Pwa̤nophû̌ 10 - Kawyaw New Testament

Khûpetarǔ kû̌ Phakò̌ne̤lǐ

¹ Bǎ Wî̤̌kèsharǐ akûnu kli ikǒdû̌ dǒ ami̤ kû̌ Phakò̌ne̤lǐ ô̌tôpwa̤, a mî̌ Rṳ̂̌me̤ kli tôya̤ a ikǒlǒkò dǒ kòyò kaǎ kû̌ Itali kli.

² A mî̌ Yǔdaphû̌ mè̤̌tô̤̌ dě a mî̌ kòyò dǒ a mô̤nṳ̌ Cǒmara tôpwa̤ htokhôtô̤̌ a kû̌ lǒ̤bò a hǐphû̌phòphû̌ tokhlǒnu a bè̌dubè̌nǎ̤ mî̌ca Cǒmara. A ma̤jè̌ dû̌wî̤ Yǔdaphû̌ dǒ a shuphǔshèwè̤ tokhlǒ dě a kwicaba Cǒmara pṳ̂̌꤮ taplǎ.

³ Tini̤kha bǎ lṳ̌mṳ̌lò̤ sunarî glè̌ bǎ akhanu, a kè̌shǐnǎ lîtîklǐ Cǒmara a mǒkhû̌ tanaphû̌ tôpwa̤ hènṳ̌ ô̌lṳ̌ sumṳ̌ dǒ a hǐdǒkû dě a kaǎ lû̌û kû̌, “Phakò̌ne̤lǐ!” pô̤̌nu.

⁴ A kè̌꤮ cû̌ mǒkhû̌ tanaphû̌ dě a ǐsha jî̌ lû̌û dě “Běcǎ, na sǎyṳ hî̌ he mî̌titè?” A gwè̌ mǒkhû̌ tanaphû̌ pô̤̌nu. Dě mǒkhû̌ tanaphû̌ hî̌shěshu a kû̌, “Cǒmara sǎphlǒ ô̌ nahǒ, ma̤titè̌hî̌dě na ta̤kwicaba tokhlǒ kû̌ na ta̤ma̤jè̌ kòyò pwa̤shèwè̤phû̌ tokhlǒnu, a htò̌tǒ̤ dǒ Cǒmara a ô̌ sô̌sô̌kû̌ na lṳhtò̌ a nuhǒ.

⁵ Khònò̤̌ nocû̌ kaǎ hèmò̌ Khûshǐmṳ̂ Petarǔ kû̌ kòyò dǒ Wî̤̌yû̌pe akû nutokhlǒ.

⁶ A cû̌ô̌ dǒ Khûshǐmṳ̂ dǒ pwa̤ma̤ta̤bě nutôpwa̤ ahǐ dǒ a ô̌ bǎ shidû̌shite̤we̤htu nutôpwa̤.”

^7-8 Mǒkhû̌tanaphû̌ hǎhtò̌cû̌kè htodě, Phakò̌ne̤lǐ kaǎ jû̌ dǒ a hǐdǒkû sò̌ginǐ̤ kû̌ kliphû̌ dǒ a bè̌dubè̌nǎ̤ Cǒmara dě a lǎ̤yṳ̌ǎ ǐ lû̌û nutôpwa̤. Dě a shôbǐǐlṳ̌ bǎ bò asî kû̌ ta̤ma̤htûhtò̌ hto anǎ̤ kû̌ a nutokhlǒ, htodě a nocû̌ asî dǒ Wî̤̌yû̌pe.

⁹ Dǒ nô̌kòtini̤ bǎ asî cû̌tǒ̤phǔ kû̌ Wî̤̌yû̌pe akhanu, Khûpetarǔ htò̌ dǒ hǐgu tadǎkhû̌ tômè dě a htò̌ kwicaba. Bǎnu akha mî̌ atô kû̌ lṳmṳ̌ glè̌ htǔhǒ.

¹⁰ A sǎǎsǎô dě kòyò tîwî̌tòwò bǎ lû̌û shǎǎ akha a kè̌shǐnǎ ta̤tocǒ.

¹¹ A kè̌shǐ mǒkhû̌ lûmôhtò̌ dě ta̤tocǒ dǒ asô̌sô̌kû̌ hugò̌ pṳdû̌ dǒ aně̤ ô̌ lǐ̤khô tôpṳ dě kòyò jèlò̤tě̤ bǎ anu.

¹² Lǒ̤bò ta̤phû̌ta̤wè̤ dǒ a khò̌lôpô̤̌ô̌ lǐ̤khô nutokhlǒ kû̌ lǒ̤bò ta̤phû̌ta̤wè̤ dǒ a lô̤̌cû̌ nutokhlǒ kû̌ lǒ̤bò htû̌phû̌yṳ̌phû̌ dǒ a wi̤ dǒ mǒlǎ̤ tokhlǒnu a ô̌ bò dǒ hugò̌dû̌ nutôpṳ akû.

¹³ Alě̤pwe̤htò̌ dě a hî̌ lû̌û kû̌, “Khûpetarǔ ihtǒ ma̤siǎkèmò̌ ta̤nu tokhlǒ.”

¹⁴ Bǎbǎkǎlè Khûpetarǔ hî̌shěshu kû̌, “Běcǎ he ǎ nô̌ tîkî̌꤮ tô̤̌, ta̤ dǒ kòyò bè̌ plò̌shî̌ yǎtô̤̌ nutokhlǒ bǎbǎ kû̌mî̌ a mṳ̂̌plî tô̤̌ nutokhlǒ bǎbǎ, he ǎ nô̌ a tôkhò̌꤮ tô̤̌.”

¹⁵ Dě alě̤pwe̤htò̌ pô̤̌ kû̌, “Ta̤ dǒ Cǒmara kè̌hî̌ kû̌ a mṳ̂̌plî pwǎ, dě ǎ yǎ nî̌ anǐ̤ pwǎ a hî̌ tokhlǒnu, hî̌ tǎ̤ a kû̌ a phû̌mò̤̌ tǎ̤mǎ̤.”

¹⁶ Hugò̌dû̌ dǒ ta̤phû̌ta̤wè̤ ô̌ dǒ lû̌kû tôpṳnu nî̌, jèlò̤lṳ̌ bǎ lû̌û suplǎ htodě kòyò johtò̌ hǎmǎkè sô̌ a dǒ mǒkhû̌.

¹⁷ Bǎ Khûpetarǔ gènè̤kè̌kè̌ Cǒmara a ta̤dǔlè̌lṳ̌ a ta̤kè̌shǐnǎ hǒo yô̤̌mûyô̤̌sǎ akhanu, kòyò dǒ Phakò̌ne̤lǐ nohè lû̌û tokhlǒnu, a hè gwè̌ kè̌bǎ Khûshǐmṳ̂ ahǐ dě a hèihtǒô̌ bǎ ahǐlô̤mô̤̌ bǎ we̤takha kòshǐnu.

¹⁸ Dě asî gwè̌lǎ kû̌, “Kòyò mi̤ kû̌ Khshǐmṳ̂ Petarǔnu tôpwa̤ nî̌ a ô̌ bǒo ya?”

¹⁹ Bǎ Khûpetarǔ gènè̤ǐpe hǒo akhanu, Yôla Plò̌shǐ Běcǎ hî̌ lû̌û kû̌, “Khshǐmṳ̂! Kòyò hèkè̌lǎ na sò̌su.

²⁰ Pô̤̌nu akhû̌akhî, hǎtě̤mò̌ dǒ hǐlǎ̤nu, ma̤ pò̤̌yǎ̤ tǎ̤mǎ̤, tûlû̌ cû̌ kû̌ asî nutokhlǒ akònu, ma̤titè̌hî̌dě he nohè asî dǒ naô̌ pwǎ.”

²¹ Pô̤̌nudě Khûpetarǔ hǎtě̤ dǒ hǐlǎ̤ dě a hî̌ asî kû̌, “He mî̌ kòyò dǒ sî hè kè̌lǎ a nutôpwa̤ hǒ. Sî hè kè̌lǎ he ma̤titè?”

²² Dě asî hî̌shěshu kû̌, “Kli ikǒdû̌ Phakò̌ne̤lǐ nohè pa. A mî̌ kòyòcǒkòyòtè̤ tôpwa̤, htokhôtô̤̌ kòyò dǒ a bè̌dubè̌nǎ̤ Cǒmara tôpwa̤. Yǔdaphû̌ tokhlǒ bè̌dubè̌nǎ̤ bò yǎ pṳ̂̌꤮ tôpwa̤, pô̤̌khô a gǔ ganǎ̤de pû na ta̤hî̌bǎ tokhlǒnu dě Cǒmara a mǒkhû̌ tanaphû̌ hè hî̌ yǎ kû̌ bǎ cû̌ kaǎ na dǒ ahǐ.”

²³ Dě Khûpetarǔ kaǎ môô̌ asî. Htodě nô̌kòtôwô̤nu, Khûpetarǔ tîwî̌tòwò anǎ̤ dě a gû̌ cû̌ kû̌ asî. Pwa̤yṳ̌ǎta̤phû̌ dǒ a ô̌ dǒ Wî̤̌yû̌pe akû tokhlǒ gû̌ cû̌ kû̌ lû̌û.

²⁴ Dě dǒ nô̌kò tôni̤nu asî cû̌tǒ̤ dǒ Wî̤̌kèsharǐ bǎ Phakò̌ne̤lǐ lǎ̤kaǎplǒ apṳ̌wè̤̌ sanǎ̤ tokhlǒ kû̌ asû̌akhô tokhlǒ agûlǎ̤, dě asî bǎnu tokhlǒ ô̌pǒ̤kè̌shuǐ lô̌khô Khûpetarǔ.

²⁵ Bǎ Khûpetarǔ glè̌ nṳ̌ dǒ hǐdǒkû akhanu, Phakò̌ne̤lǐ kaǎmô̤shǔ lû̌û dě a dô̌gînî̤ û̌lò̤ dǒ a khò̌lô̤pô̤̌ kòshǐ dě a cabahtò̌ lû̌û.

²⁶ Bǎbǎkǎlè Khûpetarǔ no ihtǒ tîkhî a dě a hî̌ lû̌û kû̌, “Ihtǒmò̌ he mî̌ kòyò hǎkhû̌phû̌ sô̌sô̌kû̌ na pwǎ.”

²⁷ Bǎ Khûpetarǔ kû̌ Phakò̌ne̤lǐ hî̌bǎ kû̌ genṳ̌ hî̌bǎ kû̌ genṳ̌ dǒ hǐdǒkû akhanu, a kè̌shǐ kòyò hèô̌prṳ̂ô̌phǎ, ô̌plǒnǎ lô̌khô bǎnu.

²⁸ Khûpetarǔ hî̌ asî kû̌, “Sî sî̌ganǎ̤ tûû̌hǒ, pa Yǔdaphû̌ a ta̤sû̌ta̤tòwò ô̌ kû̌ Yǔdaphû̌ tôpwa̤ glè̌ cû̌bǒsû̌khǎkhô kû̌ Yǔdaphû̌ mè̤̌tô̤̌ tokhlǒ bǎbǎ, a glè̌ cû̌ô̌lè gû̌ pwǎ asî bǎbǎ, anǐ̤ tô̤̌. Bǎbǎkǎlè Cǒmara dǔlè̌lṳ̌hto he kû̌ Yǔdaphû̌ mè̤̌tô̤̌ tokhlǒ numî̌ a mṳ̂̌plî gû̌ kòyò tô̤̌, mè̤̌tô̤̌dě aplò̌shǐ gû̌ kòyò tô̤̌ hî̌ tǎ̤ lô̌khô tǎ̤mǎ̤, pa tôbǎ bǒsû̌ bò asî, Cǒmara dǔlè̌lṳ̌ he pô̤̌nu.

²⁹ Pô̤̌nu akhû̌akhî, bǎ na kaǎhè he akhanu, he hî̌shěshu pe tocǒ꤮ tô̤̌, he hè sělě tôplǎnô̤̌ pwǎ. Pô̤̌nudě khònò̤̌ he sǎyṳ gwè̌ na kû̌, na kaǎhè he ma̤titè?” Nṳpwǎ.

³⁰ Dě Phakò̌ne̤lǐ hî̌ bǎ lû̌û kû̌, “Bǎ a tûlû̌kè susa lṳ̌mṳ̌lò̤ sunarî asô̌sô̌kû̌ khònò̤̌khanu, he kwicaba ta̤. Bǎnuakha, kòyò kûsô̌htò̌ jejû lîrakha tôpwa̤ hè ihtǒ sumṳ̌htò̌ dǒ he lô̤mô̤̌.

³¹ Dě a hî̌ he kû̌, ‘Phakò̌ne̤lǐ Cǒmara ganǎ̤dehto na ta̤kwicaba hǒ. A gènè̤htò̌bǎ tǒ̤ naǐnayṳ̂̌ǎ bǎ kòyò pwa̤shèwè̤phû̌ nutokhlǒ hǒ.

³² Nocû̌mò̌ kòyò tokhlǒ dě nocû̌kaǎ asî kû̌ kòyò tôpwa̤ dǒ ami̤ kû̌ Khûshǐmṳ̂ Petarǔ dǒ a ô̌ dǒ Wî̤̌yû̌pe nutôpwa̤. Khònò̤̌dě a cû̌ ô̌ bǎ ami̤ Khûshǐmṳ̂ ahǐ hǒ. Khûshǐmṳ̂ numî̌ ahǐ ô̌ bǎ shidû̌shite̤we̤htu, a mî̌ pwa̤ma̤ta̤bě tôpwa̤.’

³³ Pô̤̌nudě he nocû̌kaǎ kòyò kû̌ na taplǎnô̤̌, na hètǒ̤ kû̌ pa dě awô̌ le. Pô̤̌khô pa gǔ ganǎ̤de bò Cǒmara hî̌bǎlò̤ na nutokhlǒ dě khònò̤̌ pa hè bò dǒ Cǒmara a lô̤mô̤̌hǒ.”

Khûpetarǔ a ta̤shôbǐǐlṳ̌

³⁴ Khûpetarǔ sahtò̌ hî̌bǎ kû̌, “Khònò̤̌dě he sî̌ganǎ̤ kû̌ Cǒmara kè̌dû̌kè̌pî̌tî̌ kòyò tôpwǎ̤꤮ tô̤̌ numî̌ a mè̤̌mî̌ca.

³⁵ Kòyò khlilèphû̌ titètè̌꤮ bǎbǎ, kè̌ a bè̌dubè̌nǎ̤ Cǒmara dě a kè̌ ma̤tôma̤bǎ ta̤ numî̌ Cǒmara kaǎmô̤shǔ asî pwǎ.

³⁶ Sî sî̌ganǎ̤ hto tûû̌ kû̌ ta̤we̤ta̤kè dǒ Cǒmara nohè bǎ Yeshǔ dǒ Isôrěla akhlialè tokhlǒ aya hǒ. Dě a hè shôbǐǐlṳ̌ bǎ asî kû̌ ta̤sǎlě̤we̤kè nuhǒ. Dǒ Yeshǔ Khrǐ dǒ a htû kòyò pṳ̂̌꤮ tôpwa̤ a Běcǎ hǒtôpwa̤ akhû̌akhî, dě pa nǐ̤bǎhto ta̤pè̤̌ta̤dû hǒ.

³⁷ Dǒ Yǔdagǎ tôgǎ akûnu, Běcǎ Yeshǔ ma̤hto kwè̌ mî̌titè numî̌ sî sî̌ganǎ̤ tûû̌ hǒ. Bǎ Khûyṳ̂ha shôbǐǐlṳ̌ hto kòyò kû̌ jushi awe̤akè akhanu, Yeshǔ sahtò̌ ma̤ta̤ dǒ Galilè̤̌gǎ kû.

³⁸ Htodě Cǒmara rû̌htò̌ Wî̤̌na̤sôrè̤̌phû̌ Yeshǔ dě a ǐ lû̌û Yôla Plò̌shǐ Běcǎ kû̌ a ta̤pô̤ta̤phǎ hî̌tènu, sî sî̌ganǎ̤ hto tûû̌ hǒ. Yeshǔ cû̌lè dǒ gûlǎ̤ pṳ̂̌꤮ tûkû dě cû̌ ma̤bwǐma̤sîrî bǎ kòyò, ma̤hǎmǎkè kòyò ô̌ dǒ hǎkhû̌tana ma̤jî̌ma̤jû̌ lû̌û tokhlǒ, ma̤titè̌hî̌dě Cǒmara ô̌cu kû̌ a akhû̌akhî a ma̤ta̤ pô̤̌nu hǒ.

³⁹ “Pa mî̌ kòyò tokhlǒ dǒ a khòlṳ̌ bǎ lǒ̤꤮bò kòyò kû̌ lǒ̤꤮bò Yeshǔ ma̤hto ta̤ dǒ Yǔdaphû̌ sî ô̌ǐ gǎ tokhlǒ, kû̌ Wî̤̌yarǔshôle akû nutokhlǒ awe̤akè pwǎ. Htodě asî po̤sihtò̌kè Yeshǔ dǒ nò̌dò̌htǔlô̤.

⁴⁰ Bǎbǎkǎlè bǎ susa tôsanu, Cǒmara ma̤htûpwa̤ ihtǒ gesô̌ lû̌û dǒ ta̤si dě a dǐô̌lṳ̌htò̌ sô̌ lû̌û.

⁴¹ A ô̌lṳ̌htò̌ bǎ kòyò pṳ̂̌꤮ tôpwa̤ mè̤̌tô̤̌. A ô̌lṳ̌htò̌ bǎ tǒ̤pwǎ Cǒmara rû̌htò̌ pa dǒ pa gǔ htûhtò̌ pwa̤khòlṳ̌ tokhlǒ nupwǎ. A si ihtǒ getîkhî hto akhanu, pa tokhlǒnu, pa ǎwô̤̌wô̤̌ kû̌ hto yǎ hǒ.

⁴² Dě a mǎnǎ pô̤̌ pa kû̌ pa gǔ cû̌ shôbǐǐlṳ̌ bǎ kòyò kû̌ ta̤sǎlě̤we̤kè, htodě pa bǎ cû̌ khòlṳ̌ bǎ kòyò kû̌ a mî̌ kòyò tôpwa̤ dǒ Cǒmara rû̌htò̌ lû̌û dě a mî̌ a gǔ htû bǎ kòyò htûpwa̤ tokhlǒ kû̌ kòyòsi tokhlǒ a pwa̤cî̌htò̌ta̤ pě.

⁴³ Piwi̤pèshè pṳ̂̌꤮ tôpwa̤ shôbǐǐlṳ̌ nǎ hto awe̤akè dě asî hî̌ kû̌, ‘Lǒ̤꤮ bò kòyò dǒ a yṳ̌nǐ̤nǎ̤nǐ̤ lû̌û tokhlǒnu Cǒmara gǔ plûkè tṳtṳ̌ asî ata̤sǔ kû̌ ami̤ akhû̌khî pě,’” Khûpetarǔ hî̌ bǎ asî pô̤̌nu.

Yǔdaphû̌ mè̤̌tô̤̌ tokhlǒ nǐ̤bǎ Yôla Plò̌shǐ Běcǎ

⁴⁴ Bǎ Khûpetarǔ hî̌bǎ pepwǎ akhanu, Yôla Plò̌shǐ Běcǎ hèlò̤ dǒ kòyò dǒ a ganǎ̤de ta̤we̤ta̤kè hǒtokhlǒ alô̤ pṳ̂̌꤮ tôpwa̤.

⁴⁵ Cǒmara cû̌ ǐlò̤ tǒ̤ Yôla Plò̌shǐ Běcǎ dǒ Yǔdaphû̌ mè̤̌tô̤̌ tokhlǒ alô̤ akhû̌akhî, Yǔdaphû̌ dǒ a yṳ̌nǐ̤nǎ̤nǐ̤ ta̤ dě a ô̌ lô̌khô dǒ Wî̤̌yû̌pe akû dě a hè wô̤̌wô̤̌ kû̌ Khûpetarǔ tokhlǒnu a ǒò̌ kiti̤kaa mî̌caca.

⁴⁶ Ma̤titèhî̌dě asî ganǎ̤de tûû̌ kòyò hǒtokhlǒ hî̌bǎ kû̌ yô̤̌sǎ cô̌klî̌ tokhlǒ akhû̌akhî, asî htû̌sò̌htò̌ lô̌khô Cǒmara. Htodě Khûpetarǔ hî̌ kû̌,

⁴⁷ “Kòyò hǒtokhlǒ nǐ̤bǎ Yôla Plò̌shǐ Běcǎ pô̤̌ pa nǐ̤bǎ nuhǒ. Ma̤pô̤̌nudě asî gǔ ju anǎ̤ kû̌ shi ayanu mò̌pè tôpwa̤ gǔ ma̤tě̤tṳ jò asî ya.”

⁴⁸ Pô̤̌nu akhû̌akhî Khûpetarǔ hî̌lò̤ ayô̤̌ kû̌ asî gǔ ju anǎ̤ kû̌ shi dǒ Yeshǔ ami̤ akû. Dě asî kwisǎyṳ Khûpetarǔ kû̌ glè̌ ô̌pô̤̌ kû̌ asî bǎnu ginǐ̤suni̤.