Pwa̤nophû̌ 15 - Kawyaw New Testament

Kòyò gwè̌ Khûmṳ̂shě a ta̤mǎlò̤

¹ Kòyò ô̌ dǒ Yǔdagǎkû tokhlǒ hèlò̤ lô̌khô dǒ Wî̤̌Atiò dě hè sû̌ǐtòwòǐlò̤ ta̤dòkûphû̌ tokhlǒ kû̌, “Sî kè̌ dǔtṳ̌bě pô̤̌ Khûmṳ̂shě a ta̤mǎlò̤ nutô̤̌ mî̌ sî nǐ̤bǎjò ta̤ma̤hǎplǎge tô̤̌.”

² Khûpò̌lṳ kû̌ Khûbanabǎ htè̌shěshu shû̌sho kòyò tokhlǒ kû̌ ta̤we̤ta̤kè nutôcǒ. Pô̤̌nudě dǒ ta̤we̤ta̤kè hǒo akhû̌akhî, kòyò rû̌htò̌ Khûpò̌lǔ kû̌ Khûbanabǎ kû̌mî̌ kòyò ô̌ dǒ Wî̤̌Atiò akûnu tokhlǒ, dě asî tôbǎ cû̌ kè̌shǐ shěshu kû̌ pwa̤nophû̌ kû̌ ta̤dòkû mǒ̤khumǒ̤pwǎ̤ a ikǒlǒkòdû̌ dǒ Wî̤̌yarǔshôle akû nutokhlǒ.

³ Pô̤̌nudě ta̤dòkû tokhlǒ sûcû̌ asî dǒ Wî̤̌yarǔshôle dě bǎ asî cû̌tûlû̌bò̌ Bûnǐkegǎ kû̌ Shamarǐgǎ akhanu, kòyò shôbǐǐlṳ̌ bǎ asî kû̌ Yǔdaphû̌ mè̤̌tô̤̌ tokhlǒ yṳ̌nǐ̤nǎ̤nǐ̤ gû̌ kò Cǒmara hî̌tènu awe̤akè akhû̌akhî, ta̤dòkûphû̌ tokhlǒ sǎlě̤sǎlò̤bò pṳ̂̌꤮ tôpwa̤.

⁴ Bǎ asî cû̌tǒ̤ dǒ Wî̤̌yarǔshôle akhanu, ta̤dòkû tokhlǒ kû̌ pwa̤nophû̌ tokhlǒ kû̌mî̌ ta̤dòkû mǒ̤khumǒ̤pwǎ̤ dǒ a htû ikǒlǒkòdû̌ tokhlǒ kaǎmô̤shǔ Khûpò̌lǔ, Khûbanabǎ kû̌mî̌ ta̤dòkû dǒ ashǔshawa̤ tokhlǒ dě asî shôbǐǐlṳ̌ bǎ kòyò kû̌ ta̤we̤ta̤kè dǒ Cǒmara ma̤ tutṳ̌ ta̤ dǒ asîkû tokhlǒ awe̤akè.

⁵ Bǎbǎkǎlè Pharishè̌phû̌ aprṳ̂aphǎ dǒ a yṳ̌nǐ̤nǎ̤nǐ̤ ta̤ akla tokhlǒ ihtǒ hî̌ kû̌, “Yǔdaphû̌ mè̤̌tô̤̌ tokhlǒnu a tôbǎ dǔtṳ̌ gû̌ kò aphě, htodě kòyò tôbǎ hî̌ asî kû̌ asî tôbǎ gû̌ma̤ Khûmṳ̂shě a ta̤sû̌ta̤tòwò tokhlǒ.”

⁶ Pwa̤nophû̌ tokhlǒ kû̌ pwa̤ dǒ a htû ta̤dòkû mǒ̤khumǒ̤pwǎ̤ ikǒlǒkòdû̌ tokhlǒnu, asî ô̌cuô̌plǒ lû̌û dě asî gènè̤ wô̤̌wô̤̌ sô̌ ta̤we̤ta̤kè nutôcǒ.

⁷ Asî hî̌bǎ kè̌khî lû̌û nî̌ ayî̤gipi̤ hǒ dě Khûpetarǔ ihtǒ hî̌ asî kû̌, “He pṳ̌wè̤̌ sî, pô̤̌khô he gǔ shôbǐǐlṳ̌ padô̌ Yǔdaphû̌ mè̤̌tô̤̌ tokhlǒ kû̌ ta̤sǎlě̤we̤kè, htokhôtô̤̌ pô̤̌khô asî gǔ ganǎ̤de dě yṳ̌nǐ̤nǎ̤nǐ̤ Yeshǔ ayanu, Cǒmara rû̌htò̌ yî̤̌꤮ hto he dǒ sîkla numî̌ sî sî̌ganǎ̤ tûû̌ hǒ.

⁸ Cǒmara mî̌ a kè̌shǐ sî̌ganǎ̤bò kòyò pṳ̂̌꤮ tôpwa̤ asǎphlǒ. Dǒ a ǐ pè̤̌ Yǔdaphû̌ mè̤̌tô̤̌ tokhlǒ Yôla Plò̌shǐ Běcǎ akhû̌akhî, a dǔlè̌lṳ̌ hto kû̌ a sǎphlǒ ô̌hto asî pô̤̌ a ǐ hto pa Yôla Plò̌shǐ Běcǎnu hǒ.

⁹ Cǒmara a ta̤kè̌shǐ numî̌ pô̤̌hî̌tè hî̌dě, Yǔdaphû̌ tokhlǒ kû̌ Yǔdaphû̌ mè̤̌tô̤̌ tokhlǒ numî̌ akhô̌ nô̌ lû̌û tocǒ꤮ tô̤̌. Dǒ asî yṳ̌nǐ̤nǎ̤nǐ̤ Cǒmara akhû̌akhî, a plûkè asî ta̤sǔ dě a ma̤mṳ̂̌plî gesô̌ asî sǎphlǒ.

¹⁰ Pô̤̌nudě, ma̤hî̌tè sî cû̌ma̤ sǎphlǒdû̌ tǒ̤ Cǒmara ma̤titè? Ta̤wǐta̤ò̌ dǒ pa tokhlǒ kû̌ pa mǒ̤phaphiphu dǒ awǐnu tokhlǒ wǐpè̤̌ tô̤̌ tokhlǒnu, sî cû̌ sǎyṳ nowǐ noò̌ tǒ̤ kû̌ kòyò dǒ a yṳ̌nǐ̤nǎ̤nǐ̤ ta̤nu tokhlǒ alô̤ ma̤titè?

¹¹ Cû̌ma̤ lô̌khô tǎ̤ pô̤̌nu tǎ̤mǎ̤, dǒ Běcǎ Yeshǔ abwǐsîrî akhû̌akhî, pa nǐ̤bǎ ta̤ma̤hǎplǎge pwǎ pa yṳ̌ǎ pô̤̌nu. Asî mî̌ a nǐ̤bǎ ta̤ma̤hǎplǎge sô̌sô̌ kû̌ pa nǐ̤bǎ nupwǎ,” Khûpetarǔ hî̌ asî pô̤̌nu.

¹² Bǎ Khûpò̌lǔ kû̌ Khûbanabǎ ô̌ dǒ Yǔdaphû̌ mè̤̌tô̤̌ tokhlǒ akla akhanu, Cǒmara ma̤ tutṳ̌ bǎ ta̤cô̌klǐcô̌sè a ta̤ma̤mǎnǎ kû̌ ta̤ma̤ ǒò̌ kiti̤kaa tokhlǒ kû̌ asînu sò̌ginǐ̤. Bǎ Khûpò̌lǔ kû̌ Khûbanabǎ hî̌lṳ̌ bǎ kòyò hèô̌plǒô̌cu tokhlǒ kû̌ ta̤we̤ta̤kè akhanu, sǔtukǔ꤮ a ganǎ̤de lô̌khô.

¹³ Bǎ asî hî̌bǎhto akhanu, Khûya̤kû hî̌ kû̌, “Pṳ̌wè̤̌ sî, ganǎ̤de lô̌khô he shôbǐǐlṳ̌ bǎ sî,

¹⁴ Khûshǐmû Petarǔ shôbǐǐlṳ̌ htosa bǎ pwǎ pa kû̌ Cǒmara sahtò̌ dǔlè̌lṳ̌ bǎ a ta̤kè̌ǐnu dǒ Yǔdaphû̌ mè̤̌tô̤̌ tokhlǒ a ô̌ hǒ. Ma̤titèhî̌dě dǒ Yǔdaphû̌ mè̤̌tô̤̌ akla tokhlǒkhlǒnu, pô̤̌khô a gǔ htûhtò̌ bǎ Cǒmara ata ayanudě, a no yṳ̌nǐ̤nǎ̤nǐ̤ asî hǒ.

¹⁵ Hǒomî̌ a sô̌sô̌ kû̌ piwi̤pèshè tokhlǒ hî̌ nǎ nuhǒ, dě lî̤plò̌shǐkû hî̌nǎ kû̌,

¹⁶ ‘Dǒ nô̌kò pěnu he gǔ hè sô̌ pě. He gǔ hè ma̤wô̌ getîkhî sô̌ Khûdawi̤ ahǐ dǒ a lò̤tě̤pro̤kè nupě. He gǔ hè bô̌htò̌ tèplè̌ sô̌ a lò̤tě̤pro̤ pî̌kè nupě.

¹⁷ Pô̤̌khô lǒ̤bò kòyò hǎkhû̌phû̌ dǒ ashǔshawa̤ tokhlǒ pṳ̂̌꤮ tôpwa̤ kû̌ Yǔdaphû̌ mè̤̌tô̤̌ tokhlǒ dǒ he kaǎ hto asî kû̌ hemi̤ dǒ a gǔ htûhtò̌ bò he ta tokhlǒnu, a gǔ hèlò̤ tûû̌ dǒ heô̌ pě.

¹⁸ Běcǎ dǒ a dǐsî̌ganǎ̤ yî̤̌꤮ hto kòyò hǎkhû̌phû̌ kû̌ ta̤we̤ta̤kè nutôcǒ tôpwa̤nu, a hî̌nǎkètû̌ pô̤̌nu hǒ.’”

¹⁹ Pô̤̌nu akhû̌akhî, Khûya̤kû hî̌ pô̤̌ kû̌, “He ta̤kè̌shǐ ô̌ kû̌ Yǔdaphû̌ mè̤̌tô̤̌ dǒ a htû̌tiwǐ getîkhî tô dǒ Cǒmara a ô̌ tokhlǒnu pa tôbǎ ma̤dî̌dò asî tô̤̌.

²⁰ Pa tô wě̤ bǎ asî lî̤, dě pa tô hî̌ bǎ asî kû̌ shǎǎ dǒ kòyò lṳhtò̌ a kû̌ ta̤yô̤ tokhlǒnu, a mṳ̂̌plîtô̤̌ akhû̌akhî, pa tôbǎ noǎ asî tô̤̌, pa tôbǎ nocû̌sǔnṳ̌ asî kû̌ pwa̤mǒ̤pwa̤khû tô̤̌, htodě pa tôbǎ noǎ asî kû̌ ta̤mi̤ta̤mò̤̌ dǒ kòyò cesi agô̌bô nutokhlǒ tô̤̌, htodě sǐ titètè̌ bǎbǎnu, pa tôbǎ noǎ asî tô̤̌.

²¹ Ma̤titè̌hî̌dě kòyò dô̌lṳ̌htò̌ Khûmṳ̂shě a ta̤sû̌ta̤tòwò numî̌ ayî̤̌꤮ hǒ. Yǔdaphû̌ lṳmṳ̌dǔ pṳ̂̌꤮ plǎplǎ nu, kòyò dô̌htò̌ a dǒ ta̤cabahǐkû. Alě̤ayô̤̌ tokhlǒnu kòyò shôbǐǐlṳ̌ a dǒ wî̤̌pṳ̂̌꤮tîwî̤̌ akû,” Khûya̤kû hî̌ asî pô̤̌nu.

Kòyò wě̤cû̌ bǎ lî̤ dǒ Yǔdaphû̌ mè̤̌tô̤̌ dǒ a yṳ̌nǐ̤nǎ̤nǐ̤ Yeshǔ tokhlǒ a ô̌

²² Htodě pwa̤nophû̌ tokhlǒ kû̌ mǒ̤khumǒ̤pwǎ̤ dǒ a htû ikǒlǒkòdû̌ tokhlǒ kû̌ ta̤dòkû lǒ̤꤮ bònu, asî sǎphlǒtô dǒ a gǔ rû̌htò̌ kòyò dǒ asîkla tokhlǒ dě nocû̌ dô̌ asî kû̌mî̌ Khûpò̌lǔ kû̌ Khûbanabǎ dǒ Wî̤̌Atiò. Asî rû̌htò̌ kòyò dǒ ta̤dòkûphû̌ tokhlǒ bè̌dubè̌nǎ̤ ǐ jî̌ lû̌û sò̌ginǐ̤ dě ami̤ kû̌ Khûshǐla kû̌ Khûyǔda. Khûyǔda nî̌ kòyò kaǎ pô̤̌ ami̤ kû̌ Khûbasabǎ.

²³ Asî wě̤ lî̤nu dě a wě̤cû̌ bǎ ta̤dòkû dǒ a htû Yǔdaphû̌ mè̤̌tô̤̌ tokhlǒ, dě a sûcû̌ kû̌ kòyò nutokhlǒ. Dě asî wě̤ lô̌khô kû̌, Pa mî̌ sî pṳ̌wè̤̌ pwa̤nophû̌ tokhlǒ kû̌ ta̤dòkû mǒ̤khumǒ̤pwǎ̤ dǒ a htû ikǒlǒkòdû̌ nutokhlǒ sûcû̌ bǎ sî ta̤hî̌mô̤hî̌wô̌, Pa sûcû̌ bǎ lǒ̤bò papṳ̌pawè̤̌ amè̤̌kû̌ Yǔdaphû̌ mè̤̌tô̤̌nu dǒ a ô̌ dǒ Wî̤̌Atiò, Shurǐgǎ kû̌ Shilishiyagǎ nutokhlǒ akû.

²⁴ Pa ganǎ̤de kû̌ kòyò dǒ pakla tokhlǒ cû̌nṳ̌ ma̤dǐdò sî, htodě a hî̌ gû̌gè̌ bò sî, kòyò hî̌ pô̤̌nu bǎbǎkǎlè asî mî̌ kòyò dǒ a phî̌nṳ̌ ta̤sû̌ǐtòwòǐ dǒ paô̌ nutokhlǒ mè̤̌tô̤̌.

²⁵ Pô̤̌nu akhû̌akhî, pa ô̌htuhî̌bǎ tîkhîsô̌ lû̌û kû̌ ta̤we̤ta̤kè nudě pa sǎphlǒtô tîkhîsô̌ lû̌û kû̌ pa gǔ rû̌htò̌ kòyò dǒ pakla tokhlǒ dě pa gǔ nohè dǒ sî ô̌ pě. Asî gǔ cû̌wô̤̌wô̤̌ kû̌ pa khô Khûbanabǎ kû̌ Khûpò̌lǔ dǒ pa mô̤ǐ jî̌꤮ yǎ nu sò̌ginǐ̤ pě.

²⁶ Asî mî̌ kòyò dǒ a ǐlò̤bǔ asǎphlǒ dǒ Běcǎ Yeshǔ Khrǐ aya tokhlǒ.

²⁷ Pô̤̌nu akhû̌akhî pô̤̌khô Khûyǔda kû̌ Khûshǐla gǔ hè shôbǐǐlṳ̌ tě̤tě̤mè̤̌mè̤̌ bǎ pô̤̌ sî kû̌ pa wě̤cû̌ bǎ sî ta̤nutokhlǒ ayanudě, pa nohè asî pwǎ.

²⁸ Yôla Plò̌shǐ Běcǎ kû̌ lǒ̤bò pa nutokhlǒ sǎphlǒtô kè̌khî lû̌û kû̌ ta̤sû̌ta̤tòwò dǒ ashǔshawa̤ tokhlǒnu pa sǎyṳ nowǐ noò̌ sî tocǒ꤮ tô̤̌. Pa sǎyṳ pwǎ sî ta̤ dǒ a lǎ̤lṳ̂ ma̤ nutokhlǒ pwǎ.

²⁹ Ta̤ dǒ a lǎ̤lṳ̂ ma̤ tokhlǒ mî̌ kwè̌꤮ titèhî̌dě shǎǎ dǒ kòyò lṳhtò̌ kû̌ ta̤yô̤ta̤gî̌ tokhlǒnu ǎ lô̌khô tǎ̤mǎ̤, sǐ numî̌ ǎ yǎ anǐ̤ tô̤̌tô̤̌, ta̤phû̌ta̤wè̤ dǒ kòyò cesi agô̌bô numî̌ ǎ yǎ anǐ̤ tô̤̌tô̤̌, htodě cû̌sǔnṳ̌cû̌plěnṳ̌ lô̌khô tǎ̤ pwa̤mǒ̤pwa̤khû tǎ̤mǎ̤. Sî kè̌ khòbò̌ lô̌khô ta̤hǒo tokhlǒ numî̌, a gǔ wô̌ dǒ sîya pě. Ô̌shû̌ô̌mô̤ ô̌mô̤ô̌bǎ lô̌khô tûû̌ nî̌. Asî wě̤cû̌ lô̌khô pô̤̌nu.

³⁰ Kòyò nocû̌ pwa̤sû ta̤we̤ta̤kè nutokhlǒ dǒ Wî̤̌Atiò htodě asî cû̌ kaǎ plǒbò ta̤yṳ̌ǎnǎ̤ǎ ta̤tokhlǒ dě a ǐ asî lî̤nutôbǎ.

³¹ Lî̤ nutôbǎ nî̌, lî̤ dǒ a ǐkhû̌ǐǎ asî akhû̌akhî, bǎ asî dô̌ akhanu, a sǎlě̤sǎlò̤ lô̌khô.

³² Khûyǔda kû̌ Khûshǐla dǒ asî mî̌ piwi̤pèshè sò̌ginǐ̤nu, a shò̌gû̌kò ǐkhû̌ǐǎ yî̤gipi̤ kû̌ ta̤dòkûphû̌ bǎnu tokhlǒ.

³³ Asî ô̌ bǎnu tòshò̌phû̌ htodě kòyò dǒ a yṳ̌nǐ̤nǎ̤nǐ̤ ta̤tokhlǒ plûge mô̤wô̌bǎ asî dǒ kòyò nohè asî tokhlǒ a ô̌.

³⁴ (Bǎbǎkǎlè Khûshǐla bè̌lò̤ asǎphlǒ kû̌ a gǔ ô̌kè bǎnu.)

³⁵ Khûpò̌lǔ kû̌ Khûbanabǎ ô̌ sělě pô̤̌ bǎ Wî̤̌Atiò akûnu. Asî kû̌ kòyò dǒ ashǔshawa̤ tokhlǒ sû̌ǐtòwòǐ shôbǐǐlṳ̌ wô̤̌wô̤̌ lû̌ kû̌ Běcǎ alě̤ayô̤̌ bǎnu.

Khûpò̌lǔ cû̌khô̌kè kû̌ Khûbanabǎ

³⁶ Lṳlṳmṳ̌ni̤lṳmṳ̌sa yî̤ tîkî̌ hǒdě, Khûpò̌lǔ hî̌ Khûbanabǎ kû̌, “Pa cû̌ô̌lèkû̌ sô̌ ta̤dòkûphû̌ tokhlǒ dǒ pa shôbǐǐlṳ̌ hto asî kû̌ Běcǎ Cǒmara alě̤ayô̤̌ nutokhlǒ pṳ̂̌꤮ tîwî̤̌ tǎ, asî ata̤yṳ̌ta̤nǎ̤ Cǒmara numî̌ a ma̤bò kwè̌꤮ hî̌tè nu pa ge kè̌ wô̤̌wô̤̌ sô̌ lû̌ tǎ꤮.”

³⁷ Khûbanabǎ sǎyṳ kaǎ cû̌nṳ̌ Khûyṳ̂ha dǒ kòyò kaǎ lû̌û kû̌ Khûmakǔ nu tôpwa̤.

³⁸ Khûpò̌lǔ sǎyṳ kaǎcû̌nṳ̌ yǎ tô̤̌, ma̤titè̌hî̌dě a cû̌ma̤ hto kû̌ asî hǒ bǎbǎkǎlè a ma̤phlǔma̤hto ta̤ma̤ tô̤̌, htokhôtô̤̌ a bè̌kè asî bǎ Phaphǔliyagǎ nudě a gekè asîlǎ̤ akhû̌akhî, a tô kaǎnṳ̌ sô̌ pe lû̌û tô̤̌ a kè̌shǐ pô̤̌nu.

³⁹ Khûpò̌lǔ kû̌ Khûbanabǎ htè̌ kudǔdǔ kè̌khî lû̌û kû̌ Khûmakǔ akhû̌akhî, asî cû̌khô̌ tephekè lû̌û. Khûbanabǎ kaǎnṳ̌ Khûmakǔ dě asî cû̌dò̌nṳ̌ sǒkhlidû̌ dě hǎhtò̌cû̌ lô̌khô dǒ Kuprǔklǔ.

⁴⁰ Khûpò̌lǔ dě a kaǎnṳ̌ Khûshǐla. Dě ta̤dòkûphû̌ tokhlǒnu, a ǐ lò̤kè Khûpò̌lǔ kû̌ Khûshǐla dǒ Cǒmara abwǐsîrî a ta̤kè̌khwè̌ akû dě asî nusò̌ginǐ̤ hǎhtò̌cû̌kè bǎnu.

⁴¹ Dě asî nusò̌ginǐ̤ cû̌nṳ̌ ô̌lè dǒ Shurǐgǎ kû̌ Shilishiyagǎ dě ǐshû̌htò̌ sô̌ ta̤dòkû bǎnu tokhlǒ.