̌yarǔshôle. Bǎnu pědě ta̤ gǔ ma̤anǎ̤ kû̌ he pô̤̌hî̌tè pěnu, he sî̌yatô̤̌.

²³ He sî̌ganǎ̤ pwǎ tocǒ꤮ nô̤̌ kû̌, dǒ wî̤̌ pṳ̂̌꤮ tîwî̤̌ akûnu, Yôla Plò̌shǐ Běcǎ dǐ sè̌rè̌ he kû̌ kòyò bǎ comě he pě, dě pwa̤ ma̤pò̤̌ma̤sha he tokhlǒnu, a ô̌pǒ̤ nǎ hto heklè̌ hǒ.

²⁴ Bǎbǎkǎlè pô̤̌khô he gǔ ma̤htokè ta̤ma̤ dǒ Běcǎ Yeshǔ ǐlò̤kè he ayanu, he sǎleǐ pe he ta̤htûpwa̤nu tô̤̌ hǒ. Ta̤ma̤ dǒ a noma̤ he tokhlǒ numî̌ he bǎ khòlṳ̌ kû̌ Cǒmara abwǐsîrî a ta̤sǎlě̤we̤kè nuhǒ.

²⁵ “Khònò̤̌nu he sî̌ganǎ̤ kû̌ lǒ̤bò sî dǒ he shôbǐǐ bǎhto bò kû̌ Cǒmara ashiagǎ awe̤akè tokhlǒ nu, sahtò̌ khònò̤̌ hènè nu sî kè̌shǐ pe he tôpwǎ̤꤮ tô̤̌ hǒ.

²⁶ Pô̤̌nu akhû̌akhî, khò̌tôni̤, he gǔ hî̌lṳ̌ sî̌ganǎ̤ tě̤tě̤mè̤̌mè̤̌ bǎ sî kû̌ lǒ̤bò sî hǒtokhlǒ nî̌, kè̌ sî yôla htûpwa̤ pî̌kè tôpwa̤pwa̤ kè̌hî̌ numî̌ he ta̤sǔ mè̤̌ pe bǎtô̤̌.

²⁷ Ma̤titèmî̌ lǒ̤bò ta̤ dǒ Cǒmara ta̤yè̤lò̤nǎ tokhlǒnu, he dǒû̌dǒshò̌ nô̌ tocǒ꤮ tô̤̌. He shôbǐǐ bǎ htobò sî hǒ.

²⁸ Kè̌ǐ kè̌khî tûû̌ lôkhô sînǎ̤ dě kè̌ǐ kè̌khî bò lô̌khô sû̌phû̌ dǒ Yôla Plò̌shǐ Běca ǐlò̤hto sî dǒ sî bǎ kè̌ǐ nutokhlǒ nî̌꤮. Htû lôkhô pwa̤ dǒ a kè̌ǐ asû̌phû̌sî nutokhlǒ nî̌꤮. Kè̌ǐ lôkhô Cǒmara a ta̤dòkû dǒ aphû̌khû pwî̤ge hto kû̌ asǐ sanǎ̤ nunî̌.

²⁹ He hǎhtò̌cû̌ hto pěnu, he sî̌ganǎ̤ kû̌ kòyò dǒ a sô̌sô̌ kû̌ shǐmi̤ dǒ ajî̌akhu tokhlǒ gǔ hènṳ̌ dǒ sîkla pě, dě a gǔ nṳ̌ma̤bǎma̤sha bò sû̌phû̌ amṳ̌ tokhlǒ pě.

³⁰ Dě dǒ sîklanu kòyò gǔ ô̌lṳ̌htò̌ tokhlǒkhlǒ pě. Dě pô̤̌khô asî gǔ tili̤tôlô̌ cû̌ ta̤dòkûphû̌ tokhlǒ aya nudě, a tili̤tôlô̌ cû̌ asî pě.

³¹ Pô̤̌nu akhû̌akhî, ô̌sè̌rè̌ lôkhô sînǎ̤ nî̌꤮. Dě he sû̌ǐtòwòǐ sî lṳmṳ̌khǐkhǐ lṳmṳ̌shasha suně akû. Htokhôtô̤̌ pṳ̂̌꤮ plǎplǎ he mǐ̤sǎshilò̤ dû̌wî̤ sîyanu gènè̤htò̌ge lôkhô tû̌pû nî̌꤮.

³² “Khònò̤̌nu, he ǐlò̤hto sî dǒ Cǒmara a ta̤kè̌ǐ akû kû̌ abwǐsîrî a ta̤sǎlě̤we̤kè akûnu hǒ. A ta̤sǎlě̤we̤kè nî̌ sǔ sǔ ama̤dû̌htò̌ jò sî dě a gǔ ǐ sî û̌tě̤û̌ca dǒ a bè̌dû̌ nǎ bǎ kû̌ a kòyò plò̌shǐ lǒ̤bò nutokhlǒ aya nupě.

³³ Ru bǎbǎ, hta bǎbǎ, je lǎ̤kûlǎ̤sô̌ bǎbǎ, he sǎyṳsǎbǎ bǎ kòta tôpwǎ̤꤮ tô̤̌.

³⁴ Lǒ̤bò ta̤ dǒ he kû̌ he khô lṳ̂bǎ tokhlǒnu, he ma̤jè̌ pwǎ kû̌ henǎ̤ numî̌ sî sî̌ganǎ̤ bòtû̌hǒ.

³⁵ Pô̤̌khô pa gǔ ma̤jè̌ bò̌ kòyò dǒ a khû̌shiǎjǎ tokhlǒnudě, he ma̤kè̌lû̌mò̌mṳ bò hto sî ta̤kè̌lû̌ pṳ̂̌꤮ tocǒ kû̌ pa tôbǎ jî̌pwǐ̤ ta̤, pô̤̌nu. Dě sî̌yahtò̌ lôkhô Běcǎ Yeshǔ a ta̤hî̌bǎ dǒ a hî̌ kû̌, ‘ǐta̤nu ta̤ǐshowî̤ bǎ dû̌khlo pe kû̌ nǐ̤bǎta̤,’” Khûpò̌lǔ hî̌ bǎ asî pô̤̌nu.

³⁶ Bǎ Khûpò̌lǔ hî̌bǎhto akhanu, a dô̌gînî̤û̌lò̤ kû̌ asî pṳ̂̌꤮ tôpwa̤ dě a kwicaba.

³⁷ Dě asî phô̌ gômô̤ hî̌mô̤hî̌wô̌ Khûpò̌lǔ dě a hǎ lôkhô pṳ̂̌꤮ tôpwa̤.

³⁸ Asî sǎplǎ̤nǎ̤bǎ lǒ mî̌ Khûpò̌lǔ hî̌ asî kû̌ sî kè̌shǐ pe nô̌ he taplǎ꤮ tô̤̌nu pě, a hî̌ asî nutômû nuhǒ. Dě asî sûcû̌ lû̌û dǒ kòyò lǎ̤bè̌ô̌kǔ sǒkhlidû̌ gûlǎ̤nu.